Matej 8
8
O Isus sasljari e gubavco
(Mk 1,40–45; Lk 5,12–16)
1Sar o Isus huljela ine tari gora, baro narodo dželo palo leste. 2Otojekhvar alo koro leste nesavo gubavco, pelo ko kočija anglo leste hem phenđa: “Gospode, te mangeja, šaj te sasljare man!”
3I o Isus pružinđa plo vas, dolinđa le hem phenđa: “Mangava, ov sasljardo!”
I otojekhvar ulo sasljardo oti guba.
4Tegani o Isus phenđa lese: “Ma vaćer nikase akalestar, nego dža mothov tut e sveštenikose hem de žrtva, sar so naredinđa o Mojsije, zako svedočanstvo olenđe.”
O kapetani mothoj pli vera ano Isus
(Lk 7,1–10; Jn 4,43–54)
5Kad o Isus đerdinđa ki diz Kafarnaum, alo koro leste jekh kapetani e rimljanengoro, kova inele upreder šel vojnici, hem rodinđa lestar pomoć 6vaćerindoj: “Gospode, mlo sluga pašljola čhere nepokretno hem ano bare dukha.”
7O Isus phenđa lese: “Ka avav te sasljarav le.”
8A o kapetani phenđa: “Gospode, na injum dostojno te đerdine maje ko čher. Nego samo naredin hem mlo sluga ka ovel sasto. 9Adalese so hem me injum manuš talo autoritet, hem isi man vojnici teleder mande. I jekhese vaćerava: ‘Dža!’ – i ov džala. A averese vaćerava: ‘Ava!’ – i ov avela. A mle slugase vaćerava: ‘Ćer adava!’ – i ov ćerela.”
10A o Isus kad šunđa adava, iznenadinđa pe, irinđa pe nakoro narodo kova džala ine palo leste hem phenđa lenđe: “Čače vaćerava tumenđe, na arakhljum ni jekhe ano Izrael te ovel le esavki vera. 11A vaćerava tumenđe hem akava: but džene ka aven tari sa i phuv, taro istok hem taro zapad, hem ka oven uzalo astali e Avraameja, e Isaakeja hem e Jakoveja ki gozba ano carstvo e nebosoro. 12A okola kolenđe o carstvo pripadini ka oven frdime avri taro carstvo, ani naj dur tomina, kote ka ovel baro rojba hem krciba e dandengoro tari dukh.”
13Tegani phenđa e kapetanese: “Dža! Nek ovel ađahar sar so verujinđan!”
I ko adava momenti e kapetanesoro sluga saslilo.
O Isus sasljari bute nambormen hem opsednutimen
(Mk 1,29–34; Lk 4,38–41)
14Kad o Isus alo e Petrese ko čher, dikhlja lesere sasuja sar pašljola namborme hem isi la bari jag. 15I o Isus dolinđa lakoro vas hem i jag muklja la, i oj uštini hem lelja te poslužini le.
16Kad peli i rat, ande koro leste bute manušen ano kolende inele o demonja hem ov lafeja ispudinđa e duhen hem sasljarđa sa e nambormen. 17Ađahar pherdilo okova so phenđa o proroko o Isaija:
“Ov lelja amare bizoralipa
hem legarđa amare nambormipa.”
Nane lokho te ovel pe e Isusesoro učeniko
(Lk 9,57–62)
18Kad o Isus dikhlja da but džene čedinde pe uzalo leste, naredinđa ple učenikonenđe te nakhen ki aver strana oto jezero.
19Tegani alo đi leste jekh učitelj e Zakonestar hem phenđa: “Učitelju, ka džav tuja kaj god tu džaja.”
20A o Isus phenđa lese: “E lisicen isi jazbine hem e čirikljen gnezdija, a man, e Čhave e manušesere nane kaj te pašljarav mlo šero.”
21Aver učeniko phenđa lese: “Aš najangle, Gospode, te parunav mle dade, i ka džav pala tute.”
22A o Isus phenđa lese: “Phir pala mande hem muk o mule te parunen ple mulen.”
E Isuse šunena hem o barvalja hem o panja
(Mk 4,35–41; Lk 8,22–25)
23I kad o Isus đerdinđa ano čamco, palo leste đerdinde hem lesere učenici. 24I otojekhvar upro jezero muklja pe jekh zorali barval da o čamco lelja te pherđol pani oto talasija, a o Isus sovela ine.
25O učenici ale uzalo leste hem džangavde le vaćerindoj: “Gospode, spasin amen, meraja!”
26O Isus pučlja len: “Sose darana, tikora verakere manušalen?”
Tegani uštino, naredinđa e barvaljaće hem e jezerose te ačhon, i ulo baro mir.
27A o manuša ule začudime hem pučle: “Kovai akava so đi o barvalja hem o jezero šunena le?”
O Isus ispudini e demonen e duje manušendar
(Mk 5,1–20; Lk 8,26–39)
28I kad o Isus reslo ki aver strana oto jezero, ano krajo e Gadaresoro, iklile anglo leste duj manuša opsednutime demonencar kola avena ine taro grobija. Edobor inele nasilna da niko našti ine te nakhel adale dromeja.
29Otojekhvar vičinde: “So mangeja amendar, Čhaveja e Devlesereja? Akari li aljan te mučine amen angleder nego so valjani?”
30A po dur olendar jekh baro krdo oto bale hana ine.
31O demonja molinde e Isuse: “Te ispudinđan amen, bičhal amen ano okova krdo oto bale.”
32Ov phenđa lenđe: “Džan!”
I on iklile e duje manušendar hem đerdinde ano bale. I sa o bale prastandile taro brego ano jezero hem taslile ano pani. 33A okola so arakhena ine e balen, našle hem džele ki diz te vaćeren e manušenđe sa so ulo, hem adava so ulo e opsednutimencar. 34Tegani sa o manuša oti diz ale koro Isus. Kad dikhle le, lelje te molinen le te džal taro lengoro krajo.
Nu markerat:
Matej 8: RAB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
