SAN MATEO 22
22
Cui̱i̱ ji'i̱ ta'a su ngujui clyo'o ngu'
1Nchcui' Jesús chaca cui̱i̱ lo'o ngu' li':
2―Chcui' na' chaca cha' lo'o ma̱ cha' caca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús li'―. Caca bi' ñi'ya̱ ngua sca tsa̱ lo'o ngua ta'a ngujui clyo'o sñi' rey. Ngua'ni rey ta'a li'. 3Ngulo cña ji'i̱ msu ji'i̱ cha' tsaa ngu', tsaa chcui' ngu' lo'o lcaa ñati̱ nu ntsu'u cha' ji'i̱ lo'o rey, cha' cua ndyalaa tsa̱ nu caca ta'a bi'; pana ná ntaja'a̱ ñati̱ bi' ca̱a̱ ngu' slo rey nu ngua tsa̱ ta'a bi'. 4Xa' ngulo rey bi' cña ji'i̱ msu ji'i̱, cha' tsaa ngu' slo ñati̱ bi' chaca quiya': “Chcui' ma̱ lo'o lcaa ñati̱ bi', cha' cua laca ngua'ni cho'o na' scuaa cha' cacu ngu'; cua ndyujuii na' bata lo'o chqueru. Cua laca ntsu'u xlyaa cacu ngu' juani, si cua'ni ngu' cha' tso'o ca̱a̱ ngu' ta'a re yala ti, cha' cua ngujui clyo'o sñi' na'”, nacui̱ rey ji'i̱ msu ji'i̱. 5Pana ná ndu'u tucua ñati̱ bi', cha' ná ndube ti' ngu' cha' ngujui clyo'o sñi' rey bi'; ndyaa ngu' cña ne' quixi̱', ndyaa xi xa' la ngu' ndyujui' ngu' yu'ba ji'i̱ ngu'. 6Lo'o jua'a̱ xi xa' la ñati̱ bi' ni, ndaya' ngu' ji'i̱ msu bi', nxtyí lo'o ngu' ji'i̱ msu bi'; cuati jua'a̱ ntsu'u su ngujui'i̱ ngu' ji'i̱ msu bi' ña'a̱ cuayá' nu ndyujuii ngu' ji'i̱. 7Nu lo'o ndyuna rey cha' nu ngua'ni ngu' bi' lo'o msu ji'i̱, ngua ñasi̱' tsa rey bi' ña'a̱ ji'i̱ ñati̱ xña'a̱ bi'. Li' ngulo rey cña ji'i̱ sendaru ji'i̱ cha' cujuii ngu' ji'i̱ lcaa ñati̱ xña'a̱ bi', cha' su'ba ngu' quii' tyaqui̱ quichi̱ tyi ñati̱ bi'. 8Li' nchcui' rey lo'o msu ji'i̱ chaca quiya': “Cua ngua'ni cho'o na' scuaa cha' caca ta'a ngujui clyo'o sñi' na'”, nacui̱ rey bi'. “Pana nu ngu' nu cua nchcui' na' lo'o tsa̱ cha' ca̱a̱ ngu' ta'a ca slo na', ná ntaja'a̱ ngu' bi' ca̱a̱, bi' cha' ná cacu ngu' bi' scuaa tso'o nu ntsu'u 'na tsiya' ti. 9Tso'o la tsaa clya ma̱ nde calle tlyu juani; chcui' ma̱ lo'o lcua ti tya'a ñati̱ nu ña'a̱ ma̱ ji'i̱ nde calle jua, cha' ca̱a̱ ngu' ta'a ca slo na'.” 10Li' ndu'u ngu' msu bi' ndyaa ngu' nde calle; nchcui' ngu' lo'o cua ña'a̱ ca ñati̱ nu ndyacua tya'a ngu' lo'o, masi ñati̱ tso'o, masi ñati̱ cuxi. Li' ndyu'u ti'i̱ lcaa ñati̱ bi' slo rey ña'a̱ cuayá' nu ngutsa'á̱ ni'i̱ ji'i̱ rey, ndi'i̱ quiña'a̱ tsa ñati̱ nu cua ndyalaa ta'a slo rey bi'.
11’Li' ndyatí̱ ycui' rey bi', ndyaa nde ni'i̱ cha' chcui' lo'o lcaa ñati̱ nu ndi'i̱ ni'i̱ bi'. Li' na'a̱ rey cha' nga'a̱ sca nu qui'yu nu ná lacu' late' ji'i̱ ta'a. 12Li' nchcuane rey ji'i̱ nu qui'yu bi': “Chocue”, nacui̱, “¿ni cha' ndyatí̱ nu'u̱ ni'i̱ re lo'o ná lacu' nu'u̱ late' ji'i̱ ta'a nu cua nda na' jinu'u̱?” Pana ná ngujui ñi'ya̱ xacui̱ nu qui'yu bi' cha' ji'i̱ rey li'; 13bi' cha' ngulo rey bi' cña ji'i̱ msu ji'i̱: “Xñi ma̱ ji'i̱ nu qui'yu re, sca̱' ma̱ ya' yu, lo'o jua'a̱ sca̱' ma̱ quiya' yu. Lo'o li' xcua̱a̱ ma̱ ji'i̱ yu nde ca bilyaa su talya tsa ña'a̱, ca su nxi'ya tsa ngu' ndi'i̱ ngu', ca su lye tsa ndacu la'ya ngu' cha' ñasi̱' ngu'”, nacui̱ rey bi'. 14Lo'o ycui' Ndyosi ni, ndacane Ni ji'i̱ quiña'a̱ tsa ñati̱ cha' cua'a̱ jyaca̱ ngu' ji'i̱ lcaa cha' nu nchcui' Ni, pana cua laca ti ñati̱ nu nsubi Ni ji'i̱ cha' caca ngu' ñati̱ ji'i̱ Ni.
Cha' ji'i̱ cñi cña loo ngu'
15Li' ndu'u ngu' fariseo ndyaa ngu' cha' quiñi cha' ji'i̱ ngu' lo'o tya'a ngu', ñi'ya̱ nu caca ji'i̱ ngu' cñilo'o ngu' ji'i̱ Jesús cha' chcui' yu sca cha' cuxi. 16Li' ngulo ngu' bi' cña ji'i̱ xi ngu' cuañi' nu ndyaca tsa'a̱ cha' ji'i̱ ngu' fariseo, cha' chcui' cuayá' ngu' cuañi' bi' lo'o Jesús, ngua ti' ngu'. Li' ndyaa ngu' bi' slo Jesús lo'o xi xa' la ñati̱ nu ndya'a̱ lo'o taju ngu' nu cuentya ji'i̱ rey Herodes.
―Mstru ―nacui̱ nu ngu' cuañi' bi' ji'i̱ Jesús li'―, jlo ti' ya cha' liñi tsa ndu'ni nu'u̱; la cui' cha' liñi nu ntsu'u ji'i̱ ycui' Ndyosi, bi' ti cha' laca nu nclu'u nu'u̱ ji'i̱ ngu'. Ná ndube ti' nu'u̱ ñi'ya̱ ndañi cha' nu nchcui' ngu' jinu'u̱; sca ti cuayá' nti' nu'u̱ ña'a̱ nu'u̱ ji'i̱ lcaa ñati̱, masi ngu' ti'i, masi ngu' tonu. 17Tyu'u cha' clyu ti' jinu'u̱, cacha' nu'u̱ cha' liñi ji'i̱ ya: ¿Ha tso'o si ta na cñi cña loo na ji'i̱ rey tlyu nu ndi'i̱ xa' tsu' bi'?
18Pana ngua tii Jesús ñi'ya̱ laca cha' cuxi nu nclyacua ti' ngu' bi', bi' cha' ndi'ya̱ nguxacui̱ yu cha' ji'i̱ ngu':
―Cuiñi tsa cu'ma̱ ni. ¿Ni cha' laca nchcui' cuayá' ma̱ lo'o na'? ―nacui̱ Jesús ji'i̱ ngu' bi'―. 19Culu'u ma̱ sca cñi 'na, la cui' tya'a cñi plata nu nda na ji'i̱ ngu' nu nxñi cñi cña loo na.
Li' ñaa lo'o ngu' ji'i̱ sca cñi plata bi' slo Jesús.
20―¿Tilaca nu ca ji'i̱ lcui̱ nga'a̱ chu̱' cñi re? ―nacui̱ Jesús ji'i̱ ngu' bi'―. ¿Ti ji'i̱ laca xtañi nu nscua re? ―nacui̱.
21―Xtañi rey tlyu nu ndi'i̱ xa' tsu', bi' nga'a̱ chu̱' cñi cua ―nacui̱ ngu' li'.
―Tso'o ―nacui̱ Jesús li'―, ji'i̱ rey tlyu bi' tya ma̱ cñi cña loo nu nga'a̱ cha' ta ma̱ ji'i̱ lacua, lo'o jua'a̱ ji'i̱ ycui' Ndyosi tya ma̱ lcaa na nu ntsu'u cha' tya ma̱ ji'i̱ Ni.
22Ndube tsa ti' ngu' bi' li', cha' nchca tsa ji'i̱ Jesús xtyacui cha' lo'o ngu'. Ndu'u ngu' bi' ndyaa ngu' li'.
Nchcuane ngu' ji'i̱ Jesús ñi'ya̱ caca lo'o tyu'ú ñati̱ chaca quiya'
23Lo'o la cui' tsa̱ bi' ñaa xi ngu' saduceo slo Jesús, bi' laca sca latya ñati̱ nu nchcui' cha' nga'aa tyu'ú ñati̱ chaca quiya' lo'o cua ngujuii ngu'. Nchcuane ngu' bi' sca cha' ji'i̱ Jesús li':
24―Mstru ―nacui̱ ngu' bi' ji'i̱―, sa'ni la nda jyo'o Moisés sca cha' lo'o na cuentya ji'i̱ tya'a ngula ngu'. Nu lo'o cua ngujuii tsaca yu ni, si cua ngujui clyo'o yu pana bilya caja sñi' yu, li' ntsu'u cña ji'i̱ tya'a ngula yu nu ntucua ycui' ti cha' caja clyo'o lo'o nu cuna'a̱ nu ngua clyo'o jyo'o tya'a yu. Li' chcui' ngu' ji'i̱ sñi' clyo ngu' cha' sñi' nu qui'yu nu cua ngujuii bi' laca bi', cha' ná chcuna' xtañi yu nu cua ngujuii bi'. Jua'a̱ nchcui' Moisés sa'ni la. 25Ndi'ya̱ ngua sca quiya': Ntsu'u cati tya'a nu qui'yu tya'a ngula, tya'a quichi̱ tyi ya. Li' ngujui clyo'o nu ngula clyo, pana yala tsa ngujuii yu, lo'o bilya caja sñi' yu. Li' ndyanu nu cuna'a̱ bi' cuentya ji'i̱ tya'a yu. 26Li' ngujui clyo'o nu cuna'a̱ bi' chaca quiya'. La cui' jua'a̱, yala ti ngujuii chaca nu qui'yu tya'a ngula jyo'o bi'. Jua'a̱ ngua ji'i̱ ca ta'a ngu' qui'yu tya'a ngula jyo'o bi'. 27Ca su ndye, li' ngujuii nu cuna'a̱ bi'. 28Nu lo'o tyu'ú lcaa jyo'o chaca quiya' ni, ¿ñi'ya̱ nu laca clyo'o ca nu cuna'a̱ bi', cha' ca ta'a cati tya'a nu tya'a ngula ngu' ngujui clyo'o ngu' lo'o?
29Li' nguxacui̱ Jesús cha' ji'i̱ ngu' bi':
―Ná jlo ti' ma̱ tsiya' ti, cha' ná nchca cuayá' ti' ma̱ ji'i̱ quityi ji'i̱ ycui' Ndyosi; ná nchca cuayá' ti' ma̱ cha' nchca tsa ji'i̱ ycui' Ni cua'ni Ni cña tonu. 30Nu lo'o tyu'ú lcaa jyo'o chaca quiya', nga'aa ntsu'u cha' caja clyo'o ngu' ca bi'; tyi'i̱ ngu' li' ñi'ya̱ ndi'i̱ xca̱ ji'i̱ ycui' Ndyosi ca slo Ni. 31Chañi cha' ntsu'u cha' tyu'ú lcaa jyo'o chaca quiya'. ¿Ha bilya chcui' ma̱ cha' lo quityi nu nchcui' ycui' Ndyosi lo'o ma̱? Ndi'ya̱ nchcui' quityi bi': 32“Ycui' Ndyosi Xu'na Abraham laca na',” nacui̱ Ni, “ycui' Ndyosi Xu'na Isaac laca na', lo'o la cui' ti ycui' Ndyosi Xu'na Jacob laca na'”, nacui̱ Ni. Ná nacui̱ quityi bi' cha' na cua ngua ycui' Ndyosi Xu'na ngu' bi'; ña'a̱ ti tya laca ycui' Ndyosi Xu'na ngu' bi' juani, lo'o jua'a̱ laca ycui' Ndyosi Xu'na lcaa ñati̱ lu'ú.
33Lo'o ndyuna nu quiña'a̱ tsa ñati̱ nu nga'a̱ slo cha' nu nclyu'u Jesús bi', ndube tsa ti' ngu' ji'i̱ cha' bi' li'.
Cña nu ndulo la cha' cua'ni na cuentya ji'i̱ ycui' Ndyosi
34Nu lo'o ndyuna ngu' fariseo cha' cua ngua'ni Jesús ngana ji'i̱ nu ngu' saduceo bi', li' ndyu'u ti'i̱ lcaa ngu' fariseo bi' slo Jesús. 35Lo'o jua'a̱ nga'a̱ sca ngu' fariseo nu jlo tsa ti' lcaa cha' ji'i̱ ycui' Ndyosi nu nguscua jyo'o Moisés. Li' nchcuane yu ji'i̱ Jesús cha' chcui' cuayá' yu lo'o:
36―Mstru ―nacui̱ yu bi' ji'i̱ Jesús―, ¿ñi'ya̱ cha' laca nu ndulo la ji'na cha' cua'ni na, cha' nu nda ycui' Ni lo'o jyo'o Moisés sa'ni la?
37Li' nguxacui̱ Jesús cha' ji'i̱ yu bi':
―“Ntsu'u cha' tyucui tyiquee ma̱ tyu'u cha' ji'i̱ ma̱ lo'o ycui' Ndyosi; nu lo'o lubii ti cresiya ji'i̱ ma̱, jua'a̱ lo'o lcaa cha' nu nda'ya hique ma̱, tyu'u cha' ji'i̱ ma̱ lo'o Ni”. 38Bi' laca cha' nu tlyu la, nu ndulo la ji'na cha' cua'ni na. 39Lo'o jua'a̱ ntsu'u chaca cha' tlyu: “Ntsu'u cha' cua'ni tya'na ti' ma̱ ji'i̱ tya'a ñati̱ ma̱, ñi'ya̱ laca si ndu'ni tya'na ti' ma̱ ji'i̱ ycui' ca ma̱”. 40Su̱u̱ lcaa cha' nu nguscua jyo'o Moisés cuentya ji'i̱ ycui' Ndyosi laca tyucuaa cha' bi', lo'o jua'a̱ su̱u̱ lcaa cha' nu nchcui' ngu' nu ngua tu'ba ji'i̱ ycui' Ndyosi nu ngua sa'ni laca cha' bi'.
Nchcuane Jesús ji'i̱ ngu' cuentya ji'i̱ Cristo
41Laja lo'o tya ndyu'u ti'i̱ lcaa ngu' fariseo bi' su ndu̱ Jesús, li' nchcuane yu sca cha' ji'i̱ ngu':
42―¿Ñi'ya̱ nti' cu'ma̱ cuentya ji'i̱ Cristo nu ntsu'u cha' ca̱a̱? ―nacui̱ Jesús ji'i̱ ngu' bi'―. ¿Tilaca ngua jyo'o cusu' ji'i̱ nu Cristo bi' nti' ma̱?
―Ñati̱ tya'a ji'i̱ jyo'o rey David caca nu bi' ―nacui̱ ngu' ji'i̱.
43Li' nchcuane Jesús ji'i̱ ngu' bi' chaca quiya':
―¿Ñi'ya̱ ndyu'u ta cha' re nti' cu'ma̱, cha' cua nchcui' jyo'o David cha' Xu'na yu laca nu Cristo bi'? Cua ngulu'u Xtyi'i ycui' Ndyosi cha' bi' ji'i̱ David, bi' cha' nchcui' yu ndi'ya̱:
44Ycui' Ndyosi nu laca Xu'na na nacui̱ ji'i̱ Cristo nu Xu'na na' ndi'ya̱:
“Tyucua nu'u̱ nde la'a tsu' cui̱ 'na, ña'a̱ cuayá' nu cua'ni tye na' cha' ji'i̱ lcaa tya'a cusu̱u̱ jinu'u̱, cha' caca nu'u̱ loo ji'i̱ lcaa ca cha'”, nacui̱ Ni ji'i̱ Cristo.
45Xu'na na', nchcui' jyo'o David ji'i̱ Cristo. ¿Ñi'ya̱ caca chcui' na cha' ñati̱ tya'a ji'i̱ jyo'o David bi' laca Cristo lacua?
46Ná ntsu'u ni sca ñati̱ ca bi' nu ngua ji'i̱ xacui̱ cha' ji'i̱ Jesús li'. Lo'o jua'a̱ xa' la tsa̱ nde loo la nga'aa nchcuane ngu' cha' ji'i̱ yu tsiya' ti, cha' ntsi̱i̱ ngu' ji'i̱, ñi'ya̱ nu xacui̱ Jesús cha' ji'i̱ ngu'.
Nu markerat:
SAN MATEO 22: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
