Luka 12

Hakkilango munaafitaare

1Wakkati mum himɓe uju ujuneeje hawriti faa ɓee jaaɓontira, go Yeesu fuɗɗi baddugo aahiiɓe mum aran wi'i: «Kakkilanee ƴufinirɗum *Farisaaɓe, kan woni munaafitaare maɓɓe. 2Walaa cuuɗiiɗum ko suppitintaako, asiiri bo walaa ko annitintaake. 3Gam ka batuɗon der niwre fu nanoyte der jayŋol, ka cownontirɗon e noppi der cuuɗi, fiinoyte dow doomooɗe #12.3 Doomooɗe cuuɗi maɓɓe nandaa e ɗi meeɗen. Himɓe waawan ko jooɗi dow ɗe maɓɓe e faajo. Faaji ɗin bo nanete faa to woɗɗi. cuuɗi.»

Kaanuɗo huleego

(Matiye 10.26-31)

4«Mii bata on onon igooɓe am, to on kulee warooɓe ɓannu ɓe baawataa ko waɗi koomi ɓaawo ɗon. 5Mi hollan on kaanuɗo kulon. Kanko woni ɓaawo o wari, e woodi baawɗe wattugo der yiite jahannama. E gooŋa batanmi on, kanko nun haani kulon. 6Poolon joyon sippataake suuhon ɗiɗon na? E non fu, baa gootel makkon yeggitantaake yeeso Alla. 7Baa gaasaaji ko'e mon fu, e limaa. Gam majjum, to on kulee. Oon ɓuri pooli ɗuuɗɗi!»

Seedanaago Yeesu yeeso himɓe

(Matiye 10.32-33)

8«Mii bata on: ceedaniiɗo am yeeso himɓe fu, *Ɓii neɗɗo bo seedanoyto joomum yeeso malaykaaɓe Alla. 9Amma bi'uɗo annaa am yeeso himɓe, Ɓii neɗɗo bo wi'an annaa joomum yeeso malaykaaɓe Alla.

10Batuɗo kalluka dow *Ɓii neɗɗo fu heɓan sawraneego, amma batuɗo kalluka dow *Ruuhu Ceniiɗo, heɓataa sawraneego.

11To on jaaraama der cuuɗi baajorɗe, e yeeso hiitotooɓe e mawɓe genni, to on miilanee no calortoɗon ko'e mon, 12gam *Ruuhu Ceniiɗo janŋinan on der wakkati mum ko haani baton.»

Ballool jom jawdiijo mo walaa hakkillo

13Goɗɗo der caka jama'aare nen wi'i Yeesu: «Moodibbo, batu mawniraawo am o acca men ceenna donŋu baaba amen.» 14Yeesu toontii mo wi'i: «Moy nun waɗimmi kiitotooɗo, naa bo ceennanoowo on jawdi mon?» 15Go o bati ɓe o wi'i: «Kakkilee no wooɗi e suuno jawdi, gam jawdi bane wuurnata neɗɗo baa no ni ɗuuɗiri fu.» 16Den Yeesu waɗani ɓe ballool gom o wi'i: «Jom jawdiijo gom nun gese mum waɗi nyaamdu gooŋa e gooŋa. 17O miili der ɓerne makko o wi'i: ‟Noy gaɗanmi? Mi walaa to gattanmi ko dugganmi.” 18Go o wi'i der ɓerne makko: Nani ko gaɗanmi: ‟Mi pusan beeme am, mi mahitoo ɓuruɗe nun mawnugo, mi loowa ɗon alkamaari am e nyaamduuji am koriiɗi fu.” 19Ɓaawo majjum, mi wi'an hoore am: ‟Mii woodi nyaamdu puy, ŋol heƴan bo faa duuɓi ɗuuɗɗi, mi siwtoto, mi nyaama, mi yara, mi seyoo.” 20Amma Alla wi'i mo: ‟An mo walaa hakkillo! Jemmaare hanne, yonki ma ettete, den mum moy nun woodata ko desanɗaa hoore maa?”» 21Yeesu ɓeydi wi'i: «Non non nun ɗum laatantoo kawritanoowo hoore mum jawdi, amma o laataaki jom jawdiijo yeeso Alla.»

Koolee Alla der haaje mon

(Matiye 6.25-34)

22Ɓaawo majjum Yeesu bati aahiiɓe mum wi'i: «Gam majjum bi'anmi on: ‟To on miilanee gonki mon dow ko nyaamoton, naa bo dow ɓalli mooɗon, ko ɓornotoɗon.” 23Gam yonki e ɓuri nafa, ɓannu bo e ɓuri kolte. 24Daaree lekuuje, ɗe aawataa hakko ɗe dugga, ɗe galaa danki hakko rummuure, amma Alla e mari ɗi! Oon ɓuri bo colli faa to woɗɗi. 25Moy nun e mooɗon, der ɓillaare mum, waawata ko ɓeydi balɗe muuɗum, baa piyal gootal? 26Gam majjum, to on baawataa ko waɗi huune pettum hande ɗum ɗon, ume ɓillanton ko'e mon dow ko horii? 27Daaree no pinniiji ladde mawnirta. Ɗi mottataa, ɗi cannyataa bo. Amma mii bata on, baa Suleymaanu e tedduŋal mum fu, ɓornaaki kolte hande pinnihon kon, gootel mum. 28To Alla e ɓornina hande nii pinnihon tawaakon e ladde hanne, jaaŋo kon bulee yiite, hakkoma onon, o ɓornintaa on ko ɓuri nun na? Onon ɓe goonɗinki panɗuki! 29Onon, to on miilanee ko nyaamoton e ko jaroton, to on ɓillee ko'e mon dow majjum. 30Himɓe duuniyaaru nun daartata ɗum ɗon fu. Amma onon, *Baaba mooɗon e anni oon bukaa ɗum. 31Gomma daarton *Laamaare Alla, den ɗum ɗon fu, on ɓeydante ɗum.»

Suuɗugo jawdi dow kammu

(Matiye 6.19-21)

32«To on kulee onon koggel pettel! Gam *Baaba mon e woodi seyo hokkugo on laamaare mum. 33Cippee ko gooduɗon, cakkon talakaaɓe ceede mum, gaɗanee ko'e mooɗon suuɗirde ceede ne heennyataa, e jawdi ni heennyataa dow kammu. Ton, gujjo waawataa ko ɓattii, gilɗi bo waawataa ko biisi ni. 34Gam to jawdi mon woni, ton ɓerne mon wonotoo.»

Maccuɓe reenuɓe

35«Kaɓɓee ɓelɓeli mon gam golle, fitillaaji mon laatoo kuɓɓaaɗi. 36Onon bo nandee hande himɓe hettiniiɓe Joomiraawo mum warta diga ɓangal, gam ɓe maɓɓitana mo ɗon maa ɗon to o warti o fiyi dammugal. 37Barke laatanto maccuɓe, ɓe joomiraawo mum wartoyta tawa ɓee deeni! E gooŋa batanmi on, o haɓɓan ɓelɓelol makko, o jooɗina ɓe gam ɓe nyaama, o jagganoo ɓe. 38To o wartii, feccere jemma naa bo wakkati joggol jakaraaje o tawi ɓee deeni, barke laatanto ɓe. 39Paamee faa wooɗa: To jom wuro e anni de gujjo warata, o reenan, o accataa o yula suudu makko. 40Jooɗodee siri mon onon bo, gam *Ɓii neɗɗo waraan wakkati on miijay.»

Maccuɗo laatiiɗo geeto naa bo kalluɗo

(Matiye 24.45-51)

41Go Piyer wi'i: «Moodibbo, minon tan nun gaɗanɗaa ballool ŋol naa himɓe fu?» 42Joomiraawo toontii mo wi'i: «Moy nun laatii maccuɗo geeto mo hakkillo? Kanko woni mo jom wuro mum reeninta gollotooɓe horiiɓe, gam o seennana ɓe nafa der wakkati kaanuki. 43Barke laatanto mo joomiraawo mum warti tawi e waɗa nun! 44E gooŋa batanmi on, joomiraawo on reeninan mo jawdi mum fu. 45Amma to gollotooɗo wi'ii der ɓerne muuɗum: ‟Joomiraawo am ɓooyi wartay,” den o yanta oo fiya gollotooɓe horiiɓe e horɓe, oo nyaama, oo yara, oo buusa, 46den mum maccuɗo on, joomiraawo mum wartaan wakkati de o miijay, e der yanne ne o annaa, o muunyitan mo, o heɓa geɗu makko e himɓe ɓe walaa hooluwe.

47Gollotooɗo annuɗo ko joomiraawo mum yiɗi, amma waɗay siri mum, waɗay bo ko o yiɗi, o fiyete ɓocci ɗuuɗɗi. 48Amma gollotooɗo mo annaa ko joomiraawo mum yiɗi, to waɗii baadi kaanuni fiya ɗum, o fiyete nun seɗɗa. Gam Kokkaaɗo puy, ƴamoyte puy, jowanaaɗo huune ɗuuɗɗum, ƴamoyte ko ɓuri ɗuuɗugo.»

Yeesu woni daliila ceennol

(Matiye 10.34-36)

49«Mi warii sankitingo yiite der duuniyaaru, mii yiɗi bo ŋe nanŋa law! 50Batisi gom na'on ki gaɗanteemi, eɗum teddanimmi to ɗum waɗaaki. 51Oon miiji mi waddu nun jam der duuniyaaru na? Aawo, nun nun bane, amma ceenniigu. 52Gam diga jooni himɓe joyo der wuro wooto seennan, tato nannantirtaa e ɗiɗo, ɗiɗo bo nannantirtaa e tato. 53Baaba nannantirtaa e ɓiyum, ɓiɗɗo bo nannantirtaa e baaba mum. Inna nannantirtaa e ɓiyum debbo. Ɓiɗɗo debbo bo nannantirtaa e inna mum. Esiraawo debbo nannantirtaa e debbo ɓiyum, debbo on bo nannantirtaa e esiraawo mum.»

Suttontirgo maaneeji garooji

(Matiye 16.1-4; Marku 8.11-13)

54Yeesu bati kade jama'aare wi'i: «To on ji'ii ɓalinde far gorgal, sikan oon bi'a: ‟Diyam toɓan!” Eɗum waɗa bo. 55To on ji'ii hennu hoore fuɗowol e wifa, oon bi'a: ‟Guli waɗan!” Eɗum waɗa bo. 56Onon munaafitiiɓe! Oon baawa suttontirgo ko waɗata dow leydi e dow kammu. Too, noy waɗi ko on cuttontiray wakkatiire nee ɗo?»

Nannantiri e ganyo maa

(Matiye 5.25-26)

57«Gam ume on ceennontirtaa onon e ko'e mon ko foonnitii? 58To aa yaha an e ganyo maa yeeso kiitotooɗo, accu nannantiron an e makko diga e laawol, gam to o yaaree yeeso hiitotooɓe, gam to kiitotooɗo hokkee poliisiiɓe, kamɓe bo, ɓe maɓɓee der kasu. 59Mii wi'ee, a wurtoytaako diga ɗon, to a yoɓiday ko tannyanaɗaa faranwel mum koriiŋel.»

Nu markerat:

Luka 12: BFB

Märk

Dela

Kopiera