GENESIS 50
50
1Josef nih a pa cu aa kunhnawh i a ṭap i a hmai ah a hnamh. 2Cun Josef nih a kut tang rianṭuanmi sibawi hna cu a pa cu thu kho loin si in nan thuh lai tiah a ti hna. A ti bangin an tuah i 3ni sawm li an rau, thu lo dingin si thuhnak tuahnak ah hin cu can cu rauh tawn phung a si ko. Cun Izipt mi nih khan ni sawm sarih chung an ṭah.
4A pa ṭahnak caan cu a dongh tikah Josef nih Faro bawi pawl kha a thawh hna i, “Zaangfahnak tein, Faro kha, 5‘Ka pa nih a thih lai ah, Kanaan ram chung i aa cawhmi thlan ah na ka vui lai, tiah bia a ka kamter caah ka pa ruak cu va ka vuiter seh law ka vui dih in ka ra kir ṭhan lai, a ti,’ tiah va ka chimhpiak u,” a ti hna. #Gen 47.29-31 6Faro nih cun, “Na ka vui lai tiah bia an kamter bantukin va kal law na pa cu va vui ko,” tiah a leh.
7Cucaah Josef cu a pa vui ah khan a kal. Amah sinah cun Faro bawi vialte hna le a inn i rian a ṭuanmi upa vialte hna le Izipt ram chung haotu deuhdeuh paoh kha an kal dih. 8Cun Josef a innchungkhar le a unau hna le a pa innchungkhar zong kha an kal ve. An ngakchia hna le an tuu hna le an meheh hna le an caw hna lawng kha Goshen ram ah cun an chiahtak hna. 9Rangleng le rangcung ralkap zong kha an kal ve; bu ngan ngaingai an si.
10Cun Jordan nichuahlei i a ummi Atad hmun, facang cilnak hmun kha an phak tikah khika ah ruak humhnak nganpi an ser i Josef nih a pa ruak cu ni sarih a suan. 11Kanaan mi nih Atad i ruak humhnak an tuahmi cu an hmuh tikah, “Izipt mi caah a fak ngaingaimi mithi ngaihnak a si,” an ti. Cucaah cu hmun cu Abel-mizraim#50.11 ABEL-MIZRAIM cu Izipt ram hring hmun ti a si i Izipt ṭahnak ti bia he a aw chuah aa lo. tiah min sak a si. Jordan nichuahlei um a si.
12Cuticun Jakob nih a chimh hna bang khan a fale nih cun an tuah; 13Kanaan ram ah khan an kalpi i Abraham nih Hit mipa Efron sinin vuinak hmun caah a cawkmi vawlei Mamre in nichuahlei i a ummi Makpelah lo chung lungkua ah khan an vui. #Lam 7.16 14Josef nih a pa kha a vui dih in a unau hna le ruak vuinak ah amah sin i a kalmi vialte hna he khan Izipt ram ah an kir ṭhan.
Josef Nih A Unau Pawl Kha Hnangamnak A Chimh Hna
15An pa a thih hnuah khan Josef unau pawl nih cun, “Josef nih hin kan hua peng sual in a cung i ṭhat lonak kan rak tuahmi ruangah khan teirul cham kan tim seh law zeitin?” tiah an ti. 16Cucaah Josef kha bia an hei cah i, “Na pa nih a thih hlanah hi bia hi a kan chimhtak: 17Josef cu va chim u law a unau hna nih a cung i an tuahmi thil ṭhalo hi ngaithiam hna seh tiah na pa nih an nawl va ti u,’ a ti. Cucaah cun na pa Pathian sal hna nih na cungah kan tuahmi ṭhat lonak cu kan ngaithiam ko,” an ti. Hi bia an chimh tikah Josef cu a ṭap.
18Cun a unau pawl hrimhrim kha an ra i a hmaiah an kun i, “Na sal kan si ko hih,” an ti. 19Sihmanhsehlaw Josef nih cun a thawh hna i, “Nan thinphang hlah u; Pathian hmun ah khan keimah le keimah cu kaa chia kho lai lo. 20Ka cung i ṭhat lonak tuah awkah khua nan khan, sihmanhsehlaw cu nan khuakhannak cu Pathian nih thil ṭha ah a canter. Cu a canter cu zeicahdah a si ti ahcun cu thawngin nihin i a nungmi mi tampi hna hi, an nunnak khamh awkah a rak si. 21Cucaah nan thinphang hlah u. Nanmah he nan fale he ṭha tein kan zohkhenh hna lai,” a ti.
Josef Thihnak
22Josef cu a pa innchungkhar mi hna he khan Izipt ram ah cun an um i a thih ah kum za le kum hra a si. 23Efraim fale hna le an fale chin kha a hmuh manh hna. Manasseh fapa Makhir fale kha an chuah tikah Josef nih a innchungkhar chungah a lak hna. 24A unau pawl kha a thawh hna i, “Atu cu ka thihnak a nai cang, sihmanhsehlaw Pathian nih an zohkhenh hrimhrim hna lai i hi ram hin an chuahpi hna lai i Abraham le Isak le Jakob a kamhmi hna ram ah khan an kalpi hna lai,” a ti. 25Cun Josef nih cun Israel fapale kha bia a kamter hna i, “Pathian nih nannih kha ka chim bantuk cun an bawmh hna tikah ka ruh hi hi hmun hin nan sinah i kalpi hrimhrim dingin bia ka kam u,” a ti hna. #Exo 13.19; Jos 24.32; Heb 11.22 26Cuticun Josef cu kum za le kum hra a ti ah a thi i Izipt ram ah cun thut lonak dingin si an thuh i kuang chungah an chiah.
Nu markerat:
GENESIS 50: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006