Pomulanya 6
6
To Lino Kanjo’u-njo’u Tiduga-dugang Kaja’a nu Lengkonya
1-2Wali yako etu to lino tiduga-dugang kaborosinya ri sambawo lino. Pasi ana nsira to we’a maroro kojo. Pasi tempo etu re’e seja to rato’oka ngana i mPue Allah#Ayat 1-2. Re’e togo njaya pampobuuka ntau mangkonong tau to rato’oka ngana i mPue Allah etu. Re’e tau to mampobuuka sira wiyaa i Set. Re’e to mampobuuka sira tau to bae angganya ri lino. Panewa re’e seja tau to mampobuuka sira pomakau i mPue Allah yako ri saruga to roomo masou ri raya nu dosa.. Wali ngana i mPue Allah etu sira mangkita ana nto lino to we’a etu maroro, see naka sira mangoko to imba to naporoe mawali indo nu ana nsira samba’a pei samba’a.
3Wali i Pue Yawe manganto’o, “To lino tempo si’i jamo mangaluluka yau pamporani ndaya to si sira. Wali see naka darata temponya NosangKu tamo damampeyaa mampakakono lengko nsira. Jamo satu pei dua mpuyu nto’u to daKuwaika sira tuwu ri lino si’i panewa Aku damangahuku sira. #Ayat 3. Re’e seja tau to mampobuuka ayat si’i batuanginya Nosa i mPue Allah tamo damaroo singkasaenya resi tau ri lino si’i, wali sira tamo tuwu sawei atu nto’u pei jamo satu pei dua mpuyu nto’u kasaenya katuwunya. ” Etu semo to nato’o i mPue Yawe mangkonong to lino to ri tempo etu.
4Wali ri tempo etu, pasi polas ri temponya to etu seja, re’e tau to bose malangan koronya to tuwu ri lino. Tau bose etu sira wiyaa ntau we’a nto lino to naoko ana-ana i mPue Allah. Tau bose etu makoje mamusu, pasi sira nansani kojo ntau boros.
5Wali i Pue Yawe mangkita bae kojo kaja’a nto lino apa samparia songka to yako ri pampobuuka nsira ojo maja’a semo, tare to matao. 6Wali see naka i Pue Yawe mangansosongi palaongiNya mampapowali tau ri lino pasi Ia mawo kojo rayaNya. 7Wali apa saba ewa wetu kaja’a nto lino, see naka i Pue Yawe manganto’o, “Aku damampakaja’aka yau to lino anu to papowalingKu seore. Pei si’a ojo tau to dakupakaja’aka yau, pasiwa binatang-binatang, pasi anu to tuwu to mandonggo pasi to manjoyo ri wawo ntana, pasi songonya tonsi to mayoko njo’u rao, samparia to etu dakupakaja’aka yau seja apa Kusosongimo palaongingKu mampapowali kasamparianya etu.” Etu semo to nato’o i mPue Yawe mangkonong samparia banang nu lino etu. 8Pei ane i Nuh to ratulis ngena etu, ia mangarata kanoto i mPue Yawe.
Sarita Mangkonong i Nuh
9-10Wali si’i semo sarita i Nuh. I Nuh etu, ia togo ananya paka langkai, sanga nu ananya etu i Sem, i Yapet pasi i Ham. Wali ri tempo etu, yako kasamparianya tau to tuwu ri lino, ojo i Nuh semo to lengkonya singkonong pei i Pue Allah, pasi tare lengkonya to masipato rapakasala. Pasi ia tuwu masingkatao pei i Pue Allah. 11Pei to lino to yusa, sira paka maja’a kojo lengko nsira, pasi sira sangkani mampakaja’a yunu nsira samba’a pei samba’a. Wali samparia palaong to naika nsira etu paka maja’a ri pangkita i mPue Allah. 12Wali i Pue Allah mangalo’a to lino, Ia mangkita monso-monso pu’u maja’a kojomo apa samparia to lino mangangika lengko ngkatuwu to maja’a.
13Wali see naka i Pue Allah manganto’oka i Nuh, to’oNya, “Aku damampakaja’aka yau samparia to lino, apa sambawo lino ojo palaong to maja’a semo to naika ntau. See naka Aku damampakaja’aka yau sira sindara-ndara pei lino si’i. 14-16Pei korom taa darapakaja’aka yau. Aku damampalaes korom.
“Wali Aku manganto’oka korom, inta oko kaju gopir#Pasal 6 ayat 14. Kaju gopir etu, etu semo kaju to matao kojo mangika bangka apa ue taa maya masua ri kaju etu. pei ika bangka bae. Ika bangka etu matampe-tampe ri rayanya pei ika seja malagi songinya. Panewa bangka bae etu danupalasika soga yako ri rayanya pasi ri sambalinya. Wali ewa si’i kabaenya bangka etu: karadenya satu togo mpuyu togo meter, katawaanya dua mpuyu dua meter, pasi kalanganinya sampuyu pei togo meter. Pasi komi damangika seja ata ri bangka etu. Panewa tempo rapiatak bangka etu, ika jendela tiku bangka etu sansiku kalanganinya ri oyo nu ata pasi rindi. Ika seja juyanya etu togo ntampe pei ika seja wombonya ri woto usu nu bangka etu.
17“Wali naka pei Aku manganto’oka korom mangika bangka bae etu apa Aku damangansamal yau lino pasi damangkaja’aka yau samparia to tuwu ri ara nu yangi. Pasi samparia anu to manosa ri lino damate yau. 18Pei Aku roomo mamparajanjika damampalaes korom, pasi Aku damampakatantu parajanjingKu etu, wali korom damasua ri raya bangka bae sindara-ndara pei indo nu anamu pasi anamu pasi maniamu.
19-20“Pasi keni seja sangaya samboko yako samparia ngaya ntonsi, pasi sangaya samboko yako samparia ngaya nu binatang pasi sangaya samboko yako samparia ngayanya anu to tuwu to mandonggo pasi to manjoyo ri wawo ntana. Keni to tina pasi to pongka ri raya bangka see taa damate yau tempo samal.
21“Pasi poromung seja songonya anu to matao rakoni pei kalisoka ri raya nu bangka etu. Wali pangkoni to nuporomung ngkorom etu, etu semo to danukoni ngkomi pasi danupokonika samparia binatang pasi tonsi to ri raya nu bangka.” Etu semo gombo i mPue Allah resi i Nuh.
22Wali i Nuh mampolengkoka samparianya etu. Ewa wimba to nato’oka i mPue Allah ia, ewa wetu semo inikanya.
Nu markerat:
Pomulanya 6: WNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2018 New Tribes Mission, Sanford, FL 32771-1487, USA.
Printed in the United States of America