Mateo 28
28
Jesuspa kawsarimusqanmanta
(Mr 16.1-8. Lc 24.1-12. Jn 20.1-10)
1Samana punchaw pasaruptinmi, domingo achikyaqman Magdala llaqtayuq Mariawan huknin María, sepultura qawaq rirqaku. 2Qonqaymantam huk terremoto pasakurqa; Señorpa angelninñataqmi hanaq pachamanta uraykamuspan sepulturanman asuykurqa, hinaspam rumita asurachispan chaypa hawanpi tiyaykurqa. 3Rikchayninmi karqa llipya hina, pachanñataqmi riti hina yuraq-yuraq. 4Payta rikuykuspankum Soldadokunapas manchakuymanta katkatataspanku wañusqa hina rikurirurqaku. 5Chay angelmi warmikunata nirqa:
Ama manchakuychikchu, qamkunaqa chakatarusqanku Jesustam maskachkankichik. 6Payqa manam kaypiñachu, nisqanman hinam kawsarirunña, hamuspayá maypim churasqankuta qawaykuychik. 7Hinaspayá utqayman rispa discipulonkunaman willamuychik: “Jesusqa kawsarirunmi, Galileamanmi ñawpachkan, chaypim tupankichik”, nispa. Chayllam niykunay karqan.
8Chaymi warmikunañataq sepulturamanta mancharisqallaña hinaspa llumpay kusisqa lloqsiramuspanku discipulokunaman willamunankupaq kallparqaku. 9Richkaptinkum paykunaman Jesús rikuriykuspan rimaykurqa. Paykunañataqmi asuykuspanku Jesusta chakinmanta abrazakuykuspanku hatuncharqaku. 10Chaymi Jesusñataq nirqa:
Ama manchakuychikchu, wawqeykunaman willamuychik Galilea lawman rinankupaq, chaypiñam tupasaqku, nispa.
Soldadokunapa imam willakusqanmanta
11Warmikuna richkaptinkum, llaqtaman wakin soldadokuna rispanku tukuy imam pasakusqanta sacerdotekunapa kamachiqninkunaman willamurqaku. 12Chay kamachikuqkunañataqmi ancianokunawan tanteanakunankupaq huñunakurqaku. Hinaspankum soldadokunaman achka qollqeta pagaruspanku 13nirqaku:
Qamkunam ninkichik: “Puñunaykukamam discipulonkuna hamuruspanku Jesuspa cuerponta suwarusqaku”, nispaykichik. 14Sichum chayta gobernador yacharuptinqa, ñoqaykum qamkunapa rantikichikpi rimarisaqku, chaynapi ama sasachakuyman chayanaykichikpaq, nispanku.
15Soldadokunañataqmi qollqeta chaskikuruspanku paykunapa yachachisqanta hinalla ruwarqaku. Chay llullakuspa rimasqankutam llapa judiokuna kunan punchawkama hinalla willakunku.
Discipulonkunata Jesús kamachisqanmanta
(Mr 16.14-18. Lc 24.36-49. Jn 20.19-23)
16 #
Mt 26.32; Mr 14.28. Chunka hukniyuq discipulonkunam Galileaman rirqaku, Jesuspa nisqan orqoman. 17Chaymi Jesusta rikuykuspanku hatuncharqaku, wakiqninkuñataqmi iskayrayarqaku. 18Chaymi Jesusñataq paykunaman asuykuspan nirqa:
Diosmi tukuy atiyta qoykuwan hanaq pachapipas chaynataq kay pachapipas. 19#Hch 1.8.Chaynaqa, llapallan nacionkunaman riychik, hinaspayá discipulokunata hatarichimuspa, Taytapa, Churipa, Chuya Espiritupa sutinpi bautizamuychik. 20Qamkunaman tukuy ima kamachisqayta kasukunankupaq yachachimuychik. Ñoqaqa sapa punchawmi qamkunawan kasaq kay pacha puchukanankama, nispan.
Nu markerat:
Mateo 28: RCHQ2
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chuya Qellqa Revisión @ Sociedad Bíblica Peruana, 2012
