Matthew 3
3
1Neħ dwä̱ˑnĭs'häˑdeˑnyök' hoˑyös'öh John ne Bapˑtist deˑo'diˑo'gwahˑdö'önˑdyĭëħ he'öˑweh deˑa'di'na̱ˑgeˑnyöħ' ne Juˑdeˑa,
2Ha'dö'neħ, Döˑsa'swaˑdeˑnih' ne swaħ'niˑgöˑä̱ħ'gëh; neħ sä̱ħ'ä̱h, neˑgä̱'öˑyaħˑgëh oˑi'waħˑgëh ne dwä̱ˑnöh'döˑöħs'häˑgwënˑni'yuħ o'nä̱h oħˑgaˑyöħ.
3Neħ sä̱ħ'ä̱h nä̱ˑgä̱' ho'dööh' no'snyieħ'öh noˑdo'gä̱sˑdaˑnih, Eˑsaˑiˑas, ne'aˑwä̱, Neħ na'wä̱ˑna̱ħ hoˑi'waˑno'daˑdyĭëħs' he'öˑweh de'aˑdi'na̱ˑgeˑnyöħ, swaˑdës'yöˑnih hä̱'a̱'weˑnö'önˑdyĭëħ Naˑyaħ'daˑgwënˑni'yuħ, ä̱ˑyo'doˑgä̱h'daˑnöök hot'a'deˑnyöħ'.
4Neħˑshaˑa'yaħˑdaat ne John, hoˑsyö'nyaħˑdö'nöħ ne ga'nyaħ'sgwaat oˑä̱h'dääħ; neħ, kuh, ne gä̱ˑnöh' gaħˑheh'saħ deˑot'hwaˑhä̱h; neħ, kuh, i'aas noˑgwä̱'yuħˑdaħ, loˑcust gaˑya'söh; oħˑnöh'gönt', kuh, oˑwä̱'na̱ħ', ne gaˑha'daˑgö'khaaħ.
5Neħˑhuh' he'oˑne'nööħ he'öˑweh it'heħs Jeˑruˑsaˑlem thoˑnöh'dä̱nˑdyööh, gaˑgwe'göh, kuh', ne Juˑdeˑa, haeħˑgwah', gwaħˑhuh', ne wak'daˑdyĭëħ ne Jorˑdan.
6Neħ, kuh, neh ho'öˑweh ne Jorˑdan wa'aˑgöˑye'ähˑdah'gwä̱ħ ne bapˑtism; neħ deˑo'nönˑdöh'hiˑyä̱ä̱h hoˑdi'wa'neħˑaˑgöh'.
7Neħ, gwa, noˑnä̱h' shaˑa'göˑgä̱ħ hoˑnönt'gaħˑdeħ ne Phaˑriˑsees kuh ne Sadˑduˑcees hoˑdiˑyööh neħ nä̱ˑa̱'göˑye'äħˑdah'gwä̱ħ ne bapˑtism, haˑgö'yä̱ˑa̱h'seeh, O iis, gaˑwaˑji'yäˑdeħ no'desˑhaes'datˑgöħ, söö, eħˑchiħ'niˑgö''ä̱nˑda'döh' na'eˑswaħˑnyaˑgä̱s' ne gaˑnöħ'kwä̱sˑhäħ da'weħ'?
8Neħ, dih, neh swai'oħˑdʋs'häˑyä̱n'dehˑdö'ök heh doˑgä̱s deˑji'swä̱ħˑni'göˑä̱nˑdeˑnyööh'.
9Sä̱ˑnöh', dih, ä̱ˑdi'swih' ne swä̱n'nöhˑdöˑnyös'häˑgö, Neħ sä̱ħ'ä̱h, niiħ, neh Aˑbraˑham shaˑgwaħ'nih; neħ, sä̱ħ'ä̱h, neh'huh noħˑgwä̱'a̱s, hoˑgwe'nyööh' Na'wënˑni'yuħ nä̱ˑgä̱ gaħ'sgwääˑge'öħ na'aˑgö'yaħˑda'gesˑguħ neħ a'okˑsaħ'daħˑshöħ'gä̱ˑa̱k ne Aˑbraˑham.
10Neħ, dih, oˑnä̱h ne'waħ neħˑhuh' heˑga'eħ naˑdo'gä̱ħ nokˑde'äħˑgëh ne gä'iˑdöħ; neħ, dih, gai'öˑnih, haħ'deˑge'önˑdaˑge, neħ tä̱ħˑä̱h' deħˑwa'yöˑntˑhaħ no'yiˑyuh, nä̱ˑgä̱'önˑdyaħ'göˑök; neħˑhuh' hä̱ˑwa̱n'dyöˑök noˑjĭs'daħˑgëh.
11Iiħ, naeh, doˑgä̱s' oħˑgwa'yeˑäħ'dahˑgwä̱ħ ne bapˑtism o'neˑgaˑnòs oħˑgye'äħˑdʋk, neh dö'saˑswä̱ħ'niˑgö'ä̱nˑdeˑniħ; neħ, gwa, neħ nänt'heħ na̱ħ'gä̱ä̱ħ, weˑsuħ' haħˑhas'desˑhääd, naeh he'niˑwaaˑgyä̱ħ' niiħ; tä̱ħˑä̱h, kuh, niiħ taħ'deˑgye'iħ ö'gaˑdi'önˑdah'göˑök na'khaˑwiħ'sek no'ohˑdah'gwaħ; ha̱'öˑhwa̱ħ', naeh, ä̱ˑsheˑswaˑye'äħˑdahˑgwä̱ħ' ne bapˑtism, neħ ä̱ˑa̱n'dye'äħˑdʋk' Noˑtwais'hä'doˑgä̱h'diħ, kuh noˑjĭs'dä̱ħ.
12Neħ haˑaħ' na'gaeh'da''wakˑthaħ, neħ, kuh, neh tgaˑgont' ä̱ntˑhas'ahˑdaħ'jih he'öˑweh hatˑgwaħ'esˑthaħ; neħ noˑna̱n'jaħ ä̱ˑe'oˑek ha'ge'önˑdah'gwaħ; neħ gwa', naeh, nä̱ˑa̱'ä̱ħˑdaaħ noˑgaeh'daħ ä̱ˑa̱'yeˑäħ'dʋk ne deħˑwaħs'swas noˑjĭs'daħ.
13Oˑnä̱h' neħˑhuh' nëtˑha'weˑnööħ' ne Jeˑsus, neħˑhuh' daˑah'dä̱nˑdiħ ne Galˑiˑlee, heˑo'yösˑöh ne Jorˑdan, he'öˑweh ni'eħs ne John, neħ, haeħ'gwah, nä̱ˑo'yeˑäħ'dahˑgwä̱ħ ne bapˑtism.
14Neħ gwa', ne John waˑo'isˑdä̱ħ, neħ na'aˑwä̱, iiħ ne gä̱ħ de'yuˑdö'ä̱nˑjööh aa'sgyeˑäħ'dahˑgwä̱ħ' ne bapˑtism; neħ, gä̱h, niis oħˑsgyaħ'doˑwä̱ħt?
15Neħ, dih ne Jeˑsus dĭsˑho'wä̱ˑna̱ħˑsäˑgwä̱h, haˑwä̱'a̱hˑseeh, Nyöˑgwaħ' shö; neħˑhuh', shö, niˑya'wä̱h ne'waħ; neħ, sä̱ħ'ä̱h, oˑi'waˑyä̱'ä̱sˑdöh' he'dwaˑyaħ'daˑdeħ nä̱ˑdwai'waˑye'it gaˑgwe'göh' ne gai'wihˑsaħ'höħ nön'daˑye'iˑwaˑye'ĭs. Oˑnä̱h' doˑgä̱s' hoˑga'yaħˑseeh.
16Neħ ne Jeˑsus noˑnä̱h' neħ sha'öˑwa̱ˑye'äħˑdah''gwä̱ħ ne bapˑtism, waħˑo'gönˑdaˑdyĭëħ dëtˑho'niˑöh'gä''wä̱ä̱nˑdöh ho''neˑguħ; da', oˑnä̱h nä̱' na̱ħˑa̱'wä̱h, oˑnä̱h', shö', kuh, deˑo'deˑho'önˑdyä̱ħ'seeh ne gä̱'öˑyaħˑgëh; neħ, kuh, no'oˑgä̱ No'twaisˑhäħ Na'wënˑni'yuħ dyuˑdaħ'sä̱hˑdöh, neħˑhuh' niˑyuħ'dä̱ˑa̱nˑdyĭëħ he'niˑga'yeˑhaħ ne jääh'goˑwaaħ gʋs'heˑnä̱ħ', iˑgä̱, ne daˑwa'daħˑsä̱nt; neħ neħˑhuh' oˑdä'dʋsˑöh haˑyaħ'daˑdeħ.
17Nä̱ˑdah, kuh, na̱ħˑa̱'wä̱h, daˑga'wä̱ˑnitˑgä̱ħt ne gä̱'öˑyaħˑgëh, waˑdöh, Neħ nä̱ˑgä̱ he'aˑwak, neħ ne weˑsuħ' heˑno'öhˑgwaħ, neħ tgaˑye'iħ akˑni'göˑiˑyuh haˑyaħ'daˑdeħ.
Nu markerat:
Matthew 3: SEE
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Gospels published by the American Bible Society in 1872, Psalms in 1892.
