Luk 2
2
Nda bedziya Zezu
1Ndili yayu, kani Ogisti aluma ne utala batu se ilongo dzesi. 2Yedze ni untalu ŋwen wika. Ndili mene Kilinusi edze ni kani we ilongo dze Sili. 3Ye batu besi betse untalu, muutu ne muutu se ngundu ye bedziya wangu. 4Ne Zozefi atelime ngundu ye Nazaleti, se Galile ne utse ngundu ye Betileyemi se Zude ye bedziya Davidi, ne Zozefi edze we imbisa dze Davidi. 5Zozefi atse bane Maliya witse yikwe ŋwadzi wedzi, yayu betala ne bangu, Maliya edze ne dzimi. 6Ye bangu bedze Betileyemi, ndili ye Maliya ye udziya ya kalwe. 7Maliya adziya ŋwana wedzi we wika we ibaka, wangu avungule ŋwana mikanda ayala wangu se batsi ye bibodzi bidza, ne bangu beke kobise buma se ndaku ye benzenze.
Tuma we Nzambi aya tanda misisili mive ne bebati be bibodzi
8Se ngundu mene yangu yotu, yedze ne bebati be bibodzi bedze ne udze se mekʉba ne pinzi, ne ubata bibodzi. 9Tuma we Nzambi aya palɨkise tima ye bangu ne likuma le Nzambi kwalala, ye bangu beyene bongo amene. 10Tuma we Nzambi ne bangu ati: «Dzikayi yene bongo, me meya ni ye tanda beyi misisili mive, mitse dze itsisa dzineni dze batu besi. 11Velolo se ngundu ye Davidi, badziya beyi unlungisi Klɨsti we Nzambi etobo, wangu ni kuŋwu. 12Yenayi ndimvu ye beyi bitse yimba wangu, beyi betse kobise ŋwana we teketeke bavungule mikanda bayala se batsi ye bibodzi bidza.» 13Palɨkise, ye boko betuma beyitsi beyinga ikulu, baya kobise we wika ne uvʉtise Nzambi live ati: 14«Likuma le Nzambi we kata ikulu amene, ne itavu se senze ne batu bedzi itondo.»
Bebati be bibodzi batse Betileyemi
15Ye betuma be Nzambi bevutse ikulu, bebati be bibodzi bawowe tima ye bangu ati: «Tumbayi Betileyemi betse yene me meya, me Kuŋwu Nzambi ilaka bebe.» 16Bangu batse mesadzi mesadzi, ye bangu bekobise Maliya ne Zozefi ne ŋwana we teketeke, bayala se batsi ye bibodzi bidza. 17Ye bangu beyene wangu, bangu batanda ne batu besi me tuma we Nzambi etanda bangu se ŋwana. 18Batu besi bakima, ne me bebati be bibodzi betanda. 19Ni Maliya edze ne bata mamvu mesi se unlima, ne utsimene uyitsi. 20Ye bebati be bibodzi bevutse kwele ye bangu bibata dzimvu dze bibodzi bye bangu, ye bangu betse ne yakwe mimvu ne ukumise Nzambi, utsina ne me bangu beyene, ne me bangu beyuka: «Ni mesi mesuta si nda tuma we Nzambi etanda besu.»
Baluka ŋwana kumvu
21Vʉsa ve uŋwambi ve dzanga, ye bangu bekwise ŋwana sakwe, baluka ŋwana kumvu ye Zezu. Kumvu ye tuma we Nzambi eluka ŋwana, Maliya asa nde ne bapa dzimi.
22Ndili ye Zozefi bane Maliya bepika itsinda dze Maliya ipula ndaku ye vali nda bitsila bye Moyizi eluma bangu pika ya dzanga, ye Maliya bane Zozefi bebapa ŋwana Zeluzalemi, ne utse laka ne kuŋwu. 23Ni batende se bitsila bye Kuŋwu ati: «Ŋwana we wika tadze ibaka, badzika wangu kwele ne dzanza dze Kuŋwu.» 24Ye bivele kaba ne mekunda mole, ti ya wata vavu baana be bembinga bole, ne upika nda bitsila bye kuŋwu eluma bangu pika.
25Se Zeluzalemi, yedze ne muutu we kumvu Simeyon, wangu edze ni muutu we umve wedze ne ukuuna Nzambi, wangu edze ne ubuka wiya lungise Izayeli, Fudzu ye Umpende yedze nedzi. 26Fudzu ye Umpende, ye tanda nedzi ati: «We nde waa, ti we nde yene Klɨsti we Kuŋwu eluma.» 27Ye Fudzu ye Umpende ye luma Simeyon se ndaku ye Nzambi, ndili mene mbotu yali ye Zezu ya bapa wangu, ne utse pika bitsila bye Kuŋwu, nda beluma bangu pika. 28Simeyon aboko ŋwana se meboko medzi avʉtise Nzambi live ati:
29«Kuŋwu, yayu we tuka dzika undzanzi wowe awaa se itavu nda we tanda.
30Mɨsa mami ma yene unlungisi wowe me luma.
31Unlungisi wowe eyebise busu ve mekaka mesi.
32Wangu atse dze ni ibamvu dzitse yibise we se melongo mesi, wangu ni witse kaba batu bowe be Izayeli likuma.»
Simeyon atanda misisili mive
33Tata ne mama we Zezu, bakima ne me Simeyon edze ne utanda kule Zezu. 34Simeyon abondo ne bangu ati: «Nzambi abata beyi.» Wangu ne Maliya mama we Zezu ati: «Utsina ne ŋwana wowe batu be Izayeli beyitsi betse naŋwen, boko betse telime, wangu atse dze ni ndimvu mbotu ye Nzambi, ni batu betse lewe wangu, 35ye bitse yiba metsimini me se milima mye batu beyitsi. We mama wedzi, unlima ŋwowe ŋwen tse yene ubi, nda we beme tsʉba pusenzulu.»
Ana avʉtise Nzambi live
36Yedze ne ŋwatu we kumvu Ana, ŋwana we Fanuyele we ikaka dze Azele, wangu ni Muutu we Nzambi, wangu edze adzuna. Ana etse ibala ni asaka ngondo, bane unlumi wedzi badze bisiwu untsami. 37Yedzi evuka unkwili, wangu edze ne bisiwu meku ŋwambi ne bisiwu binayi, Ana nde teme ndaku ye Nzambi, adzanza ne musa ne pinzi, ne ukuta utsɨlu ve nzala ne ubondo. 38Ndili mene mbotu, ne Ana akalwe ndaku ye Nzambi, yedzi evʉtise Nzambi live, Ana avele wowe mamvu me se ŋwana ne batu bedze ne ubuka wangu ati: «Nzambi alungise Zeluzalemi.»
Zezu anene Nazaleti
39Yali ye Zezu yemana pika bitsila byesi bye Kuŋwu eluma bangu pika, ye bangu bevutse ngundu ye Nazaleti se Galile kwele ye bangu bidze. 40Ye ŋwana elungwene ne singa yesi, wangu edze ne ukani ne polo ye Nzambi yedze nedzi.
Zezu adzi ne bisiwu iku ne byole
41Yali ye Zezu yedze ne utse bisiwu byesi Zeluzalemi ne utse pika itsinda dze bangu bepula se uyika. 42Ye Zezu ebomo bisiwu iku ne byole, ye yali yedzi ye bapa wangu itsinda Zeluzalemi nda bangu bedze ne upika ne kala. 43Bemana itsinda, bangu bavutse ye Zezu evʉka Zeluzalemi, ni bangu beke yiba. 44Bangu beyiba nati, ŋwana adzi tima ye batu bedze ne ulanda kone bangu. Bangu balanda unyindile ŋwesi, ye bangu befumba ŋwana tima ye yali ne bembatsi. 45Nda bangu beke yene ŋwana, bangu bavutse Zeluzalemi ne utse ne ufumba wangu. 46Vʉsa ve unsatu, ye bangu beyene Zezu se ndaku ye Nzambi, untsitsi, tima ye belakisi be iwowe dze Nzambi. Wangu edze ne uyuka, ne ukaba bangu midzitsi. 47Besi bedze ne uyuka wangu, bakima ne utsengu vedzi edze ne ukalule midzitsi. 48Ye yali yedzi ye yene wangu, bangu bakima. Mama wedzi nedzi ati: «A ŋwana wami, yowe me pika besu vavu ni yi? Besu ne tata wowe beme fumba we ne bayi yesi.» 49Ye Zezu ekalʉle ne yali yedzi ati: «Ye beyi bifumba me ni yi? Beyi nde yiba ati uve madze se ndaku ye Tata wami.» 50Ni bangu beke yuka medzi edze ne utanda bangu. 51Ye Zezu evʉtse bane yali yedzi Nazaleti, Zezu edze ne ukuuna yali yedzi. Mama wedzi edze ne ubata mamvu mamu se unlima ŋwedzi. 52Zezu anene ne ukani vesi ne Nzambi ne batu, bayene wangu uve.
Nu markerat:
Luk 2: WUM
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
