മത്തായി 11
11
നീര്‌ക്ക് മുളുഗുസുവ ഓഗന്നാന്‌മ് ഏസ്സ്‌മ്
1ഏസ്സ് തന്ന് സൊല്ലുപഡി നഡാക്കുവ പന്നന്റാള്‌ഗാള്‌ക്ക് ഈ കാര്യഗാള്‌ന സൊന്ന പ്‌റ അയാള് എഗുദാര് പട്ടണഗാള്‌ക്ക്‌റാഗ പഡിസ്യാമ് നായ സൊല്ല്യാമ് അദ്‌ലിന്ത് പോനാന്.
2ക്‌റ്‌സ്‌ത്ത് ഗേവ കാര്യഗാള്‌ന പറ്റി നീര്‌ക്ക് മുളുഗുസുവ ഓഗന്നാന് ജെയില്‌ലിന്ത് കേ്ട്ട് തന്ന് സൊല്ലുപഡി നഡാക്കുവ ആള്‌ഗാള്‌ന ഏസ്സ് പട്ട്‌ക്ക് സൊല്ലി ബ്‌ട്ടാന്. 3അവാര് ഏസ്സ് പട്ട്‌ക്ക് ബന്ത്, << <ബര്യ ഇര്‌ക്ക്‌ന്റവാന് നീത്തേഗ? ഇല്ലെ എമ്മ ബേ്റൊന്റാള്‌ന കാത്തിര്‌ക്ക്യാഗ?> >>എന്റ് കേ്ള്‌ക്ക്യ ഓഗന്നാന് എമാന നിന്ന് പട്ട്‌ക്ക് സൊല്ലി ബ്‌ട്ട്‌റ്‌ന്റാന് എന്റ് സൊന്നാര്.
4-5ഏസ്സ് അവാര്‌ക്ക്: <<കുറുഡാര്‌ക്ക് കണ്ണ് കാട്ട്‌ന്റ്, കാല് മൊണ്ടിഗാള് നഡാക്ക്‌ന്റാര്, കുസുട്ട നോയിഗാറാര് തെ്ളിന്ത് അയിത്ത്യല്ലത്തവാര് ആന്റാര്, സെ്ഗ്‌ഡാര് കാദ് കേ്ള്‌ക്ക്‌ന്റവാര് ആന്റാര്, സത്തവാര് ഉജുര്‌ളാഗ്‌ന്റാര്, ഏ്ളെഗാള്‌ക്ക് നല്ല സേദിന സൊന്റാന് എന്റെല്ല നിമ്മ കാണുവാദ്‌നാമ് കേ്ള്‌ക്കുവാദ്‌നാമ് ഓഗന്നാന്‌ക്ക് പോയി സൊല്ലുനു. 6ആന നാന് ക്‌റ്‌സ്‌ത്ത്‌ത്തെ എന്റ് സന്തേഗപഡാത്തവാന് ബാഗ്യഗാറാന്‌ത്തെ>> എന്റ് സൊന്നാന്.
7ഓഗന്നാന് സൊല്ലുപഡി നഡാക്ക്‌ന്റവാര് പോന പ്‌റ ഏസ്സ് ആള്‌ഗാള്‌ക്ക് ഓഗന്നാന്‌ന പറ്റി ഇത്തെ സൊല്ല്യ പ്‌ഡിത്താന്: <<നിമ്മ എന്ത്‌ന കാണ്യ ബെ്ട്ടെകാഡ്‌ക്ക് പോനുറു? കാറ്റ്‌ല് ആഡുവ ഓഡെന കാണ്യ പോനുറ? 8അല്ല, പിന്നെ നിമ്മ എന്ത്‌ന കാണ്യ പോനുറു? നല്ല മിന്‌മിന ഇര്‌ക്കുവ ഉഡുപ്പുസഡ്‌പ്പ് ഇക്കിര്‌ക്കുവ ആള്‌ന കാണ്യഗ? ഇല്ലെ. നല്ല മിന്‌മിന ഇര്‌ക്കുവ ഉഡുപ്പിക്കിര്‌ന്റവാര് രാജകോട്ടേല്‌ത്തെ ഇര്‌ക്ക്‌ന്റാര്. 9അല്ല, പിന്നെ നിമ്മ എന്ത്‌ന കാണ്യ പോനുറു? ഒന്റു സാമിദാസ്‌ന കാണ്യഗ? സെരിത്തെ, സാമിദാസ്‌ന ബ്‌ഡ ദൊഡ്ഡവാന്‌ന കാണ്യത്തെ പോനാദ് എന്റ് നാന് നിമാക്ക് സൊന്റെ.
10<നാന് എന്ന് സേദിഗാറാന്‌ന നിനാക്ക് മുദാല് സൊല്ലി ബ്‌ഡ്‌വെ,
അയാള് നിനാക്ക് ബേ്ണ്ടി ആള്‌ഗാള്‌ന ഒരിക്കി ബെക്കുവാന്>#മലാക്കി 3:1
എന്റ് എ്ള്‌ദിര്‌ക്കുവാദ് ഓഗന്നാന്‌ന പറ്റിത്തെ. 11നാന് നിമാക്ക് സത്ത്യമായി സൊന്റേന്, പെ്ണ്ണ്‌മക്കാള്‌ലിന്ത് പ്‌റാന്തവാര്‌ല് നീര്‌ക്ക് മുളുഗുസുവ ഓഗന്നാന്‌ന ബ്‌ഡ ദൊഡ്ഡവാന് ആര്‌മില്ലെ. ആനാല്‌മ് സാമി ആളുവ കാലാക്ക് പട്ടവാര്‌ല് താന്തവാന് ആയിര്‌ക്ക്‌ന്റവാന് ഓഗന്നാന്‌ന ബ്‌ഡ ദൊഡ്ഡവാന്‌ത്തെ. 12നീര്‌ക്ക് മുളുഗുസുവ ഓഗന്നാന് ബന്ത നാള്‌ലിന്ത് ഇന്നാമാട്ട്‌ക്ക് സാമി ആള്‌ന്റവാര് കൂട്ടാക്ക് എജേയ ബേ്ണ്ടി ഗട്ടിഗാറാരാന ആള്‌ഗാള് തമാക്ക് മുഡിവ അളാവുക്കു ഓരാഡ്‌ന്റാര്.#11:12 എവന നായാത്ത്‌ല് ഈ സൊല്ലുസുലാക്ക എന്തെന്റ് സൊക്കന തെര്യ. 13എല്ലാ സാമിദാസ്‌ഗാള്‌മ് മോസെ ബെത്ത സാമിസട്ടാമ് ബര്യ പോവ കാര്യഗാള്‌ന പറ്റി ഓഗന്നാന് കാല മാട്ട്‌ക്ക് സൊന്നാര്. 14ബരുവാനെന്റ് സൊല്ലിന്ത ഏല്യാവു താനെത്തെ നീര്‌ക്ക് മുളുഗുസുവ ഓഗന്നാന്. ഇദ്‌ന നമ്പ്യ നിമാക്ക് മനേസ്സിന്തദാന നമ്പ്‌ന്. 15നാന് സൊല്ലുവാദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് കേ്ള്‌ക്കുഡൊ.
16-17നാന് ഈ കാലാത്ത്‌ലവാര്‌ന ഏദ്‌ക്ക് എ്ണേത്ത് സൊല്ലുവെ? സന്തെകഡേക്ക്‌റാഗ കുക്കാന്തിന്ത്,
<എമ്മ നിമാക്ക് ബേ്ണ്ടി കുഗാല് പ്‌ഡിത്തേമ്,
ആന നിമ്മ ആഡാലെ.
എമ്മ സുലാക്ക സൊല്ലി കേ്യിന്തേമ്,
ആന നിമ്മ നെഞ്ച്‌നമാര്‌ന അഡിത്ത് കേ്യാലെ>
എന്റ് എ്ണേവുഗാറാര്‌ക്ക് ബ്‌ളിത്ത് സൊല്ലുവ മക്കാള്‌ഗാള്‌ക്ക് സമാത്തെ അവാര്. 18എല്ലാ ആള്‌ഗാള്‌മ് തിന്റ്‌കുഡിത്ത് നഡാക്കുവ പാസെ ഓഗന്നാന് തിന്റ്‌കുഡിത്ത് നഡാക്കാലെ. അത്തെ ഇര്‌ക്ക്‌ന്റവാനായി ബന്ത <അയാള്‌ക്ക് കെ്ട്ടജാദി തട്ടിര്‌ക്ക്‌ന്റ്> എന്റ് അവാര് സൊന്റാര്. 19ആന മന്‌സാനായി പ്‌റാന്തവാന് എല്ലാ ആള്‌ഗാള്‌നാമ് പാസെ തിന്റ് കൊണ്ടുമു കുഡിത്ത് കൊണ്ടുമു ബന്താന്. <തീനിപോറാന്‌മ്, കുഡിഗാറാന്‌മ് എന്റ്‌മ്, കന്ത്യ കെ്ട്ടുവ കാസ് പിരിക്ക്‌ന്റവാര്‌മ് കേ്ഡ്‌ഗെ്ട്ടവാര്‌മ് എ്ണേവുഗാറാന്> എന്റ്‌മ് അവാര് അയാള്‌ന പറ്റി സൊന്റാര്. ആന ഒരുത്താന്‌ക്ക് സാമി കൊഡുത്ത ബുദ്ദിത്തെ ആയിന്തദാന അയാള് ഗേവ കാര്യാത്ത്‌ല് അദ്‌ന കാണ്‌ല.>>
ഏസ്സ്‌ന നമ്പാത്തവാര് പട്ടണഗാള്‌ലവാര്‌ക്ക് ബരുവ ദെ്ണ്ടണെ
20പ്‌റ ഏസ്സ് താന് മൊത്തന അദിസ്യഗാള് ഗേന്ത പട്ടണഗാള്‌ലവാര് പാവ ഗേവാദ്‌ന തള്ളി സാമിസാരി തിര്‌ഗത്താദ്‌നാലെ ഇത്തെ സൊല്ലി അവാര്‌ന നൊഡ്യ പ്‌ഡിത്താന്: 21<<കോരസീന് പട്ടണഗാറാരെ, അവ്വോ, നിമാക്ക് കജട്ടാത്തെ. ബേദ്‌സയിദ പട്ടണഗാറാരെ, അവ്വോ, നിമാക്ക് കജട്ടാത്തെ. നിമ്മ് പട്ട്‌ല് ഗേന്ത അദിസ്യഗാള്‌ന സോരു പട്ടണാത്ത്‌ല്‌മ് സീദോനു പട്ടണാത്ത്‌ല്‌മ് ഗേന്തിന്തദാന അദ്‌ലവാര് തമ്മ സാമിസാരി തിര്‌ഗ്‌നേമ് എന്റ് കാട്ട്യ ബേ്ണ്ടി അവാര് എന്നലോ താനെ സാക്ക്‌ന കെ്ട്ടി ബൂദിന ഉരുവുക്കു അട്ടി ദുക്കപട്ട് സാമിസാരി തിരിഗിര്‌ക്കുവാര്. 22ആന സോരുഗാറാര്‌ക്ക്‌മ് സീദോനുഗാറാര്‌ക്ക്‌മ് കെ്ഡേത്ത ദെ്ണ്ടണെന ബ്‌ഡ ദൊഡ്ഡ ദെ്ണ്ടണെ ബിദി സൊല്ലുവ നാള്‌ല് നിമാക്ക് കെ്ഡേക്ക്‌മ് എന്റ് നാന് നിമാക്ക് സൊന്റെ. 23കവറ്‌ണഗൂമു പട്ടണഗാറാരെ, നിമ്മ മേലോഗാക്ക് സമ ഉജാന്തവാരാവുറ? ഇല്ലെ, പാദാളാക്ക് സമ നിമ്മ താന്തവാരാവുറു. നിമ്മ് പട്ട്‌ല് ഗേന്ത അദിസ്യഗാള് സോദോമുഗാറാര് പട്ട്‌ല് ഗേന്തിന്തദാന അവാര് പാവ ഗേവാദ്‌ന തള്ളി ഇന്നമാട്ട്‌ക്ക് ഇന്ത്‌റ്‌ക്കുവാര്. 24ആന സോദോമുഗാറാര്‌ക്ക് കെ്ഡേത്ത ദെ്ണ്ടണെന ബ്‌ഡ ദൊഡ്ഡ ദെ്ണ്ടണെ ബിദി സൊല്ലുവ നാള്‌ല് നിമാക്ക് കെ്ഡേക്ക്‌മ് എന്റ് നാന് നിമാക്ക് സൊന്റെ.>>
സോറ്റിര്‌ക്ക്‌ന്റവാര് എ്ളേക്കുവാദ്
25അയി ഗളിഗേല് താനെ ഏസ്സ് ഇത്തെ സൊന്നാന്: <<അപ്പാ, മേലോഗാക്ക്‌മ് ബൂലോഗാക്ക്‌മ് ആണ്ടവാനായിര്‌ക്ക്‌ന്റവനെ, നീ ഇദ്‌ന അറുവുഗാറാര്‌ക്ക്‌മ് ബുദ്ദിസാലിഗാള്‌ക്ക്‌മ് മറേസി ബെത്ത് സ്‌ന്നമക്കാള്‌ന പാസെ തണിന്ത് നഡാക്ക്‌ന്റവാര്‌ക്ക് കാട്ടി കൊഡുത്തിര്‌ന്റായി. അദ്‌നാലെ നാന് നിനാക്ക് മദ്‌പ്പ് തന്റെ. 26നേര്‌ത്തപ്പ, അത്തെ ഗേയാത്തെ നിനാക്ക് ആസെ ഇന്താദ്.
27എന്ന് അപ്പാന് എല്ലാദ്‌നാമ് എന്ന് കയിക്ക് തന്ത്‌റ്‌ന്റാന്. അപ്പാന്‌ക്കല്ലാദെ ആര്‌ക്ക്‌മ് മഗാന്‌ന തെരിവാദില്ലെ, മഗാന്‌ക്ക്‌മ് മഗാന് ആര്‌ക്ക് കാട്ടി കൊഡുക്ക്യ ആസെപഡ്‌ന്റാനൊ അവാന്‌ക്ക്‌മ് അല്ലാദെ ആര്‌ക്ക്‌മ് അപ്പാന്‌ന തെരിവാദില്ലെ.
28പാഡ്‌പട്ട് സോറ്റിര്‌ക്ക്‌ന്റവാര്‌മ് ആരബാരാന താങ്കി നഡാക്ക്‌ന്റവാര്‌മ് ആയിര്‌ക്ക്‌ന്റവാര് ഒട്ടുക്കു എന്ന് പട്ട്‌ക്ക് ബാന്. നാന് നിമാന ഗാപാറ്യ ബെക്കുവെ. 29നാന് പൊറിമോഡ ഇര്‌ക്ക്‌ന്റവാന്‌മ് തണിമെഗാറാന്‌മ് ആയിര്‌ക്കുവാദ്‌നാലെ നാന് ഗേയ സൊല്ലുവ കാര്യന ഗേന്ത് കൊണ്ടു എന്നോഡിന്ത് പഡിന്. എന്റദാന നിമ്മ നിമ്മ്‌ദ്യായി ഇര്‌ക്കുവുറു. 30നാന് നിമാക്ക് ഗേയ സൊല്ലുവ കാര്യ എ്ള്‌പ്പുള്ള കാര്യത്തെ. നാന് തരുവ സൊമെ ബാര ഇല്ലാത്ത സൊമേത്തെ.>>
Nu markerat:
മത്തായി 11: സാമി സേദി
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
New Life Computer Institute
