SAN MATEO 20
20
Cui̱i̱ ji'i̱ ngu' nu ndya'a̱ ne' xña ji'i̱ ñati̱
1’Chaca cha' nti' na' chcui̱' lo'o ma̱ juani, cha' caca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱. Chcui' na' sca cui̱i̱ cuentya ji'i̱ sca nu laca xu'na msu. Ngua sca tsa̱ nde tlya ndu'u yu ndyaa yu lcaya' cha' chcui' yu lo'o ngu' nu caca msu ji'i̱, si cua'ni ngu' cña ne' lo'o ji'i̱ yu ca su ndyataa yaca si'yu losu' tyixi. 2Ta yu xcaya' msu ñi'ya̱ nu nda ti ngu' tyempo bi', nacui̱ xu'na msu bi' ji'i̱ ngu'; tso'o tsa nti' ngu' msu bi', si caja tsa lo cua caya' ji'i̱ ngu'. Li' ndu'u msu bi' ndyaa ngu' ne' lo'o ji'i̱ yu bi', cha' cua'ni ngu' cña. 3Nu lo'o cua ndye sna hora ntsu'u ngu' cña, li' ndyaa xu'na ngu' bi' lcaya' chaca quiya'. Ndacua na'a̱ yu ji'i̱ xa' la ñati̱, pana ndu̱ ti ngu' cha' bilya caja cña ji'i̱ ngu'. 4Li' nchcui' yu lo'o ngu' bi': “Yaa clya ma̱, cua'ni ma̱ cña ne' lo'o 'na. Stu'ba cua'ni ma̱ cña lo'o msu 'na, cha' cua ntsu'u ngu' ndyu'ni ngu' cña 'na juani. Ta na' caya' tso'o ji'i̱ ma̱ li'”, nacui̱ yu. Hora ti ndyaa ngu' ne' xña ji'i̱ xu'na msu bi' li'. 5Lo'o li' xa' ndyaa xu'na msu bi' lcaya' nde hora, jua'a̱ chaca quiya' na'a̱ yu ji'i̱ xi xa' la ngu' cha' na ndu̱ ti ngu'. La cui' ti cha' nchcui' yu lo'o ngu' bi' li', lo'o li' la cui' jua'a̱ ngua chaca quiya' hora cua sna nde ngusi̱i̱. 6Nu lo'o cua ngusi̱i̱ la ña'a̱ ti tya ndu̱ xi ñati̱ lcaya' bi'. Nchcui' xu'na msu bi' lo'o ngu' li': “¿Ni cha' laca na ndu̱ ti ma̱ ca nde tyucui tsa̱?”, nacui̱ yu ji'i̱ ñati̱ bi'. “¿Ha ná ntsu'u cña ji'i̱ ma̱ lacua?” 7“Ná ntsu'u ñati̱ nu nti' msu juani”, nacui̱ ngu' ji'i̱. “Yaa clya ma̱ cua'ni ma̱ xi cña ne' lo'o 'na lacua”, nacui̱ xu'na msu bi' ji'i̱ ngu' li'. 8Tiya' la li' lo'o cua tyaa ti cuichaa, li' nchcui' xu'na cña bi' lo'o nu laca loo ji'i̱ msu: “Xi'ya nu'u̱ ji'i̱ lcaa msu juani cha' ta nu'u̱ xcaya' ngu'”, nacui̱. “Clyo ta xcaya' msu nu ndyalaa ca ti. Cuati su cua tye, li' ta nu'u̱ xcaya' ñati̱ nu ndyalaa tya tlya la.” 9Li' ndyalaa ngu' nu nguxana ca ti cña ca slo yu, pana nda yu xcaya' ngu' ñi'ya̱ si ntsu'u ngu' cña tyucui tsa̱. 10Ca tiya' la, li' ndyalaa ngu' nu nguxana cña tya tlya la slo yu. Ngulacua ti' msu bi' cha' quiña'a̱ la cñi caja xcaya' ngu' li', pana stu'ba ti ngujui xcaya' lcaa msu ji'i̱. 11Ñasi̱' xi msu nu nguxana cña tya tlya li'. 12“Tyucui tsa̱ ngua'ni ya cña jinu'u̱”, nacui̱ msu bi' ji'i̱ xu'na. “Masi tyique' tsa cua̱ nde hora, ña'a̱ ti tya ngua'ni ya cña jinu'u̱. Lo'o juani, stu'ba ngujui xcaya' lcaa tya'a ntsu'u ya cña, masi sca hora ti ngua'ni ngu' jua cña jinu'u̱”, nacui̱ msu nu nguxana cña nde tlya bi'. 13Li' nguxacui̱ xu'na cña bi' cha' ji'i̱ msu ñasi̱' bi': “Si'i cha' cuxi nu ndyu'ni na' lo'o ma̱. ¿Ha si'i na cua ngüiñi cha' jna' lo'o ma̱ ni tsa lo xcaya' nu ta na' ji'i̱ ma̱? Lo'o jua'a̱, tsa lo cua cñi xcaya' cu'ma̱ nda na' ji'i̱ ma̱ juani. 14Xñi ma̱ xcaya' ma̱, tyaa ma̱ li'. Ná ntsu'u cha' ca ñasi̱' cu'ma̱ 'na. Si nti' na' cua'ni na' cha' stu'ba xcaya' cu'ma̱ lo'o nu xa' la msu nu xti ti hora ngua'ni cña, tso'o tsa lacua. 15Ntsu'u chacuayá' jna' cua'ni na' ñi'ya̱ nu nti' ti na' cua'ni na' lo'o cñi 'na. ¿Ha si'i jua'a̱? ¿Ni cha' laca liye' ti' ma̱ ña'a̱ ma̱ 'na, cha' tso'o ti xcaya' nda na' ji'i̱ lcaa msu 'na?”, nacui̱ xu'na msu bi'. 16Pana nu ngu' nu tyu'u tucua lo'o cua tye ti cha', bi' laca ngu' nu caca nde loo la; ngu' nu ndu'u tucua clyo, bi' laca ngu' nu tyanu nde chu̱' la ―nacui̱ Jesús―. Cua ndacane Ni ji'i̱ quiña'a̱ tsa ñati̱ cha' cua'a̱ jyaca̱ ngu' ni cha' nda Ni, pana cua laca ti ñati̱ nsubi Ni ji'i̱ cha' caca ngu' ñati̱ ji'i̱ Ni.
Xa' nchcui' Jesús lo'o ngu' cha' cua cajaa ti ycui'
17Tya ndya'a̱ ngu' tyucui̱i̱ cha' tsaa ngu' ca quichi̱ Jerusalén. Li' ndu'utsu' Jesús xi to' tyucui̱i̱ lo'o nu tii tyucuaa tya'a ngu' nu ndyaca tsa'a̱ ji'i̱, cha' chcui' xi lo'o ngu' bi' li':
18―Jlo ti' ma̱ cha' tyacuí̱ na tyaa na tyucui̱i̱ nde ca'ya juani, cha' cua tsaa ti na nde Jerusalén ―nacui̱ Jesús ji'i̱ ngu' bi'―. Cajua taya' ngu' 'na nu cua nda Ni 'na lijya̱a̱ cha' caca na' ñati̱, cha' tsaa lo'o ngu' 'na slo sti jo'ó nu laca loo, slo mstru nu nclu'u cha' jo'ó ne' laa. Cua'ni cuayá' ngu' bi' 'na li', chcui' ngu' cha' ntsu'u qui'ya 'na, cha' xqui'ya bi' ntsu'u cha' cajaa na'. 19Li' tsaa lo'o ngu' bi' 'na slo ngu' xa' tsu' nu laca loo, cha' xtyí lo'o ngu' bi' 'na. Lo'o jua'a̱ quiji'i̱ ngu' bi' 'na lo'o reta, cujui'i̱ ca'a̱ ngu' bi' 'na lo crusi li'. Pana, tsa̱ nchca tyuna, li' tyu'ú na' chaca quiya' ―nacui̱ Jesús.
Ndijña xtya'a̱ Jacobo sca cha' tso'o cuentya ji'i̱ sñi'
20Lo'o li' ya̱a̱ xtya'a̱ Jacobo lo'o Juan ca slo Jesús. Zebedeo laca sti tyucuaa nu qui'yu bi'. Stu'ba ti ya̱a̱ nu cuna'a̱ bi' lo'o tyucuaa sñi', li' ndyatu̱ sti̱' ma' slo Jesús cha' jña ma' sca cha' tso'o ji'i̱. 21Li' nchcuane Jesús ji'i̱ nu cuna'a̱ bi':
―¿Na laca nti' nu'u̱? ―nacui̱ Jesús ji'i̱.
―Cua'ni nu'u̱ cha' tso'o ta nu'u̱ chacuayá' cha' stu'ba ti chca'a̱ sñi' na' lo'o nu'u̱ ca su caca nu'u̱ loo nde loo la ―nacui̱ nu cuna'a̱ bi'―. Culo nu'u̱ cña cha' chca'a̱ tsaca yu la'a tsu' cui̱ jinu'u̱, chaca yu bi' chca'a̱ yu la'a tsu' coca jinu'u̱ ―nacui̱.
22Li' nchcui' Jesús lo'o tyucuaa nu qui'yu bi':
―Ná nchca cuayá' ti' ma̱ ñi'ya̱ laca cha' nu ndijña ma̱ 'na juani ―nacui̱ Jesús ji'i̱ ngu'―. ¿Ha taca ji'i̱ ma̱ chcube' ma̱ ñi'ya̱ nu chcube' na', ñi'ya̱ ca si ta ngu' sca taná nu clyaa' tsa cha' co'o na? ¿Ha talo ma̱ si xcube' ngu' ji'i̱ ma̱ ñi'ya̱ nu nga'a̱ cha' xcube' ngu' jna', nu lo'o cujuii ngu' 'na?
―Taca ji'i̱ cua ―nacui̱ ngu' bi' li'.
23―Chañi cha' lo'o cu'ma̱ co'o ma̱ taná clyaa' nu ntsu'u cha' co'o na' bi', lo'o jua'a̱ chcube' ma̱ ñi'ya̱ nu chcube' na' ―nacui̱ Jesús ji'i̱ ngu'―. Pana ná ntsu'u chacuayá' ta na' sca se'i̱ nde sii' na' cha' chca'a̱ ma̱ lo'o na' nde loo la, cha' cua laca ngusubi ycui' Ndyosi Sti na' ji'i̱ ñati̱ nu chca'a̱ nde sii' na' tyempo bi'.
24Lo'o ndyuna nu chaca tii tya'a ngu' nu ndyaca tsa'a̱ ji'i̱ Jesús, chi̱i̱ tsa ngua ti' ngu' ña'a̱ ngu' ji'i̱ Jacobo lo'o ji'i̱ tya'a yu li'. 25Lo'o li' ngusi'ya Jesús ji'i̱ lcaa ngu' bi', cha' tyu'u ti'i̱ ngu' slo.
―Jlo ti' ma̱ cha' nu laca loo ji'i̱ ngu' xa' tsu' ni, tyaala tsa ngu' bi' ―nacui̱ Jesús ji'i̱ ngu' nu ndyaca tsa'a̱ ji'i̱―. Lye tsa nclo ngu' nu laca loo bi' cña ji'i̱ ngu' ca quichi̱ tyi ngu'; 26pana nu cu'ma̱ ni, ná cua'ni ma̱ jua'a̱. Lcaa lo cña nu taca xtyucua ma̱ ji'i̱ tya'a ñati̱ ma̱, bi' cña ntsu'u cha' cua'ni ma̱, si cua nti' ma̱ cha' caca ma̱ loo ji'i̱ ngu'. 27Lo'o jua'a̱, si nti' ma̱ cha' ndulo la cha' ji'i̱ ma̱ cuentya ji'i̱ ngu' tya'a ma̱, ntsu'u cha' cua'ni ma̱ ñi'ya̱ si laca ma̱ msu ji'i̱ tya'a ma̱, masi ná lo'o caya'. 28Na' nu cua nda Ni 'na lijya̱a̱ cha' caca na' ñati̱, ná lijya̱ na' nde chalyuu cha' caja msu 'na; ycui' na' laca na' msu ji'i̱ ñati̱, bi' cha' lijya̱ na'. Na cua lijya̱ na' cha' cajaa na' cha' cati̱ qui'ya nu ntsu'u ji'i̱ ñati̱, cha' cua'ni lyaá na' ji'i̱ quiña'a̱ tsa ñati̱ li' ―nacui̱ Jesús ji'i̱ ngu'.
Ngua'ni Jesús jo'o ji'i̱ tucua tya'a ngu' cuityi̱'
29Cua ndyalaa ngu' quichi̱ Jericó. Cua tyu'u ti ngu' tyaa ngu' li', lo'o jua'a̱ quiña'a̱ tsa ñati̱ ndu'u lca'a̱ ji'i̱ Jesús. 30To' tyucui̱i̱ su tyeje tacui ngu' nga'a̱ tucua tya'a ngu' cuityi̱'; cua ndyuna ngu' cuityi̱' bi' cha' ycui' Jesús nteje tacui tyucui̱i̱ jua, bi' cha' cui̱i̱ ngusi'ya ngu' ji'i̱ yu:
―Xu'na, cua'ni tya'na ti' nu'u̱ ji'i̱ ya. Jlo ti' ya cha' la cui' ñati̱ tya'a ji'i̱ jyo'o David laca nu'u̱ ―nacui̱ ngu' cuityi̱' bi' ji'i̱ Jesús.
31Pana ná ndiya ti' nu ngu' quiña'a̱ bi', cha' lye tsa ngusi'ya ngu' cuityi̱' bi' ji'i̱ Jesús.
―Cuaana ti cu'ma̱ ―nacui̱ ngu' ji'i̱ ngu' cuityi̱' bi'.
Ná ndyuna ngu' cuityi̱' bi', cui̱i̱ la ngusi'ya ngu' bi' li':
―Xu'na, nu'u̱ nu laca la cui' tya'a ñati̱ ji'i̱ jyo'o David ―nacui̱ ngu' cuityi̱' bi' ji'i̱ Jesús―, cua'ni tya'na ti' nu'u̱ ji'i̱ ya.
32Li' ndyatu̱ Jesús, ngusi'ya ji'i̱ ngu' cuityi̱' bi', cha' ca̱a̱ ngu' slo.
―¿Na laca nti' ma̱ cha' cua'ni na' lo'o ma̱? ―nacui̱ Jesús ji'i̱ ngu' bi' li'.
33―Xu'na ―nacui̱ ngu' bi' ji'i̱―, nti' ya cha' tyaca̱' tso'o xee cloo ya ña'a̱ ya chaca quiya'.
34Tya'na tsa ti' Jesús ña'a̱ yu ji'i̱ ngu' bi'. Ngusta sne ya' yu chu̱' si'yu cloo ngu' bi' li', lo'o hora ti tyaca̱' tso'o xee loo ngu', ña'a̱ ngu' chaca quiya'. Li' ndu'u ngu' bi' ndyaa ngu', nguta'a̱ ngu' bi' lo'o Jesús.
Nu markerat:
SAN MATEO 20: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
