मरकुसो 2

नम्क्योंन ओ टेहची मीहबी ठीक लहज़ी

(मत्ती 9:2-8; लूको 5:17-26)

1थोड़े ध्याड़ो थल यीशु यह्च़ा कफरनहूम नगरंङ वापिस अति, दंङ दोरकी मीहतिंङ पता लेहती कि यीशु इच्च़ा चुंङरिंङ तोह। 2दंङ धोंण मीहरे ठ्रोहका शुहइरेह कि पेतंङु कछंङ ला ठाहरि मा तोहई; दंङ दुह दोतिंङ परमेश्वरो बचन शच़ि लेहती। 3दंङ थोड़े अरे मीहज़ी इच्च़ा नम्क्योंनो टेहची नतपाबि पिमी मीहतु दोहरची कुरच़े दोहर हतिरे। 4महस मीहरे शुहबीरंङ साते दोरे यीशुज़ि कछंङ पीपि मरतिरेह, दंङ दोरे लंगदिंङ हुंच़ा इलिरे ए अंऊ ठाहरीरिंङ यीशु तोहई दंङ दुह ठाहरीऊ लंङदी फ्रक्शे अम बड़ाके च़रतिर, दंङ अंऊ मंजीऊ टोईच़ी दुह नतपा तोहई, दुह मंजी रंङ साते दोरच़ी ए षोड़िंङ यीशु कछंङ तकशे च़रतिरे। 5यीशु ज़ि दोतु विशवास खांई दुह नम्किउओन टेहची मीह रंङ साते कुतोह, “हे मित्रा काह पाप माफ शुई।”

6दंङ अंईयों यहुदी शास्त्री रेह दुह चुंङरिंङ तोईरे, एनातु-एनातु सेमरिंङ विचार लहज़ी लेखी तोईरे, 7“दी मीह झांह ठ्रोह गप्पा छिले क्वात? दी ता परमेश्वरो बुराई लहज़ाते! परमेश्वरो अलावा ऊई अच़िला पाप माफ लेह मरच़ि!” 8यीशुज़ि दोहथल ए एनोह सेहमा रिंङ दी ञेंई च़रति कि दोच़ी एनोह सेहमा रिंङ छी विचार लहज़ातोर, दोतंङ साते कुतोह, “केहच़ी केन्दु सेमरिङ दी विचार छिले हप्तांई? 9योह्च़े छी तो? कि टेची मीहबी दी कुट्री कि कनु पाप माफ शुहचे इलि, या दी कुट्री कि अहच़ु केनोह मंजी कुरच़े देखा नोखा जो? 10पर केहच़ी दी ञेंहनि कि गेह मीहू योह बि धरतीऊ टोईच़ी पाप माफ लहज़िमी ला अधिकार तो।” दोई नम्क्योंन टेची दोबि कुतोह, 11“गेह करंङ साते कुट्रातग, अहच़ु केनोह मंजी कुरच़े चुंखा अच़ा इला।” 12दुह खड़े शुहचे भत्ते तु तंङशी एनोह मंजी कुरच़ा अच़ा इलि। दी खंड्रा भत्ते टठ शुहचे परमेश्वरो षटणा लहज़ी लेहतिर, “ञेंहच़ी धींगा चमत्कार अपेहल ला तंङषे मा शुह।”

लेवी बि अता कुट्री

(मत्ती 9:9-13; लूको 5:29-32)

13यीशु यहचा दोरच़ी हुंच़ा गलील झीलो कछंङ इलि, दंङ महसे मीहरे दोऊ कछंङ इलिरे, दंङ दुह दोतिंङ परमेश्वरो उपदेश रंड्री लेहकी तोहई। 14अपेहल दुह इपि लेहकी तोहई, दंङ दोई लेवी मिंदंङ इच्च़ा चुंगी लेहपच़ा तंङाते अंऊ हलफईऊ योह तोहई दुह एनोह चुंगी लेहप्च़िमी अड्डारिंङ बंङज़ा तोहई। दंङ यीशुज़ि दोहरंङ साते कुतोह, “गिऊ थले अता दंङ गिऊ चेला बणेंक इल।” दंङ दुह खड़े अच़ा एनोह कम ब्याड़ा लहजे यीशु थले शुहचे इलि।

15थोड़े ध्याड़ो थल यीशुए दोऊ चेलारे लेवीऊ चुंङ बगत ज़े लेहकी तोईरे। ता दोहथल महस चुंगी लेहपच़ा ए पापी#2:15 कानून माह मनेकच़र, यहूदीज़ि चुंगी लेहपच़ा लाह पापी चेहच़ातेर छना कुचे दोच़ी रोम सरकारो थल्जी ढबाह ठ्रोहका लहज़ातेर यीशुए दोऊ चेला रंङ साते बगत ज़े बंङज़ातेर। छना कुचे दोरे यीशु थले जोज़ातोर। 16यहुदी शास्त्री अति फरीसी ला कुट्री छना कुचे दोच़ी एनाबि धर्मी च़ेहसी ततोर, दोच़ी खंयातोर कि यीशु चुंगी लेहपच़ा रंङ साते अतिंङ दोच़ी पापी चेहच़ातेर ओ पापी रंङ साते बगत ज़्वा। दंङ दोच़ी यीशु ऊ चेला रंङ साते कुतोह, “यीशु पापी रंङ साते दंङ चुंगी लेपचाढ दोतंङ साते छिल्ला बगत ज़े लेहकी तोह?”

17यीशुज़ि दी रेड्रा दोतंङ साते कुतोह, “ठीक मीह बि वेदो ज़रूरत मशुहबी, टेची मीहबी शुहबी। गेह दुह मीहतिंङ बुलाच़ि अंज़े माहशुहगा अच़ि एनाबि धर्मी चेहच़ातोर, दंङ दोतिंङ बुलाच़ी अंज़े शुगाह अच़ि एनाबि पापी चेहच़ातोर।”

उपबासो बारे सवाल

(मत्ती 9:14-17; लूको 5:33-39)

18यूहन्ना ओ चेलारे ए फरीसी तु चेलारे छले ज़ेह मेह ब्रत लहज़ी लेहकी तोईरे, दंङ थोड़े अरे मीहच़ी यीशु कछंङ अंज़े दुह रुहक्च़ी लेहती कि, “युहन्नो चेलारे ए फरिसीतु चेलाज़ि छिले उपबास लहज़ातोर, दंङ कनु चेलारे ता उपबास मा लहज़ातोर?” 19यीशुज़ि दोतिंङ कुहतो, “अपेहल तचेक गेह घेंङौ चेला तु साते तोतोग, दोच़ी ब्रत माह लेह। छना कुचे इच्च़ा ब्याऊ साथीरे अपेहल तचेक ब्याऊ दोतु साते तोह दंङ दोच़ी खुशी मनेक्च़ी। 20पर दुह ध्याड़ा अपतो अपेहल ब्याहू दोतु विचङ ज़ि शता लोहुर; दुह मुका दोच़ी छले ज़े तुंङमी मेह ब्रत लोहर। 21यीशुज़ि दिह ला कुहतो, अरीला मीहच़ी खरकोई खम्ज़ेऊ खन्नी युई खमज़ेतिंङ मा केट्री। मा ता चक्च़िमी मुक्का दुह खरकोई खमज़ेऊ खन्नी दुह युई खमज़े बि खिंजेके ऊई ला ट्राव्लज़े च़रपोतो। 22ध्वांए ठ्रोह खरकोई सरा ला युई बरच़ारिंङ अच़िला माहतच़ी, माह ता दुह सरा क्योपी रंङ साते दुह बरच़ु थक्शे केट्री, दंङ सरा ए बरच़ु झुल्ला ए नाश शुहचे इबि, खरकोई सरा खरकोई बरच़ु अंद्रेग पिंङषी।” गिऊ शिक्षो गप्पारे पुराना रिति-रिवाज़ारंङ साते च्वाचि रुठे माह शोतो।

सब्तो प्रभु

(मत्ती 12:1-8; लूको 6:1-5)

23इच्च़ा अरामो ध्याड़ा#2:23 दुह पवित्र ध्याड़ा दोह तिंङ यहूदीज़ि छल्ले कम माह लहज़ातेर रिंङ अपेहल यीशु ए दोऊ चेलारे रिहू दोरच़ी इबि लेहकी तोईरे, दंङ दोच़ी दुह रिहू दोरच़ी छ्वाऊ सिल थ्वागज़ि ज़े लेहती। 24दंङ फरीसी ज़ि दोहरंङ साते कुतोह, “खंणु; दिहरे अरामो ध्याड़ा रिंङ कम छिले लहज़ातेर अंऊ मुसा ऊ कानूनो हिसाबे ठीक माह शुह?” 25-26यीशुज़ि दोतंङ साते कुतोह, “छि केहच़ी पवित्र शास्त्ररंङ पड़ेकतानि माह कि महस टेम तुहई न्येतु महान सेंहणा दाऊद ए छि लहरि, अपेहल अब्बियातार यहुदी महापुरोहित तोहई? अपेहल दाऊद ए दोऊ मित्रातिंङ योंहष लेहकी तोहई दंङ दुह मिलापो तम्बूरिंङ इलि दंङ दुह रोटी ज़े च़रति अंऊ परमेश्वरा बि तग चढ़ाएसी तोहई, दंङ एनोह साथीतिंङ ला रांई। मुसाऊ कानूनो हिसाबे दुह रोटी सिर्फ यहुदी पुरोहिते ज़े तरपोतो।” 27दंङ यीशुज़ि दोतंङ साते कुतोह, “परमेश्वरे अरामो ध्याड़ा मीहतिंङ बरदो रंड्रीमी थल्जी बणाएठ्री मशत।” 28यीशुज़ि दिह लाह कुहतो कि, “गेह मीहू योह अरामो ध्याड़ो ला मालिक शुगाह।”

Nu markerat:

मरकुसो 2: LBFNT

Märk

Dela

Kopiera