SAN MATEO 23
23
Ngusta Jesús qui'ya ji'i̱ ngu' fariseo lo'o jua'a̱ ji'i̱ mstru cha' jo'ó bi'
1Lo'o li' nchcui' Jesús lo'o nu quiña'a̱ tsa ñati̱ nu ndi'i̱ slo yu, jua'a̱ lo'o nu ngu' nu ndyaca tsa'a̱ ji'i̱:
2―Nu ngu' fariseo bi', lo'o mstru nu nclu'u cha' jo'ó ne' laa ni, jlo ti' ngu' bi' lcaa cha' ñi'ya nu nguscua jyo'o Moisés lo quityi. 3Bi' cha' tso'o cua'a̱ jyaca̱ ma̱ ji'i̱ cha' nu nclu'u ngu' bi' ji'i̱ ma̱, tso'o taquiya' ma̱ ji'i̱ cha' nu nclu'u ngu' bi'; pana ná cua'ni ma̱ ñi'ya̱ nu ndu'ni ti ngu' bi'. Tso'o ti nclu'u ngu' cha' jo'ó bi', pana ná ndaquiya' ycui' ca ngu' cha' bi'. 4Lo'o jua'a̱ nu ngu' fariseo bi' ni, nclyo ngu' cña ji'i̱ tya'a ngu' cha' tonu tsa yu'ba qui'ya ngu'; ti'i̱ tsa yu'ba nsta ngu' bi' scu̱ ñati̱, pana ycui' ca ngu' ni, ná sicua̱ ngu' yu'ba bi' tsiya' ti. 5Lcaa cha' nu ndu'ni nu ngu' bi' ni, ndu'ni ngu' ji'i̱ cha' ña'a̱ ti ñati̱ ji'i̱ ngu'; bi' cha' ndyaaca̱' juata su nscua cha' ji'i̱ ycui' Ndyosi hique ngu', lo'o jua'a̱ scu̱ ngu', cha' nti' ngu' cha' chcui' ñati̱ ji'i̱ ngu' cha' tacati tsa ndu'ni ngu'. Lo'o jua'a̱ nchcu' ngu' bi' payu̱ nu tonu tsa lsu ndacui lo cha' ña'a̱ ñati̱ ji'i̱. 6Nu lo'o ndya'a̱ ngu' bi' sca ta'a, li' ndyaca'a̱ ngu' su tso'o la ña'a̱ nti' ngu'; cuati jua'a̱ ne' laa, la cui' ti su tso'o la ña'a̱ nti' ngu', ca bi' ntucua ngu' bi'. 7La cui' jua'a̱, si tyacua tya'a ñati̱ lo'o ngu' bi' nde calle, lo'o chcui' ñati̱ bi' lo'o ngu', na cua'ni chi̱ ñati̱ loo nti' ngu' fariseo bi'; jua'a̱ cua nti' ngu' cha' ñacui̱ ñati̱ ji'i̱, cha' mstru laca ngu'. Jua'a̱ nti' ngu' bi'.
8’Pana cu'ma̱ ni, ná tso'o si ñacui̱ ngu' ji'i̱ ma̱ cha' mstru laca ma̱; tso'o la si sca ti cha' ntsu'u tyiquee ma̱ lo'o tya'a ma̱, cha' sca ti mstru ntsu'u ji'i̱ ma̱, bi' laca Cristo. 9Lo'o jua'a̱ ná nga'a̱ cha' ñacui̱ ma̱ cha' sti ma̱ laca sca ñati̱ chalyuu ti, cha' sca ti ycui' Ndyosi nu ntucua nde cua̱, bi' laca Sti ma̱. 10Lo'o jua'a̱ ná ta ma̱ chacuayá' ji'i̱ ñati̱ cha' chcui' ngu' ji'i̱ ma̱ cha' xu'na ngu' laca ma̱, cha' sca ti Cristo laca Xu'na ma̱ nu chañi ca. 11Nu cu'ma̱ nu ndulo la cha' ji'i̱ ma̱ cuentya ji'i̱ tya'a ma̱, nga'a̱ cha' cua'ni ma̱ cua ña'a̱ ca cña nu culo lcaa tya'a ma̱ ji'i̱ ma̱, masi laca ma̱ loo ji'i̱ ngu'. 12Ñati̱ nu nti' cha' caca tlyu la cuentya ji'i̱ tya'a ngu', ntsu'u cha' ca tyuju'u ti' ngu' ca tiya' la; pana ñati̱ nu ná ndu'ni tyixi lo'o tya'a ngu', nu ná nti' tyiji̱loo ji'i̱ tya'a ngu', bi' laca nu chañi cha' caca tlyu la cuentya ji'i̱ cu'ma̱.
13’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Na ndacu̱' ma̱ tyucui̱i̱ ji'i̱ ngu', cha' ná caca tyatí̱ ngu' cha' ji'i̱ ycui' Ndyosi, cha' ná caca ycui' Ni loo ne' cresiya ji'i̱ ngu'. Ni ycui' ma̱, ná caca tyatí̱ ma̱ cha' bi', lo'o jua'a̱ ná nda ma̱ chacuayá' cha' tyatí̱ xa' la ñati̱ cha' bi'.
14’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Nxlyaá ma̱ ni'i̱ nu ntsu'u ji'i̱ nu cuna'a̱ ti'i, lo'o li' tyiquee' nchcui' ma̱ lo'o ycui' Ndyosi slo ñati̱ cha' ña'a̱ ti ñati̱ ji'i̱ ma̱. Ná ca cuayá' ti' xa' ñati̱ lcaa cha' cuxi nu ntsu'u ne' cresiya ji'i̱ ma̱ li'. Bi' cha' lye la chcube' ma̱ ca nde loo la.
15’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tyijyu' tsa ndya'a̱ ma̱, masi tyucui̱i̱ nde lo yuu ti, masi tyucui̱i̱ nteje tacui ma̱ tyujo'o ndya'a̱ ma̱, cha' clyana ma̱ ji'i̱ ñati̱, masi sca ti ñati̱ nu tyaja'a̱ xtyanu ji'i̱ nu xa' la jo'ó nu ndu'ni tlyu yu ji'i̱, cha' xñi yu cha' nu culu'u cu'ma̱ ji'i̱ yu. Li' culu'u ma̱ ji'i̱ yu cha' caca yu sñi' cuiñaja nu tlyu la que cu'ma̱, cu'ma̱ nu ntsu'u cha' tsaa ma̱ ca bilyaa.
16’¡Tya'na tsa cu'ma̱! Na cua nti' ma̱ culu'u ma̱ ji'i̱ xa' ñati̱; pana cuityi̱' ycui' ca cu'ma̱, cha' ná nda ma̱ cuentya tsiya' ti. Ndi'ya̱ nchcui' ma̱: “Si cua'ni ngu' jura cuentya ji'i̱ laa tonu re cha' cua'ni lyiji ngu' sca cña, ná sca cha' laca”, nacui̱ ma̱. “Pana si cua'ni ngu' jura cuentya ji'i̱ na oro nu ntsu'u ne' laa cha' cua'ni ngu' cña bi', li' ntsu'u cha' cua'ni ngu' lcaa cña tsiya' ti nu cua nchcui' ngu'”, nacui̱ ma̱. 17¡Ple tsa cu'ma̱, na cuityi̱' tsa ma̱! ¿Na laca nu ndulo la cha' ji'i̱ nti' ma̱? ¿Ha tlyu la cha' ji'i̱ na oro nu ntsu'u ne' laa bi'? ¿Ha tlyu la cha' ji'i̱ laa tlyu su ntsu'u na oro bi', nti' ma̱? Sca ti cuayá' ndyu'u cha' bi'. 18Lo'o jua'a̱ chaca cha' nchcui' ma̱: “Si cua'ni ngu' jura cuentya ji'i̱ mesa nu ntsu'u ne' laa re, cha' cua'ni lyiji ngu' sca cña, ná sca cha' laca”, nacui̱ ma̱. “Pana si cua'ni ngu' jura cuentya ji'i̱ msta̱ nu nsta ngu' lo mesa bi', cha' cua'ni ngu' cña bi', li' ntsu'u cha' cua'ni ngu' lcaa cña tsiya' ti nu cua nchcui' ngu'”, nacui̱ ma̱. 19¡Chañi cha' cuityi̱' cu'ma̱! ¿Na laca nu ndulo la cha' ji'i̱, nti' ma̱? ¿Ha tlyu la cha' ji'i̱ msta̱ bi'? ¿Ha tlyu la cha' ji'i̱ mesa su nscua msta̱ bi', nti' ma̱? Sca ti cuayá' laca cha' bi'; 20bi' cha' nu lo'o cua'ni ngu' jura cuentya ji'i̱ mesa bi', cha' cua'ni ngu' sca cña, stu'ba ndyu'ni ngu' jura cuentya ji'i̱ na nu nscua lo mesa bi'. 21Lo'o jua'a̱, si cua'ni ngu' jura cuentya ji'i̱ laa tonu re, la cui' jua'a̱ ndyu'ni ngu' jura cuentya ji'i̱ ycui' Ndyosi, cha' lo'o ne' laa bi' ndya'a̱ ycui' Ni. 22La cui' ti cha' ni, si cua'ni ngu' jura cuentya ji'i̱ sca na nu ntsu'u nde cua̱, la cui' jua'a̱ ndyu'ni ngu' jura cuentya ji'i̱ su tlyu ca su ntucua ycui' Ni, lo'o jua'a̱ cuentya ji'i̱ ycui' Ni li'.
23’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tacati tsa ndu'ni ma̱ lo'o ycui' Ndyosi lo'o lcaa na xca ti nu ntsu'u ji'i̱ ma̱; si ntsu'u tii tya'a laca' tyunu' xlya ji'i̱ ma̱ ni, masi si'yu hañi, masi si'yu comino, hora ti nda ma̱ tsaca ji'i̱ ycui' Ndyosi li', masi ná ndaquiya' ma̱ ji'i̱ cha' nu ngulu'u Ni, nu ndulo la cha' ji'i̱. Cua nacui̱ ycui' Ndyosi cha' liñi ti cua'ni cuayá' ma̱ ji'i̱ ñati̱, lo'o jua'a̱ nacui̱ Ni cha' cua'ni tya'na ti' ma̱ ji'i̱ ñati̱, cha' jlya tso'o ti' ma̱ ji'i̱ ycui' Ni; pana ná nduna ma̱ cha' bi'. Ntsu'u cha' taquiya' ma̱ ji'i̱ cha' nu ndulo la bi', masi tya cua'ni ma̱ cha' tso'o ñi'ya̱ nu ndyu'ni ti ma̱ nu lo'o nda ma̱ msta̱ sube ti bi'. 24Nti' ma̱ culu'u ma̱ cha' ji'i̱ ycui' Ndyosi ji'i̱ xa' ñati̱; pana na cuityi̱' ycui' ca ma̱, cha' ndyacu̱' hique ma̱ ji'i̱ lcaa cha' liñi bi'. Ñi'ya̱ laca si nsubii ma̱ hitya cha' co'o ma̱, cha' ná co'o ma̱ na'ni sube nu ntsu'u lo hitya bi', pana ná ndu'ni cuentya ma̱ ji'i̱, si cua ntyucui̱' ma̱ sca na'ni tlyu la, ñi'ya̱ nti' sca camello.
25’¡Tya'na cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tso'o tsa ndyaati̱ loo ma̱, ndyaati̱ chu̱' cuaña' ma̱, ñi'ya̱ nti' ndyaati̱ sca tasa, ndyaati̱ sca ca'ña; pana nde ne' cresiya ji'i̱ ma̱ xcui' cha' cuxi ntsu'u, cha' nti' ma̱ xlyaá ma̱ na nu ntsu'u ji'i̱ xa' ñati̱, cha' lya' ti' ma̱ ji'i̱ ñati̱. 26Na cuityi̱' ma̱, lcaa cu'ma̱ ngu' fariseo. Clyo cua'ni lubii ma̱ ne' cresiya ji'i̱ ycui' ca ma̱, cha' tyanu lubii tyucui ña'a̱ ma̱ li', ñi'ya̱ nti' ndyaati̱ sca tasa, sca ca'ña.
27’¡Tya'na tsa cu'ma̱ ngu' mstru cha' jo'ó lo'o cu'ma̱ ngu' fariseo, cha' tucua cha' ntsu'u tyiquee ma̱! Ñi'ya̱ sca ni'i̱ sube nu ndu̱ chu̱' cuaá nu ndu'ni ngati̱ ngu' ji'i̱, tso'o tsa ña'a̱ ni'i̱ bi' li', la cui' jua'a̱ laca cu'ma̱. Pana xcui' tyijya̱ jyo'o ntsu'u ne' cuaá bi', xcui' na tyucu̱ ntsu'u bi'. 28Lo'o jua'a̱ cu'ma̱ ni, tso'o tsa ña'a̱ ma̱ nde chu̱' ma̱, liñi tsa ndu'ni ma̱ nti' ñati̱; pana lo'o ña'a̱ ycui' Ndyosi ca nde ne' ma̱, tucua cha' ntsu'u tyiquee ma̱, cuxi tsa cha' nu ntsu'u ne' cresiya ji'i̱ ma̱, nti' Ni.
29’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tso'o tsa ña'a̱ ni'i̱ sube nu ndiñá ma̱ chu̱' cuaá su ndyatsi' jyo'o nu cua ya̱a̱ nchcui' cha' ji'i̱ ycui' Ndyosi lo'o ñati̱ nu ngua sa'ni la; tso'o tsa ndalya' ma̱ ji'i̱ ni'i̱ bi' nu ntucua chu̱' cuaá su ndyatsi' jyo'o nu tso'o tsa tyiquee nu ngua sa'ni la. 30“Cuxi tsa ngua'ni jyo'o cusu' ji'i̱ ya cua sa'ni”, nacui̱ ma̱. “Si cua nguti'i̱ ya chalyuu nu ngua tyempo bi', ná lo'o cua ndyujuii ya ji'i̱ ngu' nu ngua tu'ba ji'i̱ ycui' Ndyosi bi'”, nacui̱ ma̱. 31Jlo ti' ma̱ cha' laca ma̱ la cui' tya'a ñati̱ lo'o jyo'o cusu' ji'i̱ ma̱ nu cua ndyujuii ji'i̱ ngu' nu ngua tu'ba ji'i̱ ycui' Ndyosi nu ngua sa'ni; ña'a̱ ti cuxi tyiquee ma̱ juani, ñi'ya̱ nu cuxi tyiquee jyo'o cusu' ji'i̱ ma̱ nu ngua li'. 32Tso'o lacua. Tya cua'ni la ma̱ cha' cuxi nu ngua'ni jyo'o cusu' ji'i̱ ma̱ nu ngua sa'ni li'.
33’¡Ñi'ya̱ nti' cuaña, jua'a̱ nti' cu'ma̱! Tajua' tsa ndyu'ni ma̱ cha' cuxi. ¿Ha nti' ma̱ cha' clyaá ma̱ ji'i̱ ycui' Ndyosi cha' ná chcube' ma̱ ca bilyaa? Ná taca ji'i̱ ma̱ jua'a̱. 34Bi' cha' ta na' ji'i̱ ñati̱ 'na cha' ca̱a̱ ca slo ma̱; masi ngu' nu laca tu'ba 'na, masi ngu' nu jlo ti' cha' jna', masi ngu' mstru nu cuentya jna', ta na' ji'i̱ ngu' cha' ca̱a̱ ngu' ca slo ma̱. Jlo ti' na' cha' tyaala tsa cu'ma̱; cujuii ma̱ ji'i̱ xi ñati̱ bi', cujui'i̱ ca'a̱ ma̱ ji'i̱ xi xa' la ñati̱ bi' lo crusi, quiji'i̱ ma̱ ji'i̱ xi xa' la ñati̱ bi' lo'o reta. Masi ne' laa ji'i̱ ma̱, cua'ni lya' tsa ti' ma̱ ji'i̱ ngu' bi' ña'a̱ cuayá' nu culo'o ma̱ ji'i̱ ngu' bi', cha' ná tyanu ngu' bi' quichi̱ tyi ma̱ tsiya' ti. 35Bi' cha' lacua, tyanu qui'ya ji'i̱ ma̱ xqui'ya cha' cua ndyujuii jyo'o cusu' ji'i̱ ma̱ ji'i̱ quiña'a̱ tsa ñati̱ nu nchcui' cha' liñi tya sa'ni la, tya lo'o ngujuii Abel nu ngua tya clyo la, ña'a̱ cuayá' nu ngujuii Zacarías sñi' Berequías. Nu jyo'o Zacarías ni, cua ndyujuii ngu' ji'i̱ yu su ndu̱ yu ne' laa, ca su laja cla'be to' mesa su ndyaqui̱ msta̱, nu lo'o cua tsaa ti yu ni'i̱ su tacati tsa. Stu'ba ndyu'u cha' ñi'ya̱ laca si ycui' ca ma̱ cua ndyujuii ma̱ ji'i̱ jyo'o cusu' bi', cha' la cui' cha' cuxi bi' ntsu'u tyiquee ma̱ juani. 36Cha' liñi nchcui' na' lo'o ma̱ juani, cha' bilya cajaa ma̱ lo'o tlyu tsa cha' cuxi caca ji'i̱ cu'ma̱ ngu' nasiyu̱ nde xqui'ya qui'ya nu ndyanu ji'i̱ ma̱.
Ngusi'ya tsa Jesús xqui'ya quichi̱ Jerusalén
37’¡Tya'na̱ tsa cu'ma̱ ngu' Jerusalén! Tucui tsa cha' ntsu'u ji'i̱ ma̱. Tya sa'ni la ndyujuii ma̱ ji'i̱ ñati̱ nu ngua'a̱ lo ycui' Ndyosi cña ji'i̱, masi ngujui'i̱ ma̱ quee ji'i̱ ngu' nu laca tu'ba ji'i̱ Ni. Tyu̱u̱ tsa quiya' ngua ti' na' cha' cua'ni tyaca'a na' ji'i̱ ma̱ cha' ná ca cuxi ji'i̱ ma̱. Ñi'ya̱ nti' sca su'u̱ nu nxuti'i̱ ji'i̱ sñi' ne' lu'be ni', jua'a̱ ngua ti' na' cua'ni na' lo'o ma̱; pana ná nda ma̱ chacuayá' 'na tsiya' ti. 38Bi' cha' xñi'i̱ ti tyanu quichi̱ tyi ma̱ juani. 39Cha' liñi nchcui' na' lo'o ma̱ juani, cha' nga'aa ña'a̱ ma̱ 'na ña'a̱ cuayá' nu tyalaa tyempo lo'o chcui' ma̱ cha' 'na: “Tso'o tsa ndyu'ni ycui' Ndyosi lo'o ñati̱ nu lijya̱ chacuayá' ji'i̱ ycui' nu Xu'na na”, ñacui̱ ma̱ li'.
Nu markerat:
SAN MATEO 23: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
