MATHI 12
12
Sabath Mlei thu mdo Khewl
1Mpha ava thu Jisu ngi kehu bil thu chet da; msiikhu rekka mpoi in mtham thungta, kehu chavui pjii lamda kchaa pṭhun lamda. 2Pdainu Pharisi rekki ava mdee in thungta, Mhin the lamda, “Asuw, asiikhu rekka, sabath nitti Nowlam kurthuwk kma nong mtlot inna.” 3Ungbi Mma ngi mhin inni theda, “Devid leh mmiiṭhi rekki mpoi in mtham thu mdo tlot in ava naanva pa maan timo: 4mma ngi tak heppi Isowr Inn thu luwt da,ungu mdo down dok thenpen ava mchaak, mma ruk ungta mmiiṭhi rek daat ruk va mdo chaak in ava Nowlam dorot pme, pdainu thiimpu rek daat do chaak ra ava pme mo? 5Mata thiimpu rekki sabath nitti luwbuk Inn thu sabath mdo pkui in ava karmak tdit ki Nowlam ava naanni tak heppi apat in? 6Neiji akthe inna, luwbuk Inn hinva klin bet do khat hava thung ngi ka am daatta. 7Ungta hava tak mdo the na tdit naanni adee inta, ‘Neiji wonsat ava kdo ngei chaak ungu tlaai down ava pme,’ kparmak kma mii ava naanni mraal ado piik in ro nime. 8Mleija Mii Chapa ava sabath ki Mukpu ruk kurthuwk.”
Khut Khat Kyeng Miilai Khat
9Ungta Mma ngi ava thungki vangda, ungu mmaan synagog thung ngi lut da. 10Ungta asuwn, mkhut khat kyeng miilai khat ava thung ngi am daat da. Ungu mmaanni Mhin khewl lamda, “Sabath nitti kapdam ava Nowlam do rot mo?” kdingi mmaanni mraal mdo piik nraan the lamda. 11Ungbi Mma ngi mhin inni theda, “Naan thung ki ku mii khatti mJao mdo thloi khat ava sabath nitti khur thung ngi mtlaak dokku, mkhutti kjowng da ṭen arthuw nime mo? 12Ava leiji Jao khat hinnu miilai khatti mman klu kurthuwk.” 13Ava dilli Mma ngi miilai ava hin theda, “Akhut arjii.” Ungta mma ngi mkhut arjii da, ungbi mii murson rek khut heppi mkheng ngi dam chda. 14Pdainu Pharisi rekki Mma mdo ae kre nraan karseel lop thung ngi vang thuwk lamda.
Isowr do Kchol Sra Owr
15Jisu ngi hava mdo dee leiji ava thungki kurlou da sun da. Ungta mii knempokki mdil ṭoi lamda, ungu mkheng inni pdam pik lamda. 16Ungta Mma ava mii ngi mdo dee ma nra mhin inni pau pṭum da. 17Hava ava khulpu Isaijah ngi mdo the dok ava mkurkhum na kurthuwk:
18“Asuwn, Nei kdo kchol ksra owr,
Kraothla ngi plung mdo pngam psuk Nei ksra owr,
Mma leen Neiji kapthla thii nik di,
ungu Mma ngi ktlok chati rek hin mkindit kparyaam ra.
19Mma ngi karteen ṭhii mdit mata ko owng tlo nime,
mdit mata lamṭhuwm rek thu ku mii khat lee ngi mukrowl aryaa nime;
20kindit ava ngi mapchaan du khim khai;
kbeng dingthum pbeng nime,
mdit mata plaa teher ava mei khut archu you nime;
21ungu Mma miing nga ktlok chati rekki mbin chaak in.” Dida mdo the ava mkurkhumna kurthuwk.
Jisu leh Beljebul
22Ava dilli mik ktot khat tarnam doṭhi ki ewng kcha ava Mhin arhai ṭhi lamda, ungu Mma ngi pdam pik da, ava leiji ki ewng miilaiji pauda ungta khuw kdei pha chda. 23Ungu mii mkheng nga ngak chda, ungta the lamda, “Hava Devid Chapa ngaal mo?” 24Pdainu Pharisi rekki aryaa da the lamda, “Tarnam kruwng chapa Beljebul rutanni hava Mma ngi tarnam rek mdo rei pthii pchaan.” 25Muplung thuw in Mma ngi deida, mhin inni theda, “Mthi na ngi mraal karpii da kinṭhen kruwngpaam khim khai ava do sii nime, ungu mthi na ngi mraal kirpii da kinṭhen khuwpii mdit mata inn ava rip chip pchaang nime. 26Ungta seitaan ni seitaan mraal pii sora mthi nangi mkinṭhen bi, tak heppi mkruwngpaam ava krip pchaang rang? 27Ungu Beijebul rutan ni Neiji tarnam rek krei pthi kukur thuttu, naaan achapa leenva ku rutan ni mdo rei pthi da? Ava ngi mlei kurthuwk da,mmaanni naan akekṭewl raan. 28Pdainu Isowr pthla ngi Neiji tarnam rek krei pthi pchaang ku kurthut bi, Isowr Kruwngpaam ma naan leen kurjung nga. 29Mata ruktang mii ava ru kri ngi mbowl dok mabi, tak heppi ru ktang khat inn thungva khatti lut don mdona kupru pchaang rang? Mma ngi mbowl dok dil thang ro ngi mi inn thungki kukruwl rora. 30Neitu kilṭhi kma mii ava Nei mukro kma, ungu Neitu kurkuk kma mii ava kpinṭheu tir pthira. 31Ava ngi mlei kurthuwk da, Neiji ahin thaanni kthea, pnu ungta Isowr kjowm cha ngi kpau mii mkheng ava kuptlot pik ra, pdainu pthla leen kjowm cha ngi kpau mii mkheng ava ptlot pik nime. 32Mleija Mii Chapa leen mraal kpii ngi pau kthe ku mii khat ava kuptlot pik ra, pdainu pthla kchiir mraal piida kpau ku mii khat ava hava charuwl thung daat don karvang rang ki charuwl thung daat don ptlot pik nime.
Ding Khat leh Mthei
33“Ungta thei mṭhat nra mding ava apṭhat in; mdit mata thei mṭhat ma nra mding ava pṭhat maan; mleija ding ava mtheiji mdo tdet. 34Pruwl doi nao rek naan! aṭhat ma arlaan inni tak heppi kṭha pauvi kpau in pti da? Mleija plung thungki kiplee ava nerri mdo the. 35Kṭha miilaiji kṭha mdo purtuwl thungki kṭha mdo thuwṭhi, ungu kṭhakma miilaiva kṭhakma mdo purtuwl thungki kṭhakma mdo thuwṭhi. 36Neiji akthe inna,makṭewl nit va mii pum ktai ava do ksii kma pauna mdo the khim khaija ktai ra. 37Mleija naan ki pauna rek ava ngi akpindit raan, ungta naan pauna rekki mraal akpii raan.”
Tngana Khat mdo Ngeen in
38Ava dilli Nowlam chukpu rek leh Pharisi rek mii angṭhe ngi Mhin the da, “Chukpu, neenni Nah hinki titin na khat kdee chaak nuwm inna.” 39Pdainu Mma ngi mhin inni arthawng da, “Kṭhakma leh losang kṭhi charuwl ava ngi titinna mdo thlaam in, pdainu khulpu Jonah ki titinna kma donle titinna kpii ro nime. 40Mleija Jonah ava tuwlva poi thung ngi nii kdum jaan kdum amda, ava leiji Mii Chapa rukka dulti plung thung ngi nii kdum jaan kdum ka amra. 41Makṭewl nit va Ninevah mii rekki rip lam donle hava charuwl ava mraal kpii lamra; mleija Jonah do paryaam leiji mmaanni plung ren hur lamda, ungta asuwn, Jonah hinnu klin do khat hava thung ngi krip daatta. 42Makṭewl nit va kurdu ktongki kruwngnu ngi rip donle hava charuwl ava mraal kpii lamra; mleija dultipaam mdon na ki ngi Solomon lousing karyaa chra thleng da, ungta asuwn, Solomon hinnu klin do khat hava thung ngi krip daatta.”
Pthla Kṭhakma Kinlet
43“Miilai khat thungki pthla kṭhakma ngi msun dok dil tha, mkarngat nra kthlaammi dii am nma mun thu tlowngda, pdainu mma ngi pha mda. 44Ava dilli mma ngi theda, ‘Neiji ksun dok na inn ava thung ngi kinle chdaat ni.’ Ungu mma ngi marvan kinlet thungta, ktlong deek ungta truh dang kintiing deekki phada. 45Ava dilli mma ngi chet da mma hinnu kṭha sii kma pthla kṭhakma murson rek ṭhi tpom da, ungu mmaanni mthung ngi lut lam da am lamda; ungta mṭut na thangva miilai ava ru kri ki hinnu kheel sii ngi jul chda. Ava leiji hava kṭhakma charuwl rekka anto hep daat kurthuwk ra.”
Jisu Nuh leh Mnaopale
46Mma ngi mii rek hin mpau slii arlaanni, asuwn, duwn thang ngi mnuh leh mnaopa le ngi rip lamda, Mhin mdo kirbiik ṭhi nlamra paukhewl chlam da. 47Ku mii khatti Mhin theda, “Anuh leh anaopale ngi duwn tha rip lamda, ado tkarbiik ṭhi nuwm lam leiji atikhewl lamma. 48Pdainu Mhin kthe miilai ava hin arthawngda, “Knuh leh knaopale ava kule da?” 49Ungta msiikhu rek ktongtha mkhutti tikheu da, Mma ngi theda, “Havalea Nei knuh leh knaopale lam! 50Mleija parwaanki Kpah plungbin ktlo mii ava Nei kṭapa, kchernu ungu knuh lam.”
Iliyochaguliwa sasa
MATHI 12: LAMKBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
