SAN MATEO 17
17
Cua ngutsa'a̱ ña'a̱ tyucui ña'a̱ loo Jesús ndu̱ slo ngu'
1Lo'o cua ndya'a scuá tsa̱, li' ndyaa lo'o Jesús ji'i̱ Pedro lo'o Jacobo lo'o Juan tya'a ngula Jacobo bi'; jacua tya'a ngu' bi' ndyaa ngu' lo xlya ca'ya cua̱. 2Li' laja lo'o na'a̱ ngu' ji'i̱ Jesús, cua ngutsa'a̱ ña'a̱ tyucui ña'a̱ loo yu li'; ndubi tsa ña'a̱ loo yu ñi'ya̱ ndubi xee cuichaa li'. Ñi'ya̱ sca xee nu ngati̱ tsa, jua'a̱ ngati̱ tsa ña'a̱ ste' yu. 3Lo'o li' ndu'u tucua jyo'o Moisés lo'o jyo'o Elías, ndu̱ ngu' nchcui' ngu' lo'o Jesús. Lo'o nu ngu' tya'a ndya'a̱ Jesús bi', na'a̱ ngu' ji'i̱ ngu' bi'. 4Li' nchcui' Pedro lo'o Jesús:
―Xu'na ―nacui̱ Pedro ji'i̱―, tso'o tsa cha' nga'a̱ ya re ―nacui̱―. ¿Ha tso'o nti' nu'u̱ si cuiñá na' sna tya'a chcua'ya? Tsaca laca su tyi'i̱ ycui' nu'u̱, chaca su tyi'i̱ La Moisés, chaca su tyi'i̱ La Elías.
5Pana laja lo'o nchcui' Pedro, li' ndu'u tucua sca coo nu ngati̱ tsa ña'a̱, nu ndubi tsa ña'a̱, ngüixi̱i̱ chu̱' ngu', tyucui ña'a̱ su ndu̱ ngu'. Li' nguañi xtyi'i sca ñati̱. Hora ti ngua cuayá' ti' ngu' bi', cha' nchcui' ycui' Ndyosi lo'o ngu' laja coo bi':
―La cui' yu re laca Sñi' na', tyaca'a tsa yu 'na ―nacui̱ Ni―. Tso'o tsa ntsu'u tyiquee na' ña'a̱ na' ji'i̱ yu. Cua'a̱ tso'o jyaca̱ ma̱ ji'i̱ lcaa cha' nu chcui' Sñi' na' re lo'o ma̱.
6Lo'o ndyuna nu ngu' nu ndyaca tsa'a̱ bi' cha' nu nchcui' ycui' Ni cuentya ji'i̱ Jesús, li' nclyú ngu' bi' nde lo yuu cha' ndyutsi̱i̱ tsa ngu' bi'. 7Lo'o li' ngusta ya' Jesús hichu̱' ngu' bi'.
―Tyatu̱ ma̱ ―nacui̱ Jesús ji'i̱ ngu'―, ná cutsi̱i̱ ma̱ tsiya' ti.
8Laja li' nxña'a̱ nu sna tya'a ngu' nu ndyaca tsa'a̱ bi' su ndu̱ jyo'o bi' tsa̱ la, pana na'a̱ ngu' cha' nga'aa ndu̱ ngu' bi'; sca ti Jesús ndu̱ ca bi' li'.
9Lo'o lijya̱ nda'ya ti'i̱ ngu' sii' ca'ya bi', li' ngulo Jesús cña ji'i̱ ngu' nu ndyaca tsa'a̱ ji'i̱:
―Ná cacha' ma̱ ji'i̱ xa' ñati̱ ñi'ya̱ ngua cha' nu cua na'a̱ ma̱ lo xlya ca'ya jua tsa̱ ―nacui̱ Jesús ji'i̱ ngu' bi'―. Nu lo'o cua ngujuii ycui' na' nu cua nda Ni 'na lijya̱a̱ cha' caca na' ñati̱, nu lo'o tyu'ú na' chaca quiya', li' taca cacha' ma̱ cha' bi' ji'i̱ xa' ñati̱.
10Li' nchcuane ngu' nu ndyaca tsa'a̱ ji'i̱ Jesús:
―¿Ñi'ya̱ ndyu'u cha' nu nchcui' cha' jo'ó lacua? Nchcui' cha' clyo la ntsu'u cha' ca̱a̱ jyo'o Elías nde chalyuu chaca quiya' ―nacui̱ ngu' ji'i̱.
11―Chañi cha' ca̱a̱ Elías clyo cha' cua'ni cho'o ji'i̱ lcaa lo na ―nacui̱ Jesús―. 12Pana cha' liñi cacha' na' ji'i̱ ma̱ juani cha' cua ñaa nu laca Elías; ná ndyuloo ngu' ji'i̱, bi' cha' cua ngua'ni cuxi ngu' lo'o. Lo'o jua'a̱ xcube' ngu' jna' nu cua nda Ni 'na lijya̱a̱ cha' caca na' ñati̱.
13Li' ngua cuayá' ti' ngu' cha' ji'i̱ jyo'o Juan nu ntyucuatya ji'i̱ ngu' laca cha' nu cua nchcui' ca Jesús lo'o ngu'.
Ngua'ni Jesús jo'o ji'i̱ sca yu cuañi' nu nxalú cui'i̱ cuxi ji'i̱
14Lo'o cua ngua'ya ngu' sii' ca'ya bi', xa' ndyalaa ngu' su ndi'i̱ ngu' quiña'a̱ lo'o nu xa' la tya'a ngu' nu ndyaca tsa'a̱ ji'i̱ Jesús bi'. Hora ti ñaa sca nu qui'yu, ndyatu̱ sti̱' yu slo Jesús, nchcui' yu bi' lo'o li':
15―Cua'ni tya'na ti' nu'u̱ ji'i̱ sñi' na', cusu' ―nacui̱ yu bi' ji'i̱ Jesús―. Quicha tsa ti' sñi' na' cha' lu'ba tsa nxalú cui'i̱ cuxi ji'i̱ yu; ndu'ni cui'i̱ bi', cha' lu'ba tsa nclyú yu lo quii', lu'ba ti nxtyú ji'i̱ yu lo hitya. 16Ñaa lo'o na' ji'i̱ nu quicha bi' slo ngu' nu ndyaca tsa'a̱ jinu'u̱, pana ná ngua ji'i̱ ngu' cua'ni ngu' cha' tyaca tso'o yu.
17―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.
18Li' ngulo Jesús cña ji'i̱ cui'i̱ cuxi bi', cha' tyu'utsu' tsiya' ti ji'i̱ nu quicha bi'. 19Ca tiya' la xi nchcuane ngu' nu ndyaca tsa'a̱ ji'i̱ Jesús su ntucua ycui' ti ngu':
―¿Ni cha' ná ngua ji'i̱ ya culo ya ji'i̱ cui'i̱ cuxi bi' lacua? ―nacui̱ ngu' ji'i̱ Jesús.
20Li' nguxacui̱ Jesús cha' ji'i̱ ngu' bi':
―Xti ti cha' jlya ti' ma̱ ji'i̱ ycui' Ni, bi' cha' ná ngua ji'i̱ ma̱ ―nacui̱ Jesús ji'i̱ ngu' bi'―. Cha' liñi nchcui' na' lo'o ma̱ juani, cha' si chañi ca cha' jlya ti' ma̱ cha' ji'i̱ ycui' Ndyosi, masi tsa lo cua sca si'yu cuxee ti nu piti tsa, si jua'a̱ ti jlya ti' ma̱ cha' ji'i̱ Ni, li' taca chcui' ma̱ lo'o ca'ya cua̱ nde: “Tyu'utsu' nu'u̱ tyaa nu'u̱ chaca se'i̱ cajua la”, ñacui̱ ma̱ ji'i̱. Lo'o li' taquiya' ca'ya bi' cha' nu nchcui' ma̱ lo'o, tyu'utsu' ca'ya bi' tsaa chaca se'i̱ li'. Ná ntsu'u cha' nu ná caca cua'ni ma̱ si chañi ca cha' jlya ti' ma̱ 'na. 21Lo'o jua'a̱ cha' culo ma̱ ji'i̱ cui'i̱ cuxi bi' ni, ná ca culo ma̱ ji'i̱ cui'i̱ bi' si ná cua'a ma̱ xi ji'i̱ ycui' ca ma̱; tso'o si ná cacu ma̱ tyaja laja lo'o chcui' ma̱ lo'o ycui' Ndyosi cuentya ji'i̱ nu quicha bi'. Jua'a̱ cua'ni ma̱ ña'a̱ cuayá' nu tyu'u cui'i̱ bi' tyaa.
Xa' nchcui' Jesús lo'o ngu' cha' ntsu'u cha' cajaa ycui' yu
22Lo'o li' tya ndya'a̱ ngu' xi loyuu su cuentya Galilea, nu Jesús lo'o ngu' nu ndyaca tsa'a̱ ji'i̱. Laja lo'o ndya'a̱ ngu' nchcui' Jesús lo'o ngu' bi':
―Ntsu'u sca ñati̱ nu cujui' cresiya 'na ji'i̱ ngu' tisiya cha' cua'ni cuxi ngu' lo'o na', masi cua nda Ni 'na lijya̱a̱ cha' caca na' ñati̱; 23cujuii ngu' bi' jna' li'. Pana tyu'ú na' chaca quiya' tsa̱ nchca tyuna li'.
Ngua xñi'i̱ tsa ti' ngu' lo'o ndyuna ngu' cha' bi'.
Nda ngu' cñi cuentya ji'i̱ laa tonu
24Cua tsa̱ xi ndyalaa ngu' quichi̱ Capernaum, lo'o li' ndyalaa xi ngu' nu laca cña ne' laa slo Pedro; nxuti'i̱ ngu' bi' cñi cuentya ji'i̱ laa tonu nu ntucua nde Jerusalén. Li' nchcui' ngu' bi' lo'o Pedro:
―Nu mstru ji'i̱ ma̱ ni, ¿ha lo'o yu nda yu cñi ne' laa bi'? ―nacui̱ ngu' ji'i̱ Pedro.
25―Nda yu ―nacui̱ Pedro ji'i̱ ngu' li'.
Nu lo'o cua ndyalaa Pedro toni'i̱, li' nchcui' Jesús lo'o yu:
―¿Ñi'ya̱ nti' nu'u̱, Simón? ―nacui̱ Jesús ji'i̱ Pedro―. ¿Ti ji'i̱ nclyo ngu' nu laca loo cñi? ¿Ha culo ngu' cñi ji'i̱ sñi' ngu' nti' nu'u̱? ¿Ha si'i ji'i̱ xa' ñati̱ culo ngu' cñi?
26―Ji'i̱ xa' ñati̱ nclyo ngu' nu laca loo cñi, si'i ji'i̱ sñi' ―nacui̱ Pedro li'.
―Chañi hi̱. Ná lo'o sñi' ngu' nda caya' cuentya ji'i̱ cha' bi' lacua ―nacui̱ Jesús ji'i̱ Pedro―. 27Pana ná nti' na cha' ca ñasi̱' ngu' ji'na, ngu' nu laca loo ne' laa tonu, bi' cha' yaa clya nu'u̱ to' tayu' cha' cu̱ nu'u̱ chcua̱ xñi cualya lo hitya, cha' xñi nu'u̱ ji'i̱ sca cualya. Li' taya' nu'u̱ ji'i̱ cualya nu caja jinu'u̱ clyo, scana tu'ba cualya bi', cha' culo nu'u̱ cñi nu ntsu'u tu'ba ni'; tyu'u scua cñi bi' cha' ta nu'u̱ cñi ji'i̱ ngu' cuentya jinu'u̱, lo'o jua'a̱ cuentya jna'.
Nu markerat:
SAN MATEO 17: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
