लुका 22
22
येसु सेॽनेमे दाउ
(मत्ति २६:१-५; १४–१६; मरकुस १४:१-२,१०-११; युहन्ना ११:४५-५३)
1यहुदि जातिजिमि चलनडोॽ सिडा मे़न्ठुबॽआ चरेपा चामे छुट्कारामि चाड लेङ्सिॽपोरोक्पॽआ ले़टे़। 2एप्पा याडाङ्बाजिनुङ यहुदि धरमिक खा इःॽखुबाजिडे़ॽ येसु सेॽनेमा योगुजे, तर खोजि हाइखा याॽमिजिनुङ किस्सिडामे।
3मोडोक्पेॽनोॽ येसुमि बारो जना चोङ्साजिबेॽ इक्को यहुदा इस्करियोत निङ ले़ःॽखुबा चोङ्साबेॽ सैतानमि निवा पे़ःॽयुसा। 4मोसे़ॽ निवाहाङ्मि एप्पा याडाङ्बाजिनुङ मन्दिरबेॽहा तिरिङ्गाजिमि एप्पाबेॽ खे़ॽनुङ “के़ॽ येसु इन्डोक चालडे़ॽ राःप्मेनुङे” लुनुङ मोत्ता इःसु। 5इगो खा खेम्नुङ माहाजि साप्थाङ्मानुङ मो चोङ्सा याङ पिमामि पोरोगामि। 6इगो खाबेॽ यहुदा राजि लिसा, मोबा येसु खुस्रिङ्मु राःप्मेॽमे दाउ योक्पोगु।
ए़क्साङ्ए भत्तेर
(मत्ति २६:१७-३०; मरकुस १४:१२-२६; युहन्ना १:२१-३०; १ कोरिन्थि ११:२३-२५)
7खमिर लुमे़ सिडा मे़न्ठुबॽआ चरेपा चामे़ छुट्कारामि चाड लेस्सा, मो याकपेॽनोॽ सामुपसा भोग पिमे याक लेस्सा। 8येसुडे़ॽ खोम चोङ्साजि पत्रुसनुङ युहन्ना इडोक लुनुङ पाक्सुजि, “खे़ॽनुङ कानिङ्मि लागि छुट्कारा चाडमि भत्तेर पोरोगाजे” 9खोजिडे़ॽ येसु सिप्साजु, “काजिङेॽ इगो भत्तेर हाम्बेॽटे पोरोक्मे़ ?” 10येसुडे़ॽ लुसु, “खेप्साजे, हे़न्जिङ सहरबेॽ पे़खे़ॽमाबेॽ इक्को याॽमि पस्नाबेॽ योङा खिमानुङ खे़ॽमे़ॽनिङ्सिबॽआ चुप्मिन्जुए, मोबा खोनुङ खडाजे, 11मो याॽमि हाम्बे खिमहोङ्सिॽयु पे़खे़ये, मो खिमबेॽए खिमदाङ्बा सिम्मे़ ‘गुरुडे़ॽ इडोॽ लुटे़, के़हा चोङ्साजिनुङ पेन्नुङ छुट्कारा चाड हाम्बे कोठाबेॽ चामे़ ?’ 12मोबा खोसे़ॽ मेॽटोङ्ए तला चाक्नुङ युङ्बॽआ कोठा खाङ्मेये, मोबेॽनोॽ छुट्कारा चाडमि भत्तेर पोरोगाजे।” 13खोजि खे़ॽमाबेॽ येसुडे़ॽ लुबॽआडोक्नोॽ चुप्टाजु मोबा मोबेॽनोॽ मोजिडे़ॽ छुट्कारा चाडमि भत्तेर पोरोगाजु।
14चामे बेला लियेम्बाङ येसु खोमि बारो जना चोङ्साजिनुङ चासिॽ पेना। 15येसुडे़ॽ चोङ्साजि लुसुजि, “के़ॽ खेः आङ्मा याक्लो हे़निङ्नुङ पेन्नुङ इगो छुट्कारामि चाड चामा मिनिङे। 16हागो के़ॽ हे़निङ लुनिम्ने, इगो भत्तेरडे़ॽ लुमायोक्पॽआ पुरा मे़ल्लिरो फेरि इगो भत्तेर के़ॽ चासुङ्नि।” 17मोबा येसुडे़ॽ अङ्गुरमि खे़वाँनुङ्मा खोरिया ठेॽनुङ निवाहाङ ओहाक पिसु, मोबा “इगो लानुङ हाःजासानुमे” लुनुङ खोमि चोङ्साजि पिसुजि। 18के़ॽ हे़निङ लुनिम्ने़, “हागोएम्बाङ निवाहाङ्मि राज्य मे़लेङ्रो के़ॽ इगो अङ्गुरमि खे़वाँ उक्सुङ्नि।” 19मोबा ए़क्साङ येसुडे़ॽ हुकपेॽ चरेपा याङ्नुङ निवाहाङ ओहाक पिसाङ चरेपा एॽनुङ खोम चोङ्साजि पिसाङ लुसुजि, “हे़निङ्मि लागि पिबॽआ इगो के़ए़ हिङा ले़ये। हागोएम्बाङ का मिॽमामि लागि सानिङ इडोक्नोॽ ले़टानुमे।” 20मोडोक्नोॽ चरेपा चासे़ॽनुङ अङ्गुरमि खे़वाँनुङ्मा खोरिया ठेॽनुङ चोङ्साजि पिसाङ लुसुजि, “इगो अङ्गुरमि खे़वाँनुङ्मा खोरिया के़ए़ हरिबेॽ हे़निङ्नुङ हुप्पॽआ चोङ हेन्ज्रुङ ले़ये। इगो हरि हे़निङ्मि लागि यिःॽपॽआ ले़हा। 21तर खाक्सानुमे, का राःप्मेॽखुबा कानुङ्नोॽ चासिॽ पेङ्इटे़। 22निवाहाङ्डे़ॽ मिॽपॽआडोॽ का याॽमिमि पसागो इक्याक याॽमिमि लागि सिघे़ॽमानोॽ खे़ये, तर इनामा याॽमिमि पसा धोका पिघुबा”। 23इडोक्मा खा खेम्नुङ चोङ्साजि खोजि ताङ्बा काबोगामि, “कानिङ्बेॽ मोडोक्मा योम्बोक ले़ःॽखुबा असाडे ?”
असा चाहिँ बेॽए
(मत्ति २०:२५-२८; १९:२८; मरकुस १०:४२-४५)
24चोङ्साजिमि रुम्बेॽ असा चाहिँ बेॽएम्मा ले़ये लुमे़ टुम्बेॽ खा लिबुगा। 25येसुडे़ॽ माहाजि लुसुजि, “मक्खाम्डेमबेॽहा हाङ्बाजिडे़ॽ खोजिमि जनताजिसोक्पेॽ राज्य ले़न्डुजे, इडोॽ ले़ःॽखुबाजि कानिङ याॽमिजि सहायोग ले़ःॽखुबा मिॽइन्डुजे। 26तर हे़निङ आक्टोॽ लिमा फे़न्निबा। हे़निङ्बेॽ बेॽएम्मासे़ॽ चोप्पा ए़डेम्मा लिनुङ, सेउतेडोॽ लिमा खे़ये। 27खेप्सानुमे, चामा चासिॽ पेङ्घुबा मायोङ्बानुङ चामा पिघुबा सेउतेबेॽ असा चाहिँ एप्पा ? मायोङ्बानोॽ एप्पा ने़ॽने़ ? तर कागो हे़निङ चामा पिघुबा सेउतेडोक्नोॽ लिटिङे।
28 “हे़निङे़ॽ काङ्मि चोप खेःमि बेलाबेॽ कानुङ सोरि पेनानिङ। 29के़ए़ पाबे़ॽ का राज्य ले़ःॽमे अधिकार पिटिङे मोडोक्नोॽ के़ॽ हे़निङ्सो अधिकार पिनिम्ने़। 30के़ए़ राज्यबेॽ पेन्नुङ कानुङ्सोरि चान्डानिङे मोबा हाङ्पेन्ढामबेॽ पेन्नुङ इस्राएलबेॽहा इक्पोङ निच्चि कुलमि न्याय ले़न्डानुमे।”
पत्रुसडे़ॽ रेम्डेॽपॽआ
(मत्ति २६:३१-३५; मरकुस १४:२७-३१; युहन्ना १३:३६-३८)
31मोबा ए़क्साङ येसुडे़ॽ लुसु, “खेप्से सिमोन सिमोन, सैतानडे़ॽ#२२:३१ चापजिमि एप्पा हे़निङ चाम ठाःप्टिडोक्नोॽ ठाःप्मामि अधिकार ङाइटुए। 32तर हे़निङ्मि बिस्वास बोलियो लिरो लुनुङ के़ॽ हे़ने़ए़ लागि पारथना ले़ए़टुङे। फेरि हे़न काबेॽ टेमाबेॽ हे़ने़ए़ वावानिसाजिसो बिस्वासबेॽ बोलियो टोक्साजे।” 33पत्रुसडे़ॽ लुसु, “परभु, का हे़न्नुङ तिरिङ्गा खिमबेॽ से़क्सिघे़ॽमानुङ सिमा सिॽङाहोङ्सो पोरोइङे।” 34तर येसुडे़ॽ लुसु, “चइबानोॽ हे़न लुन्ने़, हे़ने़ॽ सुमघे़ॽ का लेसुङ्नि मे़लुरो आयु वापा ओःक्निबा।”
येसुमि खेःमि याक
35येसुडे़ॽ पाङ्बआ याॽमिजि लुसुजि, “के़ॽ हे़निङ याङ, चब्रा, राङ्सुप मे़ॽनिङ पाङ्माबेॽ हे़निङ इमाङ खाँचो सिॽटानिङे ?” खोजिडे़ॽ लुसुजि, “इमाङ्सो खाँचो मे़सिॽटा।”
36येसुडे़ॽ लुसुजि, “हागो चाहिँ याङ, चाब्रानुङ ताब्या, मे़ङ्काप्खुबे़ॽ चाङ्मे़ चे़ॽ इन्जानुङ इक्को ताब्या इनुरो। 37इन्ढोङ्होङ के़ॽ हे़निङ लुनिम्ने़, निवाहाङ्मि बचनबेॽ इडोॽ साप्पॽआ ले़ये, ‘खो अपराधिजिनुङ युक्सुजि’#यसैया ५३:१२ लुनुङ साप्पॽआ खा के़ए़ हिङ्मवाबेॽ पुरा लिमानोॽ खे़हा। चइबानोॽ माहा खा पुरा लिमे़ॽनिङ्सिहा।” 38खोमि चोङ्साजिडेॽ येसु लुसुजि, “खाक्से परभु, इगोबेॽ निच्चि ताब्या टुहा।” येसुडे़ॽ लुसुजि, “इडोकहोङ के़ॽए़ये!”
जैतुन लुमे टोक्टोक्माबेॽ येसुडे़ॽ पारथना ले़ःॽपॽआ
(मत्ति २६:३६-४६; मरकुस १४:३२-४२)
39येसु सानिङ्डोॽ सहर याःॽयानुङ जैतुन लुमे टोक्टोक्माबेॽ खडा, खोनुङ्नोॽ सोरि खोम चोङ्साजिसो खडामि। 40मोबेॽ रुक्नुङ खोम चोङ्साजि लुसुजि “कानिङ जाँचबेॽ सिॽमा फे़न्नि लुनुङ पारथना ले़टानुमे।” 41मोबा येसु ए़डेॽ मेॽयोङ खे़ॽनुङ टुम्रुगे़ॽ ठोःक्नुङ पारथना ले़टा। 42खोसे़ॽ लुसु, “हे पाबा, हे़ने़ॽ निवे़ॽ मिॽइन्डुहोङ इगो खेः आङ्मे खा काबाङ सेम्बेॽमा। तर के़ए़ निवे़ॽ मिॽटिडोॽको ने़ॽनि हे़ने़ए़ निवे़ॽ मिॽपॽआडोॽ लिरो।” 43मोबा थाङ्सिरिबाङ इक्को थाङ्सिरिदुत लेन्नुङ खो खेः आङ्हेमे बोल पिसु। 44खोमि निवा इॽठुप खेःमि सुरता टुबॽआसे़ॽ बेॽलो पारथना ले़टु, मोबा खोमि होप्तिवासो हरिमि ठे़ॽलुवा ठे़ःॽमे़ॽनिङ्सिडा। 45मोबा येसु येःपुक्नुङ खोम चोङ्साजिबेॽ लेम्माबेॽ खोजिदाङ्बा सुरताडे़ॽ याःक्चाघे़ॽनुङ इम्डिघे़ॽपॽआ चुप्टुजि। 46येसुडे़ॽ खोम चोङ्साजि लुसुजि, “हे़निङ इन्ढोङ इम्मे़ॽनिङ्सिन्डानिङे, पुके़ॽनुङ हागो ले़ङ्इये खेःबेॽ मे़सिॽलो लुनुङ पारथना ले़टानिङे!”
येसु राःप्पॽआ
(मत्ति २६:४७-५६; मरकुस १४:४३-५०; युहन्ना १८:३-११)
47येसुडे़ॽ इगो खा इःमे़ॽनिङ्सिमाबेॽ खोमि बारो जना एप्पा चोङ्साजिबेॽ इक्को यहुदा इस्करियोत निङ ले़ःॽखुबा चोङ्सा चाहिँ याॽमिजि चिक्मानुङ येसु राःप्सिॽ मोबेॽ लेस्सा। मोबा येसु चुम्बन ले़ःॽसिॽ येसुमि के़क्पेॽ खडा। 48तर येसुडे़ॽ खो लुसु, “यहुदा, हे़ने़ॽ का याॽमिमि पसा चुम्बन ले़ःॽनुङ धोका पिये ?” 49मोबेॽ टुबॽआ चोङ्साजिडे़ॽ हागो लिसिॽपोरोक्पॽआ खा लेडोक्नुङ येसु लुसुजि, “परभु, ताब्या रिक्मे़न्डे ?” 50मोबा इक्को चोङ्साडे़ॽ चाहिँ ताब्या रिक्नुङ चोप्पाङ एप्पा याडाङ्बामि सेउतेमि चुप्थिङ ने़ए़क चेम्बेबेॽटु। 51तर येसुडे़ॽ, “योङ्मेॽटे!” लुनुङ मो याॽमिमि ने़ए़क सुःप्नुङ नुबोक्पेॽटु।
52येसु राःप्सिॽ लेङ्घुबाजि चाहिँ एप्पा याडाङ्बाजि, मन्दिर हुङ्घुबाजि, हाइखा एप्पाजिनुङ यहुदि एप्पाजि ले़टामे। येसुडे़ॽ माहाजि लुसुजि, “इमा का खुसुबाङ्डे ? हे़निङ ताब्यानुङ टोङ्इरा याङ्मानुङ का राःप्सिॽ लेङ्इटानिङे ? 53का सानिङ हे़निङ्नुङ्नोॽ सोरि मन्दिरबेॽ टुसिङ, मोडोक्पेॽ हे़निङे़ॽ का मे़राःप्हेसानिङ! तर हागो हे़निङ्मि पालो लेङ्इटे़ सैतानमि सक्तिमि राज्य इगोनोॽ ले़ये।”
पत्रुसडे़ॽ येसु लेसुङ्नि लुबॽआ
(मत्ति २६:५७-५८,६९-७५; मरकुस १४:५३-५४,६६-७२; युहन्ना १८:१२-१८,२५-२७)
54माहा याॽमिजिडे़ॽ येसु राःप्नुङ चोप्पा बेॽए याडाङ्बामि खिमबेॽ चिॽखे़ॽटुजि। खोम चोङ्सा पत्रुस चाहिँ ए़डे़ॽ मेॽयोङ्बा येसुमि ए़ङ्गुवा ए़ङ्गुवा खडा। 55मोबेॽ सोक्लुङ्मि रुम्बेॽ याॽमिजि मि टुप्नुङ हुङ्मे़ॽनिङ्सिडामे, मोबेॽ रुक्नुङ पत्रुससो पेना। 56मो खिमबेॽए सेउतेनिडे़ॽ पत्रुस मि हुङ्मे़ॽनिङ्सिबॽआ खाङ्नुङ लुसु, “इगो याॽमिसो येसुनुङ्नोॽ टुसे़।” 57तर पत्रुसडे़ॽ मो लुसु, “नानुसा, के़ॽको खो लेसुङ्नि।”
58इॽछोॽ ए़क्साङ हाइके याॽमिडे़ॽ फेरि लुसु, “हे़न गो माहाजिमिन्नोॽ लङ्गाम ने़ॽने ?” पत्रुसडे़ॽ लुसु, “कागो ने़ॽनि।”
59इॽछोॽ ए़क्साङ हाइको इक्को याॽमिडे़ॽ लुसु, “इगो याॽमिसो येसुनुङ्नोॽ टुसे़, इगोगो गालिल ठाउँबेॽएन्नोॽ ले़येन्डि।” 60तर पत्रुसडे़ॽ लुसु, “लो हे़ने़ॽ इमाङ इःमे़ॽनिसिन्डुए, के़ॽको लेसुङ्नि!” पत्रुसडे़ॽ इडोॽ लुमासोरोॽ वापा ओगा। 61मोडोक्पेॽनोॽ येसु पत्रुसलाम हिङ्घे़ॽनुङ खाक्सु, “आयु वापा ओक्मा याक्लो हे़ने़ॽ का सुमखेॽ लेङानि लुये” लुनुङ येसुडे़ॽ लुबॽआ खा पत्रुसडे़ॽ मिॽटोक्टु। 62मोबा ए़क्साङ पत्रुस पाखे़ॽयु खे़ॽनुङ हे़क्हे़क मिन्साङ हाबा।
येसु सिःक्चासाङ मोक्पॽआ
(मत्ति २६:६७-६८; मरकुस १४:६५)
63येसु हुङ्घुबाजिडे़ॽ खो सिःक्चासाङ मोगुजि। 64खोमि मिक टे़क्नुङ मोःक्साङ सिप्सुजि, “लो लुसे हे़न असे़ॽटे मोगे़ ?” 65इडोॽ माहाजिडे़ॽ खो बेजेत ले़ःॽसाङ ननाओले लुसाङ योबुजि।
येसु एप्पा यहुदिजि सुम्ढाम खिमबेॽ
(मत्ति २६:५९-६६; मरकुस १४:५५-६४; युहन्ना १८:१९-२४)
66एप्पा याडाङ्बाजिनुङ यहुदि धारमिक खा इःॽखुबा चोप अगुवाजि माक्मिसेल्लाम एप्पा यहुदजि सुम्ढाम खिमबेॽ सुप्सामि, मोबा तिरिङ्गाजिडे़ॽ येसु मोबेॽ चिक्खे़ॽनुङ लुसुजि, 67“हे़न छुट्कारा पिघुबा खिरिस्ट ले़येहोङ कानिङ लुमा लुनुङ महाजिडे़ॽ येसु सिप्सुजि।” येसुडे़ॽ लुसुजि, “के़ॽ लुसुङ्होङ्सो हे़निङे़ॽ बिस्वास ले़टानुम्नि। 68के़ॽ सिम्माहोङ्सो हे़निङे़ॽ खा टेहेसानुम्नि। 69तर हागो याॽमिमि पसा निवाहाङ्मि सक्तिमि चुप्थिङ्लाम पेङ्इये।” 70मोबा माहाजि चोबे़ॽ लुसुजि, “इमा हे़न निवाहाङ्मि पसाडे ?” येसुडे़ॽ माहाजि लुसुजि, “हे़निङे़ॽनोॽ आक्टोक लुन्डानिङे।” 71माहाजिडे़ॽ खोमि इगो खा खेम्नुङ लुसुजि, “हागो कानिङ हाइखा साक्छिनोॽ पाप्निबा, इन्ढोङ्होङ खोमि याबुकबाङ्नोॽ खेम्बेटुङ्मा।”
Nu markerat:
लुका 22: YAMP
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2023, Wycliffe Bible Translators, Inc. and Nepal Bible Society
