Gen 9
9
God ina vivaghina makamakiina Nowa yavata.
1God, Nowa natunatuna yavata ivi biibiinisi ma ivonesi bo, “Kovi tuwa kirakai da kona peyari da rakarakami dobu ina makii yavui. 2Ma ghamoghamo dipiyai, kiu kiidamowai, dowatetetesi ma iyana yegiyai na kudubisi ina yabuyabumanemi ma ami rewapana gaburinai ina makamakai. 3Mara wadobunai kii amame ma vavai dowa kamonai averemi da kami vavai. Ma karako na ghamoghamo, kiu ma iyana bade avereveremi da kami siya.
4Ma yawasa na tara kamonai, tuna kubiine avonavonatanimi da siya ere tarana ke kona kani. 5Ma bade meni wawayina ina berai da kwinana tarana ina sororo na ani tupavirei da avi kubiine iberai. Ghamoghamo wawaya ina kiivunui na kana kovogha na rabobo. Ma wawaya kwinana ina kiivunui na bade kana kovogha na rabobo.
6‘Wawaya ayamonisi da taku mani maghimaghighiku.
Tuna kubiine meni wawayina kwinana ina kiivunui
na tuna bade tarana ina sororo,
wawaya kana kovogha ina verei da ini raboboi.’
7Ma vaghina, tami na kovi tuwa kirakai da kona peyari da rakarakami dobu ina makii yavui.”
8Nani murinai God, Nowa ma natunatuna ivonesi bo, 9“Kovi yana, wekarakava Vivaghina Makamakiina tami kurimi atereterei. Tami ma tupurereghimi 10ma bera yavu kudubina yawayawana, ghamoghamo manamisi, ghamoghamo dipa ma kiu waka kamonai ikiibau na 11peyarimi yavata ma Vivaghina Makamakiina aberaberai. Ke meyani kutukutuva ana vonatawe meyei da bera yavu yawayawana ina rabobo. Ke meyani okowa ina rakata da dobu kudubina ina resotawei.”
12Ma God ivonesi bo, “Ita Vivaghina Makamakii Nonowina na tami ma tupurereghimi ma bera yavu yawayawana, kimta ma kimta kurimi aberaberai na kana matakira na weni, 13aku vurere kwavuwai atereterei. Tuna ini matakira da Vivaghina Makamakiina gwabitiyai emakamakai. 14Kwavu ana vonatawei ma maranai vurere kwavu kamonai ina nekiibau ana kitai na 15ita Vivaghina Makamakiina ana notai da ke meyani kutukutuva ana vonatawe meyei da bera yawayawana kudubina ina kiipupuna meyei. 16Meni marasiyai vurere ina nenekiibau ana kitakitai na ita Vivaghina Makamakiina taku ma bera yavu yawayawana taberai na ana notai.”
17Ma vaghina God, Nowa kurina ivona bo, “Ita Vivaghina Makamakiina kana matakira na vurere.”
Nowa ma natunatuna.
18Nowa natunatuna waka ikiibutawei na kii vava Sem, Ham ma Jepeta. (Ma Ham natuna kana vava Keinan.) 19Weni tomotomowisi ivi aroba tupurereghisi na tota, wawaya kudubita karako dobuwai.
20Nowa tuna wayowa wawayina ma ina vao kamonai na greipi ivoni. Muriyai greipi amesi iyuna da wain iyamoni. 21Mara sago wain iumai da ineghanegha ma yobe kamonai iyuna kava ikenakena. 22Ma natuna Ham irugenara da ina mamai iyuna kava ikenakena ikitai na inae da Sem ma Jepeta ivonesi. 23Ma ivi ruwa ivi nimaya na gara iviini da kuputuwasiyai itawanepai, visovo gubana. Ivi murititina ku yobe irui da i mamai ikiisovoi. Matasi ku boga ikitakita da i mamai iyuna kava ke ita kitai.
24Muriyai Nowa gayamina ivi kiimaniniyei na akova iviiya da natuna murimurina Ham ibera beroi, ina mamai ke ita vopepetei. 25Tuna kubiine Nowa ivona bo,
“Keinan, aimimagim!
Karako tam na varevaresim i wayowa kana kavakavara.”
26Ma Sem da Jepeta ivi biibiinisi ma ivona bo,
“Bada avokavakavari, tuna Sem ina God!
Karako Sem ina wayowa kana kavakavara na Keinan.
27Ma ainowi God kurina da Jepeta ina rakaraka ina peyari da dobu ghamana ini rapenei,
ma Sem ina rakaraka yavata ina makii patapata.
Ma bade Jepeta ina wayowa kana kavakavara na Keinan.”
28Ma vaghina, kutukutuva murinai Nowa madegha 350 ku tepana imakai. 29Kana madegha 950 ma irabobo.
Iliyochaguliwa sasa
Gen 9: pwgB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009, Wycliffe Bible Translators, Inc. All rights reserved.