LUKAS 20
20
Yesus Adya Welemok Wa Yub Emba Heibek Yuba
(Mat. 21:23-27; Mrk. 11:27-33)
1Yok sum enyek, Yesus ara Imik Neyung e eremek wekoka, Imik Neyung adyaʾ perob lero yanggan yuba nim ek lel eleklesuk enyek, Imik Neyung yuba wa gakaʾ dub nang eb, yuba neksin nang eb, Yahudi sokok dub nang eb dadya, Yesus ak yeiniboka, 2lebekja, ”Wera anda hek damok edya yokaʾ-yokaʾ lok soʾ unululamaʾ anyek neksilom! Heknedya anak ban unulumnelam aboka migib en elegajok do?” aboka heibek. 3-4Anasa Yesus adya dara, ”Nababya ugunuk heibnesin. Yohanes Pembaptis be meka dalasukaʾ ara, hek damok edya do? Imik Neyung migib adya gom, nimi migib adya unulumok gom? Anadya aboka nak neknululum,” aboka heibsuk.
5Dara sikda nidyaʾ ara ganya sunuwoka lebdanamekja, ”Nunda lebnemabja, Imik Neyung migib adya, henemab dara, alja dara, Wera ugunda hekasa dib senenggululum do? henesil. 6Bok onoʾ nunda, Nimi migib damok adya, henemab dara, Yohanes bera nimi nidyaʾ adya dara, ununumnaʾ lenya senelemak bok anasa, girik adya obsijek bar,” wenyabdek. 7Anya sikja dara, ”Nunda elgom,” hyek. 8Anasa, Yesus adya sikenek lebsukaʾ ara, ”Wera anasa nababya, hek migib damok edya, lok soʾ unulamnaʾ ara, anadya unulamna aboka neknenggunusin,” hyok.
Galdok Wak Holaʾ Gereboka Memenaʾ Nang Ek Yuba
(Mat. 21:33-46; Mrk. 12:1-12)
9 #
Yes. 5:1
Dara onoʾ, Yesus ara nim ek ban yub enyek sunuwoka lebsukaʾ ara, ”Nimi ben hnon gal dok wa weboka memelemoknya ulumok. Dara wa damnya bera, ugunja meewoka welemnenulum aboka, yok nim ek rupiah dekoka, alda yok sokok biniboka uldablemok. 10Wera gal doka dakne salek era, oka dok dara, wa damnya bera, yok oruknaʾanya ben hnon seleb moulenya daka yanalam bar aboka bokdo dorogok. Bok men wa welemnelum aboka oruga bilisuk nang edya, ben yalamok enyek, saboka oboka or nong baneng bindowalom hyek. 11Dara onoʾ wa damnya bera yoknya bek gal doka dakoka beiyimeija dara, bo yananelem aboka bokdo dorogok, bok anyagan men wa welelulum aboka orugosuk nang edya, ben yalamok enyek, al saboka oboka malya nenewoka nong baneng bindowalom hyek. 12Dara onoʾ wa damnya bera saaboka, winilinya ben hnon bokol yok. Bok beneba onoʾ neik nang edya saboka oboka, wak sam abaʾ ara yakdo bobogek.”
13”Wera anasa wa damnya bedya dara, Nara hekaʾ ak hubnamna do? Nara saaboka nadyaʾ me yokaʾ wanaʾ nong me nenyek, sikda alak perobaʾ lebnemeija me nenyek gal doka dakoka beiyimeija dara, do yananelem aboka boknamna! hyok. 14Bok sikda wa damnya bedya me nong enyek okoka eibek dara, sik moumen leldalamekja, Wa dam me nera an yanggal an. Alja wa nera nu danamabaʾ anasa, nunda al nong ak obnemab, aboka lelemek. 15Wera me nenyek saboka oboka bo goboka, dibaʾ obek,” hyok.
Dara onoʾ Yesus adya dara, ”Wei, damnya benyek yasok ab dara, wa welenululum aboka oruga bilisuso nang ek ara hekaʾ hubnesuso do? 16Wa damnya yeiniboka, wa welenululum aboka oruga bilisuso nang era nidyaʾ obsusookanya, wa ara yok nang ek ugunja welemnenulum aboka lebnamso,” hyok.
Ban wenyan yuba kemek dara, nimi nauba adya Yesus ak, ”Hyak mem o!” hyek. 17#Mzm. 118:22Dara Yesus ara sikenek keebdaboka lebsukaʾ ara, ”Anasa yuba ban hnon ulumlaʾ ara,
E sonaʾ nang edya e denewoka sobnenggumekaʾ lobek girik era, men youboka perobnya dal,
aboka Imik Neyung yuba bukuk sam momnya dobokaʾ ara, damok ara hekaʾ ak lebok do? 18Nimi nidyaʾ girik enyek an malyingginimak nim era, malya uboka soldob meneganasil; anya heknyek girik enedya obnamla dara, alda soldowoka aso hukaʾ danamla,” hyok.
Mok Soko Amba Rupiah Deklemak Yuba
(Mat. 22:15-22; Mrk. 12:13-17)
19Yahudi Imik Neyung yuba wa gakaʾ dub nang eb, yuba neksin nang eb dara, Yesus adya ban yokaʾ ak sunuwoka leboknya nera, sikja dara, nunsamba lebsil senemek. Anasa Yesus ak wene salek heng goubnemab senewek bok, nimi nauba anyek lok anasa lomek.
20Anasa sikja dara, pewalya sum donok senewoka pik elemek. Wera anasa sikja dara, nimi pe unulamna nang eneso anyek deknaʾ deknesabaʾ anasa, ugunja Yesus ak sene hek hulul do aboka sunuru yabalelulum, henemab. Anadya beknaʾ danamla sum era, mok soko dub nang edya sikja migib lomok doboka eleganamab, senemek. 21Wenyaboka deknaʾ dekesik nang edya Yesus ak, ”Neklesilimnya o, neyung anja lelesilimaʾ ab, neklesilimaʾ ab dara, hyak dib nongaʾ ak lelelam. Anda nimi nidyaʾ lek senesinaʾ loboka, perobaʾ lelesilimaʾ anasa, Imik Neyung adya nim ek anaso unuwaseng senelamlaʾ anyek laga poboka neklesilimaʾ ara, ella ulumab. 22Anasa nunja yuba donaʾ ak sam lelemlaʾ sunuwoka unuwanalum wenyhenesilim, soko dubnya Kaisar bek ara, mok soko amba dara rupiah or deknesibya gom, orok gom?” aboka heibek.
23Bok Yesus ara sikja sene heimekaʾ ara eiyisukaʾ anasa, alja sikenek lebsukaʾ ara, 24”Rupiah hnon nak aawonululum. Heknedya sununaʾ eb, si neb ulumla do?” aboka heibsuk. ”Sokok dubnya bek ulumla!” hyek. 25Yesus adya sikenek lebnesukaʾ ara, ”Anaso ulumlaʾ ak eiblum dara, dubnya bedyinya nera, dub nang elegolulum, Imik Neyung adyinya nera, Imik Neyung ak elegolulum,” hyok. 26Wera Yesus adya wenyaboka lebokaʾ nong adya, anyagan wekemek nang edya dara, Yesus ara ban malya unaʾ enyek okoka dib unuwokaʾ damok ara eibnenggumek. Sikda Yesus adya pe lelemok yub enyek dib lelemokaʾ anasa loka daboka yuba sanaʾ lomek.
Somoknaʾ Ak Ab Embengaʾ Suboka Bulumak Yuba
(Mat. 22:23-33; Mrk. 12:18-27)
27 #
Kis. 23:8
Nimi Saduki nang, wene nang Yesus ak yeilimek. (Saduki nang edya dara, somoklemak nim era eimik hnon embengaʾ subnenggunumak senelemek nang.) Sikda Yesus ak heiboka, 28#Ul. 25:5”Neklesilimnya o, nimi ben hnon somoganamlakanya, alja gel gera lo binimla dara, wera gel ara weibsanya bedya doboka, somogalenya benesa me beib lunuwanamla aboka, Musa bedya nunja yub ek momnya dobok. 29Wera, nimi seleb sekbadya nang nemek bok, yandonya bera gela domok bok, me beilinaʾ loboka somogok. 30Dara onoʾ anam beremnya bera alja somogoknya bedya gel gen dobok bok, beneba me beilinaʾ loboka somogok. 31Winilinya beneba neik so ok unubgiga bilimokaʾ ara, sidyaʾ seknya beneba neik so unu somogok. 32Dara onoʾ dolomek gel geneba eimik sidyaʾ dakoka somogok. 33Wera anasa, nimi sekbadya sik nang yilaʾ era, neik gel gek nidyaʾ domek bok anasa, soko sidyaʾ daknamla sum era, heknedya gel ge yokaʾ danamla do?” aboka heibek.
34Anasa Yesus adya sikenek lebsukaʾ ara, ”Nimi nidyaʾ wenyek ulumak nang era, sikda gela doldalamak bok, 35eimik dibaʾ ulumnemakaʾ amba embengaʾ suboka bukiyiwanasil nang, eimik yenewanamla salek ulumnemak nang era, gela mekaʾ dobnenggunumak. 36Sikja nong somoknaʾ ara orokaʾ anyek, lero anaso ulumnemak. Sikda somoknaʾ ak ab sam seleb suboka embengaʾ bukiyiwanasilaʾ anasa, sikda Imik Neyung alja yokaʾ mab ek ulumnemak. 37#Kel. 3:6Musa bedyaʾ anaba alda seleb nimi somoklemeija nim era, embengaʾ suboka bulumnemak aboka lebok. Alda seleb momnya dobokaʾ ara, gal donggalek sam uk bokaʾ delemokaʾ ak sam ab dara, Musa bedya Wenelesilnya bek ara, Abraham bedya Imik Neyung, Ishak bedya Imik Neyung, Yakub bedya Imik Neyung,’ aboka lebok. 38Wei, anasa Imik Neyung ara somoklemak nang Imik Neyung unggulumla! Nimi nidyaʾ ara, Imik Neyung ak dara, embengaʾ ulumakaʾ anasa, Imik Neyung ara embengaʾ ulumak nim edyaʾ Imik Neyung ek ulumla,” hyok.
39Hnon yuba neksin nang edya Yesus ak, ”Neklesilimnya o, anja leblamaʾ ara hyak dib nonga leblam,” hyek. 40Anasa sikda onoʾ hnon saaboka Yesus ak yokaʾ-yokaʾ heinaʾ ara lomek.
Nimi Blebsinaʾ Dubnya Bemba Yuba
(Mat. 22:41-46; Mrk. 12:35-37)
41Dara Yesus adya sikenek, ”Kristus, nimi blebsinaʾ dubnya bera, Daud nang yilaʾ ak ab lanawanamla amokaʾ ara hurub so ak lemok do? 42#Mzm. 110:1Wera onoʾ Daud bedyaʾ anaba Mazmur yub ek alja dara lebokja,
Wenelesilnya bedya nadyaʾ wenelenelnya bek lebokaʾ ara, anda nadyaʾ sirikek ok buklom,
43anya anjaʾ isaʾ nang era, nadya anak an anyek ok bo elegel dal yanamak,
wenyamok. 44Anasa Daud benyek babya blebsinaʾ dubnya bek ara, nadya Wenelenelemnya, amok bok dara, wera hekaʾ adya blebsinaʾ dubnya bera Daud nang yilaʾ senewanasibya do?” hyok.
Yahudi Neksin Nang Ek Keeboka Ulululum Hyok Yuba
(Mat. 23:1-36; Mrk. 12:38-40)
45Nimi nauba ara, Yesus adya wenyaro lelemok yuba anam kelemek salek, Yesus ara alja yuba doro diriga ban nang ek, 46#Luk. 11:43”Ugunda Yahudi yuba neksin nang ek ara, pe keeboka ulululum. Sikda waren-waren akleng enyek ongo-ongo bilimnekanya, deknaʾ gasaʾ pik ab salyaʾ seklemeibya enyek, yok nim edya giblesinok senelemak. Hnonda Yahudi nim edya yuba don ek gom, denaʾ senenggomaʾ youboka delemnaʾ ak ara, hyak laga perobaʾ nong ok bulunob senen ganya bolomak nang ek, anara ulumak. 47Sikda you gelewa ek sondaʾ leiyiboka, bonaʾ nidyaʾ ara doldolosak, anya sikda pika irigildanaʾ dibaʾ ara, Imik Neyung ak mololdalamak dara, hyak waren nongaʾ anyek mololdalamak! Ban nang era hyak nauba igina kweboka gweklemnemak!” hyok.
Nu markerat:
LUKAS 20: LAINLC
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
