EXODUS 2
2
Moses Chuahnak Kong
(Heb 11.23)
1Levi phun chung mipa pakhat nih khan cu phun chung minu pakhat cu a ṭhit. 2Fa a pawi i fapa pakhat a hrin. A chuak thiam ngaingaimi fapa a si kha a hmuh tikah thla thum chung a thuh. #Lam 7.20; Heb 11.23 3A thuh khawh ti lo tikah khin phaikung in an tahmi bawm pakhat kha aa lak i farthling le bitumen in a nalh i cu bawm chungah cun a fapate cu a chiah i tiva kam ram lakah khan a va thuh. 4A unute nih a cungah zeidah a tlung te lai tiin lamhlat nawn khin a cawngh.
5Faro fanu kha i kholh awkah tiva ah cun a ra i a lalang pawl kha tiva kamah khan an i chawk. Faro fanu nih cun bawmte kha a hmuh i a salnu kha va la tiah a fial. 6Faro fanu nih cun a vun hun i a chungah ngakchiapate pakhat cu a rak um i cu ngakchiapa cu a hung ṭap. A zaang a fak ngaingai i, “Mah hi ngakchiate hi Hebru mi hna ngakchia pakhat a si ko lai,” tiah a ti. 7A farnute nih khan Faro fanu cu, “Hi ngakchia an zohkhenhpiaktu dingah Hebru minu pakhat in in auhpiak ning,” tiah a ti. 8“Va au,” tiah a ti i ngakchianute nih cun a va kal i ngakchiapa i a nu kha a va auh. 9Faro fanu nih khan ngakchiapa a nu cu a thawh i, “Hi ngakchiapa hi i lak law va ka cawmpiak. Cun na cawm man cu keimah nih kan pek lai,” a ti. Cucaah nu nih khan ngakchia cu a lak i a cawm. 10Ngakchia cu a ngan nawn tikah Faro fanu sinah cun a hei kalpi i a fapa ah a rak i ser. Aa thawh i, “Ti chungin ka chuahmi a si caah,” a ti i a min ah Moses#2.10 Moses ti holh fang hi Hebru holh i chuah ti holh fang he an aw-chuah an i lo. a sak. #Lam 7.21
Moses Midian Ram Ah A Zam
(Heb 11.24-25)
11Cu hnu tlawmpal, Moses cu a hung upat tikah khan, a phunhawi mi cu a va leng hna i zeitluk in dah rianhrang ṭuan an hnek hna ti kha a va hmuh. A miphun hawi pakhat Izipt mipa i a thah zong kha a va hmuh fawn. #Heb 11.24 #Lam 7.23-28 12A pawngkam kha a zoh i ahohmanh a hmuh hna lo tikah, Izipt mipa cu a thah i a ruak cu vawlei chungah a thuh. 13A thaizing ah khan a va kal ṭhan i Hebru mi pahnih an rak i velh len ko kha a hmuh hna. A sualpa cu a thawh i, “Zeicahdah na phunhawi a si mipa cu na velh len ko?” a ti. 14Cu pa nih cun aa thawh i, “Aho nih dah nangmah cu a kan uktu bawi le bia a kan ceihtu ding bawi ah an in ser? Izipt mipa na thah bantuk khan dahra thah na ka timh ve?” a ti. Moses cu a thin a phang i, “Ka tuahmi kha mi nih an hngalh ko cang hi ta,” tiah a ruah. 15Cucu Faro nih a hngalh tikah Moses cu thah a zalh. Asinain Moses nih cun a zamtak i Midian ram i va um awkah a kal. Cuka a va phak tikah tikhor pawngah khan a ṭhu. #Lam 7.29; Heb 11.27
16Midian tlangbawipa nih cun fanu pasarih a rak ngeih hna. Ti than awkah khan an ra i an pa tuu le meheh kha ti dinh awkah saram ti dinhnak kuang chungah khan ti cu an thlet. 17Asinain tuukhal pawl kha an ra i an dawi hna. Moses nih cun a chanh hna i an saṭil cu ti a dinhpiak hna. 18An pa Reuel sin i an va tlun tikah a rak thawh hna i, “Zeitindah nihin cu tuante ah nan tlun khawh?” a rak ti hna. 19Annih nih, “Izipt mipa pakhat nih tuukhal pawl sin khan a kan chanh i ti hmanh a kan thanpiak i kan saṭil kha ti a kan dinhpiak hna,” tiah an leh. 20Anih nih cun, “Cu pa cu khuazei ah dah a um?” tiah a fanule cu a hal hna i, “Zeicahdah cuka ah cun nan kaltak? Va kal u law va ko u, kan sinah rawl rak ei seh,” a ti. 21Cuka um cu Moses nih cun a duh i Reuel nih khan a fanu Zipporah kha nupi ah a pek. 22Fapa pakhat a hrin. Moses nih, “Kei cu midang ram ah khual ka si,” a ti i a min ah Gershom a sak.
23Caan saupi hnuah Izipt siangpahrang kha a hung thi. Israel mi cu an sal cannak ah khan an hrum an ai lengmang ko i bawmhnak hal in an ṭap. An ainak cu Pathian sin kha a phan i 24an hrumainak kha a theihpiak hna i Abraham le Isak le Jakob sin i a sermi a biakamnak kha a philh lo. #Gen 15.13-14 25Israel mi sal an sinak kha a hmuh i annih sinah khan aa hngalhter.
Nu markerat:
EXODUS 2: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006