Luka 5

İsa telebanê xoyê sıfteyınan çineno we

1Rocê, İsa kınarê Gola Celile#5:1 Gola Celile: Greki de “Gola Ginesar”, namê xowo bin Gola Celila. de bi. Sılxetiye dormê iy gırot kı qesanê Heqi bıeşiyê pê. 2İsay kınarê golı de, dı teni qayıği di. Mordemê kı masi pê gırotenê, qayığanê xo ra amay bi war, torrê xo şütenê. 3İsa nist qayığa Simuni, cı ra wast kı qayığı kınarê golı ra tenê bancero ota. Bado qayığı de nist ro, uca ra waaz da mıleti. 4Qeşikerdena xo kı qedenê, Simuni rê vat: “Bıramı cayê xori, torranê xo bercerê awkı kı masiyan pêgerê.”

5Simuni vat: “Malım, ma peşew ra hata lel guriyayım, qe thaba pê nêgırot. Feqet ezo ancia vatena to bıkeri, torran berceri awkı.”

6İnan na vatena İsay kı kerdı, hini zêdı masi pê gıroti kı senık mandi bi kı torrê xo çhır bêrê. 7İnan bı dest'a işaret da havalê xoyê kı qayığa binı derê, inan ra pheşti wasti. Havalê xo amay, dı qayıği hata fek masiyan ra kerdi pırr, ay ra senık mandi bi kı qayıği sêrê bınê awkı.

8-9Simun Petrusi kı na diye, xo est verê nınganê İsay, nia vat: “Ya Wayir, ez mordemo de gunakaran, mı ra duri fındı!” Simun u iyê kı bı iy'a pia qayığı de bi, inan kı di çıqa masi pê gırotê, sas bi mandi. 10Lacê Zebedi, Yaqub u Yuhanna ki bı Simuni'a pia guriyenê, ni ki zê Simuni sas bi bi.

İsay Simuni rê vat: “Metersı, nay ra tepia hurindia masiyan de mordeman gênay pê.” 11İnan qayığê xo anti kınarê golı, her çi ca verday, İsay dıma şi.

İsa jüyê de cuzamıni keno wes

12Key kı İsa jü sukı de bi, uca de jü mêrıko de nêweşiya cuzamı gıroti bi, rastê cı ama. Canê niy pêro khul bi bi. Key kı iy İsa di, xo est verê nınganê İsay, rüyê xo na herdi ser, cı rê mınetı kerd u vat: “Wayir, ekı tı bıwazerê, şikinay mın wes kerê.”

13İsay destê xo derg kerd na mêrıki ra, vat: “Ez wazenan kı tı wes bêrê.” A deqa mêrık nêweşiya cuzamı ra xeleşiya ra.

14İsay mêrıki rê vat: “Kesi rê qalê nay mekı. So, rayibi bıvênı; qurbana kı Pêxember Musay emır kerda, ay berı rayibi rê kı her kes bıvênero, tı biyay wes.” 15Feqet xeberê kı heqa İsay de daa zêdı biyenê vıla. Mılet amenê pêser, şiyenê lê İsay kı gos bıdero qesanê iy u nêweşiyanê xo ra bıxeleşiyo ra. 16İsa ki rew rew şiyenê cayanê isızan düay kerdenê.

İsa jü mordemê de kudi keno wes

17Rocê İsay ancia waaz denê. A waxt en vırniye de, Ferisiyan#5:17 Ferisi: İtıqatê Yahudiyan de jü meseb bi. Lista qesan ro sêr kerê, peyniya ni kıtabi de. bı ilimdaranê itıqati'a ronişti bi; ni pêro her dewa Celile ra, her dewa Welatê Yahudiyan ra, suka Yeruşalimi ra ki amay bi. İnan nisti bi ro, gos denê qesanê İsay. İsay bı qeweta Heqi'a weşiye denê nêwesan. 18A waxt, dı-hirê mordeman ki jü mêrıko de kud serê cılı de ard. İnan wastenê kı zerrı kuyê, ni mêrıki bêrê lê İsay. 19Feqet i cay hini sılxet bi kı nêşkiyay zerrı kuyê. İ ki veciyay serê bani, inan uca de jü lanıkı kerdı ya, mêrık bı cıl'a pia a lanıkı ra na ro wertê mıleti, verê İsay. 20İsay kı itıqatê inan di, mêrıkê kudi rê vat: “Bıra, gunay to ef bi.”

21 İlimdaranê itıqati bı Ferisiyan mabênê xo de nia qeşi kerdenê: “No kamo? Çıton xo keno hurindia Heqi? Heqi ra zobina kam şikino kı gunan ef kero?”

22İsay zana inan mabênê xo de çık qeşi kerdenê, inan rê nia vat: “Sıma, çay çiyê nanênan anê aqlê xo? 23Kamcinı reta? Mordem vaco ‘Gunê to ef bi’, yan vaco ‘Urcı pay, bıfeteli’? 24Sıma nay bızanerê kı Lacê Mordemi#5:24 Lacê Mordemi: Mesih İsa, ni nami saba xo vano, no namı kıtabê Pêxember Daniel de vêreno ra, no namı hetê Yahudiyan ra êno zanıtenı. şikino herdê dina de gunan ef kero.” Bado mêrıkê kudi rê nia vat: “Urcı pay, cıla xo bigi, so kê xo.”

25Mêrık a deqa verê çımanê pêronan de vest ra pay, cıla xo gırotı. Heqi rê bı şukır kerden'a şi kê xo. 26Her kes sas bi u heyran mand. İnan Heqi rê şukır kerd, nia vat: “Ma eyro çiyê ecayibi diyê.”

Levi beno telebê İsay

27Na mesela dıma, İsa veciya teber. Uca de jü taşildar di. Namê ni taşildari Levi bi. No taşildar cao kı vergi amenê top kerdenı, uca de nisti bi ro. İsay cı rê vat: “Mı dıma bê.” 28Levi ust ra, her çi ca verda, İsay dıma şi.

29Bado Levi kê xo de saba İsay ziyafeto de gırs da. Ni ziyafeti de xeylê taşildari u mıleto bin pêro nisti bi ro nani ser. 30Ferisiyan u ilimdaranê itıqati telebanê İsay rê vat: “Sıma çay bı taşildaran u gunakaran'a pia wenê, sımınê?”

31-32İsay inan rê vat: “İyê kı Heqê xo de rastê, ez saba inan niaman. Ez iyê kı gunakarê, saba inan aman veng deri inan kı i bêrê tobı bıkerê. Çıkı mordemanê wesan rê nê, mordemanê nêwesan rê doxtor lazımo.”

Mesela roci

33 Ferisiyan u ilimdaranê itıqati İsay rê nia vat: “Hem telebê Yahyay hem telebê Ferisiyan rew rew rocı gênê pê, düan kenê. Telebê to her waxt wenê, sımınê.”

34İsay ki inan rê nia vat: “Meymanê kı amê veyvı, key kı zama mabênê inan dero, i senên rocı pê bigêrê? 35Rocê êna kı zamay mabênê inan ra gênê, i a waxt rocı gênê pê.”

36İsay inan rê mesela nanênı ki qeşi kerdı: “Qe kes kınca newiye ra phersban nêgêno, nêsano kınca khanı. Ekı hini bıkerê, hem kınca newiye lanı bena, hemı ki phersbano kı kınca newiye ra amo gırotenı, emisê kınca khanı nêbeno. 37Jü ki qe kes şeraba newiye nêkeno meska khanı. Ekı hini bıkerê şerabı meskı peqnena, hem şerabı rışina, hem ki meskı bena xırabı. 38Ay ra, gereko kı şeraba newiye cı kerê meska newiye. 39Jü ki keso kı şeraba khanı sımıno, şeraba newiye nêwazeno, vano, ‘Awa kı khana, daa wesa.’ ”

Nu markerat:

Luka 5: kiu

Märk

Dela

Kopiera