Matej 10
10
O Isus bičhali e apostolen te vaćeren o evanđelje hem te sasljaren
(Mk 3,13–19; 6,7–13; Lk 6,12–16; 9,1–6)
1O Isus vičinđa kora peste e dešu duje apostolen hem dinđa len autoritet upro bišukar duhija, te ispudinen len, hem te sasljaren đijekh nambormipe hem bizoralipe. 2A akavai o anava e dešu duje apostolengere:
Simon, vičime Petar,
Andreja, e Petresoro phral,
Jakov, e Zevedejesoro čhavo,
Jovan, e Jakovesoro phral,
3Filip,
Vartolomej,
Toma,
Matej, o cariniko,
Jakov, e Alfejesoro čhavo,
Tadej,
4Simon Zilot
hem Juda Iskariot, kova posle izdajinđa e Isuse.
5O Isus bičhalđa akale dešu dujen vaćerindoj: “Ma džan koro manuša taro avera nacije hem ma đerdinen ki nisavi diz e samarijakiri, 6nego najangle džan koro našalde bakre e izraelesere narodostar. 7Džan hem vaćeren lenđe dai o carstvo e nebosoro paše. 8Sasljaren e nambormen hem e gubavonen, vazden e mulen hem ispudinen e demonen. Bizo pare priminđen, bizo pare den. 9Ma len tumencar zlatna, ni srebrna, ni bakarna kovanice ano tumare pojasija, 10ni torba dromese, ni aver gad, ni buderi obuća, ni štapi, adalese so o bućarno zaslužini pli plata.
11Kad đerdinena ki nesavi diz ili gav, roden nekas ko ka primini tumen te ačhoven koro leste đikote na džana adathar. 12So đerdinena ko adava čher, vaćeren: ‘Mir akale čhereste’. 13Te o čherutne priminde tumen, tumaro mir nek ačhol olencar. A te na priminde tumen, tumaro mir nek irini pe tumenđe. 14Te neko na priminđa tumen ili te na manglja te šunel tumare lafija, ikljoven taro adava čher ili tari adaja diz hem tresinen i prašina tumare prendar sar znako zako zoralo odbiba. 15Čače, phenava tumenđe, ko dive oto baro sudo ka ovel po lokhe e manušenđe tari Sodoma hem Gomora negoli e manušenđe tari adaja diz.”
O Isus vaćeri e učenikonenđe da ka oven progonime
(Mk 13,9–13; Lk 21,12–17)
16“Ače, bičhalava tumen sar bakren maškaro ruva. Adalese oven lukava sar o sapa, a birumime sar o golubija. 17Arakhen tumen, adalese so o manuša ka legaren tumen ko sudo hem ka šibinen tumen pumenđe ano sinagoge. 18Adalese so injen mle učenici, ka legaren tumen ko sudo anglo vladarija hem anglo carija. Adava ka ovel te šaj olenđe hem e manušenđe taro avera nacije te svedočinen mandar. 19Kad on ka preden tumen, ma oven zabrinuta sar hem so te vaćeren, adalese so tegani ka del pe tumenđe so te vaćeren. 20Adalese so naka vaćeren tumen, nego o Duho tumare nebeskone Dadesoro ka vaćeri prekala tumende.
21O phral e phrale ka del te mudaren le, a o dad e čhave. O čhave ka ušten upro pumare dada hem daja hem ka ćeren lenđe te oven mudarde. 22Sare ka mrzinen tumen zbog mande. Ali kova ačhola verno đi o kraj, ka ovel spasime. 23Kad ka len te progoninen tumen ani jekh diz, našen ki aver. Čače vaćerava tumenđe, naka resen te ćeren ano sa o dizja e Izraelesere okova sose injen bičhalde angleder so me, o Čhavo e manušesoro, ka avav.
24Nane o učeniko upreder o učitelji, ni o sluga upreder o gospodari. 25Dovoljnoi e učenikose te ulo sar lesoro učitelji, a e slugase te ulo sar lesoro gospodari. Te man, e anglune čherutne, vičinde ‘Veelzevul’ – Sotoni – kobor više tumen, mle čherutnen, ka vičinen po bišukare anavencar!”
O učenici na valjani te daran, adalese soi dragocena e Devlese
(Lk 12,2–7)
26“Adalese, ma daran olendar, adalese so sa soi čorale, ka dičhol hem sa soi garavdo, ka šunđol. 27So vaćerava tumenđe ani tomina, vaćeren ko svetlost; hem so pohari vaćerava tumenđe ko kan, vaćeren taro krovija sare te šunen.
28Ma daran okolendar kola šaj te mudaren samo o telo, a našti te mudaren hem i duša. Nego daran e Devlestar kova hem i duša hem o telo šaj te uništini ano pakao. 29Na biknena pe li duj čiriklja zaki samo jekh najtikori kovanica? A palem, nijekh olendar na perela ki phuv, a adava te na mukel tumaro Dad kovai ano nebo. 30A tumenđei đijekh bal ko šero džendo. 31Adalese, ma daran! E Devlese injen po dragocena negoli but čiriklja!”
O učenici valjani te priznajinen e Isuse anglo manuša
(Lk 12,8–9)
32“Đijekh kova anglo manuša ka priznajini dai mlo, hem me anglo mlo Dad, kovai ano nebo, ka priznajinav dai ov mlo. 33A đijekh kova anglo manuša odreknini pe mandar, hem me anglo mlo Dad, kovai ano nebo, ka odrekninav man olestar.”
E Isusesoro lafi ka anel podela
(Lk 12,51–53; 14,26–27)
34“Ma te mislinen da aljum te anav mir ki phuv. Na aljum te anav mir, nego mači. 35Aljum te razdvojinav:
‘e čhave lesere dadestar
e čhaja lakere dajatar
e borja lakere sasujatar.
36E manušese ka oven neprijatelja lesere čherutne.’
37Ko mangela ple dade ili pla daja više nego man, nane dostojno te ovel mlo učeniko. Ko mangela ple čhave ili pla čhaja više nego man, nane dostojno te ovel mlo učeniko. 38Ko na lela plo krsto hem na džala pala mande, nane dostojno te ovel mlo učeniko. 39Ko arakhi plo dživdipe, ka našali le, a ko našali plo dživdipe zbog mande, ka arakhi le.”
Nagrada okolenđe kola priminena e učenikonen
(Mk 9,41)
40“Ko primini tumen, man primini, a ko primini man, primini e Devle kova bičhalđa man. 41Ko primini e proroko adalese soi proroko, proročko nagrada ka primini, hem ko primini e pravedniko adalese soi pravedno, pravedničko nagrada ka primini. 42Ko dela hem samo jekh šudri čaša panjeja jekhese akale najtikore manušendar te pijel adalese soi mlo učeniko, čače vaćerava tumenđe da naka našali pli nagrada.”
Nu markerat:
Matej 10: RAB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
