يُوحَنَّا 3
3
الوالودة الجاية بالروح
1وَ فِي نَادُمْ وَاحِدْ مِنْ كُبَارَاتْ الْيَهُودْ أُسْمَهْ نِقُدِيمُسْ وَ هُو فَرِيزِي. 2وَ هُو جَاءْ لِعِيسَى فِي اللَّيْل وَ قَالْ لَيَّهْ: «سَيِّدْنَا، نَعَرْفُوا كَدَرْ إِنْتَ مُعَلِّمْ الْجَايِ مِنْ اللّٰهْ. نَادُمْ مَا يَقْدَرْ يِسَوِّي الْعَجَايِبْ الْإِنْتَ تِسَوِّيهُمْ إِلَّا كَنْ اللّٰهْ قَاعِدْ مَعَايَهْ». 3وَ عِيسَى رَدَّ لَيَّهْ وَ قَالْ: «أَسْمَعْ نُقُولْ لَيْك الْحَقّ، نَادُمْ مَا يَقْدَرْ يِشِيفْ مَمْلَكَةْ اللّٰهْ إِلَّا كَنْ هُو مَوْلُودْ مِنْ جَدِيدْ.#3:3 مَوْلُودْ مِنْ جَدِيدْ: معنى الكلام دا باللُغّة الأصْليّة هو مَوْلود مرّتَيْن أو مَوْلود من فَوْق.»
4وَ نِقُدِيمُسْ سَأَلَهْ وَ قَالْ: «كَنْ نَادُمْ بِقِي كَبِيرْ خَلَاصْ كِكَّيْف يَلْدَوْه مِنْ جَدِيدْ؟ هَلْ يَقْدَرْ يِقَبِّلْ فِي بَطُنْ أَمَّهْ أَشَانْ هِي تَلْدَاهْ مَرَّةْ تَانِيَةْ وَلَّا؟» 5وَ عِيسَى رَدَّ لَيَّهْ وَ قَالْ: «أَسْمَعْ نُقُولْ لَيْك الْحَقّ، نَادُمْ مَا يَقْدَرْ يَدْخُلْ فِي مَمْلَكَةْ اللّٰهْ إِلَّا بِالْوَالُودَةْ الْجَايَةْ بِأَلْمِي وَ بِرُوحْ اللّٰهْ. 6الْمَوْلُودْ مِنْ إِنْسَانْ، هُو إِنْسَانْ وَ لَاكِنْ الْمَوْلُودْ مِنْ الرُّوحْ، هُو رُوحْ. 7مَا تِعَجِّبْ مِنْ كَلَامِي كَنْ قُلْت لَيْك وَاجِبْ تَبْقَى مَوْلُودْ مِنْ جَدِيدْ. 8الرِّيحْ تُسُوقْ فِي أَيِّ بَكَانْ الْهِي تِدَوْرَهْ. وَ النَّاسْ يَسْمَعَوْا حِسَّهَا لَاكِنْ مَا يَعَرْفُوا الْبَكَانْ الْجَايَةْ مِنَّهْ وَ لَا الْمَاشَةْ عَلَيَّهْ. وَ يُكُونْ مِثِلْ دَا لِأَيِّ نَادُمْ الْمَوْلُودْ مِنْ الرُّوحْ.»
9وَ نِقُدِيمُسْ قَالْ: «كِكَّيْف دَا يَبْقَى؟» 10وَ عِيسَى رَدَّ لَيَّهْ وَ قَالْ: «إِنْتَ قَاعِدْ تِعَلِّمْ بَنِي إِسْرَائِيلْ. كِكَّيْف مَا فِهِمْت الْكَلَامْ دَا؟ 11أَسْمَعْ نُقُولْ لَيْك الْحَقّ، نِحَجُّوا بِالشَّيّءْ النَّعَرْفُوهْ وَ نَشْهَدَوْا فِي الشَّيّءْ الشِّفْنَاهْ لَاكِنْ إِنْتُو مَا تَقْبَلَوْا شَهَادِتْنَا. 12حَجَّيْت لَيْكُو فِي الشَّيّءْ الْيَبْقَى فِي الْأَرْض وَ مَا آمَنْتُوا. وَ كِكَّيْف تِآمُنُوا كَنْ نِحَجِّي لَيْكُو فِي الشَّيّءْ الْيَبْقَى فِي السَّمَاءْ؟ 13مَا فِي نَادُمْ وَاحِدْ طَلَعْ فِي السَّمَاءْ إِلَّا إِبْن الْإِنْسَانْ النَّزَلْ مِنْ السَّمَاءْ.
14«فِي الصَّحَرَاء، مُوسَى رَفَعْ الدَّابِي#3:14 مُوسَى رَفَعْ الدَّابِي: بإذِن اللّه، النبي مُوسَى صنع دابي من نحاس و رفعه فَوْق في عود أشان ينجّي الناس من غضب اللّه. التاريخ دا تلقوه في عَدد 21:4-9. فَوْق وَ لَابُدَّ إِبْن الْإِنْسَانْ كُلَ يَرْفَعَوْه مِثِلْ دَا 15أَشَانْ كُلَّ النَّاسْ الْيِآمُنُوا بَيَّهْ يَلْقَوْا الْحَيَاةْ الْأَبَدِيَّةْ. 16وَ اللّٰهْ حَبَّ نَاسْ الدُّنْيَا بِلْحَيْن وَ أَشَانْ دَا، هُو أَنْطَاهُمْ إِبْنَهْ الْوَاحِدْ أَشَانْ أَيِّ نَادُمْ الْيِآمِنْ بَيَّهْ مَا يَهْلَكْ لَاكِنْ يَلْقَى الْحَيَاةْ الْأَبَدِيَّةْ. 17اللّٰهْ رَسَّلْ إِبْنَهْ فِي الدُّنْيَا مَا لِيِحَاكِمْ نَاسْ الدُّنْيَا لَاكِنْ لِيِنَجِّيهُمْ بَيَّهْ. 18النَّادُمْ الْمُؤمِنْ بِعِيسَى الْمَسِيحْ، اللّٰهْ مَا يِحَاكِمَهْ. وَ لَاكِنْ النَّادُمْ الْمَا مُؤمِنْ بَيَّهْ، حَاكَمَهْ خَلَاصْ أَشَانْ النَّادُمْ دَا أَبَى مَا آمَنْ بِإِبْن اللّٰهْ الْوَاحِدْ. 19وَ دَاهُو الْحُكُمْ، نُورْ اللّٰهْ دَخَلْ فِي الدُّنْيَا وَ النَّاسْ حَبَّوْا الضَّلَامْ وَ مَا دَوَّرَوْا النُّورْ أَشَانْ عَمَلْهُمْ شَيْن. 20أَيِّ نَادُمْ الْقَاعِدْ يِسَوِّي عَمَلْ فَسِلْ يَكْرَهْ النُّورْ وَ مَا يَجِي فِي النُّورْ أَشَانْ مَا يِدَوْر عَمَلَهْ الْفَسِلْ يِنْشَافْ. 21أَيِّ نَادُمْ الْيِسَوِّي الْحَقّ يَجِي فِي النُّورْ أَشَانْ يَبْقَى وَاضِحْ كَدَرْ الْعَمَلْ الْهُو سَوَّاهْ دَا، سَوَّاهْ حَسَبْ الْيِدَوْرَهْ اللّٰهْ.»
كلام يَحْيَى في عِيسَى المسيح
22وَ بَعَدَيْن، عِيسَى شَالْ تَلَامِيذَهْ وَ مَشَى دَارْ الْيَهُودِيَّةْ وَ قَعَدْ مَعَاهُمْ أَيَّامْ. وَ فِي الْبَكَانْ دَا، قَمَّ يِغَطِّسْ النَّاسْ. 23وَ يَحْيَى كُلَ قَاعِدْ يِغَطِّسْ النَّاسْ. هُو قَاعِدْ فِي بَكَانْ أُسْمَهْ عَيْن نُونْ قَرِيبْ لِحِلَّةْ سَالِيمْ أَشَانْ فِي الْبَكَانْ دَا، فِي أَلْمِي كَتِيرْ. وَ النَّاسْ جَايِينْ لَيَّهْ أَشَانْ هُو يِغَطِّسْهُمْ. 24وَ دَا وَكِتْ لِسَّاعْ مَا كَرَبَوْا يَحْيَى فِي السِّجِنْ.
25وَ تَلَامِيذ وَاحِدِينْ هَنَا يَحْيَى قَمَّوْا يِغَالُطُوا مَعَ يَهُودِي وَاحِدْ فِي وَضُوءْ الْيَهُودْ. 26وَ التَّلَامِيذ جَوْا لِيَحْيَى وَ حَجَّوْا لَيَّهْ وَ قَالَوْا: «يَا سَيِّدْنَا، النَّادُمْ الْكَانْ مَعَاكْ وَكِتْ إِنْتَ قَاعِدْ غَادِي لِبَحَرْ الْأُرْدُنْ، هُو الْإِنْتَ شَهَدْت لَيَّهْ، هُو كُلَ قَاعِدْ يِغَطِّسْ النَّاسْ. وَ كُلَّ النَّاسْ مَاشِينْ لَيَّهْ.»
27وَ يَحْيَى رَدَّ لَيْهُمْ وَ قَالْ: «النَّادُمْ مَا يَلْقَى شَيّءْ مِنْ اللّٰهْ إِلَّا كَنْ اللّٰهْ أَنْطَاهْ. 28إِنْتُو ذَاتْكُو سِمِعْتُوا كَلَامِي وَ تَقْدَرَوْا تَشْهَدَوْا لَيِّ. أَنَا قُلْت أَنَا مَا الْمَسِيحْ لَاكِنْ اللّٰهْ رَسَّلَانِي أَشَانْ نَمْشِي قِدَّامَهْ. 29النَّادُمْ الْعِنْدَهْ الْعَرُوسْ، هُو بَسْ الْعَرِيسْ. وَ رَفِيقْ الْعَرِيسْ هُو يَقِيفْ جَنْبَهْ وَ يَسْمَعْ كَلَامَهْ. وَ كَنْ يَسْمَعْ حِسّ الْعَرِيسْ، هُو فَرْحَانْ بِفَرْحَةْ كَبِيرَةْ. وَ الْفَرْحَةْ دِي، هِي فَرْحَةْ هِنْتِي وَ هَسَّعْ أَنَا فَرْحَانْ مَرَّةْ وَاحِدْ. 30وَاجِبْ عِيسَى يَبْقَى عَالِي وَ أَنَا نَبْقَى تِحِتْ.
31«الْجَايِ مِنْ فَوْق هُو أَكْبَرْ مِنْ كُلَّ النَّاسْ. وَ النَّادُمْ الْمِنْ الْأَرْض هُو هَنَا الْأَرْض بَسْ وَ يِحَجِّي فِي شَيّءْ هَنَا الْأَرْض. الْجَايِ مِنْ السَّمَاءْ هُو أَكْبَرْ مِنْ كُلَّ النَّاسْ. 32هُو شَاهِدْ فِي الشَّيّءْ الشَّافَهْ وَ السِّمْعَهْ وَ لَاكِنْ النَّاسْ مَا يِدَوْرُوا شَهَادْتَهْ. 33وَ أَيِّ نَادُمْ الْقِبِلْ شَهَادْتَهْ أَكَّدْ كَدَرْ كَلَامْ اللّٰهْ صَحِيحْ. 34النَّادُمْ الْاللّٰهْ رَسَّلَهْ يِحَجِّي الْكَلَامْ الْجَايِ مِنْ اللّٰهْ أَشَانْ اللّٰهْ يِنَزِّلْ فَوْقَهْ رُوحَهْ بَلَا حَدّ.
35«اللّٰهْ يِحِبّ إِبْنَهْ وَ أَنْطَاهْ كُلَّ شَيّءْ فِي إِيدَيْنَهْ. 36أَيِّ نَادُمْ الْآمَنْ بِإِبْن اللّٰهْ لِقِي الْحَيَاةْ الْأَبَدِيَّةْ. لَاكِنْ أَيِّ نَادُمْ الْيَابَى مَا يِتَابِعْ كَلَامْ إِبْن اللّٰهْ، هُو مَا يَلْقَى الْحَيَاةْ الْأَبَدِيَّةْ أَشَانْ غَضَبْ اللّٰهْ قَاعِدْ فَوْقَهْ.»
Nu markerat:
يُوحَنَّا 3: ع.د.ت19
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
La Bible en arabe tchadien © Alliance biblique du Tchad, 2019
