Marcu 8
8
Multsirea a Doaua a Pãnjilor
1Tu atseali dzãli, s-adunã unã multsãmi multu mari sh-nu avea tsi s-mãca, Isusul lã-grãi a ucenitsilor sh-lã dzãsi a lor: 2“Nj-easti njilã di aestã multsãmi, cã s-featsirã trei dzãli tsi sta cu mini, sh-nu ari tsi s-mãcã. 3Sh-ma s-lji pitrecu la casã ni mãcat, va-s armãnã pi cali, cã niscãntsã di elji au vinit di diparti.”
4Sh-ucenitsilji a lui lj-apãndisirã: “Cum va lji fãntea vãrã cu pãni aeshti aoa tu irnjii?” 5Sh-elu lji-ntribã: “Cãti pãnji avets?” Elji dzãsirã: “Shapti.”
6Atumtsea elu lã-deadi ordin ali multsãmi s-apunã mpadi. Sh-lo shapti pãnjili, hãristisi, li-frãmsi shi li-deadi a ucenitsilor a-lui tsi s-li mpãrtsa ali multsãmi, sh-elji li pãrtsarã. 7Avea sh-niscãnti peshti njitsi. Dupã tsi li-ghinicuvãntã, ordinã tsi sh-atselji s-lji mpãrtsa la multsãmea. 8Ashã elji mãcarã shi s-fãnãtirã, sh-adunarã shapti coshuri cu bucãtsili tsi armasirã. 9Atselji tsi mãcarã eara vãrã patru njilji di oaminji, deapoea lji sãlãghi tra s-fugã.
Nvitsãtura a Fariseilor
10Elu trãoarã intrã tu varcã cu ucenitsilji a lui shi s-dusi tu locurili a-Dalmanutiljei. 11Vinirã Fariseilji shi apãrnjirã si zbura cu nãsu, cãftãnda un semnu dit tser tra s-lu bãga tu provã. 12Elu suschirãnda dzãsi: “Cãtse aestã gheneratã caftã semnu? Dealihea ma vã dzãc cã a farãljei aishtei nu-va lji si da vãrã semnu.” 13Sh-alãsãnda-lji, intrã napoi tu varcã shi tricu di napãrti.
14Ucenitsilji avea agãrshit s-ljea pãni, sh-tu varcã nu-avea tsiva dicãt mash unã singur pãni. 15Isusul lã-vãrghi dzãcãnda: “S-avets cãshtiga, afirits-vã di maeaua a Fariseilor sh-di maeaua al Herodul!” 16Ma elji minduia namisa di nãshi, dzãcãnda: “Nu avem pãni.” 17Isusul bãgã oarã sh-lã-dzãsi: “Cãtse minduits cã nu avets pãni? Ninga nu avets achicãsitã sh-nu avets aduchitã? Ninga u-avets inima nchitritã? 18Avets oclji sh-nu videts, avets ureclji sh-nu-avdzãts? Nu tsãnets minti? 19Cãndu mpãrtsai tsintsi pãnjili ti tsintsi njilji, cãti coshuri mplini cu bãcãtsi adunat?” Elji dzãsirã: “Doisprãdzatsi.” 20“Cãndu mpãrtsai shaptili pãnji ti patru njilji, cãti coshuri mplini cu pãnji adunatã?” Elji dsãsirã: “Shapti.” 21Sh-elu lã dzãsi a lor: “Ma cum ninga nu achicãsits?”
Vindicarea a Orbului dit Betsaida
22Deapoea agiumsi tu Betsaida sh-lji adusirã un orbu sh-lji si rugarã s-bagã mãna. 23Atumtsea lo di mãnã orbul, lu scoasi nafoarã dit hoarã, shi dupã tsi lji-scuche tu oclji shi bãgã mãnjili pri nãsu, lu-ntribã macã videa tsiva. 24Sh-elu, discljisi ocljilji sh-dzãsi: “Ma ved oaminji ca ponji tsi imnã.” 25Sh-Isusul lã bãgã mãnjili napoi pristi ocljilji a lui sh-lji dzãsi s-veadã cãtrã nsus, shi atsilui lji si turnã videarea sh-videa ghini itsido. 26Sh-Isusul lu-pitricu s-ducã la-casa a lui dzãcãnda: “Nu intrã tu hoarã sh-nu lji aspunã a vãrui tsiva.”
Mãrtiria a Petrului
27Deapoea Isusul s-dusi deadun cu ucenitsilji a lui tu hoarili a Cezareljei al Filip. Sh-tu cali lã-ntribã ucenitsilji a lui dzãcãndã: “Cai dzãc oaminjlji cã escu mini?” 28Elji apãndisirã: “Niscãntsã dzãc Ioan Pãtidzãtorlu, altsã Elia, sh-altsãlji un dit prufitsilji.” 29Sh-elu lã-dzãsi a lor: “Ma voi, cai dzãtsets cã escu?” Sh-Petrul apãndisinda lji-dzãsi: “Tini eshti Hristolu.” 30Atumtsea elu lã ursi s-nu aspunea a vãrui ti nãsu. 31Deapoea Isusul apãrnji s-lã nveatsã a lor cã Hiljilu a-Omlui prindi s-mundueascã di multi lucri, shi va-si s-aleapid di aushlji, di ma mãrlji a-preftsãlor sh-di scriblji, cã va s vatãmã shi dupã trei dzãli va s-nyeadzã. 32Sh-elu lã dzãsi aesti zboari pri fatsã. Atumtsea Petrul lu lo dinãparti sh-apãrnji s-lu vãrgheascã. 33Ma elu s-turnã, vidzu ucenitsilji a lui sh-lji aurlã a Petrului dzãcãnda: “Fudz di la mini, drac, cã tini nu ai minti ti lucrili al Dumnidzãu, ma ti lucrili a-oaminjlor.”
Cathiun s-ljea Crutsea a Lui
34Sh-acljimã ningã nãsu multsãmea cu ucenitsilji a lui, sh-lã dzãsi: “Cathiunu tsi va yinã dupã mini, s-aleapid bana a lui, s-ljea crutsea#8:34 s-ljea crutsea Va s-dzãc s-hii etimu s-ti mundueshti shi s-mori urmãnda Hristolu. a lui, shi s-mi urmeadzã. 35Cã atsel tsi va s-ascapã bana a lui, va su-chearã, ma atsel tsi va-u chearã bana a lui trã itia a mea sh-ti evanghelu, va s-ascapã. 36Tsi hãiri va s-aibã omlu s-amintã ntreagã lumea, macã deapoea va s-chearã suflitlu a lui? 37Icã tsi poati s-da omlu tu alãxirea a suflitlui a lui? 38Cã a cathiunui tsi va-lji yinã arushini trã mini sh-trã zboarili a meali namisa di aestã gheneratã curunã-cãlcatã shi amãrtioasã, trã atsea va lj-yinã arushini sh-a Hiljilui a Omlui, cãndu s-agiungã la mãrirea a Tatãlui a lui, cu anghilji sãmtsã.”
Nu markerat:
Marcu 8: BLRR
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
