Marcos 13
13
Templo tuñichisqa kananmanta
(Mt 24.1-2. Lc 21.5-6)
1Templomanta Jesús lloqsichkaptinmi huknin discipulon nirqa:
Yachachikuq ¡kay suma-sumaq templotawan ruminkunata qaway! nispan.
2Chaymi Jesusñataq nirqa:
¿Qawachkankichu kay suma-sumaq templota? Manam chulla rumillapas perqasqaqa puchunqachu, lliwmi tuñichisqa kanqa, nispa.
Jesuspa kutimunanpa ñawpaqninta imakunam pasakunanmanta
(Mt 24.3-28; Lc 21.7-24; 17.22-24)
3Chaymantam templopa chimpan Olivos moqoman rirqaku. Chaypi Jesús tiyaykuptinmi, Pedrowan Jacobo, Juan hinaspa Andrés sapaqpi tapurqaku:
4Yachachikuq ¿haykapitaq kay nisqaykikunaqa kanqa? ¿Ima señalkunataq kanqa tukuy chaykuna cumplikusqanta yachanaykupaq? nispanku.
5Hinaptinmi Jesusñataq nirqa:
Pipas pantachisunaykichikmantayá allinta cuidakuychik. 6Achkaqmi ñoqapa sutiypi hamunqaku: “Ñoqam Cristo kani” nispanku; chaynata rimaspankum achkaqta pantachinqaku.
7Guerrakunamanta otaq guerrakuna kananmanta rimayta uyarispaykichikqa amam manchakunkichikchu, chaykunaqa pasakunanpunim, ichaqa manaraqmi kay tiempopa tukupayninraqchu. 8Huk nacionmi huk nacionpa contranpi hatarinqa, huk reymi huk reypa contranpi hatarinqa; terremotokunapas kaypi chaypim kanqa, muchuykunapas kanqam. Chaywanpas kaykunaqa ñakariykunapa qallariyllanraqmi.
9Qamkunaqa kikikichikyá cuidakuychik, juezkunaman entregasqam kankichik, sinagogakunapim maqasqa kankichik. Ñoqaraykum kamachikuqkunapa chaynataq reykunapa qayllanman apasqa kankichik, chaynapim paykunamanpas ñoqamanta willakunkichik. 10Manaraq kay tiempo tukuchkaptinmi kay evangelio lliw nacionkunapi willakusqa kanqa. 11#Mt 10.17-20; Lc 12.11-12.Autoridadkunaman apasuptikichikqa amam llakikunkichikchu imam rimanaykichikmantaqa, aswanqa Diosmi yachachisunkichik chay ratopi imam rimanaykichiktaqa, manam kikillaykichikmantachu rimankichikqa. Chuya Espiritum yachachisunkichik imam rimanaykichikta.
12Huk runam wawqenta wañuyman entreganqa, taytapas churintam entreganqa; wawa-churikunapas tayta-mamankupa contranpi hatarispam wañuchinqaku. 13#Mt 10.22.Ñoqaraykum lliw runakuna cheqnisunkichik, ichaqa tukupaykama takyaqmi salvasqa kanqa.
14 #
Dn 9.27; 11.31; 12.11. Sichum #13.14 Kay parteqa ñawpaq manuscritokunapiqa manam kanchu, ichapas Mateopa nisqanta churamunmanku karqa. (Mt 24.15)[Profeta Danielpa qellqasqanman hina] templopi millakuypaq kaqkuna ruwasqanta rikuspaykichikqa (pipas kayta leeqqa entiendechunyá), Judeapi kaqkunayá orqokunaman ayqeychik. 15Wasipa hawanpi kaqpas amañayá wasinmanqa imapas hurqoqqa uraykuchunñachu. 16#Lc 17.31.Chakrapi kaqpas amañayá capan hoqariqqa kutichunchu. 17¿Imaynaraq kanqaku chay punchawkunapi wiksayuq otaq ñuñuq wawayuq warmikunaqa? 18Diostayá mañakuychik kaykunaqa ama para tiempopichu kananpaq. 19#Dn 12.1; Ap 7.14.Chay punchawkunapiqa hatu-hatun ñakariymi kanqa, chayna ñakariyqa manam kay pachata Dios unanchasqanmanta kunankamapas karqachu, manataqmi qepamanpas kanqachu. 20Sichum chay punchawkunata mana Dios asllayachiptinqa manachá pipas wañuymanta librakunmanchu. Aswanqa akllasqankunaraykum chay punchawkunata asllayachinqa.
21Chaynaqa, sichum pipas nisunkichik: “Qawaychik, kaypim Cristo kachkan”, otaq “Wakpim Cristo kachkan” nispa, hinaptinqa amam creenkichikchu. 22Cristo tukuqkunawan profeta tukuqkunam rikurimunqaku, hinaspam admirakuypaq milagrokunata ruwaspanku Diospa akllasqan kaqkunatapas engañanqaku. 23Chaynaqa, waqaychakuychikyá, manaraq imapas pasakuchkaptinmi tukuy kaykunataqa willachkaykichikña.
Imaynam Jesucristopa kutimunanmanta
(Mt 24.29-35, 42-44. Lc 21.25-36)
24Chay punchawkunapi ñakariykuna pasaruptinmi, inti tutayarunqa, killapas manañam kanchanqañachu, 25#Is 13.10; Ez 32.7; Jl 2.31; Ap 6.12-13.chaskakunam wichimunqa, cielokunapi tukuy ima kaqkunapas katkatatanqam. 26#Dn 7.13; Ap 1.7.Chaymi runapa Churinta puyupi tukuy atiyniywan hinaspa kanchariyniywan hamuchkaqta llapallan runakuna rikunqaku. 27Paymi angelninkunata kamachinqa llapallan akllasqaykunata kay pachapa patanmanta-patankama may karupiña kaptinkupas huñumunankupaq.
Jesucristoqa qonqayta kutimunanmanta
(Mt 24.32-42)
28Higos sachamantayá yachaychik: Kallmankuna llulluyariptinmi llaqenkuna ikllimun, chaymi yachankichik qoni tiempo hichpamusqanta. 29Chaynataqmi qamkunapas, kay nisqaykuna pasakuqta rikuspaykichikqa, runapa Churin kutimunan tiempo hichpallaña kasqanta yachankichik. 30Cheqaptapunim nikichik, tukuy kaykunaqa cumplikunqa manaraqpas kay miray runakuna tukuchkaptinmi. 31Hanaq pachawan kay pachapas tukunqam, palabraykunam ichaqa wiñaypaq takyanqa.
32 #
Mt 24.36. Chaywanpas ima punchawmi hinaspa imay horatam runapa Churin kutimunantaqa manam pipas yachanchu, hanaq pachapi angelkunawan runapa Churinpas manam yachankuchu, aswanqa Dios Taytallam.
33Chaynaqa, rikchan-rikchanlla kaspayá Diosta mañakuychik, manam yachankichikchu haykapim kutimunayta. 34#Lc 12.36-38.Nisqayqa rikchakun, imaynam huk runa karuman illananpaq serviqninkunaman nanachikunankupaq wasinta saqeykuqmanmi, paymi sapakamaman imam ruwanankupaq saqerqa. Punku cuidaqtapas rikchan-rikchanlla kananpaqmi kamachirqa. 35Chaynaqa, qamkunapas rikchan-rikchanllayá kaychik, manam yachankichikchu wasiyuqpa imay horam kutimunantapas. Ichapas tutaykuqta, chawpi tutata, utulu waqayta otaq achikyamuytapas kutiramunqa. 36Yanqañataq qonqaymanta chayaramuspan puñuchkaqta tariramusunkichikman. 37Qamkunaman willasqaytaqa lliwmanmi willani, chaynaqa rikchan-rikchanllayá kaychik, nispa.
Nu markerat:
Marcos 13: RCHQ2
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chuya Qellqa Revisión @ Sociedad Bíblica Peruana, 2012
