EXODUS 4
4
1Moses nih cun a leh i, “Israel mi nih an ka zumh lo i ka chimmi an ngaih duh lo i, ‘Bawipa cu na sinah a lang pek lai lo,’ an ka ti ah tah zeitindah ka tuah lai?” a ti. 2Bawipa nih cun, “Naa putmi kha zeidah a si?” a ti. Moses nih, “Ṭhiangṭhunh,” tiah a leh. 3Bawipa nih cun, “Vawlei ah khan hlonh,” a ti. Moses nih cun a vun hlonh i rul ah a cang i a zaam. 4Bawipa nih cun Moses cu, “A mei khan vun tlai,” a ti. Moses nih cun a vun tlaih i a kut ah khan ṭhiangṭhunh ah a cang ṭhan. 5Bawipa nih cun, “Bawipa, an pupa hna Pathian, Abraham Pathian, Isak Pathian, Jakob Pathian na sinah ka langh kha an zumh khawh nakhnga, kha ti khan na va tuah lai,” a ti.
6 Bawipa nih khan Moses cu a thawh ṭhan i, “Na angki leng chungah khan na kut kha vun nawk tuah,” a ti. A chim bang cun a vun nawh i a hun chuah ṭhan tikah a kut cu zawtnak nih a tlunh, ṭialṭang in a rang dih i hawhra bantuk a si. 7Bawipa nih cun, “Na kut cu na angki leng chungah khan vun nawk ṭhan tuah,” a ti. A vun nawh ṭhan i a hun chuah tikah, a tak dang bantuk khan dam hirhiar tein a um ṭhan. 8Bawipa nih cun, “Nangmah kha an in zumh khawh lo i hmelchunhnak pakhatnak nih an lung a pemter khawh hna lo ahcun, pahnihnak tal nih hin cun a zumhter ṭheo hna lai. 9Cun hi hmelchunhnak pahnih hna thawng zongin an zumh khawh hlei lo i na chimmi kha an ngaih duh ṭhiamṭhiam lo ahcun, tiva chung ti kha tlawmpal in na lak lai i vawlei ah khan na thlet lai. Cu ti cu thisen ah a cang lai,” a ti.
10Moses nih Bawipa cu, “Bawipa, kei cu ka ngaithiam ko; zapi sin biachim a thiammi ka si bal lo i na ka chawnh hnu zongah hin ka thiam hlei ṭhiamṭhiam lo, Bawipa. Kei cu biachim holhrel a thiam lomi, mikahak, leichum ka-aa ka si,” a ti. 11Bawipa nih cun a thawh i, “Minung hi a ka cu aho nih dah a pek? Aho nih dah hnachet in a tuah i holh kho lo in a ser? Aho nih dah hmuhnak a pek i aho nih dah a mit a cawtter? Cu ti a tuahtu cu Bawipa hi ka si lo maw? 12Cucaah cun va kal ko; na holhnak ah kan bawmh lai i na chim ding kha kan chimh lai,” a ti. 13Sihmanhsehlaw Moses nih, “Bawipa, kei cu ka ngaithiam ko, midang tu thlah ko hna,” tiah a ti.
14 Bawipa cu Moses cungah khan a thin a hung i, “Levi mi na u Aaron kha a um a si lo mei? Amah cu bia chim a thiam ngaingaimi a si kha ka hngalh. Atu hi nangmah don awkah a ra lio i nangmah kha hmuh an duh ngaingai. 15Amah kha chim ding cu na chimh lai. Nan pahnih in chim awk kha kan bawmh hna lai i nan pahnih in nan tuah awk kha kan chimh hna lai. 16Nangmah aiawh in mi zapi sinah khan Aaron nih cun bia cu a chim lai; amah cu na ka-hlang a si lai i nang cu Pathian bantukin, cucu chim, khakha chim, a titu na si lai. 17Hi ṭhiangṭhunh hi i put, hi ṭhiangṭhunh hin khuaruahharnak na tuah hna lai,” a ti.
Moses Cu Izipt Ram Ah A Kir
18Moses cu a pu Jethro sinah khan a va kal i, “Izipt ram i ka rualchan pawl an nung rih maw ti vung zoh ka duh hna, cucaah cun ka kalter law ka vung zoh hna lai,” a ti. Jethro nih cun, dam tein vung kal ko, a ti. 19Bawipa nih Moses kha Midian ram ah cun a chawnh i, “Atu cu Izipt ram ah vung kir cang, nangmah thah an duhmi vialte kha an thi cang,” a ti. 20Moses nih a nupi le a fapa hna kha a lak hna i laa cungah a citter hna i Izipt ram ah khan an kir. Pathian nih a pekmi ṭhiangṭhunh kha aa put. 21Bawipa nih Moses cu a thawh i, “Atu cu Izipt ram ah na kir lio cang, na tuah khawh lai kan timi khuaruahharmi thil vialte kha Faro hmaiah na tuah hna lai. A lung ka ṭhawnter lai i mi cu kalter a duh hna lai lo. 22Cu tikah Faro cu na thawh lai i, Bawipa nih, ‘Israel cu ka fapa upa bik a si. 23Ka fapa nih cun a ka biak khawh nakhnga kalter ko, tiah kan ti i na duh lo. Cucaah cun na fapa upa bik kha ka thah lai,’ a ti, na ti lai,” tiah a ti. #Exo 12.29
24Lampi i an riahnak hmun pakhat ah Bawipa nih Moses kha a ton i thah a zalh. 25Zipporah nih khan lung harmi pakhat aa lak i a fapa cuarpar kha a tan i cu lung cun Moses ke kha a tawngh hna. Zipporah nih cun, “Nangmah cu thisen chuahtertu ka va na si hrimhrim ko,” a ti. 26Cun Bawipa nih Moses kha a nunter. Cu caan ah cun pei, khaka ah khan, cuarpar tannak tuahmi ruangah khan, “thisen chuahtertu va,” tiah a ti kha a si cu.
27 Bawipa nih Aaron cu a thawh i, “Moses ton awkah thetse ram ah khan va kal tuah,” tiah a ti. Amah ton awkah cun Pathian tlang ah khan a va kal i a ton tikah a hnamh. 28Pathian nih Moses cu kal a fial tikah a chimhmi vialte kha Moses nih cun Aaron cu a chimh dih i Bawipa nih tuah a fialmi khuaruahharmi thil vialte zong kha a chimh dih fawn. 29Moses le Aaron cu an va kal i Israel mi hruaitu vialte kha an pumh hna. 30Aaron nih cun, Pathian nih Moses a chimhmi vialte kha a chimh hna i khuaruahharmi thil vialte kha mi zapi hmaiah cun a ser hna. 31Mizapi nih cun an zumh i Bawipa cu kan sinah a ra i retheihnak kan inmi kha a hmuh ti kha an hngalh tikah an kun i an biak.
Nu markerat:
EXODUS 4: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006