Matiu 26

26
Jiu ama lotu tanatanamu ko korokorotato tu ke vouvaevo vo Jisu
(Maka 14:1-2; Luke 22:1-2; Jone 11:45-53)
1Ni Jisu ta o paikake mati nianiiekiko komia kiadama quli, ni vota eri kiolake voko disaipeli madu kasi, 2“Meta lula meqai nianiia ta oqotiṉa inio Alokato ko Ṉojola ko matuma ṉaniu. So keru inio aṉa maba a eveni lala ta ke luavilou se aṉako kana madu kasi, ni ke vouvaelou aṉa korosi topi,” kiolake.
3Ni so keru inio se raura kama siama madu ni se lotu tanatanamu ta ke toraekiniake, Kaepasi vo Ṉisa Siama ko matu pade ko taqo kale, 4ni ke erekake ko korokorotato tu ke noqoevo vo Jisu moizavole ni ke vouvaevo kikelake. 5Melai seta mata eri kikelake, “Animeta pui me noqoevou vo koa matuma ṉaniu kale, ako pui uri tu matu kubo maba poso ta ke melai korakorailo anime ni ke erekou ko riṉoteṉote sole,” kikelake.
Rekoreko ko lumuevo vo Jisu Betani
(Maka 14:3-9; Jone 12:1-8)
6Ni vo Jisu ta ota olake Betani peuru kale vo Saimone lulavo pokupoku ala o eveni ko pade kasi. 7Nio Jisu obeta vuata keru, nio kama pado rekoreko ta ko kati amaqeake kama pado oela ko teamuteamu sukasukati ama oela sama, ni koa teamuteamu ta matu tatabara kama dikidoke ama lado alebasita ka kikelako. Nio koa rekoreko ta ko raibikake koa oela Jisu ko lezu topi. Ni kota matu uria tui kama, ni matu tatabara sama oela. 8Nio so keru se disaipeli madu ke kea keru koko kavani, seta keta matu korakoraivake ni eri kikelake, “Noi sole inio ṉota ṉo niumaeka koa oela? 9Ako ṉoqai tatabaraova tea, matu kubo seleni kio ṉoqai kovou nio ṉo qatimou se ozaoza kamu,” kikelake.
10Melai Jisu ta obe tama nianiiake se kikelani, sole vota eri ma kiolake se, “Pui kai karaṉo komia rekoreko koko erekako koko uri ama iruruputo aṉa kasi, 11Ako se ozaoza kama maba madu meme qasemani ta mekasi nio kebeta eloa koi kiada keru sole, melai aṉa inio pui mekasi aba eloa lala kiada keru. 12Nio komia rekoreko ko raibiko ko uria tui kama oela aṉako tupu topi ta ko mamola pueka inio aṉako mutailo. 13Ni aṉata a bazuemela me, lai ma lai komia Uri ama Bazu Baṉara ko lekasa puo ko ko pikairiovoa koi komia peuru ma peuru kale, ta kekai bazubazutou komia rekoreko ko erekako uri ama iruruputo tu maba poso ta ke kerukeruekou ko,” kiolake vo Jisu.
Seko tabarivo vo Jiudasi tu o saiqorivo vo Jisu
(Maka 14:10-11; Luke 22:3-6)
14Koa omadeuma ṉaniu kale inio kala sea toni omuqa disaipeli azo, o ṉi ta Jiudasi Isikarioti, ta o olake raura kama siama madu kasi, 15ni eri kiolake, “Loma quli kio meta me qatilou aṉa, inio aṉata a mela saiqorivou vo Jisu?” kiolake. Nio seta ke ataekake zouke toni takula ni seta ke kativake vo. 16Nio koa taku kale azo inio Jiudasi ta o kati vailake lama taku kio uri ama taku tu oma luavivo se vo Jisu.
Jisu ko tovatovama kuo ko Alokato ko Ṉojola ko sailao voko disaipeli madu sate
(Maka 14:12-21; Luke 22:7-13,21-23; Jone 13:21-30)
17Nio kulekuleto ama ṉaniu koa puliama isiti sama bereti ko ṉojola kuo,#26:17 puliama isiti sama bereti ko ṉojola kuo: Komi ta mata ka pado ni Alokato ko ṉojola kekai nokaekema. se disaipeli madu ta ke olake Jisu kasi ni eri kikelake, “Lai nio ṉo ṉoqai zariakoi tu eṉeta ṉeba inainaekou ko Alokato ko Ṉojola ko sailao?” kikelake. 18Nio Jisu ta o mati tiorikake ni eri kiolake, “Meta me ziovou koa matu peuru kale, ni me velou kala maba sai, ni eri kimevou, ‘Eṉevo Tanala ta eri kiola, vo Baṉara ola pitoekema taku ta sipole, sole aṉako disaipeli madu ni aṉa ta ṉe erekou ko Alokato ko Ṉojola ko sailao ṉoko pade kale,’ kimevou,” kiolake. 19Nio se disaipeli madu ta ke olake ni ke kake Jisu mati kiolani jari ni kepa inainaekake koa Alokato ko Ṉojola ko sailao.
20Nio koko raisiraisi nio Jisu ni voko disaipeli madu ta ke papuake ni keta vuatake. 21Nio koa vuato keru, inio Jisu ta eri kiolake sekasi, “Aṉata a bazuemela me, kala me azo ta o saiqorilou aṉa,” kiolake. 22Nio sea disaipeli madu ta matu duki keta evake, ni sea kiadamu ta ke kuimaevake kala mati kala vo Jisu, ni eri kikelake, “Lekasa, aṉa inio esa so la kinola, ma?” kikelake. 23Nio Jisu ta o mati tiorikake ni eri kiolake, “Eqe omadeu suseko qe eloa qela ko bereti komia taroro kale, vo inio o saiqorilo ala aṉa. 24Ako aṉa maba a eveni lala ta soa vou inio a elo avo ko Tabu ama Riki kikovevo sole. Melai matu ruqe ama quli kio kovai barolou voa maba vo o saiqorilo ala aṉa maba a eveni lala, ni noni kaqe inio ota alile?” kiolake vo Jisu. 25Nio vo Jiudasi vo o saiqorivo ala vo Jisu ta eri kiolake, “Tuvevo, Lekasa, sole aṉa inio esa ma?” kiolake. Nio Jisu ta o vati tiorikake ni eri kiolake, “Tuvevo ṉo ṉavi kiṉolani jari,” kiolake.
Jisu ko tovatovama vuato
(Maka 14:22-26; Luke 22:14-20; 1 Koriniti 11:23-26)
26Nio se kebeta vuata keru inio Jisu ta o koake ko bereti, ni mauru o ikake, ni o palamukake ni o katimake voko disaipeli madu, ni eri kiolake, “Komi ta ko mamola pueka aṉako tupu. Meta komo ni kumo,” kiolake. 27Ni vota mata o koake ko kapa vaini ko ju sama, ni o kasekake voko uriavo Baṉara kasi, ni o katimake se, ni eri kiolake, “Meta nozuekomo, 28komi ta ko mamola pueka aṉako dara, koko rereovo ama tu ko pakiemo kubo maba poso tu vo Baṉara ta ota ma akoekou seko sarueko, ni komia aṉako vou kio ko vinaeko ama vo Baṉara ko leveleveo maba poso kasi. 29Ni aṉata eri kiala mekasi, aṉata pui mata aba nozuekou eri ama vaini ko ju ti kobeta barolou koa ṉaniu aṉa mata a nozuekou keru ko vairu ama vaini ko ju me sase aṉavo Mama ko lekasa puo kale,” kiolake vo Jisu.
30Ni seta kekai keraoke ka pado ilusato ko kera, ni keta olake Olive Ore sama Sopu kale.
Jisu tava pidokiko Pita ko zolio
(Maka 14:27-31; Luke 22:31-34; Jone 13:36-38)
31Nio Jisu ta mata eri kiolake sea disaipeli madu kasi, “Oduadu ipu kale mea kiada mela ta meda soqoilou ni ukaka me ilou aṉa, ako ko Tabu ama Riki kikovevo ta eri nio sole, ‘Vo Baṉara ta o vouvaevou vo sipi o kati vailani ni se sipi poso ta keta birebireilou.’ 32Melai so keru vo Baṉara mata o saevilou keru aṉa voukale azo, aṉata a ziovou Qalili meko kuleto,” kiolake. 33Nio Pita ta eri kiolake Jisu kasi, “Nia kiadamu ta keta ṉa soqoilou melai aṉata maba pui ti pui aba vaeṉou,” kiolake. 34Nio Jisu ta eri kiolake Pita kasi, “Pita, puliako kokorako zialo omuqama taku oduadu ipu kale, nio ṉota ṉoda la zoliovou ni eri kiṉovou zouke taku, ‘Aṉata pui avai nianiia vo,’ kiṉovou,” kiolake. 35Ni Pita ta eri kiolake, “Maba kebe vouvaelou ṉo sate melai aṉata pui aba taṉa zoliovou!” kiolake. Ni sea kiadama disaipeli madu ti omadeuvo kikelake vo jari.
Jisu ko vararaito Qetisemani
(Maka 14:32-42; Luke 22:39-46)
36Nio Jisu ta o mati kailake voko disaipeli madu ka pado zaekale ko ṉi ta Qetisemani, ni vota eri kiolake sekasi, “Meta papumo koi tu aṉata a zio uki vararaitole.” 37Ni vota o mati olake sea toni omuqa kale azo Pita, ni Jemisi ni Jone, Zebeti ko meqora kidi, ke kiadakoi. Ni Jisu ta matu upotuqu ota evake, 38ni vota eri kiolake sea zouke kasi, “Aṉata matu duki ada eva ni sipole ko vouvaelou koa duki. Tu meta koi ni pui me maroṉou melai me vararaitou aṉa sase,” kiolake.
39Ni vota o sasa vatutake sekasi azo, ni ota iqeiqeake miduku kale ni ota vararaitake ni eri kiolake, “A Mama ṉa, ko rovea tea, tala vatutika komia upotuqu ko kapa aṉa kasi azo! Melai pui ṉo erekou aṉako zario kikolani melai vaeka tu ko ereilo ṉo ṉaviko vatolo kikolani jari.” 40Nio vota o vaitake sea zouke disaipeli madu kasi, ni o meake kebeta maroṉake. Nio vota eri va kiolake vo Pita, “Noi sole inio meta pui me rovea vaito aṉa sase kama omadeu aoa? 41Meta vailomo ni vararaitomo nio pui me amaqeovou zolizolito kale. Ako meta meqai zaria ereko ko sidopu, melai meta lekuleku ama maba poso mela.”
42Nio omuqama taku Jisu ta mata o vaitake vararaitole ni eri kiolake, “A Mama ṉa, ṉota pui ṉoda la vatutikou kiṉovou komia upotuqu aṉa kasi azo melai uri. Tu vaeka tu ṉoko vatolo ta ko ereilo,” kiolake. 43Ni vota o vaitake ni mata o meake sea disaipeli madu kebeta maroṉake, keta dudeake sole.
44Nio Jisu ta mata o vaemake ni ota ola vararaitole zouke ama taku, ni okai vararaitake koa omadeuma vararaito. 45Nio vota mata o vaitake o disaipeli madu kasi, ni o meake ko omadeuvo kebeta kake. Nio eri ma kiolake, “Noi nio, meta mebeta maroṉa ni mamaza kio? Keatini! Ko taku ta kota baroa ni aṉa maba a eveni lala ta a qatiziovou se ruqe ama maba madu ko ṉase topi. 46Zolaimo tu meda zio. Keatini, nei ta voineni voa maba obeta kueva vo o saiqorilani aṉa!” kiolake.
Se lotu tanatanamu ko noqoevo vo Jisu
(Maka 14:43-50; Luke 22:47-53; Jone 18:2-11)
47Ni so keru Jisu obeta pesipesita keru nio Jiudasi, kala sea toni omuqa disaipeli madu kale ala, ta o baroake. Ni vo ke luluevani ta matu kubo vaki ke borikake ko benisi ni kubau, se raura kama siama madu ni se lotu tanatanamu ko soropato kale. 48Nio voa ruqe ala maba Jiudasi ta lula o bazueme sea vaki ni eri kiove, “Vo aṉa a lumevo ala, vo inio voa maba me mevai zariani. So sole meta me noqoevou vo!” kiolake. 49Nio vo Jiudasi ta tutumazi avole o olake Jisu kasi ni eri kiolake, “Matu uri, tanala,” kiolake, ni o luluevake vo. 50Nio Jisu ta eri kiolake vokasi, “Lolo, ṉota taukavo ereka ko quli ṉo ṉoqai zariako quli ereko!” kiolake.
Ni so keru nio seta ke noqoevake vo Jisu. 51Ni kala sea disaipeli azo ta o ravuzikake voko benisi koko teamuteamu kale azo tu o pazovo kiolake vo Ṉisa Siama vo nabulu, ni ota va pikekake voko taliṉa. 52Nio Jisu ta o keake komi quli ni eri va kiolake, “Ṉota vaitoeka ṉoko benisi ko ṉaviko zaekale. Ako se kekai pazokinio amu ko benisi ta kekai vouvou ko benisi sole. 53Ni ṉota pui ṉoqai nianiia ta aṉata avai zaivotou aṉavo Mama tu o tauvelo kiavou, ti vota obe soroekou nio matu kubo vuro mateana tu ke kilou ni kela pazokiniou aṉa. 54Melai kota pui so kopa kalou, ako so ko kalou ta ko Tabu ama Riki kikovevo ta pui nio tuvevo kopa elou sole,” kiolake.
55Ni so keru inio Jisu ta mata eri ma kiolake sea vaki, “Meko kerukeru kale ta aṉata kala matu ruqe ala kuiloa lala ni pazokinio ko maba lala la kimela inio meta meda kueva benisi poso ni kubau poso sate tu noqoelole aṉa, kio? Aṉa inio abeta papua ni a nianiiekatani lala kiadama ṉaniu poso ubutiania Jelepade kale melai pui me noqoela sai. 56Melai komi quli koko ereivako ta se poropita madu ko riki kikovevo ko tuvevo puilo sole,” kio ke viqake, nio sea kiadama disaipeli madu ta keta va soqoike.
Jiu amu ko lotu tanatanamu ko titizivo vo Jisu
(Maka 14:53-65; Luke 22:54-55,63-71; Jone 18:12-14,19-24)
57Nio se kepa noqoeveni vo Jisu ta ke vati olake vo Kaepasi Ṉisa Siama ko pade kasi, sai se vo Mosese ko Bazu ko nianiiekato ko maba madu ni se lotu tanatanamu ke padoivakoi. 58Ni vo Pita melai obe luluemake se, melai vaṉa inio ota ma taliake. Nio so keru o baroa keru vo Ṉisa Siama ko pade ko taqo kale, nio vota ota amaqeake ni ota papuake se vailo ko maba madu sate tu o kelo noi nio ke ivo avo vo Jisu, kiolake.
59Nio se raura kama siama madu ni se Jiu amu ko tanatanamu ta ke madoekake tu kevai kuiriko vo Jisu lipalipa kama kuiripato, tu ke vouvaevo vo. 60Nio matu kubo maba madu inio ke lojoake ni kevai kuirikake lipalipa kama quli, melai seta pui keta va keake kama silo pala sarueko. Ni koko tovatova inio mata omuqa kidi qo lojoake, 61ni eri kiqolake, “Eqe qeta va viqani nea maba ta eri nio kiolani, ‘Aṉata a biresukou vo Baṉara ko Jelepade, ni zouke ṉaniu kale inio a baikou orumukou,’ nio kiolani,” kiqolake. 62Nio vo Ṉisa Siama ta o lojoake ni eri kiolake Jisu kasi, “Ṉota ṉobe viqa nioqia omuqa maba ko kasa iṉo ṉo. Ta noi nio pui ṉo opata?” kiolake. 63Melai Jisu ta pui o pesiake.
Nio vo Nisa Siama ta mata eri kiolake vokasi, “Vo saevola Baṉara ko ṉikale aṉata maulu aṉa pika. Tu ṉota bazueṉela eṉe, ṉo inio voa Pakio ṉa vo Baṉara vo Meqora ṉa?” kiolake. 64Nio vo Jisu ta o vati tiorikake ni eri kiolake, “Tuvevo ṉo kiṉolani nio. Ni aṉata a bazuemela me, tova inio meta me lelou aṉa maba a eveni lala ta a bapuvou vo Piza kala Baṉara ko palo rana tu a lekasa puo ni a qilou aukale ama leikale!” kiolake. 65Nio vo Nisa Siama o viqa keru komi quli vota ota matu korakoraivake, ti obe rotiekake inio voko sabosabo, ni eri kiolake, “Nea maba ta o anararaiva inio vota Baṉara jari ala! Sole animeta pui meba vai zariovou kala voko tuvevo o kaseko ala, ako meta lula me viqala me ṉavi voko aṉararailo sama pesio sole. 66So sole noni ta meko pitoto?” kiolake. Nio seta ke vati tiorikake ni eri kikelake, “Vota maba o vouvou,” kikelake.
67Nio kake ta keta vai supatake vo Jisu ko loilo, ni ke pazovake, ni kake ta ke qurativake vo seko tava pazoko kale voko loilo ke ṉase saresare kale 68ni eri kikelake, “Noa Pakio ṉa ta bazueṉela eṉe ni kaseva lala inio vo ṉo o pazoṉani! Tava kaseka o ṉi!” kikelake.
Pita tava zolio vo Jisu
(Maka 14:66-72; Luke 22:56-62; Jone 18:15-18,25-27)
69Nio vo Pita obeta papua keru titizikinio ko pade ko kupekupe, nio ka pado vo Nisa Siama ko nabulu ta ko olake vokasi ni eri kikelake, “Ṉoela, ṉota vo Qalili ala Jisu sasea laṉa inio,” va kikolake. 70Melai vota ota zolike sea kiadamu ko ubutiania, ni eri kiolake, “Ṉoiza, aṉata pui aqai nianiia ṉo kiṉolani,” kiolake, 71ni ota vatutake koa titizikinio ko pade ko veutu tona.
Nio mata kama pado nabulu ta ko veake vo ni eri kikelake sea maba poso kasi, “Vota vo Nazareti ala Jisu kale ala,” kikelake. 72Melai Pita ta obeta zolike ni eri kiolake, “Aṉata maulu a bika ta aṉata maba pui avai nianiia nea maba meme qasevani!”
73Ni puliako tu keu nio se sai ke lojoani ta ke olake ni ke aramuvake vo Pita ni eri va kikelake, “Tuvevo ṉo inio kala ṉa vo kalea laṉa, ako ṉoko pesio ko rukuruku ta Qalili amu ko jari sole,” kikelake. 74Melai Pita ta eri kiolake, “Aṉata maulu a bika ni tuvevo ama quli kio a qaseka ni vo Baṉara ta o koqotaelou aṉa a lipalipatou ta! Aṉata maba pui avai nianiia voa maba!” kiolake, ti kokorako ikio kobeta ziake. 75Nio Pita ta o kerukeruekake Jisu va kiovevo vo, ko eri, “Puliako kokorako zialo, inio ṉota ṉoda la zoliovou aṉa zouke taku, ni eri kiṉovou, ‘Aṉata pui avai nianiia vo,’ kiṉovou,” ka kiovema. Ni vota ota saqorake kupele ni ota matu ṉuisiṉuisiake zialo.

Nu markerat:

Matiu 26: BLBNT

Märk

Dela

Kopiera

None

Vill du ha dina höjdpunkter sparade på alla dina enheter? Registrera dig eller logga in