LIPOK 6
6
Meimchiri Tamajung Inyakba
1 #
Yob. 1.6; 2.1 Kodang alima nung meimchir soyapokyatsü tenzük, aser jalanulatem parnok nem sotsü, 2Tsüngrem chirtemi nisung jalatem tobur junga angu, anungji parnoki aginübatem parnok kinungtsü asütsü agi. 3Idangji Kibubai ashi, “Kü nelai nisung den teti rara-a malitsü, kechiaser parnok shi nung dang. Tang nungi parnok arishi küm noklang ka ser metsü dang alitsü.” 4#Zün. 13.33 Item anogo nungji alima nung aso tulu nisungtem#6.4: Aso Tulu Nisungtem: Parnok dang ‘Shira’ mesüra tsüngrem chirtem ta aja. liasü, aji ser külena Tsüngrem chirtemi nisung jalanulatem den medema, parnok nem chirnurtem sotsü. Parnokji alemli nungi nokinketertem aser shiratem liasü.
5 #
Mat. 24.37; Luk. 17.26; 1 Pe. 3.20 Kodang meimchiri tekülak tamajung mapatem inyakba aser parnok mulung nung teti tamajung dang bilemer ta Kibubai angu, 6pai alima nung meimchir yangluba atema jashi aser pa temulung mepelai aküm. 7Anungji pai ashi, “Meimchir shiba ni yanglu, parnok den ayazüba shirurutem aser ozütem ajak ni samatsütsü, kechiaser parnok yangluba atema ni jashir.” 8Saka Kibuba madang Noai taochi angu.
Noa
9 #
2 Pe. 2.5
Noa putu itemi: Noa par putu nung ochishir aser tai makaba nisung ka liasü. Pai Tsüngrem den jaja. 10Noa nungi jabaso asem jakzük: Shem, Ham aser Yafet. 11Tang Tsüngrem madang alima temenen aser teka yitepba agi sünga liasü. 12Aser Tsüngremi alimaji reprang aser ibaji teraksa aser memeshi liasü; alima nung meimchir ajakji temenen yimya nung aliba pai angu.
Noai Rong Yangluba
13Tsüngremi Noa dang ashi, “Meimchir ajak tatem küma meshimeshia samatsütsü ni lemtetogo, kechiaser parnoki alimaji azü tokshiba agi süngtsüogo aser ajiang alima den parnokji ni samatsütsü. 14Nai gofer süng agi rong ka na asoshi yangluang, aser iba nungji taktang taktang enokang; iba telunglen aser temalen temenateptsü agi nübangang. 15Nai aji yamai yangluang: metong nung süklep noklang asem, lenten nung süklep tenem aser touchi nung süklep semer. 16Rong nungji kichiba ka yangluang, aji temalen süklep ka tashi yangluang, aser nai rong kishiji iba temalenji yangluang, aser nai aji teküpoklen, tanabuba aser tasembuba taktang keta yangluang. 17Kechiaser ni alima dangi tzümetsüng yoka taküm ajak samatsütsü. Alima nung aliba taküm ajak asütsü. 18Saka ni ne den tezüngzüktepba ka yanglutsü. Na aser ne kinungtsü, ne jabasotem aser parnok kinungtsütem rong jagi tuang. 19Aser taküm aliba shiruru ajak nungi tapu shia anana parnok taküm alitsüsa rong jagi anir iang, parnok tepung o tetsü na alitsüla. 20Ozütem tapu shia, shirurutem tapu shia, aser alima nung ayazüba tapu shia parnok taküm litettsüsa tapu shia anana ne dangi arutsü. 21Ano nai tachitsü asoshi chiyungtsü tapu ajak bendena yuang aser aji na aser parnok asoshi chiyungtsü alitsü.” 22#Ibr. 11.7 Aser Tsüngremi melaba ajak Noai inyak.
Iliyochaguliwa sasa
LIPOK 6: AONAGABSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ao Naga C.L. Bible
© Bible Society of India, 2004.
Used by permission. All rights reserved worldwide.