Jǒn 21
21
Jisos o/byí o-kâm Bǎmgbán Emen Ashí Káchâtkányi
1Ké nkéré mú ńkyín kii/shwôm, Jisos o/chîtông bǎmgbán emen byiko kabónge ké baya ḿbé Tabyíryos. Něen nké nyǐ o/tông kámbé byiko. 2Sámon-Pyíta ne Tómos mú bada ǎ ekó Afúng ne Natányel mú o/fím Kína, ké Gályílyi ne bwǎn-Zébédyi ne bǎmgbán-Jisos bakíri ashí afee ba/mû kyikit kyibónge mbé ashí amúmú. 3Sámon Pyíta o-sét kámbé o/fu, me n-kú n-wâa ng ntûfúk edapwó.
Mbé ba-sét ǎ ba/fu, be to byi-câ ne wo. Ba-dim kâng ba-da-nung ké ókpǐ. Nké kyirim-buchú ánkyi kyimúmú, ba*da/kám nang kaǎchwóm*. 4Ké nkéré mú esû e-kú e-byí i, Jisos o/babwom ké bukô-baya. Nké bǎmgbán emen ba*da ǎ ecêe*. 5Ne o-kó kámbé kâng o/fu, byisat, ba*da/kám ne nang kaǎchwóm*?
Mbé ba-faa ǎ ba/fu, nang kaǎchwóm byi*da/kám ne*.
6Nyǐ o-sét kámbé o/fu, pwó n̂g ntûfúk enen ké kyicê-ókpǐ ńkyí bubwô-etyebéng, ne ben ba/chi ba-kám ekworê. Mbé ba-pwó kâng ntûfúk, ne ba*fí to ba-chî ng eman etut kámú o-bwa esim ké ókpǐ* ké ebóng, ekworê ee/sú ké mǔ pwat.
7Ḿgbán-Jisos mú o/mû o-jang ng ejê Jisos o-raa ne Pyíta o/fu, onet ámu o-chi i Otu Kyítá. Ké nkéré mú Sámon-Pyíta o/jwo ba/fu, onet ámu o-chi i Otu Kyítá, nyǐ o-yip byídí emen o-fé, ké ebóng, o/mû oo/pii kámbyí, ne o-nyíp o-nung ké kace. 8Bǎmgbán-Jisos ḿbé áku ba-cen ké ókpǐ, ba-tut ng ntûfúk ba-bâ ne ekworê ké mǔ pwat. Mbé ba/mû ba*da/jang etíbî ne bukô-baya*. Kyi/mû bajam-bamyíta nang batánge. 9Ńdyí baa/ribi ké bukô-baya, ba-ri okwâ ányi mú ba/wóngê ne ekworê ké mǔ ne berêt. 10Jisos o-raa kâng ne mbé o/fu, bâ n̂g ne kyicê-ekworê nyí ba/kám abeabe.
11Sámon-Pyíta o-nung kâng ké ókpǐ o-tut ntûfúk ámu o-tî ké bukô-baya ne biimbâng-ekworê ké mǔ pwat. Ekworê ányi emúmú e/mû bajam káchâtkányi esim diǐkpú ne echât. Nang ké e/mû e/jang ejê éné, ntûfúk o*da/járê*. 12Jisos o-sét kámbé o/fu, bâ n̂g ba-ba-ryí byiryíng. Ḿgbán emen nang obónge o*fí mú o/cíp dyityém o-bí ǎ o/fu, wo yeě* ké ebóng, mbé ba/mû mbe ba-nyît ng ba/fu, nyǐ o-chi i Otu Kyítá. 13Jisos o-shwôm kâng o-da-yip berêt o-kye kámbé ba-ryí. O-kye to kámbé ekworê ba-ryí.
14Ńkyín kâng kyi/mû kampén kachât ńké Jisos o/tông bǎmgbán emen byiko, kyi-fím ké nkéré mú Osówo o/jwóbê ǎ ké bukyû.
Jisos ne Pyíta
15Ké nkéré mú mbé baa/ryí byiryíng, Jisos o-bí Sámon-Pyíta o/fu, Sámon mú wǎn-Jǒn, me mu n-jê ng ǒ n-shwôm eringe nyí me mu n-jê ng bǎmgbán ejí ḿbén dí.
Sámon o-faa o/fu, âa, wo amu a-nyît ng a/fu, wo amu a-jê ng mě.
Jisos o-sét ǎ o/fu, kûnen bwǎn-ebû ejí. 16Jisos o-chî ǎ ebí ké kampén kafee o/fu, Sámon mú wǎn-Jǒn, me mu n-jê ng ǒ dí.
Nyǐ o-faa o/fu, âa, wo amu a-nyît ng a/fu, wo amu a-jê ng mě.
Jisos o-sét ǎ o/fu, kûnen ebû ejí. 17Jisos o-chî ǎ ebí ké kampén kachât o/fu, Sámon mú wǎn-Jǒn, me mu n-jê ng ǒ dí.
Pyíta o-firi bafip báfip, ké ebóng, Jisos o/bí ǎ ké kampén kachât o/fu, me mu n-jê ng ǒ dí. Ne Pyíta o-faa o/fu, Otu Kyítá, wo amu a-nyît ng kángkáng byěm, ne amu a-nyît ng a/fu, wo amu a-jê ng mě.
Jisos o-sét ǎ o/fu, kûnen ebû ejí. 18Me mu n-sét ng ǒ ntûntû n/fu, ké nkéré mú wo a/mû wǎsíng, wo a/mû a-fwam m esît emâp eyên kíngkíng a-dim kyicê nang kyirá ńkyí a/mû a-ryuu ng. Nké ké nkéré mú aa/kâa, wo a/chi a-nabe abwô eyên, ne onet okíri o/chi o-bwá kányí, ne o-yip ǒ o-dim ne wo kyicê ńkyí wo a*fí a-ryuu ng a/fu, wo a-câ*. 19Ńkyí Jisos o/raa něen o/mû mu o-tông ng dyizong-bukwóp ḿbú Pyíta o/chi o-kpú, ne o-kye Osówo akpee. Jisos o-sét kâng Pyíta o/fu, bâ ne me ké kyikû.
Jisos ne Ḿgbán Emen mú áku
20Pyíta o-pín achi ké esim o-ri ḿgbán mú áku mú odajang ejê Jisos. Ḿgbán ámu mú o/mû o/jêem Jisos ké kakim, ké nkéré ba/mû ba-ryí i byiryíng, ne o-bí o/fu, Otu Kyítá, yeě mu o-bâ ebachi ba-kám ǒ. 21Ké nkéré Pyíta o/ri ḿgbán ámu, o/bí Jisos o/fu, Otu Kyítá, aa kyi-kim kâng ne onyinchéng mún.
22Jisos o-faa ǎ o/fu, â me mu n-ryuu ng n/fu, nyǐ okpen tete me m-bâ, ńkyí ányi kyi/byí ǒ ebóng. Bâ ne me ké kyikû.
23Ba-sét kâng kyi-káng kángkáng banet ḿbé mbe ba-cen n ne Jisos ba/fu, ḿgbán-Jisos mún oo*ba/chi o-kpú*. Nké Jisos o*da/fu, mú ányi oo*ba/chi o-kpú*. Nyǐ o/fu, â me mu n-ryuu ng n/fu, nyǐ okpen tete me m-bâ, ńkyí ányi kyi/byí ǒ ebóng.
24Nyǐ o-chi i ḿgbán-Jisos ámu mú o/raa byiraa ḿbyín, nyǐ nké o/sáng to byiraa ḿbyín kyísí. Ne byimu byi-nyît ng byi/fu, ńkyí nyǐ o/raa nkyi ntûntû.
Nkuli Kyikû-Bǎmpém
25Nké byěm byikíri mbyi kô chwóó ḿbyí Jisos o/chi. Â ba/mû ba/sáng kámbyí byimúmú kyísí ké kyibónge ké kyibónge, me mu n-kabe ng n/fu, ejíí emúmú ee*kwárê banwet ḿbé ba/mû ba/chi ba-sáng*.
Nu markerat:
Jǒn 21: BKY
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Published by the Bible Society of Nigeria @ 1985
