O KISAH RASUL-RASUL 16
16
O Timotius wanïki o Paulus deʼ o Silas
1O Paulus wohigila-gila aidodagi o Derbeika, ahao o Listraika. Genangoka naga wininïki o Yesus womatëngo airomanga o Timotius. Ngoi ayo o Yahudioka manyawa moi, mingakuoka o Yesusika; mä aiama o Yunanioka manyawa. 2O nyawa yongaku-ngaku manga hidogoronaka yogogogere o Listra deʼ o Ikoniumoka, o Timotius iwinako hokä o nyawa maoa-oa. 3O Paulus woigo hupaya o Timotius winïki dede ünanga; karana gënanga ünanga wihuna o Timotius. Unanga wodiai gënanga, hababu o Yahudioka manyawa madaera gënanga mata-mata ihiöriki o Timotius aiama o Yunanioka manyawa moi. 4O kota ihigeto-getongo önanga yotulu yalega, önanga yahingahu o nyawa yongaku-ngakuokaika o putu-putuhu ihitatapuoka o rasul-rasul deʼ o tutuda o Yerusalemoka. Onanga yatemo-temo roriadodoto yongaku-ngakuoka gënanga, hupaya yamoteke o dato-datoro gënanga. 5O jemaat-jemaat gënanga idogo ikuata manga ngongaku, deʼ o wange ihigetongo kaiholoi idogo magegetongo mangöe.
O Troasoka: o Paulus wamäke o lolega moi
6Ma Jou Madutu ai Womaha yahigumal̄aua o Paulus deʼ o Silas ihigerewoto ma Jou Madutu aidemo o Asia maprovinsika. Ho önanga manga dodagi ihigila-gila o Frigia deʼ o Galatia madaeraika. 7Maöraha imahiädono o Misia maribatingika, önanga ihitaili yowohama o Bitinia maprovinsiika, mä o Yesus ai Womaha yähigumal̄aua önanga genangika. 8Hoʼ onanga yakaika o Misia deʼ yogila-gila o Troasika. 9Yohutuku, o Troasoka o Paulus wamäke o lolega moi. O lolega mahidogoronaka gënanga ünanga wimäke o Makedonia manyawa womatëngo womaokoino aihimangoka de duruhë wogahoko hupaya ünanga woiki o Makedoniaika mangale wariwo önanga. 10O Paulus wamäke iböto o lolega gënanga, gila-gila ngomi mimahidiai mangale mioiki o Makedoniaka. Hababu ngomi mihigoungu de mial̄ë mamangarati, ma Jou Madutu womihuloko ngomi mihingahu o Abari ma Oa gënanga o nyawaika dokengoka.
O Filipioka: o ngo Lidia mingaku ma Jou Madutuika
11Ngomi mia mal̄a o Troas deʼ mihidete migila-gila o Samotrakeika, deʼ iyarehino o Neapolisika. 12Gangoka ngomi o Filipika o kota moi madodihiraka o Makedonia madaeraka. O Filipi ganga o Roma mapareta makuaha matimioka. Dokengoka ngomi migogere o wange muruono naga. 13O Puji mawangeoka ngomi mioiki o ngairi madatekika o kota mangorana iamo-amoko maporetoka, hababu ngomi miatobote genangoka naga o Yahudioka manga hubayanga mangï. Daha ngomi migogeruku de mima koketemo de o ngongoheka imatotoömuinoka o ngïoka gënanga. 14Momatëngo manga hidogoronaka önanga, nägala moma huku-hukunu o pakeanga magoguhurungu, amiromanga o ngo Lidia, deʼ ami ahali o Tiatiraino. Münanga mihininga ma Jou Madutu, aha ma Jou wagaraki amihininga hupaya münanga matarima okia o Paulus wodotokoka munangika. 15O ngo Lidia deʼ amitau madol̄a wäohiki. Wäohiki iböto münanga momiahoko ngomi. Münanga mato, ”Nako Roriadodoto niamäo ngohi igou-goungu tingakuoka o Yesusika, niaino nimahidodogumu tongohi ahitauoka.” Daha münanga momiributu hupaya ngomi miamoteke amigogahoko.
O Paulus iwibuiika o Filipioka
16O wange moiuku ngomi magogiriaka mioiki o niata mangïika, ngomi mima kamäke de o ngoheka momatëngo; münanga o gilaongo. O ngoheka gënanga imikuaha o womaha madorou ho makunu momaihi idodadadi aha iböa. De mohidodemoka o nyawa manga wowango madodagi, o ngoheka gënanga mahidöaka o gutumu maamoko amitua-tuangika. 17O ngoheka gënanga kami niniki hokogenangika dika o Paulus deʼ ngomi daha moma pöa-pöaka, ”O nyawa nënanga ma Jou Madutu duru woamo-amoko Ai gilaongo! Onanga yoböa mangale ihingahu Roriadodotika sarakia madodagi yakunu ngini nihalamati!” 18O wange muruonino naga madekana o ngoheka gënanga momatogu-togumua mopöaka hoko genangika. O Paulus imataka aisabari, hiädono ünanga woma idulu daha wotemo o womahika gënanga, ”De o Yesus Kristus ai romanga ngohi tonipareta ngona nohupu o ngohekaino nënanga!” Oraha gënanga dika o womaha gënanga imimal̄aika o ngoheka gënanga. 19Maöraha amitua-tuanga yanako mangale önanga yamäke o tiwi mangëkomo ihihangoka, önanga yatagoko o Paulus deʼ o Silas, daha yatatauru yahinotö o kadato malöaika yahihimanga yokokuahaika. 20Onanga yähihimanga o Paulus deʼ o Silas o Roma mapopareta yolago-agomika, ahao yato, ”O nyawa nënanga o Yahudioka manyawa. Onanga yaruae tongone nanga kotaoka. 21Onanga yähuloko o nyawa yadiai manga biaha ma adati imahowono de tongone nanga tita, o Roma manyawa. Ngone hakunua hatarima ekola hamoteke o biaha ma adati gënanga!” 22O nyawa yowöe-wöeö imahimoteke yälawani o Paulus deʼ o Silas; deʼ o popareta yolago-agomo yakakihi manga pakeanga mangaröehoka o rasul yahinoto gënanga daha yähuloko o nyawa yägohara önanga yahinoto. 23Onanga yägohara kohagiria iböto, önanga yahingohama o bui magoronaika. O bui mabaluhu iwihuloko wägöana önanga wakaigoungu. 24Karana o pareta gënanga, o bui mabaluhu gënanga watumungu önanga o bui makamari duru magogoronaika, de önanga manga l̄ou ihidalara o balakika.
25Doneho hutu gorona o Paulus deʼ o Silas mangagogiria imaniata de o puji-puji ihinyanyi ma Jou Madutuika. O nyawa mahomoa yatumu-tumungukuö magogiria ihigihene önanga yonyanyi. 26Itodokanino idadi o ohu duru kohagiria, hiädono o bui mapondasi gënangaö imahidigiwioka. Mata-mata o bui mangorana ikoki helenga de o rante-rante yahilaraika o nyawa yatumu-tumunguku mata-mata ö ikokihoheoka. 27O bui mabaluhu gënanga iwitodokana wohidomomikil̄e. Maöraha ünanga wamäke o bui mangora-ngorana ikoki helengaka, ünanga kawomadauru aioworo mangale womatoma aidiri, karana ünanga watobote o nyawa yätumu-tumunguku mata-mata yokoki oaroka. 28Mä o Paulus womapöaka wakua-kuatil̄e, ”Uha natoma anidiri! Ngomi kanagahi mata-mata nenangoka!”
29O bui mabaluhu gënanga wogahoko o hilo daha wohioa-oara magoronaika, deʼ duru wohaharoka ünanga watilabuku o Paulus deʼ o Silas manga himangoka. 30Ahao ünanga wäao önanga yohupu deʼ wotemo, ”Tua-tuanga, ngohi kiani todiai okia, hupaya ngohi tohalamati?”
31O Paulus deʼ o Silas yohaluhu, ”Ningaku ma Jou Yesusika! Ngona aha nohalamati – ngona deʼ mata-mata o nyawa anitauoka!” 32Daha o Paulus deʼ o Silas ihitararono ma Jou aidemo o bui mabaluhi ka gënanga, deʼ o nyawa mata-mataika naga aitauoka. 33O hutu gorona gënanga dika, o bui mabaluhu gënanga wä ao önanga daha watebini manga nabo-nabo önanga. Unanga de mata-mata o nyawa aitauoka gila-gila yäohiki. 34Ahao ünanga wäao o Paulus deʼ o Silas aitauika deʼ yahidiai o inomo onangika. Unanga de aitau madol̄a yongodumu yomörene duru hababu ünanga öraha nënanga wingaku ma Jou Madutuika.
35Iyarehe mangorumino, o Roma mapopareta yolago-agomo yahuloko o polisi o buika mangale ihingahu o pareta hupaya o Paulus deʼ o Silas yapidiloka.
36O bui mabaluhu gënanga wahingahu o hali gënanga o Paulusika. Unanga wato, ”Tua-tuanga o popareta yolago-agomo ihidöakoka o pareta mangale inipidiloka Tua-tuanga. Oraha nënanga Tua-tuanga yakunu nilio. Halamati nima jobo!”
37Mä o Paulus watemo o polisi yotugas-tugasika gënanga, ”Ngomi o Roma manegara mabä. Nimi tailakouahi, ngomi nimigoharoka o nyawa yowöe-wöe manga himangoka de nimihingohamoka o bui magoronaika. Deʼ orahanënanga önanga imihuloko ngomi mioiki de kamimarirïdoka? Ngomi mioluku! Niahuloko o popareta yolago-agomo gënanga yoböa mahirete nenangino imihipidili ngomi.”
38O polisi yotugas-tugas gënanga ihingahu o hali gënanga o Roma mapopareta yolago-agomika. Ma o popareta yolago-agomo gënanga yoihene o Paulus deʼ o Silas o Roma manegara mabä, önanga dadi yohawana. 39Daha önanga yoiki yogahoko o apongo o Paulus deʼ o Silasika, ahao yangotaka önanga yahinoto yohupu o buioka, de yogahoko hupaya önanga yoiki de o kotaka gënanga. 40O Paulus deʼ o Silas yamal̄a o bui gënanga, daha yoiki o ngo Lidia amitauika. Imakamäkeoka de o nyawa yongaku-ngaku dokengoka, yahidöaka o hihitomo onangika, o Paulus deʼ o Silas imagoraka.
Nu markerat:
O KISAH RASUL-RASUL 16: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
