Genesis 9
9
Tayta Diosmi Noeman limalicun
1Tayta Diosmi Noeta, lluy chulincunactawan allin capäcunanpä nin: “Achca chuliquicuna cachun; jinal cay jinantin pachäman juntapäcuy.#Gen 1.28. 2Lluy uywacunapis manchaculcäśhunquim. Jinantin pachäćhu imaymana uywacunäta, pälïcunäta, yacucunäćhu cawsäcunätapis maquiquimanmi ćhulaycamú. 3Chaynütac cay pachäćhu imaymana licchä cawsäcunäpis, imaymana ricäducunäpis micapäcunayquipämi canꞌa. 4Ñatac yawarnin pasäśha aychactam ichá ama micapäcunquichu; chay yawarcäćhu cawsaynin caśhanpamá.#Lev 7.26-27; 17.10-14; 19.26; Deut 12.16, 23; 15.23. 5Rasunpa, amcunap yawarniquita uywa jićhaśhanpi cäraycuśham canꞌa. Mayanniquipis nuna-masiquip yawarninta jićhaycücäpis cäraycuśhatacmi canꞌa.
6“Nunaca quiquin Tayta Diosnüllam
lulaycuśha cayan.#Gen 1.26.
Chaymi mayanpis nuna-masinta wañuchïcätá,
quiquintapis juc nunatac wañüchinꞌa.#Exo 20.13.
7Ñatac amcunapá achca milayniquicuna cachun.
Jinal jinantin pachäman juntapäcuy” nil.
8Nilcuśhanpïmi yapañatac Noetawan chulincunacta Tayta Dios nin: 9“Amcunaman, lluy milayniquicunamanpis limalicuśhämi. 10Chaynütacmi barcupi yalamü imaymana lichcä lluy uywacunämanpis: pälïcunämanpis, mansuwan chucaru uywacunämanpis limalicuśhä. 11Caymi amcunaman limalicuśhäca: Manañam nunacunäpis nï uywacunäpis yacuwan chincachishañachu caycunꞌa. Manañatacmi jinantin pachäćhu tamya fisyu imaypis canꞌañachu” nil.
12Nilculmi Tayta Dios nin: “Lluy cawsäcunäman limalicuśhäca wiña-wiñaypä rasunpa caśhanta tantiapäcunayquipä caymi camalachinꞌa: 13Tulumanyäta pucutaycäman śhalcachishäcämi. Caymi cay pachäman limalicuśhäcäpa camalachïnin canꞌa. 14Cay pachäman pucutayta pucutächimuptïmá tulumanyaca camalanꞌa. 15Jinaptinmi amcunaman, chaynütac lluy uywacunämanpis limalicuśhäta yalpaläśhä. Manañam tamya fisyuwan mućhuchicuy lluy cawsäcunäpä imaypis canꞌañachu. 16Chay tulumanya śhalcüśha cayaptinmi yalpaläśhä lluy cawsäcunäwan limalicuśhäca wiña-wiñaypä caśhanta” nil.
17Chaynütacmi Tayta Dios nin: “Caymi jinantin pachäćhu lluy cawsäcunäman limalicuśhäcäpa camalachïnin canꞌa” nil.
Noemi shincälun
18Ñatac Noe barcupi yalapämuśhan chulincunam cala: Sem, Cam, Jafet nishancuna. Cay Cam nishanmi Canaanpa taytan. 19Cay quimsa chulincunapïtam yapañatac jinantin pachäman nunacunaca milälälila.
20Noe ćhaclaćhu lulayta allayculmi übacta talpula. 21Chaymi juc cutićhu übapi bïnucta lulacuycul upyälul shincäla. Jinalmi chucllan ćhawpićhu calanllan jitalayäla. 22Chaynu calanllan taytan jitalayäśhanta licalculmi, Canaanpa cä taytan Cam nishan waśhaćhu cä wawꞌi-caśhancunacta willaycula. 23Chaymi chaynu calanllan jitalayaptin Semwan, Jafet ipa cutillanpa yaycuycälil jatun chusiniläwan taytanta lancaycapäcula. Ipa cutillanpa yaycapäculmari calanllan taytan caśhanta mana licapäculachu.
24Ñatac Noe malläyälul, śhullca chulin aytuśhanta yaćhälulmi:
25“¡Mana allinpä licaśha Canaan cachun!
Ishcaynin wawꞌi-caśhayquip uywayninpïpis
piyur uywayninlämi canquipis” nin.
26Nilculmi:
“¡Tayta Diosninchic
Semta allinpä licaycuchun!
¡Canaanñatac uywaynin cachun!
27¡Jafettañatac allin cäniyüman
Tayta Dios milaycachichun!
¡Sempa yaćhaśhanćhu Jafet yaćhachun;
Canaan#9.27 Canaan nipäcula Cam nunap milaynincunactam. uywaynin cachun!” nin.
28Chay tamya fisyupïta quimsa paćhac picha ćhunca (350) watacunalämi Noe cawsala. 29Isun paćhac picha ćhunca (950) watayümi Noe wañucula.
Nu markerat:
Genesis 9: QVW
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú