BOTHUBO 4
4
Cain ngo Abel
1Adam no pa nipu Eve ithive kethiu li ye mishive no Cain punu, eno pi, “Ampeu kukuphu vecheo ni ye anu ithuluvae.” 2Eno itaghi, li no pa thiküzüu Abel punu. Abel ye ambekheu shi ache, eno Cain ye aluchemi shi ache. 3Ado hami thiu Cain no aluche lono tüxatini kümllagho Ampeu lau peighi, 4eno Abel ghi pa mbeloji lo piti tüghüu, atha pubeyi keqo dolono peighi. Ampeu no Abel eno pa kümllagho shou amloqive, 5ikemu Cain ngo pa kümllagho ye Pa no amlo kiqishi move. Ikehu Cain ye ighono amloideve, eno pa gi pishiqho luve. 6Ampeu no Cain vilo pi, “Kushiye no ye amloide ani kea, eno kushiye o gi pishiqhope ani kea? 7Tsala nono achipi shi aye, no ye ikhikulupu shimoni keshea? Eno nono akivi shimove aye, axine ye ahukikha ijepe ani. Tino o shou kaluveni shi ani, ikemu no ye tipau shou theqhi luve masae.”
8Cain no pa thiküzüu Abel pütsae. Eno kughou pama aluza lo akeno, Cain no pa thiküzüu Abel mjochile thuve no pa ghiqhive. 9Tithiu Ampeu no Cain vilo pi, “O thiküzüu Abel ye khile ani kea?” Pa no pi, “Ni ye mthae; ni ye I thiküzüu kheu keshea?” 10Ampeu no pi, “No ye kiu shive akea? O thiküzüu ji ghügha huno ayeghi lono I lau igha ikughi anie. 11Ikehu ayeghi khikhino o u lono pele keu o thiküzüu ji mighe luniye akichi xükho keno, tipau no itehi ye o müsüinivae. 12Kughou nono ayeghi mlani keno, ti ye aghüma akeu qhemi athi pithi o tsümoae. No ye ayeghi lo kupokichemi eno kachena shiniae.” 13Cain no Ampeu vilo pi, “I ghime ye I no puqhe kulupu nguno akimshiue. 14Julo, Nono ayeghi lono ishi no I haphevae, eno O zülono ni ye itshüve niae. Ni ye ayeghi lo kupokichemi eno kachena shive niae, eno khuu no ni ithuluni keno heqhive nanie.” 15Tile Ampeu no pa vilo pi, “Tishimlae! Khuana no Cain heqhive aye, ghuthu tsüni pa shou amkhü lunani.” Eno Ampeu no amchipu lakhi Cain shou qhive, tishimo aye khukhumu pa ithulu keu no pa ghüza nosake. 16Tithiu Cain ye Ampeu zülono wuve eno Eden kipelau Nod yeghi lo xüsüve.
17Cain no pa nipu ithive eno li ye mishive no Enoch punu. Kughou pa no aphughi lakhi shiqhe keno, pa no pa nu jelono tipau pesü Enoch kuvetsü. 18Enoch nu Irad, eno Irad nu Mehujael, Mehujael nu Methushael, Methushael nu Lamech. 19Lamech ye anipu kini luve. Anipu lakhi je Adah, eno lakhiu je no Zillah. 20Adah no Jabal punu; pa ye aphiki lo ngoche kemi eno pichepighi kipighimi papu ke. 21Pa thiküzüu je no Jubal; pa ye aheo ngo fulili küigha chekemi papu. 22Zillah no Tubal-cain punu; pa ye alazayi ngo ayi pesü tinhemgha iqiphe kemi shive. Tabul-cain chepu je no Naamah.
23Lamech no pa nipu pama vilo pi:
“Adah ngo Zillah, I tsa inilo;
Lamech nipu nokujo, I no kiu pi keno inilo: timi lakhi
no I ghüza ke, apumi lakhi no
I heve kehu I no pithivae.
24Tsala Cain mkhükulu no ghuthu tsüni shi aghi aye,
Lamech sala ye ghuthu lhotsüni tsüni lunani.”
25Adam no itaghi pa nipu ithive, li no anu lakhi punu eno pa je Seth kuvetsü, kughengu li no pi, “Cain no pithive tsükeu, Abel züqhulo Alhou no I ghenguno atikughuko kütau süküsü shive tsüae.” 26Seth lau ghi anu lakhi punu, eno pa je Enosh kuvetsü. Tipa ghuloki lo timiqo ye Ampeu je kuthuve.#4:26 Momu sheqhe shikimthi thuve.
Nu markerat:
BOTHUBO 4: SUMRVBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The Bible Society of India
© 2023, Used by permission. All rights reserved. More