Matayo 11
11
Wono watumwa kulawa kuli Yohana u Mubaputizi
1Nayo Yesu yali yeza kukondya kuwalajiliza i wejizwa wakwe, hodu yakawuka kuko, yakawa kubita kwijiza no kuganula, mu makaya gawo.
2Nayo Yohana mubaputizi, yakazihulika ze metumo ga Yesu lono yali yali mu jela. Holeka yakawa kuwatuma i wejizwa wakwe, 3wamuwuze watye, “Alo yo gwegwe yulya mono yakuza, hamba cimulindilaje yunji?” 4Nayo Yesu yakawapitula yakatya, “Mubite mukamulonjele Yohana zose zono mukuzihulika no kuziwona, 5vyono i wabofu wakuwona kanyhi, we vitewe nawo, wakujenda, nawo wono wena wukoma, wakwezwa, na we ciziwi nawo wakuhulika kanyhi sunga na wono wafwiye, nawo wakuzukulwa, ne waciwa nawo wakuganulilwa u Luganuzi Luswanu. 6Holeka, yo mumoti u munhu mono si yakuyiwona nghani yo yose yimbi muli nene.”
7Ale, i wanhu wawo wono watumwa na Yohana, wali weza kuwa watuluka, baho Yesu yakawa kwanza kugalonjela i mapuga ge wanhu, i zinghani za Yohana, yakutya, “Alu mwene mwabitaga kulanga cici kuko ku nyika? Idete lyono likuyumvywa ne mbeho? 8Alo mwabitaga ho mukawone ci cici? Mwabitaga ho mukamulanje u munhu mono yavwalile i vivwalo vye cimalidadi? Ninga i wanhu wono wavwalaga i vivwalo vye cimalidadi wekalaga mu zikaya ze watemi. 9Holeka alu anye mwabitaga ho muwone ci cici? Alo u Muwizi?” Heya mbeka u munhu mono yamucizize muno u muwizi.
10“Yuyu yo yalongwa mu Mandiko Gono Gelile vyono, Lanjenyi ta, nghumutuma u mutumwa wangu, vyo yakutya u muwaha ho yakulongolele no kukunozelezeza i nzila yako.” 11Nane nghumulonjelenyi mbeka, vyono mu wana wose we wanhu, yakali si yanejela mono muwaha yamucizize Yohana Mubaputizi. Hamba nha vivyo, ayulya mono yakwijela nha yo mudodo muno mu wutemi wa ku wulanga, yo muwaha yamucizize yuyo Yohana. 12Kuwulawilila mu vilo vya Yohana sunga nalu, u Wutemi wa ku wulanga wukwinjilwa kwe vilungo muno muno, ne wanhu i wahidimbazi, wo wakujela kuwutuga kwe vilungo. 13Ne mejizo gose ge wawizi no Wulajilize wa Musa, vyose vyawila muli ze madaha gaga. 14Holeka hono musume kuvumila, ale, yuyu Yohana yo ayulya Eliya mono yali yaze. 15Ale muhulice hono mwina makutu!
16“Alu ʼmba niluhwanicizaje u lulelo lulu na cinhuci? Na lunji lwinha i wazelelo wono wali wekaye mu sokoni, nawo wakawa wakwilonjela i cipuga acino na acilya, wakutya, 17Cimutowelenyi zifilimbi, ninga hamba si muvinile, ale, cimwimbilenyi i zinyimbo zo wukalale, nanye hamba kulila ngʼo!” 18Hambi Yohana lono yaziza, nha yaleka kulya, kanyhi hamba si yangʼwezaga divayi, nawo wakatya, “Ayo yena yicisi.” 19Alu, u Mwana wo Munhu yakaza, yakulya no kungʼwa, nawo wakatya, “Mulanjenyi ta ayu munhu mubuguci, kanyhi mungʼwa divayi, mwendece we watoweza kodi ne wahodanji. Ninga hamba nha vivyo i mahala go Mulungu gakuhomelelwa vyono maswanu ku so i metumo gakwe.”
I makaya gono si gehuwiye
(Lk. 10:13-15)
20Baho yakawa kwanza kugatacila i makaya gono, hamba yawe yanoza mapoto menji mugati yago, ninga iwanhu wayo hamba si wasaka kuwukawaniza zo wuhile wawo wubi, yakutya, 21“Woyi he, kuliʼgwe go Kolazini, woyi he, kuliʼgwe, go Betesayida. Hambi i mapoto gono ganozezwa kuliʼgwe, hono gali ganozezwe ku Tulo na Sidoni, iwanhu wa mumo mhali wavwala katali vivwalo vye magunila, no kwibaka i mavu, ho walajile vyono wanena. 22Hamba nha vivyo ane nghumulonjelenyi vyono, Mwizuwa lye ningʼaniza mbeka anye, molotuga wulipicizwe wuwaha muno si nha Tulo na Sidoni. 23Nagwe go Kapelanawumi, wukwihwesa vyono kotegulwa sunga ku wulanga mbi? Aa, ngʼo, langa kovulumuswa sunga kono kowali wafu! Kusoko i mapoto gono ganozezwa kuliʼgwe, hono gali ganozezwe ku Sodoma, mhali likaya lilyo lilibaho sunga ne nzuwayi. 24Ninga nghumutyenyi mbeka, vyono i lizuwa lye ningʼaniza lyolowa lili ciba muno muno kuli wanhu wa Sodoma si nho kwako go mweneco.”
Muze kwangu mucehe
(Lk. 10:21-22)
25Mwipango lilyo Yesu yakatya, “Nghukulumba gwe Baba, go Muwaha wo wulanga ne yinze, hambi nha kuwahundika we mahala i zinghani zizi, langa wukawagubulila i wana wadodo. 26Heya, Baba, vyo wali wendile go mweneco.”
27“Baba yamhela vinhu vyose. Na hasina mono yamumanyile Mwana, langa hono si Baba du, hamba hasina mono yamumanyile Baba, langa hono si Mwana du, kanyhi na wo wose mono u Mwana kokwenda kumumanyiza. 28Ale, muze kuliʼne anye wose mono mukugazika, na mono muvunice ne mitegulo yenyu, nane nomucehezenyi. 29Mwiwicilaje u lubano lwangu, mwiyijize kuliʼne, hambi ane nha nili mupolo, kanyhi nili mwinenenyhezi mu nhumbula, nanye motuga wutuzwe mu zinhumbula zenyu. 30Hambi u lubano lono nghumupelenyi ane, nha lupelu, hamba no mutegulo wangu si muzito yaye.”
Nu markerat:
Matayo 11: GOG91
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Cigogo New Testament © Bible Society of Tanzania, 1991.
