SAN MATEO 19
19
Ngulu'u Jesús cha' ná xtyanu ngu' ji'i̱ clyo'o ngu'
1Lo'o ndye nchcui' Jesús cha' bi' lo'o ngu', li' ndu'u yu loyuu su cuentya Galilea bi', ndyaa yu nde loyuu su cuentya Judea. Nteje tacui Jesús sta'a̱ Jordán, 2lo'o quiña'a̱ tsa ñati̱ ndya'a̱ lca'a̱ ji'i̱ yu cha' cua'ni yu jo'o ji'i̱ lcaa nu quicha nu lijya̱ lo'o ngu' bi'; ngua'ni Jesús jo'o ji'i̱ ngu' quicha bi', ngua tso'o ngu' bi' li'.
3Laja li' lijya̱ xi ngu' fariseo slo Jesús cha' chcui' cuayá' ngu' lo'o yu si caca tyiji̱loo ngu' ji'i̱ yu, ngua ti' ngu'.
―¿Ha ntsu'u chacuayá' cuentya ji'na cha' xtyanu sca ñati̱ ji'i̱ clyo'o yu tsiya' ti, si nga'aa nti' yu ji'i̱ nu cuna'a̱ bi'? ―nacui̱ ngu' ji'i̱ Jesús.
4―¿Ha bilya chcui' ma̱ lo quityi cha' ji'i̱ ycui' Ndyosi? ―nacui̱ Jesús ji'i̱ ngu' bi'―. “Clyo ngüiñá Ni ji'i̱ ñati̱, sca nu qui'yu lo'o sca nu cuna'a̱”, jua'a̱ nscua lo quityi bi'. 5Lo'o jua'a̱ ndi'ya̱ nacui̱ Ni: “Bi' cha' tyu'utsu' sca nu qui'yu slo sti yu, slo xtya'a̱ yu, cha' caja clyo'o lo'o sca nu cuna'a̱, cha' caca ngu' sca ti xtañi tyucuaa ngu'”. 6Nga'aa si'i tucua tya'a ñati̱ laca ngu', cua laca ji'i̱ ngu' ñi'ya̱ si laca ngu' sca ti ñati̱. Bi' cha' ná tso'o xtyanu ngu' ji'i̱ clyo'o ngu', cha' cua nda ycui' Ndyosi cha' clyo'o ji'i̱ ngu'.
7Li' nguxacui̱ ngu' bi' cha' ji'i̱ Jesús:
―¿Ni cha' laca ngulo jyo'o Moisés cña ji'na lacua? Cha' tso'o ji'i̱ sca nu qui'yu, nacui̱ jyo'o cusu' bi', si culo yu sca quityi cha' xtyanu yu ji'i̱ nu cuna'a̱ nu laca clyo'o yu.
8Xa' nchcui' Jesús lo'o ngu' bi' li':
―Ná ndaquiya' ma̱ ji'i̱ ycui' Ndyosi tsiya' ti, bi' cha' nda jyo'o Moisés chacuayá' ji'i̱ ma̱ cha' xtyanu ma̱ ji'i̱ clyo'o ma̱ lo'o sca quityi ti ―nacui̱ Jesús ji'i̱ ngu'―. Pana si'i jua'a̱ ngua ti' ycui' Ni tya lo'o ngüiñá Ni chalyuu. 9Cuentya jna' ni, ta na' sca cui̱i̱ lo'o ma̱ juani: Si ntsu'u sca ñati̱ nu nguxtyanu ji'i̱ clyo'o cha' caja clyo'o lo'o xa' nu cuna'a̱, ngua'ni tyucuaa ti' yu lo'o nu cuna'a̱ clyo'o yu. Sca ti si clyo'o yu ngua'ni suba' lo'o xa' nu qui'yu, liñi cha' xtyanu yu ji'i̱ nu cuna'a̱ bi' li'. La cui' jua'a̱, nu cuna'a̱ nu cua nguxtyanu clyo'o ji'i̱ bi', si xa' caja clyo'o lo'o chaca ñati̱, cha' suba' cua'ni ngu' bi' li'.
10Lo'o li' nchcui' ngu' nu ndyaca tsa'a̱ ji'i̱ lo'o Jesús:
―Tso'o la si ná caja clyo'o na tsiya' ti, si jua'a̱ laca cha' ji'i̱ ngu' qui'yu lo'o clyo'o ngu' ―nacui̱ ngu'.
11―Ntsu'u tsa ngu' qui'yu nu ná talo ngu' cha' ntucua ngu' ycui' ti ngu' ―nacui̱ Jesús ji'i̱ ngu' nu ndyaca tsa'a̱ ji'i̱ li'―. Sca ti si culo ycui' Ndyosi cña ji'i̱ sca ñati̱ cha' ná caja clyo'o, li' talo yu cha' ná cala' ji'i̱ sca nu cuna'a̱ tsiya' ti, si xtyucua ycui' Ndyosi ji'i̱ yu bi'. 12Ntsu'u tyu̱u̱ lo cha' nu ndu'ni cha' ná nchca caja clyo'o sca nu qui'yu: ntsu'u ngu' nu quicha ngu' tya lo'o ngula ngu'; lo'o jua'a̱ ntsu'u xi ngu' nu quicha ngu' xqui'ya cha' ngua'ni ñu'u̱ ñati̱ ji'i̱ ngu' bi'; lo'o jua'a̱ ntsu'u xi ngu' nu cua ngusubi ycui' Ndyosi ji'i̱ cha' cua'ni ngu' cña ji'i̱ Ni, bi' cha' tso'o la masi ná caja clyo'o ngu' bi' li', nti' ngu', cha' sca ti ycui' Ndyosi caca loo ji'i̱ ngu' li', nti' ngu'. Nu qui'yu bi' ni, ycui' yu nda yu cuentya si caca ji'i̱ yu tyi'i̱ yu ycui' ti yu; tso'o si talo yu bi' tyi'i̱ yu ycui' ti yu lacua.
Ngulacua̱ Jesús ji'i̱ nu sube
13Lo'o li' ngua sca quiya' ñaa lo'o ngu' ji'i̱ tyu̱u̱ tya'a nu sube ca su nga'a̱ Jesús. Ngua ti' ngu' cha' sta ya' ycui' Jesús hique nu sube bi', cha' chcui' yu lo'o ycui' Ndyosi cuentya ji'i̱ nu sube bi'. Li' ngua'ni tyaala nu ngu' nu ndyaca tsa'a̱ ji'i̱ Jesús ji'i̱ ngu' bi', 14pana hora ti nchcui' Jesús lo'o ngu' nu ndyaca tsa'a̱ ji'i̱ li':
―Ta ma̱ chacuayá' ji'i̱ nu sube cha' ca̱a̱ ngu' slo na' ―nacui̱ Jesús ji'i̱ ngu' bi'―. Ná cua'a ma̱ ji'i̱ nu sube bi'. Ñi'ya̱ laca lo'o jlya ti' nu sube ji'i̱ sti ngu', la cui' jua'a̱ ntsu'u cha' jlya ti' ñati̱ ji'i̱ ycui' Ndyosi nu lo'o caca Ni loo ne' cresiya ji'i̱ ngu'.
15Li' ngusta ya' Jesús hique nu sube bi'. Lo'o li' ndu'u Jesús ndyaa.
Nchcui' sca nu culiya' lo'o Jesús
16Ca tiya' la li' ñaa sca nu qui'yu cuañi' slo Jesús.
―Mstru, tso'o tsa ndu'ni nu'u̱ ―nacui̱ yu ji'i̱ Jesús―. Cua'ni nu'u̱ cha' tso'o cacha' nu'u̱ jna': ¿Na laca nu tso'o cua'ni na' cha' caja chalyuu nu ná nga'a̱ cha' tye 'na? ―nacui̱ yu.
17Lo'o li' nchcui' Jesús lo'o yu:
―¿Ni cha' nchcui' nu'u̱ cha' tso'o tsa ndu'ni na'? ―nacui̱ Jesús ji'i̱ yu bi'―. Sca ti ycui' Ndyosi laca nu chañi cha' tso'o laca Ni. Pana taquiya' nu'u̱ ji'i̱ lcaa cña nu ngulo ycui' Ndyosi ji'i̱ ma̱, si nti' nu'u̱ caja chalyuu nu ná nga'a̱ cha' tye jinu'u̱.
18―¿Ñi'ya̱ nu laca cña bi' nti' nu'u̱? ―nacui̱ yu cuañi' bi' ji'i̱.
Li' ngulu'u Jesús xi cha' ji'i̱ yu bi':
―Ná cujuii ma̱ ji'i̱ tya'a ñati̱ ma̱. Ná cua'ni ma̱ cha' suba' lo'o clyo'o xa' ñati̱, ni ná cuaana ma̱ cha' tso'o nu ntsu'u ji'i̱ tya'a ñati̱ ma̱. Ná chcui' ma̱ cuentyu ji'i̱ tya'a ñati̱ ma̱. 19Lo'o jua'a̱ cua'ni tlyu ma̱ ji'i̱ sti ma̱, ji'i̱ xtya'a̱ ma̱. Cua'ni tya'na ti' ma̱ ji'i̱ tya'a ñati̱ ma̱, ñi'ya̱ laca si ndu'ni tya'na ti' ma̱ ji'i̱ ycui' ca ti ma̱.
20Li' nguxacui̱ yu bi' cha' ji'i̱ Jesús:
―Tya lo'o cuañi' na' ndaquiya' na' ji'i̱ lcaa cña bi' lcaa tsa̱ ―nacui̱ yu cuañi' bi' ji'i̱ Jesús―. ¿Ha tya ntsu'u la cha' nu tya lyiji cua'ni na' lacua? ―nacui̱.
21―¿Ha chañi cha' nti' nu'u̱ cha' ca lubii cresiya ji'nu'u̱, cha' caja chalyuu nu ná nga'a̱ cha' tye jinu'u̱? ―nacui̱ Jesús ji'i̱ yu bi'―. Si chañi cha' nu nchcui' nu'u̱, yaa clya cujui' nu'u̱ lcaa cha' tso'o nu ntsu'u jinu'u̱; tyu'u cñi cha' ta nu'u̱ ji'i̱ ngu' ti'i li'. Lo'o li' sta ycui' Ndyosi sca cha' tso'o nu tyacua jinu'u̱ ca su ntucua ycui' Ni. Lo'o cua ngua'ni nu'u̱ cha' bi', li' ca̱a̱ nu'u̱ slo na' cha' tya'a̱ nu'u̱ lo'o na'.
22Lo'o ndyuna yu cuañi' bi' cha' nu nda Jesús lo'o yu, ndu'u yu ndyaa yu li'; xñi'i̱ xi ti' yu cha' nchcui' Jesús cha' bi', cha' culiya' tsa yu.
23Li' nchcui' Jesús lo'o ngu' nu ndyaca tsa'a̱ ji'i̱:
―Cha' liñi nchcui' na' lo'o ma̱ juani ―nacui̱―, tucui tsa caca ji'i̱ ngu' culiya' cha' tyatí̱ ngu' cha' ji'i̱ ycui' Ndyosi, cha' caca Ni loo ne' cresiya ji'i̱ ngu'. 24Lasa la cña tyeje tacui sca na'ni quiya' cuxa, masi sca na'ni tonu ñi'ya̱ nti' sca camello, lasa la cha' bi'; tucui la tyalaa sca ngu' culiya' ca su laca ycui' Ni loo.
25Ndube tsa ti' ngu' nu ndyaca tsa'a̱ ji'i̱ lo'o ndyuna ngu' cha' bi'.
―¿Tilaca laca nu taca ji'i̱ clyaá ji'i̱ nu cuxi nu ntsu'u chalyuu cha' tyalaa ca slo ycui' Ndyosi lacua? ―nacui̱ ngu' ji'i̱ Jesús li'.
26―Bi' laca sca cha' nu ná nchca cua'ni ni sca ñati̱ chalyuu; pana ycui' Ndyosi ni, nchca ji'i̱ Ni cua'ni cha' tyalaa ngu' slo Ni ―nacui̱ Jesús ji'i̱ ngu'.
27Li' nchcui' Pedro xi lo'o Jesús:
―Lo'o cuare ni, cua nguxtyanu ya lcaa na nu ntsu'u ji'i̱ ya cha' tya'a̱ ya lo'o nu'u̱, ñi'ya̱ nu nacui̱ nu'u̱ cha' cua'ni ya ―nacui̱ Pedro ji'i̱ Jesús―. ¿Na laca caja ji'i̱ ya nde loo la li'?
28―Cha' liñi nchcui' na' lo'o ma̱ juani ―nacui̱ Jesús ji'i̱ ngu'―, cha' nu lo'o caca chalyuu cucui bi' ni, li' ca̱a̱ na' nu cua nda Ni 'na lijya̱a̱ cha' caca na' ñati̱; tsaa tucua na' ca su tso'o tsa ña'a̱ ca bi', cha' cua'ni cuayá' na' ji'i̱ lcaa ñati̱ chalyuu li'. Lo'o cu'ma̱ nu ndya'a̱ ma̱ lo'o na', tiya' la tyucua ma̱ lo tii tyucuaa tya'a yaca nu tso'o tsa ña'a̱, cha' cua'ni cuayá' ma̱ ji'i̱ tya'a ñati̱ ma̱, nu tii tyucuaa tya'a taju ngu' Israel bi'. 29Lo'o jua'a̱ cua ña'a̱ ca ñati̱ nu ntsu'u cha' tsaa tyijyu' cha' cua'ni ngu' cña cuentya jna', nu nguxtyanu lcaa na nu ntsu'u ji'i̱ ngu' cha' ndyu'ni ngu' cña bi', ná xtyanu na' ji'i̱ ngu' bi' jua'a̱ ti; masi tyi ngu', masi tya'a ngula ngu', masi sti ngu', masi xtya'a̱ ngu', masi sñi' ngu', masi yuu nu ntsu'u ji'i̱ ngu', masi xtyanu ngu' lcaa cha' bi', pana caja chalyuu nu ná nga'a̱ cha' tye ji'i̱ ngu'. Lo'o jua'a̱ xa' caja quiña'a̱ la cha' ji'i̱ ngu' bi', tsa ña'a̱ nu nguna' ji'i̱ ngu' bi' ngua ti' ngu'. 30Pana nu ngu' nu tyu'u tucua lo'o cua tye ti cha' bi' laca ngu' nu caca nde loo la; nu ngu' nu ndu'u tucua clyo, bi' ngu' laca nu tyanu nde chu̱' la li'.
Nu markerat:
SAN MATEO 19: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
