APOEM AYANG: 7
7
Tigyid shi' Khyoo:
1 Aseing gi Noa ri «Re" yhoem: byu yi dangain" yo' gyid lhid moo" zeing khoug: khyoo: vang loo we'. Mougmyid gyab goin" moo deing byeung" moo" zei: su: gi nang nyang: kyeing" nghoid nyid ziri ngoo myang bye:. 2Younglho' da" gougnyhoug ja: khang" moo" rigi nyhed zoem" zoem" koid nghoid loug agyeing" ashang: da" gougnyhoug rigi dazoem" zoem" za: koid lho: nang yo' dage" shu" fang yu we'. 3Houg: yo' dakhyoo" ti" ngho' ja: khang" moo" ri we' nyhed zoem" zoem" fang yu we'. Hid: su" koid khyo" gougnyhoug joem yo' ngho' joem cang: joeb gi kangso' loid wigi mougmyid moo doem nyid byeung" loo baja". 4Akhid" mo nyhed nyid" lang" ngoo gi ngoo phain" so: to" da" dei moodei- nyid moonyid ri toem" pyam wa shid re" myid: xi: nyid" nyid: xi: myen moug: voo nhang: loo wa». 5Houg: lho: Noa gi Aseing amyeing" dang: dangain" ri cang zei: bye:.
6Mougmyid tho' moo Tigyid shi' uri Noa gi 600 zain nghoid bye:. 7#Mat 24:38,39; Luk 17:27. Nyang: yo' nya: yhoem: seing: myhi'- houg: lho: nya: zoo: yi yo' nya: du moo" yigi tigyid shi' jang" mo loid byoin wa shid re" gyid lhid moo" zeing khoug: khyoo: vang khare" boem bye:. 8Younglho' ziri we' ayounglho' ziri we' ngho' cang: joeb yo' gougnyhoug cang: joeb da" amyhi' dadu: yo' aphoo' dadu: du: gi 9Mangsoo tid ziyo' dakhyoo" ti" Noa yo' dage" gyid lhid moo" zeing khoug: khyoo: vang boem bye:. 10Nyhed nyid" thang: moo tigyid shi' kaid bye:.
11 #
2 Pe 3:6. Noa gi khyug shoo: zain byeung" da" zain lhammoo" eig khyab daxe: nyhed nyid" nyid" moo atho' tid gyi: da" gyid thoem" gyid khoem" dangain" bug thu ri" bye:. Mougkhung: mo gyid khoem" dangain" we' bug thu ri" bye:. 12Houg: lho: mougmyid tho' khyoo: myid: xi: nyid" myid: xi: myen moug: vo khyo' kaid bye:. 13Hau: bidnyid moo Noa yo' nya: yhoem: seing: myhi' gi nya: zoo: soem" yug- Shem- Ham- Yaphed yo' du moo" yi yo' dage" gyid lhid moo" zeing khoug: khyoo: vang boem bye:. 14Nyangnu" yo' dage" gougnyhoug acang: joeb- yhoem: myhu: gougnyhoug yo' siyoo gougnyhoug- gyi: ja: nge ja: yo' ngho' acang: joeb gi vang loung" nyid bye:. 15Kang: dei noem ja: khang" moo" mo amyhi' yo' aphoo' dazoem" zoem" gi Noa yo' dage" gyid lhid moo" zeing khoug: moo vang bye:. 16Mangsoo nhang: ziyo' dakhyoo" ti" nyang: koid bye:. Houg: lang" Aseing gi Noa ri akhoug: khyoo: myhid" lhoung kaid.
17Tigyid gi myid: xi: nyid" ju" sho' xo' xo' je: lo lho: gyid nau" lo wigi Noa da" gyid lhid moo" zeing gi myu: gyam" loo" bye:. 18Gyid gi je je: nau" lo lho: gyid lhid moo" zeing gi gyid tho' moo myu" gyam" jo, bye:. 19Hau: gyid gi atho' tid nau" lo wigi myhang: thang da" boem we' noeb khare" zigi 20Boem phyoo" boem nyoug joem da" adang moo 25 pe: ju" sho' nau" khari" bye:. 21Ngho' dangain"- gougnyhoug dangain" yo' byu dangain"- mougmyid tho' mo dei moodei nyid moonyid shid: byug bye:. 22Mougmyid tho' mo so' shi: mooshi: dangain" shid: bye:. 23Aseing gi mougmyid tho' mo byu xangsu:- gougnyhoug gougdoo: yo' ngho' zoo: yen" zoo: dei moodei- nyid moonyid dangain" ri jhoid toem" pyam bye:. Noa yo' nyang: yo' dage" gyid lhid moo" zeing khoug: moo lung" mo, kyeing" za: danyid deing lo: da:. 24Gyid gi dasho: wim: xi nyid" ju" sho' dajhi' lang" kain" lo" khyoo: ajo, shi".
Nu markerat:
APOEM AYANG: 7: LCL
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lacid Bible © Bible Society of Myanmar, 2009.