Jǒn 11
11
Bukyû ḿbú Lázáros
1Onyinchéng obónge mú o/mû o-kyú u ké oshê mú badakó Bétányi, mú o/mû o-bángê e Lázáros o/mû mu o-rwôm m. Bétányi o/mû oshê mú Méryi ne wǎn-boné emen mú onyinyi, mú odabángê Máta ba/mû ba-kyú u. 2Méryi mún nké o/pwó Otu Kyítá bakút ḿbé badanyîn kyinung ké byiká, ne o-shî kámbyí ké eji emen. Wǎn-boné emen mú onyinchéng, mú odabángê Lázáros nké o/mû mu o-rwôm m. 3Bwǎn-bané-Lázáros ḿbé banyinyi ba-twóm kyitwóm ba-sét Jisos ba/fu, Otu Kyítá, ocín-dyityém eyên mu o-rwôm m.
4Ké nkéré mú Jisos o/jwo kánkyí, nyǐ o/raa o/fu, nkuli kyikû-chwǒm ké orwôm mún oo*ba/chi o-kyú bukyû ḿbú Lázáros*. Orwôm mún oo/chi, eringe nyí banet ba/chi ba-kpee Osówo, ne eringe nyí Osówo o/chi o-kye to Wǎn emen akpee.
5Máta ne wǎn-boné emen mú onyinyi ne Lázáros ba/mû ba-jê ng Jisos. 6Ké nkéré mú nyǐ o/jwo kyitwóm ba/fu, Lázáros mu o-rwôm m, nyǐ o/chîrí ací afee ké kyikit ńkyí nyǐ o/mû. 7Ne o-raa kâng ne bǎmgbán emen o/fu, bâ n̂g byi-bwa esim Judyâ.
8Bǎmgbán emen ba-faa ba-bí ǎ ba/fu, ntánge byiraa-Osówo, kaǎkím-nkéré ńké ka/shwôm nyín abe abe nké banet-Jûs ba/mû mbe ba-ryuu ng ba/fu, mbé ba-tím m ǒ aká, ne amu a-chî ng etî okabe mú adachîbwa esim ányi?
9Jisos o-bí kámbé o/fu, dyicí dyi*fí dyi-bwon n égbáng diǐkpú ne efee dí*. Ké bubwô ámbu kâng, â onet mu o-cen n ké esû wááng, oo*kpán ké chwǒm* ké nǎ, nyǐ mu o-ri ng kiinwángé ńkyí ké ejíí ńnyín. 10Nké â o/cen ne buchú, o-kpán n ké chwǒm, ké nǎ, o*fí o-ri ng kiinwángé*. 11Jisos o-chînye o-sét kámbé o/fu, Lázáros mú ocín eten oo/róng ké burê, nké n/chi n-ca n-da-jwóbê ǎ.
12Bǎmgbán emen ba-faa ǎ ba/fu, Otu Kyítá, â nyǐ mu o-rê ng, o/chi o-nyange.
13Nké ńkyí Jisos o/raa, ányi kyi/byí, Lázáros oo/kpú. Nké mbé ba/mû ba-kabe ng ba/fu, burê buyén. 14Ne Jisos o-sét kâng kámbé wááng o/fu, Lázáros oo/kpú. 15Nké ké bubwô enen, me mu n-jêe ng, ké ebóng, me m/mû n*fí áku* eringe nyí ben badabángê ne me ne atyém enen. Byidim m̂ byi-da-ri ǎ.
16Tómos mú bada ǎ ekó Afúng o-raa ne bábe-bǎmgbán o/fu, be ashí amúmú byidim m̂ ne ntánge byiraa-Osówo eten ké kyikû, eringe byidakpú burwám ne nyǐ.
Jisos o-chi i Ojwóbe ké Bukyû ne Dyikpen
17Ké nkéré mú Jisos o/ribi ké oshê ámu, o/jwo ba/fu, baa/ryii Lázáros ací a/firi anyii. 18Bétányi o/mû oo*byí nang bakyilómyíta banyii* fím ké Jerúsélem* 19ne banet-Jûs chwóó baa/bê ebafé Máta ne Méryi dyityém ké bukyû ḿbú wǎn-boné ebe o/kpú.
20Ké nkéré mú Máta o/jwo ba/fu, Jisos mu o-bâ, o/byí kyíjí o-wâa edakwárê ne nyǐ, nké Méryi o/waa ké byise. 21Máta o-raa ne Jisos o/fu, Otu Kyítá, â wo a/mû nyín, wǎn-boné ejí o/mû oo*ba/chi o-kpú*. 22Nké me mu n-nyît ng n/fu, nang kántîk, Osówo o-kyâ ǒ nang ebóng chwǒm ńkyí wo ada ǎ ebí.
23Jisos o-sét ǎ o/fu, Osówo o/chi o-jwóbê wǎn-boné eyên ké bukyû, o-bwa ké dyikpen.
24Máta o-faa o/fu, me mu n-nyît ng n/fu, Osówo o/chi o-jwóbê ǎ ké bukyû, o-bwa ké dyikpen, ké nkuli kyikû-dyicí.
25Jisos o-sét ǎ o/fu, me n-chi i ojwóbe ké bukyû ne dyikpen. Nang yeě nké mu o-bángê e ne me ne dyityém emen o/chi o-kpen, nang nyǐ oo/kpú. 26Nang yeě to nké mu o-kpen n ké bubwô ḿbú ejí ne mu o-bángê e ne me ne dyityém emen oo*ba/chi o-kpú ne banyá*. Wo a/bángê ńkyín ńkyí mu n-sét ng dí.
27Máta o-faa o/fu, Otu Kyítá, nkyi éné. Me m/bángê ne dyityém ejí n/fu, wo a-chi i onet mú Osówo o/kúng ǎ butu, Wǎn-Osówo mú o/chi o-bâ ké ejíí ńnyín.
Jisos o/kpet etii
28Ńdyí Máta o/raa ńkyín, o-bwa esim o-da-kó Méryi mú wǎn-boné, onet o*da/nyît*. O-sét ǎ o/fu, ntánge byiraa-Osówo eten mu nyín, mu o-bí ng ǒ. 29Ké nkéré mú Méryi o/jwo ńkyín, o-bûu nensang o-dim kyíjí babap o-wâa o-kâm ǎ. 30Jisos o/mû o*da/ribi ne ké kafâ-oshê*. Nké o/mû o/tôong ké kyikit ńkyí Máta o/mû o/kâm ǎ. 31Banet-Jûs ḿbé ba/mû ké kafâ-kyise ne Méryi ba-fâ ǎ dyityém ba-dim ne nyǐ ké kyikû ké nkéré mú mbé ba/ri ǎ o/bûu nensang o-dim kyíjí babap. Mbé ba/mû ba/kabe ba/fu, Méryi o-kú o-wâa ng edatii ké dyikun.
32Ké nkéré mú Méryi o/ribi ké kyikit ńkyí Jisos o/mû, ne o-ri ǎ, o-myii Jisos ké byiká, o-raa o/fu, Otu Kyítá, â wo a/mû nyín, wǎn-boné ejí o/mû oo*ba/chi o-kpú*.
33Jisos o-ri ǎ ké mu o-tii ng ne banet-Jûs ḿbé ba/bê ne nyǐ ké kyikû ké mbe ba-tii ng to. Kyi-ta ǎ ké dyityém. Byiko byi-kpú ǎ o-firi bafip báfip. 34O-bí kámbé o/fu, ben ba/ryii ǎ nyá.
Mbé ba-faa ǎ ba/fu, bâ a-ba-ri, ǎ Otu Kyítá.
35Jisos o-tii. 36Banet-Jûs ba-kpet eraa kâng ba/fu, kû n̂g eri eringe nyí Lázáros o/mû o-jê ng ǎ.
37Nké banet-Jûs bakíri ba/fu, nyǐ o/chi nsêe achi o-kûrángê, o*da/chi dí*. Nyǐ o/mû oo*ba/chi o-chi Lázáros eringe nyí oo*kpú*?
Jisos o/jwóbê Lázáros ké Bukyû
38Bafip ba-chîchi Jisos kanong kanong, ne o-dim o-wâa ké dyikun ńdyí dyi/mû bucim ne buká ḿbú ba/cít ké ndyí. 39Jisos o-kye busa o/fu, bírî n̂g buká ámbu ba-tî ké bukô.
Máta mú wǎn-boné-okúsí-Lázáros o-faa o/fu, kyinung ńkyí kyi/chi kyi-byí kántîk kyi-bên n kyi-shwôm, ǎ Otu Kyítá, ké nǎ, ací a/firi anyii nyí ba/ryii ǎ.
40Jisos o-raa ne nyǐ o/fu, me n*da ǒ esét n/fu, a/chi a-ri busa ḿbú Osówo*? â a/bángê ne me ne dyityém eyên*? 41Ba-yip buká ámbu ba-tî kú. Jisos o-bêem achi kyíbóng o-raa o/fu, me n/kó ǒ asǎma, ǎ Kyítá, ké ebóng, amu a-tî ng atông ké byiraa ejí. 42Me mu n-nyît ng n/fu, kángkáng nkéré wo amu a-tî ng atông ké byiraa ejí. Nké me mu n-raa ng ńkyín něen ké bubwô ḿbú banet ḿbé mbe nyín, eringe nyí mbé ba/chi ba-bángê ne atyém ebe ba/fu, wo nké a/twóm mě. 43Ké nkéré mú nyǐ oo/raa ńkyín, o-kó kakânkakân o/fu, Lázáros, bâ kyíjí. 44Okúsí-Lázáros o-byí kyíjí, abwô emen ne byiká bwábwá ké byídí-okúsí, ne kyídí nímním ké bushú. Jisos o-raa ne mbé o/fu, firi n̂g ǎ, ba-mîng ǎ o-dim.
Batu-Ashí-Banet-Jûs ba/nam Jisos Dyiju
(Mátyuu 26:1-5; Mâk 14:1-2; Lûk 22:1-2)
45Banet-Jûs chwóó ḿbé ba/mû ba/bê Méryi ebari ba/ri ńkyí Jisos o/chi, ba-bángê ne nyǐ ne atyém ebe. 46Nké banet-Jûs bakíri ba/dim ba-kâm banet-ncibi mú badakó Fárasyî, ba-sét kámbé ńkyí Jisos o/chi. 47Banet-Fárasyî ne batu-banchi kyifen-Osówo ba-cibi kâng ne esuk nyí eryên nyí banet-Jûs ba-kpet eraa ba/fu, be byi-chi i nǎ. Ké nǎ, onyinchéng mún mu o-chi i biǐtí-akat chwóó. 48Â byi/mîng ǎ o-ca kashú ké eringe ńnyín něen, nang yeě nang yeě o/chi o-bángê ne nyǐ ne dyityém emen. Ne batu-ashí-banet-Rûm ba/chi ba-bâ, ba-bên kiǐtí-kyise-kyifen-Osówo echi eten cibicibi ne oshê eten kángkáng.
49Nké onet obónge ké burwám ebe mú o/mû otu-nchi kyifen-Osówo ké dyije ándyi, mú odabángê Káfas o-raa ne mbé o/fu, ben nang chwǒm kyibónge ba*fí ba-nyît ng*. 50Ben ba*fí ba-nyît ng ba/fu, nkyi kanong ne ben ńkyí onet obónge odakpú ké dyishí ńdyí banet*? kyi-shwôm ńkyí badabên oshê omúmú*? 51Ké ntûntû, nyǐ o*da/raa ńkyín ké kakim emen*. Nké wǎ otu-nchi kyifen-Osówo ké dyije ándyi, nyǐ o/mû mu o-sét ng wǎ mkpábé mú odasét byiraa-Osówo, o/fu, Jisos o/chi o-kpú ké dyishí-banet-Jûs, 52*chí nang ké dyishí ńdyí mbé nké nke* nké eringe nyí nyǐ odakpî to kángkáng bwǎn-Osówo ḿbé mbe pwópwó ké byikit, o-tî kyikit kyibónge.
53Kyi-fím ké dyicí ándyi kyi-ca kashú, batu-ashí-banet-Jûs ba-kpet etóbê eringe nyí mbé badaju Jisos. 54Ké bubwô ámbu, Jisos o*da/chîcen wááng ké Judyâ* nké o/dim o-wâa ké kyikit kyikíri fáráng ne kyikim-dyikán, ké Éferem. Ányi nké o/kyú ne bǎmgbán emen.
55Dyijî-kyifen ńkyí Shwôm kyi/mû kii/fárâng, ne banet chwóó ba/dim ké oshê ebe ba-wâa Jerúsélem kyifen edachi ńkyí byiko esoo, ne dyijî dyi-kûfyi. 56Mbé ba/mû mbe ba-kyé ng Jisos. Ké nkéré mbé ba/cibi ké kafâ-kiǐtí-kyise-kyifen-Osówo echi, ba/kpet ebí barî ba/fu, wo amu a-kabe ng nǎ. Ntûntû, nyǐ oo*ba/chi o-bâ dyijî*. O/chi o-bâ? 57Batu-banchi kyifen-Osówo ne banet-Fárasyî ba/mû baa/kye busa ba/fu, â nang yeě nké mu o-nyît ng kyikit ńkyí Jisos mu, onet ámu o-man o-sét, eringe nyí mbé bada ǎ eman ekám.
Nu markerat:
Jǒn 11: BKY
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Published by the Bible Society of Nigeria @ 1985
