O LUKAS 22
22
O hidailako madorou o Yesusika
(Mat. 26:1-5; Mark. 14:1-2; Yoh. 11:45-53)
1 #
Kel. 12:1-27
O Roti i Ragi-ragi Ua ma Rameanga yahetongoli o Paskah itigioka. 2O imam-imam manga häeke deʼ o agama maguru-guru yolingi-lingiri o ngëkomo la iwitoma o Yesus de moiua ihiöriki, karana önanga yämodongo o nyawa yowöe-wöeika.
O Yudas womahi moteke o Yesus iwitagoko
(Mat. 26:14-16; Mark. 14:10-11)
3Ipaha o Ibilihi iwïngohama o Yudas iwihetongoli o Iskariot, enagënanga yangimoi de yahinoto o Yesus iwinöninïki manga dodiawo. 4Karana gënanga o Yudas woiki deʼ imateke ade-ade deʼ o imam-imam manga häeke deʼ ma Jou ai Tau magogöana manga häeke mangale sarakia ünanga yakunu wihilapahi o Yesus onangika. 5Onanga duru yosanangi deʼ yojaji aha iwihidöaka o tiwi unangika. 6O Yudasö wohimoteke deʼ womuläenge wolingiri o öraha maoa la wihilapahi o Yesus onangika, de moiua o nyawa ihiöriki.
O Paskah mainomo ihidiai
(Mat. 26:17-25; Mark. 14:12-21; Yoh. 13:21-30)
7O Roti i Ragi-ragi Ua ma Rameanga mawange imahiadonoka done o duba o Paskah mainomo yatöaka. 8O Yesus wähuloko o Petrus deʼ o Yohanis, ”Nioiki nihidiai nanga Paskah mainomo.”
9”Kiaka Bapa nomau ngomi mihidiai?” önanga yoleha.
10O Yesus wohaluhu, ”Maöraha ngini niwohama o kotaika, o nauru womatëngo woao moi o rube-rube madol̄a o akere aha nimakamäke de ngini. Niwinïki matau kiaka ünanga wöngohama, 11deʼ niahëtongo matau madutuika gënanga: Mia Guru wato, ’Kiaka mangï la mangale ihinöninïki deʼ Ngohi miol̄omo o Paskah mangol̄omo?ʼ 12Matau madutu gënanga aha winihimatoko nginika o ngï moi maamo-amoko o lotengoka, mameja de magogogere itotiai. Nihi diai mata-mata dokengoka.”
13De o Petrus deʼ o Yohanis yoiki daha yamäke mata-mata itiai hokä o Yesus waheto-hetongoka. Onangö ihidiai o Paskah mangol̄omo gënanga.
Ma Jou wohi tita o ngol̄omo de o ngokere itebi-tebini madoomu
(Mat. 26:26-30; Mark. 14:22-26; 1Kor. 11:23-25)
14Itedekanua o Paskah mainomo mangol̄omo yadonoka maöraha o Yesus wogogeruku de iwinöninïki o jamuanga mangïoka. 15De Unanga wätemo onangika, ”O huha deʼ o hangihara tatagongowahi Ngohi duru töigo taol̄omo o Paskah mainomo nënanga dede ngini! 16Hababu ningaku: Ngohi aha taol̄omokaua nënanga hiädono o jamuanga nënanga mamangarati ihinyata ma Jou Madutu ai Dunia ma Hungioka.”
17Ipaha de gënanga o Yesus wagoraka o angguru magalahi, daha womäniata wosukur ma Jou Madutuika, ipaha wotemo, ”Nia l̄ë nënanga, deʼ nihikodoku; 18karana nianako: muläenge o öraha nënanga Ngohi aha tokerokauali o angguru nënanga hiädono ma Jou Madutu wakuahaoka mata-mataika.”
19Iböto de gënanga o Yesus wal̄ë o roti. Deʼ womäniata de wosukur ipaha, Unanga wabëla-bëlaka o roti gënanga de Ai giama daha wahidöaka onangika, deʼ wotemo, ”Nënanga Ahi röehe [tohilapahi mangale ngini. Niadiai nënanga mangale nihihininga Ngohi.” 20#Yer. 31:31-34 Hoko genangö yol̄omo ipaha, Unanga wohidöaka o angguru maudo-udomo gënanga deʼ wotemo, ”Udo-udomo nënanga ganga ma Jou Madutu aijaji mahungi, ihigoungu de Ahi awunu – o awunu i kokopoa mangale ngini].”
21 #
Mzm. 41:10
”Ma nialega! O nyawa yosetiaokaua Ngohino naga nengokadau dede Ngohi! 22O Nyawa manga Ngohaka marai aha wohonenge hokä sarakia ma Jou Madutu wohitantuoka; mä yobodito o nyawa yososetiaua Unangika!”
23Onanga yomuläenge imakokeleha, manga hidogoronaka o nagona o hali gënanga aha yodiai.
O ributu mangale o nagona iholoi yolamoko
24 #
Mat. 18:1; Mark. 9:34; Luk. 9:46 O Yesus iwinöninïki manga hidogoronaka ipuda o ributu mangale toönanga manga hidogoronaka o naguna kokiani iwipulono iholoi wolamoko. 25#Mat. 20:25-27; Mark. 10:42-44 O Yesus wätemo onangika, ”O hoana de o berera manyawa manga kokoano iwinäko-näkoua ma Jou Madutu yätuku manga kawaha, deʼ yokokuaha yähetongo ’O Kawaha manga Hohohongo’. 26#Mat. 23:11; Mark. 9:35 Mä ngini yakunua hokogënanga. Haramoioli, o nyawa yolago-agomo nia hidogoronaka kokiani yodadi hokä yohohumujuru, deʼ o tutuda kokiani yodadi hokä yolöleleani. 27#Yoh. 13:12-15 O nagona iholoi yolamoko: o nyawa yogögogeruku yol̄omo o mejaka ekola o nyawa iwïlöleleani ünanga? Marai o nyawa wogögogeruku gënanga. Mä Ngohi naga tingini niahidogoronaka hokä wolöleleani.
28Hagala Ahihuha magoronaka, ngini salalu dede Ngohi. 29Hoka sarakia o Ama wohihidöakoka Ngohino la topareta, hokogenangoli Ngohi aha tohidöaka o haku gënanga nginika. 30#Mat. 19:28 De hoko gënanga ngini yakunu nimoteke nimahi sosanangi dede Ngohi ma orahoka Ngohi todadi o Koano. Deʼ ngini aha nigogeruku ngimoi de hinoto o kuruhi imomulia mal̄okuoka, la niäpareta o Israel manyawa o hoana ngimoi de hinoto.”
Wohi dodemoka o Petrus aha wihipongono o Yesus
(Mat. 26:31-35; Mark. 14:27-31; Yoh. 13:36-38)
31”Simon, Simon, noihene! O Ibilihi ihigumal̄aka la inïtaili ngini; hokä o gandum ma akeme ihitingaka maafa, hiädono maoa ihitingaka de madorou. 32Mä Ngohi tohubayangoka mangale ngona, Simon, hupaya aningongaku ma Jouika uha ihihanga. Deʼ nako ngona nomakilioroka Ngohino, kokiani ngona nahikuata aniroriadodoto.”
33O Petrus wohaluhu, ”Jou, ngohi katömodeke towohama o bui deʼ tohonenge dede ngona Jou!”
34”Nongaku, Petrus,” o Yesus wato, ö wange nënanga o kuru-kuru i horenowahi ngona nohihi pongono nohigali mahange.”
O tiwi mangï, o popoje ekola o oworo
35 #
Mat. 10:9-10; Mark. 6:8-9; Luk. 9:3, 10:4 Ipaha de gënanga o Yesus wätemo onangika, ”Mahira maöraha Ngohi tinïhuloko ngini tinihigumal̄aua ngini nimägao o tiwi mangï, o popoje ekola o hapato, boteka ngini okianaga nikuranga?”
”Kowali!” önanga yohaluhu.
36”Mä o öraha nënanga,” o Yesus wato, önagona de manga tiwi mangï ekola o popoje, kokiani imägao; deʼ o nagona koiwa manga oworo, kokiani manga juba yahukunu la imäija o oworo. 37#Yes. 53:12 Hababu, ningaku, Ma Jou Ai Demo ma Buku itulihi hoko nënanga, ’Unanga iwipulono hokä o nyawa madorou moi,’ kokiani idadi Ahi diriuku. Hababu okia ituli-tulihoka Ma Jou Ai Demo ma Buku yakorona Ngohi o öraha nënanga magogiriaka idadi.”
38”Jou,” o Yesus iwinöninïki yotemo, ”nölega, nenangoka naga o oworo hinoto.”
”I böto dika!” o Yesus wohaluhu.
O Yesus womä niata, o Zaitun ma Doporonoka
(Mat. 26:36-46; Mark. 14:32-42)
39O Yesus wamal̄a o berera deʼ woiki hokä biaha o Zaitun ma Doporonika, deʼ iwinö ninïki yoikoli dede Unanga. 40Maöraha imahiädono genangoka, Unanga wätemo onangika, ”Nimä niata hupaya uha nibaradoha näko ngini inïtaili.”
41Ipaha Unanga woiki iholoi ikurutika mahuhutulu dede önanga, magurutika done ngade-ngade höhokawelika de o helewo, daha watilabukuku deʼ womäniata. 42”Ama,” wotemo, ”nako yakunu, nohihitingaka dede Ngohi o huha de o hangihara kiaka kokiani tatago-tagongo nënanga. Mä uha imoteke Ahimau, duga-duga imoteke Animau dika Ama.” [43O malaekat womatëngo waino Unangino deʼ wihikuata. 44O Yesus aihiningaka duru wamäo o huha de o hangihara hiädono Unanga iholoi wakaigoungu womä niata. Ai gahauku itututu hokä o awunu o tonakuku.]
45Iböto womäniata, o Yesus womakilioroli iwinöninïkino. Unanga wämäkeino önanga imäiduoka karana manga hininga duru ihuha. 46De Unanga wätemo onangika, ”Yadodoa hongini nima idu? Nimomiki deʼ nimäniata hupaya ngini inikoronaua o bobaja.”
O Yesus iwitagoko
(Mat. 26:47-56; Mark. 14:43-50; Yoh. 18:3-11)
47O Yesus kawo ade-adeohi magogiriaka, o nyawa o doomu moi yoböa. Onanga wähihira o Yudas o Yesus iwinöninïki manga dodiawo. Ipaha o Yudas woiki o Yesusika daha wïame. 48Mä o Yesus wïtemo unangika, ”Yudas, mode de o game gënanga ngona nomau nihibodito o Nyawa manga Ngohaka?”
49Maöraha o Yesus iwinöninïki naga genangoka yamäke okia aha idadi, önanga yotemo, ”Jou, ngomi miatoka dika de miaoworo!” 50Gila-gila womatëngo manga hidogoronaka, wïoto ma imam womomulia aigilaongo, de o oworo, hiädono aingauku manirakoka itöaka.
51Mä o Yesus wotemo, ”Ibötohi!” Daha Unanga wapal̄anga o nyawa gënanga aingauku deʼ wohitogumoka.
52Ipaha o Yesus wätemo o imam-imam manga häekika deʼ ma Jou ai Tau magogöana mabalu-baluhika inoli o Yahudioka manga tutuda yaino-ino genangino la iwitagoko Unanga, ”Mode Ngohi nënanga o nyawa madorou, hiädono ngini niböa de niaoworo deʼ niaboboha la nihitagoko Ngohi? 53#Luk. 19:47, 21:37 O wange higetongo Ngohi naga dede ngini ma Jou ai Tauoka, ngini nihitagokua. Mä nenanga toënanga maöraha ngininiadiai niamau, o huhutu makuaha maöraha idadi o tutuda.”
O Petrus wihipongono o Yesus
(Mat. 26:57-58, 69-75; Mark. 14:53-54, 66-72; Yoh. 18:12-18, 25-27)
54Onanga iwitagoko o Yesus deʼ iwiao ma imam womomulia aitauika. O Petrus winïki womakökurutoko. 55O löa gënanga mahidogoronaka o uku itofo-tofoino itokaril̄eoka deʼ o Petrus woiki wogogeruku dede önanga de manyawa yogögogeruku magilolitino. 56Momatëngo o ngoheka molöleleani mïmäke o Petrus wogogeruku o uku itofo-tofoino madatekoka gënanga; daha o ngoheka molöleleani gënanga mïtotailako o Petrus, ipaha mato, ”O nyawa ne unangö kangano naga de o Yesus!”
57Mä o Petrus womahipongono. Unanga wotemo, ”Ngohi ha kali-kali tinäkoua o nyawa geünanga!”
58Ipahaika hokokiaua womatëngo mahomoa wïmäke o Petrus deʼ wato, ”Ngonaö to önanga manga dodiawo!”
Mä o Petrus wohaluhu, ”Kowali, ngohiua!”
59Done ho o jam moi ipahaika, womatëngo mahomoali wotemo wakua-kuatil̄e, ”Maraioka o nyawa nënanga wininïki o Yesus, hababu unangö o Galilea manyawa!”
60Mä o Petrus wohaluhu, ”Okia animau, ngohi tohi orikua!”
O öraha gënanga dika, o Petrus kawo ade-adeohi, o kuru-kuru ihorene. 61O Yesus womälega deʼ wïpulono o Petrus. Gila-gila o Petrus womähininga ma Jou wïtemoka unangika, ”O wange nënanga o kuru-kuru ihorenowahi, ngona nohigali mahange nohihi pongono.” 62De o Petrus wohupu genangoka deʼ woari iwihöhowo-howo.
O Yesus imahi gogule deʼ iwi gohara
(Mat. 26:67-68; Mark. 14:65)
63O nyawa mangangöe iwïgögoa-goana o Yesus, imahigogule deʼ iwigohara Unanga. 64Onanga yatamunoko Ai lako de yoleha Unangika, ”Abeika nähetongo o nagona inigohara?” 65Mangöeoli o hikauku mademo-demo iwihitemo Unangika.
O Yesus o Agama ma Juru Hakimi mahimangoka
(Mat. 26:59-66; Mark. 14:55-64; Yoh. 18:19-24)
66Mangoru-ngorumino, o Yahudioka manga tutuda, deʼ o imam-imam manga häeke deʼ o agama maguru-guru imatoomu, de o Yesus iwiao manga Agama ma Juru Hakimika. 67”Nomihi ngahu ngomino,” iwitemo Unangika, ”mode Ngona nënanga ma Koano Wohihohalamati?”
O Yesus wohaluhu, ”Nako Ngohi tinihingahu nginika, ngini aha ningakua. 68Deʼ nako Ngohi tinileha nginika, ngini aha nihaluhua. 69Mä muläenge o örahanënanga, o Nyawa manga Ngohaka aha wogogeruku ma Jou Madutu Duru woko Kuaha ainirakoka.”
70Onanga mata-mata yotemo, ”Nako hokogënanga, Ngona nënanga ma Jou Madutu ai Ngohaka?”
O Yesus wohaluhu, ”Hokogënanga ngini niato.”
71De önanga yotemo, ”Iparaluokaua o hakihiohi! Ngone hoihenoka Ai uruiha mahirete!”
Nu markerat:
O LUKAS 22: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
