THRÜNTAN 3
3
Mihtsürü Rükaki ching Ayokhi
1Kheakü Atungpuh Thrünpuhnü athrünkhi shiwüh alala kheaknü phuruto ju rük amütsü lakheah. Tüsho phurutonü alibe ki keokhi, “Atsütsü shahwün ching lakhi sangdung küpü kheaknü she mütsühpü Thrünpuhnü thadü de?”
2Tüsho alibenü phuruto ki alo, “Isanü shahwün ching lakhi sangdungbo kheaknü sangaso tsühpü kuklah; 3tüshe shahwün phulung ching lakhi sangdung kheaknü aso dütsüh, yungsho ju düqiu, jude thsüsho nüsa ashebah de Thrünpuhnü thado.”
4Phurutonü alibe ki tha, “Nüsa atsütsünü müshe. 5Tümütüsho küpü nimung nüsanü hoju tsühbanü nüsa mük khimshuhbah tüsho nüsa ju Thrünpuh nangde atsü tüsho amütsü mükheahbah de Thrünpuhnü mükheahlah.”
6Junangde alibenü sangaso ju atsühpü atsü, mük ki reangkeambe khülang tüsho lümlung ngüpü sangdung ngü, alibenü ju sangaso lu tüsho tsüh. Alibenü ayamkhünbuh kilim she jih tüsho apinü tsüh. 7Judüki ane mük khimshuh tüsho bünkeang ah de mükheah; jumonü anenü khubaso yü thürerubah yihdo.
8Arelim anenü Atungpuh Thrünpuh shahwün ching tsahkhi jingkhün sobah api kheaknü shahwün ching sangdung bolung jikabah. 9Tüshe Atungpuh Thrünpuhnü Adam ki jide tha, “Nü küching la?”
10Apinü alo, “Shahwün ching nü düsheak sobah I bünkeang lakhinü trede jiklah.”
11Tüsho apinü tha, “Nü bünkeang ah de shepünü nü ki thakhea? Inü nü ki dütsüh de athakhi sangaso nünü atsühkhea shi?”
12Judüki mihtsürünü alo, “Nünü I lung lashihkhi alibenü sangdung kheaknü sangaso I kilim jih tüsho inü tsüh.”
13 Atungpuh Thrünpuhnü alibe ki tha, “Tümü thsükhi nünü ha rhimokhea?”
Alibenü alo, “Phurutonü I mülapyukjih, tüsho inü tsüh.”
Thrünpuhnü Mahkhapkhi
14Judüki Atungpuh Thrünpuhnü phuruto ki tha, “Nünü ha rhimokhinü akam-shiwüh tüsho mütüm shiwüh alala kheaknü alü nü muthrumünean thsang; nü buknü achinbah tüsho nü rhangdung amuyung asungthulung tsühbah. 15Inü alibe le nüke dükeak tüsho nü müjih le alibe müjih dükeak lungkhangachih zojihbah; apinü nü ku thrümrüpbah tüsho nünü api lahzhi kheak mukiubah.”
16Apinü alibe ki tha, “Inü nü khungarü hankhi thsünü alü kamshihbah; nü thsünüsahde khungarü zübebah; jude thsüthsü she nü niubuh mürühpü nü kheak labah, tüshe apinü nü kurungkheak yakzan shuhbah.”
17Apinü Adam ki tha, “Tümütüsho nünü nü niube yu anide inü nü ki dütsüh de thiyukhüm jihkhi sangdung chingnü tsühdo: nü dünkheaknü alo muthrumüneana lah; nü rhangdung amuyung khisahbah lang atsühbah. 18Ayangbo tüsho thrümthrukbe nü thsungkheaknü akhiukshihbah, tüsho mükeak ching yo wokephüyak tsühbah. 19Nü alo mükamloyi khiungde nü kingkang chingnü shoke shude rhimobah lang tsühyungbe ngübah, tümüde nü alonü akamkheah; nü a alo ah tüsho nü alo kamlobah.”
20Tüsho Adamnü aniube ki Eve de ji, tümütüsho anihbe mihtsürü alala abe ah. 21Atungpuh Thrünpuhnü Adam le aniube thsungkheak shihküpnü khimmih thsüa phuyujih.
Adam le Eve Shahwün chingnü Ayankhitkhi
22Judüki Atungpuh Thrünpuhnü tha, “Kheahang, mihtsürü ju atsü tüsho amütsü mükheahpü isa nangde kamdo; api khah chungde rhangdung sangdung chingnü rhoa tsühbah lünnü api rhangdung lapü mümülübeah.” 23Jumonü Atungpuh Thrünpuhnü küpü lonü api thrünkheanü ju wochakshihpü Eden shahwün chingnü yankhitabah. 24Junangde apinü mihtsürü ju yankhitabah; tüsho apinü rhangdung limro aheangshihpü Eden shahwün aniakhiuklim cherubim tüsho azhingzhing nukshang khülang khülim khülim phürapde zo.
Iliyochaguliwa sasa
THRÜNTAN 3: YIMCBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.