Matta 6
6
Mɛlalɨ Yesui A Dul Nǝtǝm Lǝma
1“Bɛ ka jǝ́ maa lɛ kanjǝl nɨ dǝngdǝngɨ a nu nǝbɨɨ sǝ ja kuwo jen. Na jǝ́ maa nyɨɨ, mɨsɔ jǝ́ nya bwili lɛ a daa Tɨya jen nɨ woi a kwamaɨ. 2Na jǝ́ nǝ nǝb bʊnǝnɔ jǝl lɛɨ, ka jǝ́ guu lɛ jum sǝ nǝbɔ a nyʊwa kanga nǝb fentogɔ gǝ maa lɛ a mʊgɔ keli a kantɨn mɛlalɨ jǝbɔ nu golantɨnɨ, sǝ nǝbɔ a nǝ ji dʊʊnɨ. N bɨlǝngǝn mǝ sʊwa jen nɛɨ, ja kwɛl ja yo yoi lǝma jinɔ gwam. 3Nǝn kwama nɨ mʊ nǝ nǝb bʊnǝnɔ jǝl lɛɨ, ka ń jǝla lɛ kang fɔlɔng mʊnɔ a nyǝm jʊ kang jajǝngɔ maa lɛɨ. 4Maa nyɔ, sǝ nǝtǝm mʊnɔ a yǝlam shig shig. Tɨya jen nɨ a kuwo jʊ mʊ maa shig shigi, nǝn gɔ nǝ ń lǝma gǝnɔ lɛɨ.
Mɛlalɨ Yesui A Dul Keli
(Luk 11:2-4)
5“Na jǝ́ maa keli lɛɨ, ka jǝ́ maa lɛ keli kanga nǝb fentogɔ gǝ maam lɛɨ, jʊ a bwɨɨ jǝ swɨ lɛ ja tɨ tɨɨ sǝ ja maa keli a mʊgɔ kan mɛlalɨ jǝbɔ daltɔ golantɨn, sǝ nǝbɔ a kuwo ji. N bɨlǝngǝn mǝ sʊwa jen nɛɨ, ja kwɛl ja yo yoi lǝma jinɔ. 6A kwama nɨ jǝ́ maa keli lɛɨ, bɛ jǝ́ dɔ mʊgɔ kan, jǝ́ nʊng nyanga kanɔ, sǝ jǝ́ kela Tɨya jen nɨ mɨ jǝ́ kuwo lɛɨ. Wʊnɨ kuwo jʊ nɨ lɛ jǝ́ maa lɛ shig shigi, nǝ jen nǝ lǝma. 7Na jǝ́ maa keli lɛɨ, bɛ ka jǝ́ yǝla lɛ jǝ́ sʊwala kaam kanjǝl nɨ lɛ jǝ́ kwɛl jǝ́ kelaɨ kanga Bʌtʌbɔ maam lɛɨ. Jǝ kuwo lɛ gɔ na jǝ yǝla jǝ sʊwalatǝn kanjǝl nɨ tʌgoi, Kwaama nyʊwa ji nyʊwa. 8Ka jǝ́ maa lɛ keli kanga jǝ maam lɛɨ. Tɨya jen, a kwɛl a nyǝm nyǝmɨ jʊ jǝ́ swɨ lɛɨ, nǝn kwama jǝ́ bɛm lɛ nǝn keligɔ a daa gǝ woi. 9Na jǝ́ kel keli lɛɨ, bɛ jǝ́ sʊwa nyɔ:
“ ‘Tɨya bǝn nɨ a kwamaɨ,
bɛ dun mʊnɔ a nya dʊʊltǝm.
10Bɛ fɔlɔn mʊnɔ a bɛ.
Jʊ mʊ swɨ lɛɨ,
bɛ a nya maatǝm a tǝm nɨ,
kanga jǝ maam lɛ a mʊgɔ kwamaɨ.
11Nǝ bǝn jǝjalǝn dwiyenɔ jǝbɔ a tangǝn kumtɨnɔ.
12Kǝlǝm bǝm bwɨlangkɛl bǝnɔ,
kanga bǝ kǝlǝm nǝb nɨ gǝm
lɛ a maa bǝm bwɨlangkɛlɨ.
13Bɛ ka ń yɔ lɛ nǝn bǝn
a daa tɛltǝm.
Bɛ ń jǝg bǝn a daa
nǝ Bwɨlagɔ woi.
[Jʊ a bwɨɨ, fɔlɔnɔ jǝbɔ
kwaanɔ jǝbɔ dʊʊnɔ
na a mɔ, mɨ dɨtǝm wo.
A daa nyɔ.#6:13 Kaam bɛl mʊlalɨ galɨgɔ mɨ nǝn bɛ gola nɨ.]’
14“Na jǝ́ kǝlǝm nǝb nɨ gǝm a maa jem bwɨlangkɛlɨ, Tɨya jen nɨ a kwamaɨ kǝlǝm jem kǝlǝm. 15Na jǝ́ kǝlǝm bɔ nǝbɔ gǝm bwɨlangkɛltɨn jini, ga na nyɔ Tɨya jen mɨsɔ kǝlǝm jem bwɨlangkɛltɨn jenɔ lɛ.
Mɛlalɨ Yesui A Dul Dotǝm Diil Mwɛ
16“Na jǝ́ do diil mwɛ lɛɨ, ka jǝ́ wʊ lɛ kǝga kanga nǝb fentogɔ gǝ maa lɛɨ. Jǝ wʊ kǝga jinɔ sǝ a nʊng nǝbɔ gɔ jǝ do diil mwɛ lɛ. N bɨlǝngǝn mǝ sʊwa jen nɛɨ, ja kwɛl ja yo yoi lǝma jinɔ. 17Na mʊ do diil mwɛ lɛɨ, bɛ ń fʌl nu mʊnɔ, waa nwangɔ a dul, 18kage nǝbɔ a nyǝm gɔ mɔ do diil mwɛ lɛ. Nǝn Tɨya mɔ nɨ kwaagɔ mʊ kel lɛɨ, kuwo lɛɨ. Tɨya mɔ nɨ kwaagɔ wʊnɨ mɨ jǝ kuwo lɛɨ, wʊnɨ kuwo kanjǝl nɨ lɛ mɔ maa lɛ shig shigi, nǝ ń lǝmagɔ lɛɨ.
Mʊr Shilogɔ A Kwama
(Luk 12:33,34)
19“Bɛ ka ń ya lɛ dul mʊnɔ gǝm shilo a tǝm nɨ, a daa nɨ bʊntangɔ jǝbɔ bwatɛgɔ kalǝm lɛɨ, nǝbkuumɔ kǝl nyanga kanɔ lɛ a dɔ a kuui. 20Yʊ shilo mʊnɔ a dʌbʌl a daa nɨ a bʊmɨ. A daa nɨ bʊntangɔ jǝbɔ bwatɛgɔ mɨsɔ kal lɛɨ, nǝbkuumɔ mɨsɔ dɔ lɛ a kuui. 21Daa nɨ shilo jenɔ woi, n daa gɔ nǝl jenɔ woi.
Nyalǝm Bʊtɔgɔ
(Luk 11:34-36)
22“Nyalǝm bʊtɔgɔ, n nu. Na nu jenɔ ja lɛɨ, nyalǝmɔ yii yii bʊtɔ jenɔ gwam. 23Na nu mʊnɔ mɨ kwamɨgǝnɨ, bʊtɔ mʊnɔ gwam mɨ nyalǝm wo. Na nyalǝmɔ a bʊtɔ mʊnɨ n duddugi, duddugigɔ la la daa.
N Bwangtǝm Kwaamaɨ Ka? N Shilo Ka?
(Luk 16:13)
24“Mɨ nʊ nɨ wo maa jwaalɛn nɛ a tɛlalɔtɨnɔ yoi. Gǝ kɔ kɔ win, ga swɨ a wini, gǝ jǝla jǝla nǝn win, mɨsɔ gǝ jǝla lɛ nǝn a wini. Mɨsɔ jǝ́ mʊrka bwangtǝm Kwaamaɨ lɛ jǝbɔ bwangtǝm kemʌn.
Ka Jǝ́ Kom Lɛ Dul Jenɔ
(Luk 12:22-31)
25“Mǝ sʊwa jen nɛ, ka jǝ́ kom lɛ dul jenɔ a jʊ nɨ jǝ́ ja lɛɨ jǝbɔ jʊ nɨ jǝ́ nɔɔ lɛɨ, jǝbɔ jʊ nɨ jǝ́ dʊʊ lɛ a bʊtɔɨ. Kʊlɨgɔ a laa bɔ jǝjalǝn ka? Bʊtɔgɔ a laa bɔ dwangtɨn ka? 26Jǝ́ dʌng lǝbɨtɨnɔ. Mɨ jǝ kwal lɛ, mɨ jǝ kʌso lɛ, mɨ jǝ tal lɛ a bʌnitɨn. Tɨya jen nɨ a kwamaɨ nǝ ji jǝjalǝnɔ lɛ. Jǝ́ laa ji bʊmǝn, mɨ nyɔ ka? 27Nuwo a kʊm jen a mʊgɔ komtǝm sʊ dul gǝnɔ gǝm kum lɛɨ?
28“N wɛ a bwɨ jǝ́ kom dul jenɔ lɛ a kɛl dʊʊlɨ? Jǝ́ dʌng fɨlǝntɨnɔ kanga jǝ dʊʊlam lɛɨ! Ja maa bɔ maajɨ nǝn kwaan. Ja fɛka bɔ dul jinɔ gǝm dʊʊl. 29Mǝ sʊwa jen nɛ, Sulemanu a mʊgɔ bʊmǝn dʊʊl gǝnɔ gǝm a la ji bɔ bʊmǝn. 30Na Kwaamagɔ a fɛ yǝlagɔ a bʊm nyɨɨ, dwiyen nǝn kʊlɨ, fʌng ja mal a gaakǝba, mɨsɔ nǝ jen dʊʊl nɨ lɛ a laa nyɨɨ ka? Jǝ́ nǝb nɨ nǝtǝm bɨlǝngkɛl jenɔ a lada bɨɨ. 31Ka jǝ́ bwan nɛ jʊ jǝ́ ja lɛɨ, jʊ jǝ́ nɔɔ lɛɨ, jʊ jǝ́ dʊʊ lɛɨ. 32Nǝb nɨ a nyǝm bɔ Kwaamaɨ, saa kanjǝl nɨ lɛ gwam. Tɨya jen nɨ a kwamaɨ a nyǝm komʌn jenɔ. 33Jʊ a laa jǝl gwamɨ, jǝ́ saa fɔlɔn lɔ Kwaamaɨ dɨn, jǝbɔ yɨm dǝngdǝng gǝnɔ. Na jǝ́ maa kanjǝl nɨ nyɨɨ, jǝ nǝ jen nǝ tangǝn kanjǝlɔ gwam. 34A dul kɛl nɨ ka jǝ́ kom lɛ dul jenɔ a fʌngɔ gǝm. Fʌngɔ bɛ lɛ nǝn komʌn gǝnɔ. Komtǝmɔ a kɔkɔgɔ dwiyeni a wʊlam.
Nu markerat:
Matta 6: DBD
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
©️2024 Luke Initiative for Scripture Translation
