Fuɗɗoode 12
12
Nguurndam Ibrahiima
No Laamɗo noddiri Abram#Fadde Laamɗo waylitinde innde Ibrahiima, Abram wi'etenoo.
1Joomiraaɗo haaldi e Abram, wi'i:
— Dillu leydi maa e lenyol maa e suudu bammaa de njahaa leydi ndi kollanmaami ndiin.
2Mi waɗete lenyol manngol,
mi barkinte,
mi mawninan innde maa.
Yimɓe fuu keɓan barke saabe maaɗa.
3Mi barkinan barkinɓe ma,
Mi huɗan kuɗuɗo ma.
Saabe maaɗa lenyi adunaaru fuu keɓan barke.
4Abram dilli hono no Joomiraaɗo wi'iri ɗum noon. Luudu yaadi e makko. Abram tawraa duuɓi 75 nde o dillannoo Haran. 5O yaadi e Saaray jom suudu makko e Luudu ɓii sakiike makko e jawdi maɓɓe e maccuɓe maɓɓe ko ɓe keɓi Haran fuu. Ɓe ndilli Haran faa ɓe njehi leydi Kanaana.
Abram ley leydi Kanaana e Misira
6Nde ɓe njottinoo leydi Kanaana ndeen, Abram dawi feƴƴiti leydi ndiin faa yottowii Sikem, to lekki mawki ngonuki Moore#12:6 Maanaa Moore woni «Jannginoowo».. Wakkati oon, Kanaaninkooɓe njooɗinoo e leydi ndiin.
7Joomiraaɗo ɓangi e Abram, wi'i ɗum:
— Wo ƴuwdi maa kokkammi leydi ndii.
Abram mahani Joomiraaɗo sakkirde to ɓangani ɗum toon. 8O eggi ɗoon, o yehi hayre wonnde lettugal Baytila o darnowi hukum makko toon. Baytila ina heedi o gorgal, Ayi du ina heedi o lettugal. Toon o mahani Joomiraaɗo sakkirde wonnde de o du'orii e innde Joomiraaɗo. 9Noon Abram heddorii ina waɗa egga-hoɗa faro horɗoore leydi Kanaana.
10Rafo waɗi ley leydi ndiin. Wakkati oon Abram jipporii Misira faa jooɗowoo toon, sabo rafo ngoon mawni e leydi ndiin sanne. 11Nde o ɓadinoo yottaade Misira ndeen, o haaldi e Saaray jom suudu makko, o wi'i ɗum:
— Hettina, miɗo anndi a debbo jom ŋari, belɗo ndaarude. 12Nde Misirankooɓe nji'ii ma fu, mbi'an wo a jom suudu am, ɓe mbaran kam de ɓe acce aan kaa mbuura. 13Miɗo ŋaare, mbi'aa ɓe wo a sakiike am debbo faa mi heɓa moƴƴere, de mi wuura saabe maaɗa.
14Nde Abram yottinoo Misira ndeen, Misirankooɓe nji'i deekum oon na ŋarɗi sanne. 15Mawɓe laamu du nji'i mo de mani o yeeso Fira'awna. O yaaraa ley laamordu muuɗum. 16Abram heɓi moƴƴere saabe makko. O heɓi maccuɓe e horɓe e baali e be'i e na'i e araaji gori e debbi e geelooɗi. 17Ammaa Joomiraaɗo fiyiri Fira'awna e suudu muuɗum nyawuuji bonɗi saabe Saaray jom suudu Abram oon. 18Fira'awna noddi Abram, wi'i:
— Ko saabii de ngaɗuɗaa kam nii? Ko waɗi de a haalanaay kam wo o deeka? 19Ko waɗi mbiiɗaa wo o sakiike maa debbo, ngaɗuɗaa kooƴumi o, o laatii jom suudu am? Joonin kaa inan deeka. Adu mo ndillidaa!
20Fira'awna hokki yimɓe yamiroore ɗowta mo, kanko e jom suudu makko e huunde fuu ko o jeyi.
Nu markerat:
Fuɗɗoode 12: FBF
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© SIM International 2012, 2022