Maka 11

11
Jisu ko amaqeo Jerusalema
(Matiu 21:1-11; Luke 19:28-40; Jone 12:12-19)
1Ni so keru Jisu ni voko disaipeli madu sipole kebe baro Jerusalema kikela keru, inio seta ke baroake Betipeji ni Betani sasa peuru ko sipole, Olive Ore sama Sopu ko ketaketa. Nio Jisu ta o soroekake omuqa voko disaipeli kidi tu qopeta zio seko kuleto vasi. 2Ni puliako vo soroeko nioqa vota eri kiolake, “Qeta olako ukoa peuru kale Betani ni qeta qe velou kala doqi vo meqora ke titievani barabara topi vo puliako keru maba kovai zazuani. Qeta qe rupasivou ni qe vati kilou koi. 3Ni kala ta o kuimaeqelou qe ni eri kiovou, ‘Noi sole inio qeta qe rupasiva voa doqi meqora?’ kiovou, ta qeta eri kiqevou, ‘Animevo Lekasa inio ova zaria, ni vota taukavole o vaitoevou,’ kiqevou,” kiolake.
4Nio nioqa omuqa disaipeli ta qo olake, ni qo veake voa doqi vo meqora keve ko ketaketa ke titieveni pade ko veutu tona. Ni nioqata qo rupasivake, 5ni sea maba poso ke keani ko quli ko ereivako quli ta ke kuimaekake nioqa ni eri kikelake, “Noi sole inio qeta qe rupasiva voa doqi meqora?” kikelake. 6Ni nioqata qoma opatake se, omadeuvo jari pado Jisu kati kiovevo ni seta ke zariekake nioqa tu qo zio. 7Ni nioqata qo vati olake voa doqi vo meqora Jisu kasi ni qo saluekake nioqako suma voko momo topi, ni Jisu ta ovai zazuke. 8Ni matu kubo vaki ta ke ivikake seko topi ama sabosabo ni ke saluekake keve tona, ni kake ta ke kobuekake ore ko kata kiaro kale ni ke saluekake keve tona. 9Nio so keru inio se maba poso seke taliani Jisu ko kuleto ni voko tova ta ke velavelaoke ni eri kikelake, “Me ilusivo vo Baṉara! Baṉara ta mauru o ivou vo o kuevani voko ṉikale! 10Baṉara ta mauru o ikou koko kuevako lekasa puo animevo taite Devita ko jari ama! Ilusivomo vo Baṉara!”
11Ni Jisu ta ota amaqeake Jerusalema ni ota olake Jelepade kale ni o lelepikake kiadama quli koa Jelepade ko zaekale ama. Melai lula matu raisiraisi sole Jisu ni voko disaipeli madu ta keta vaitake Betani.
Jisu ko vati levezo vo epa pide ala piqi ore
(Matiu 21:18-19)
12Ni koko raneo kale nio Jisu ni voko disaipeli madu ta mata keta vaitake Jerusalema Betani azo, ni Jisu ta ota luapake keve tona. 13Ni vaṉʼazo inio Jisu ta o veake kala piqi ore kubo leko sala. So sole vota ota olake tu opa tava kelo voko epa kiolake. Melai sipole ota va ola keru voa piqi ore vota lekona ko kiada ikio ota va keake, ako pui piqi ko sisu ko taku sole. 14Nio Jisu ta eri va kiolake voa piqi ore, “Puliala inio mata opa taṉa kuovou ṉoko epa!” ni vo so kiola keru voko disaipeli madu ta keta va viqake.
Jisu ko butuemo se Jelepade kale ke tatabaraovani
(Matiu 21:12-17; Luke 19:45-48; Jone 2:13-22)
15Ni so keru seke baroa keru Jerusalema inio Jisu ta ota amaqeake Jelepade ko zaekale ni o butuemake sea kiadamu sai kekai tatabaraekiniani ko lomaloma, ni vota o mati raibiraibikake seko tevolo sai kekai besiekiniakoi ko takula,#11:15 Sai kekai besiekiniakoi ko takula: Jelepade ko takisi ni siqasiqa ko biana ta pui ke rovea tabariko kiada keru ama seleni kale. So inio kekai besiekinia tu ke kovo Jelepade kale kekai iruruputako takula. ni seko papupapu sai se kekai tatabaraovakoi ko kurou, 16ni pui o zariemake se tu kala ta o kati kobutou talio kama lomaloma Jelepade ko taqo kale. 17Ni vota o nianiiekimake sea maba poso ni eri kiolake, “Kota ko rikiziovi Tabu ama Riki kale ko eri ka kiovema vo Baṉara, ‘Aṉako Jelepade ta kiadama peuru ma peuru kale ama qoqono poso ko vararaito ko pade ka kikevou,’ melai meta se kuilokuilo amu kekai mutaivako keaka meda va ika!” kiolake vo Jisu.
18Ni se raura kama siama madu ni se vo Mosese ko Bazu kekai nianiiekatani keta va viqa keru vo, seta ke taniekake vailiko kama keve tu ke vouvaevo vo Jisu. Melai seta keta ma ṉake sea vaki, ako sea vaki ta keta va vuzeike sole voko nianiiekato.
19Ni matu raisiraisi kota evake sole Jisu ni voko disaipeli madu ta ke vaekake koa matu peuru.
Vai oqu vo Baṉara
(Matiu 21:20-22)
20Ni koko raneo kale omadeu vikale nio Jisu ni voko disaipeli madu ta kebeta taliake keve tona nio seta ke veake voa piqi ore lula ota kajaova ko tataiqili kasi azo. 21Nio Pita ta o kerukeruekake Jisu ko vati levezo voa piqi ore, ni eri kiolake, “Keatini tanala, vo piqi ore ṉoṉo vati levezalani ta lula ota kajaola!” kiolake.
22Nio Jisu ta o mati tiorikake ni eri ma kiolake, “Meta vai oqumo vo Baṉara. 23Aṉata a bazuemela me, kala ta eri kiovou komia sopu kasi, ‘Zolai ni piave ivere kale!’ kiovou, ni vota pui niuniala opa elou voko bulo kale, melai o tuvevo puekou vo o kasekako quli ta kota ereilou, so inio Baṉara ta ova erekou voa maba. 24Sokale avo inio aṉata a bazuemela me, so keru meme basekou keru kama quli meko vararaito kale, meta tuvevo puekomo ta meta me qovou, so inio vota o katimelou ko quli meme baseko ama. 25Ni so keru me vararaito kimevou keru meta meda ma akoekou saita seko sarueko seke saruekani mekasi. So inio mevo aukale ala Mama ta ota mela akoekou ko meme erekako sarueko,” kiolake vo Jisu.#11:25 Kama lulama Quriki pesio kale ama riki poso kale ta ko kati paquliovi vesi 26 ko eri: ‘Melai meta pui meda ma akoekou seko sarueko seke saruekani mekasi ta mevo aukale ala Mama ta pui opa tamela akoekou meko sarueko.’
Lalako pizato kale inio Jisu ta o iruruputa?
(Matiu 21:23-27; Luke 20:1-8)
27Ni seta mata ke baroake Jerusalema, ni Jisu ta okai taliake ko Jelepade ni sai nio se raura kama siama madu ni se vo Mosese ko Bazu kekai nianiiekatani ni se lotu tanamu ta ke olake vokasi, 28ni eri kikelake, “Lala inio o zariena inio ṉota ṉo ereka komi quli, ni lala inio o katiṉa ṉo koa pizato?” kikelake.
29Nio vo Jisu ta o mati tiorikake ni eri ma kiolake se, “Aṉa melai aqa zaria melai kuimaeko me kama pado kuimanao, ni meta mela opatikou koa kuimanao nio aṉa melai a bazuemelou lalako pizato kale inio aṉata a ereka komia iruruputo. 30Sole meta bazuelomo, lala inio o kative vo Jone koa pizato, inio vota bapitaiso o imake se maba poso? Vo Baṉara inio o kative koa pizato ma maba inio?” ma kiolake.
31Nio seta ke taniekake zolizoliekinio ke ṉavio kude ni eri kikelake, “Ako vo Baṉara inio o kative koa pizato kimevou, ta vota eri nio mela kiovou, ‘Ta noi sole inio meta pui meba tuvevo pueve vo?’ inio mela kiovou. 32Ni animeta mata eri kimevou, ‘Maba inio o kative koa pizato’ kimevou, ta meda ma balauvou se maba madu, ako seta ke tuvevo pueveni nio sole vo Jone ta kala poropita,” kikelake.
33So sole seta eri kikelake Jisu kasi, “Eṉeta pui ṉeqai nianiia,” kikelake. Nio Jisu ta eri ma kiolake se, “Sole aṉa melai pui aba melai bazuekou me lalako pizato kale inio aṉata a ereka komi quli,” kiolake vo Jisu.

Nu markerat:

Maka 11: BLBNT

Märk

Dela

Kopiera

None

Vill du ha dina höjdpunkter sparade på alla dina enheter? Registrera dig eller logga in