Naiˍ htangˍ 11
11
Yeˍruˆsaˍlaemˍ Hkritˆ yanˍ ang muˉ uiˉ na Peˍtruˆ yang kanˉ uiˉ maˍ biˍ jiˍ
1Changˉ ceuˉ htiˍ baˍ uiˍ Hpaˍcaoˍ beu ang tangˍ na hap yuˉ naeˉ awˍ lawng na Yuˉdaˆ ang meungˉ hkaoˉ veu ca naeˉ naiˍ htangˍ uiˍ nae yumˉ naeˉ saˉ naeˉ uiˉ changˉ htiˍ baˍ uiˍ ya kyaˍ jiˍ. 2Haeˉ mae yao, Peˍtruˆ Yeˍruˆsaˍlaemˍ vengˍ veu lae laeˍ beu, ang hkaw haen laeˍ jiˍ yumˉ naeˉ saˉ naeˉ Yuˉdaˆ changˉ uiˉ yang na ha biˍ jiˍ yang, 3Naˇ ang hkaw baˍ haen laeˍ nae uiˉ changˉ uiˉ kawngˉ yumˉ veu awngˉ nga lae yao yawng kawngˉ ang caˍ ang tangˉ jiˉ leˍ nae, yawng yang na iˍ jiˍ. 4Haeˉ mae beu, Peˍtruˆ nawˍ yawng na hpeuˍ laˍ jiˉ kanˉ hingˉ tawngˍ pawk veu ca yao tawngˍ tin veu hkeu hkai yao piˉ kyaˍ jiˍ yang,
5Ga Yuˆpeˍ vengˍ hkaoˍ veu ang buinˉ paˉ yao ca beu, aˍ hpenˍ ang huiˍ lawˍ htiˍ hpeunˍ nae, ang ku ang ku nae hpui yao buingˍ htaˍ veu ca yao ga kawngˉ tiˍ hkeu poiˉ luiˍ laˍ jiˍ na, mae buinˉ hkaoˉ veu ga ya myangˉ yaeˉ. 6Hingˉ na ga maenˍ nae hu beu, nuingˉ chaˍ htaˍ veu cenˍ laˍ hkuiˍ hanˍ hkuiˍ nae tawˍ cangˉ naeˉ uiˉ cenˍ nae buingˍ htaˍ veu pyamˉ nga cangˉ naeˉ uiˉ ga ya myangˉ yaeˉ. 7Haeˉ mae beu, Peˍtruˆ veuˉ, hta laˉ yao saeˍ ya yao caˍ bao nae ciˍ sangˍ laˍ naeˍ ang tangˍ na ga ya kyaˍ yaeˍ. 8Hta yao muiˉ, ga ha biˍ, Baˍ hpeuˍ laˍ taw Ang suingˉ Hpaˍcaoˍ, aˉ mae yao nae baoˉ vaˍ, baˍ seungˍ baˍ sangˍ nae uiˉ ang ceuˉ uiˉ ga beu miˍ tu hkaoˉ veu htiˍ cangˍ nae muiˉ baˍ piˍ awngˉ aeˉ myang nae ha biˍ yaeˍ. 9Buingˍ htaˍ veu ang tangˍ htiˍ cangˍ kyaˍ laeˍ jiˍ. Hpaˍcaoˍ piˉ seungˍ piˉ sangˉ nga jiˉ ang ceuˉ na baˍ seungˍ baˍ sangˍ nae baˍ ciˍ jo nae ga na ha langˍ ngaeˉ. 10Ningˉ mae sumˍ cangˍ veu tiˍ hkeu hpeuˍ peunˍ yao, hingˉ uiˉ na buingˍ htaˍ htaˍ veu suiˍ ta laengˉ laeˍ byaˇ. 11Hingˉ nyamˍ hkaoˍ veu Kaeˉsaˍriˆ vengˍ veu ga kawngˉ tawk yaˍ luiˍ jiˍ uiˉ changˉ sumˍ hu gu ca naeˉ yumˉ htangˍ hingˉ keung hkeu lui jiˉ. 12Nuing ba htawˉ nawtˆ kuitˆ naeˉ uiˉ baˍ ca nae, yawng kawngˉ htuˍ yaˍ laˉ mae aeˉ voˍ nae, Ang hkawˍ laˉ ga na ha laˍ ngaeˉ. Ang pawngˍ aiˉ hkoˍ hu uiˉ muiˉ ga kawngˉ htuˍ yaˍ laˉ mae aeˉ yao Kawˉneˍliˆ beu yumˉ veu awngˉ aeˉ yaeˉ. 13Changˉ hiˉ maˇ, yang yumˉ veu buingˍ htaˍ naiˍ htangˍ htiˍ hu cung yao ca naeˉ na yang ya myangˉ jiˉ awˍ lawng gu na ha langˍ ngaeˉ. Buingˍ htaˍ naiˍ htang yang na ha biˍ jiˍ yang, Yuˆpeˍ vengˍ veu changˉ poiˉ yao Peˍtruˆ nae maengˉ jiˉ Siˉmunˍ mangˍ na piˉ haoˉ aeˉ voˍ. 14Nang nae nang beu yumˉ changˉ uiˉ hkaˉ hko laˉ hko aˉ mae ha yao htaiˍ awkˍ naeˍ uiˉ na ya naeˉ uiˉ saˍ laiˍ, yaˇ nawng na upˍ laˍ naeˍ yaˇ nae gu na htiˍ cangˍ upˍ laeˍ laˍ naeˍ. 15Ga hkaˍ muˍ hkai hpanˍ hpanˍ beu, ang daˍ beu Ang hkawˍ laˉ ang seungˍ sangˉ gu htaˍ veu lung luingˉ jiˉ lawˉ, yawng htaˍ veu muiˉ lung yao lui jiˉ. 16Haeˉ mae beu, Ang suingˉ Yeˍsuˆ hkai laˍ jiˍ ang tangˍ tiˍ htaeˍ hingˍ na ga kuitˆ puiˉ laeˍ yaeˍ. Yoˉhanˍ nawˍ langˉ hkaoˉ veu baˆtiˆsamˍ piˍ jiˍ. Htaˍ yao muiˉ, nawngˍ ngaˍ Ang hkawˍ laˉ ang seungˍ sangˉ hkaoˉ veu baˆtiˆsamˍ ya hkamˉ yuˉ naeˉ nae yang ha biˍ jiˍ. 17Ang suingˉ Yeˍsuˆ na gu yumˉ saˉ beu, Hpaˍcaoˍ gu na lapˍ sawngˍ piˍ laˍ naeˍ lawˉ, yawng na muiˉ piˍ baoˉ vaˍ, gaˇ aˉ mae ha yao Hpaˍcaoˍ na haenˉ taw naeˇ nae, Peˍtruˆ ciˍ jiˍ.
18Ningˉ awˍ lawng ningˉ na yawng ya kyaˍ beu, yawng htiˍ ceuˍ nae muiˉ baˍ hkai. Yawng Hpaˍcaoˍ na chiˍ mawng yao ciˍ jiˍ yang, haeˉ mae baoˉ vaˍ, Changˉ ceuˉ htiˍ baˍ uiˍ muiˉ Ang hkawˍ laˉ yaˍ teˍ yaˍ naeˍ uiˉ saˍ laiˍ, Hpaˍcaoˍ yawng beu naˍ hokˍ na kuitˆ puiˉ laeˍ naeˍ uiˉ saˍ laiˍ aˉ hkvangˍ piˍ naeˍ nae ha biˍ jiˍ.
Anˍtiˉokˆ Hkritˆ yanˍ ang muˉ awˍ lawng
19Haeˉ mae beu, Saˍteˍhpanˍ na tangˍ yao hkanˍ yaˍ chuiˍ yaˍ jiˍ na ya hkamˉ jiˉ pa, Yeˍruˆsaˍlaemˍ vengˍ hkaoˍ veu ca naeˉ yumˉ naeˉ saˉ naeˉ uiˉ changˉ ang byaˍ hpakˍ lang yao, Hpiˆniˆ ang meungˉ, Kuˇpaˉruˆ cunˉ nae Anˍtiˉokˆ vengˍ veu tiˍ hkeu aeˉ yao, Yuˉdaˆ changˉ uiˉ na yawng ang buinˉ tangˍ maˍ biˍ jiˍ. 20Caˇ, yawng htiˍ baˍ baˍ nawˍ, Anˍtiˉokˆ vengˍ veu hkeu lui beu, Heˍlaˍsaˆ tangˍ ciˍ naeˍ Yuˉdaˆ changˉ uiˉ na muiˉ, Ang suingˉ Yeˍsuˆ awˍ lawng mawnˍ pyawˉ naeˉ uiˉ ang buinˉ tangˍ maˍ biˍ jiˍ. Haeˉ mae maˍ biˍ jiˍ uiˉ changˉ uiˍ aˍ, Kuˇpaˉruˆ cunˉ changˉ nae Kuˆreˍneˍ ang meungˉ changˉ uiˉ yaˇ. 21Ang suingˉ Hpaˍcaoˍ beu laˍ htiˍ tanˉ hkoˇ yawng kawngˉ htuˍ yaˍ laˉ mae ca yao, changˉ ang byaˍ yumˉ saˉ laˉ yao Ang suingˉ Yeˍsuˆ kawngˉ hpap yao lui laeˍ jiˍ. 22Ningˉ awˍ lawng ningˉ na Yeˍruˆsaˍlaemˍ vengˍ hkaoˍ veu ca naeˉ Hkritˆ yanˍ ang muˉ uiˉ ya kyaˍ beu, Baˍnaˍbaˆ na Anˍtiˉokˆ vengˍ veu piˉ aeˉ jiˉ. 23Yang hiˉ keung hkeu yao Hpaˍcaoˍ beu ang buinˉ na ya myangˉ yao mawnˍ pyawˉ jiˉ. Nawng nuing ba yiˍ naenˉ nae Ang suingˉ Yeˍsuˆ na puing ing voˍ nae yawng hkaˉ hko laˉ hko uiˉ na yang kaˍ piˍ htaengˍ jiˍ. 24Aˉ mae yao nae baoˉ vaˍ, Baˍnaˍbaˆ nawˍ changˉ ang maenˍ hpeuˍ yao Ang hkawˍ laˉ ang seungˍ sangˉ na baˍ upˍ, yumˉ naeˉ uiˉ na baˍ upˍ htiˍ puing ca naeˉ changˉ uiˉ yaˇ. Haeˉ mae beu, changˉ ang byaˍ Yeˍsuˆ na yumˉ saˉ laˉ laeˍ jiˍ. 25Baˍnaˍbaˆ nawˍ Sawˉluˆ na saˉ naeˉ nae, Taˍsuˆ vengˍ veu aeˉ jiˉ. 26Yang na ya myangˉ beu, Anˍtiˉokˆ vengˍ veu suiˍ langˉ jiˉ. Yaˇ yetˍ aˍ htiˍ nuing pi lumˉ lumˉ Hkritˆ yanˍ ang muˉ kawngˉ hpawm lang yao, changˉ ang muˉ uiˉ na maˍ biˍ jiˍ. Taˍ peˍ htiˍ baˍ uiˍ na Hkritˆ yanˍ nae haoˉ naeˉ uiˉ ang maengˉ na, Anˍtiˉokˆ vengˍ veu maengˉ taw laˉ jiˉ. 27Ang nyamˍ hingˍ uiˉ hkaoˉ veu, Hpaˍcaoˍ beu pa rawˉ hpaet htiˍ baˍ uiˍ Yeˍruˆsaˍlaemˍ vengˍ nae Anˍtiˉokˆ vengˍ veu laˉ jiˉ. 28Yawng hkaoˉ veu Aˍgaˍbuˆ nae maengˉ jiˉ changˉ htiˍ hu mangˉ hta laˉ yao, Ang hkawˍ laˍ ang seungˍ sangˉ na cuˉ yao, Lok nuingˉ chaˍ htaˍ nawtˆ baeˍ naeˍ suˍ naeˍ uiˉ ang nyamˍ hkeu laˉ naeˉ nae ha biˍ jiˍ. Baeˍ naeˍ suˍ naeˍ ningˉ ngaˍ ang suingˉ ang huiˍ Kaˍlawˉdiˆ coe veu maˉ manˉ hpeuˍ laˉ jiˉ. 29Haeˉ mae yao, ta peˍ htiˍ baˍ uiˉ aˍ, aˍ sangˍ yang hkiˍ jiˍ cha jiˉ lawˉ, Yuˉdaˆ ang meungˉ hkaoˉ veu ca naeˉ yumˉ naeˉ saˉ naeˉ uiˉ changˉ na pawngˍ naeˍ uiˉ saˍ laiˍ kuitˆ chae laeˍ jiˍ. 30Yawng kuitˆ chae lae yao chiˉ jiˉ laˉ mae ha peunˉ yao, Baˍnaˍbaˆ nae Sawˉluˆ laˍ puˍ hkaoˍ veu awnˍ hoˉ yaˍ manˍ uiˍ htiˍ baˍ na fakˍ laeˍ biˍ jiˍ.
Nu markerat:
Naiˍ htangˍ 11: pyy
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2022, Wycliffe Bible Translators, Inc. All rights reserved.
