KORINTUS 1 10
10
Oaid intau Israel mobaḻí tompoingat
1 #
Iḷn. 13:21-22, 14:22-29 Utatku mita, ibogonku moiko in diá mokoḻiong kon onu inta ain nobaḻí kon mogoguyang naton kon tungkuḷ in mosia dinumudui kon i Musa. Mosia komintan inoḻiungan in goḷom, bo nosaḷamat in iḷumoḷan kon Dagat Teberau. 2Sinbá mobaḻí dumodudui i Musa, dá mosia komintan in binaptis kon bonu in goḷom bo kon bonu in dagat tatua. 3#Iḷn. 16:35 Mosia komintan in nokaan kon kaanon inta ain sinantú i Tuhan kaanon monia, 4#Iḷn. 17:6; Pin. 20:11 bo nonginum kon tubig inta ain doman sinantú kon inumon monia. Mosia komintan in nonginum kon tubig nongkon buḷud batu inta umuran kotaki-takin monia; buḷud batu tatua in ki Kristus. 5#Pin. 14:29-30 Táe umpaka natua yo nobayongbí doman in kon sigad monia tua in kinodoí i Allah. Tuamai in nobarong kon sigad monia in minatoi kon padang gurun.
6 #
Pin. 11:4
Tua komintan in nobaḻíbí contoh kon i naton, mopotorop kon bá donaai in kita mogaid kon inta diá mopia ná inaidan monia. 7#Iḷn. 32:6 Bo bá diá doman in kita mosumba kon berhala, naonda bo inaidan in tongonumai intau kon sigad monia. Kon bonu in Buk Motusi in pinais nanaa, “Bo nomangkoidon in bangusa tatua nongaan bo nonginum poḷat nomanari sin mosumba kon berhala.” 8#Pin. 25:1-18 Kita in diábí motaau in mogaid kon diá mopia ná inta inaidan in tongonumai intau kon sigad monia, sahingga doyowa nopuḷú bo toḷu noribu in intau in minatoi kon sigad monia in singgai tatua. 9#Pin. 21:5-6 Kita in diábí motaau in monungkuḷ kon i Tuhan#10:9: Tuhan: tongonumai in naska dungkuḷmai: Kristus. ná inta inaidan in tongonumai intau kon sigad monia tungkuḷ intua, sahingga minatoi sinobak in uḷag inta mobisa in mosia. 10#Pin. 16:41-49 Kita in dikabí umuran mokarana; ná inta inaidan in tongonumai intau kon sigad monimu koḻipod, sahingga in iḻimod in Malaekat inta Momomatoi.
11Tua komintan ain noiantug kon i monia saḷaku contoh kon intau mita ibanea. Bo komintan tua in pinaisbí doman sin mobaḻí tompoingat kon i naton kon singgai tumi inta ain nodiug.
12Bo intau inta monganggap moropot in sia, musti mokopopia; dika bo moḷabú. 13Bayongan in totungkuḷ inta korasaan monimu tua in bagubí totungkuḷ inta biasamai korasaan in intau. Táe ki Allah in tantúbí mosatia kon dandi-Nea. Diábí pomayá-Nea mako in moiko in koantugan totungkuḷ inta moiḻiudon kon komampuan monimu. Kon dodai in koantugan in sobaan in moiko, Sia in umuranbí mobogoi in daḷan kon i monimu, sinbá umuran moropot in moiko bo mokotahang.
14Tuamai uḻe utatku mita inta kinotabiku, poyayú in gina monimu inta umuran moibog mosumba kon berhala. 15Akuoi in moguman kon i monimu naonda bo moguman kon intau mita inta mopandoi. Raidon onu in pinogumanku naa. 16#Mat. 26:26-28; Mrk. 14:22-24; Luk. 22:19-20 Kon dodai in nonginum kon anggur bo nosukur kon i Allah, tua mangaḻenea notobatú bidon i Kristus in kita kon bonu in kinopatoian-Nea? Bo kon dodai in nosilai kon roti in kita sin kaanon moyotakin, yo tua in mangaḻenea notobatúdon takin awak i Kristus in kita? 17Sin tongábí tobatú in roti, bo kita komintan ain nokaan kon roti tatua. Dá umpaka nobayong in kita, táe tongábí tongoawakan monag.
18 #
Im. 7:6
Tarukiraka in intau mita in Israel. Mosia inta ain nokaan kon kaanon inta ain pinosumba kon tampat pobobogoian kon sosumba, in intaubí mita inta ain notobatú in tampat tatua. 19Onu degá in mangaḻe in singogku naa? Berhala andeka kaanon inta pinosumba kon berhala, komintanbí diá in mangaḻenea. 20#Ul. 32:17 Onu in pinosumba kon meja pogogukatan kon sosumba inta inogoi kon berhala, deemanbí pinosumba kon i Allah, táe kon dimukudbí moraat. 21Moiko in diábí motaau in monginum kon palo in anggur pongonginuman i Tuhan, bo monginum doman kon palo pongonginuman in dimukud mita moraat. Natua doman, moiko in diábí motaau in mongaan moyotakin i Tuhan bo mongaan doman moyotakin in dimukud moraat. 22#Ul. 32:21 Ande degá mopoterengbí kon i Tuhan? Eta kita in moropo-ropot in ki Tuhan?
23 #
Kor.1. 6:12
Kain intau, “Kita in motaaubí mogaid kon onukadon in kino ibog naton.” Totuubí doman! Táe onu in aidan naton tua, diábí komintan baraguna. “Kita in motaaubí in mogaid kon onukadon in kinoibog naton” – táe onu in kinoibog naton tua, diábí komintan mokobiag kon i naton. 24Dikabí tongá morai kon kopontingan monimu tontaní, táe poraibí doman kon kopontingan intau ibanea.
25Moiko in motaaubí in mokaan kon onukabí in pinotaḷui kon pasar in ponoyá. Kumudungbí in motaḷui, dikabí morai kon yagi-yagi umpaka oyúon in mokobogat mita kon bonu in ginamu. 26#Mzm. 24:1 Sin kon bonu in Buk Motusi ain pinais, “Dunia bo tombonunea naa in komintanbí kapunyaan i Tuhan.”
27Aka moiko bo inoiní in intau inta diá mopirisaya kon i Yesus sin mongaan moyotakin monia, bo minayá in iko, yo kaanbí onu in inoḷud monia kon inimu. Kumudungbí in mongaan. Dikadon moḻibó mongo nouḻí kon onda in kaanon tatua, sinbá mopia in pongongaan monimu. 28Tongá aka oyúon in moguman kon i monimu nanaa, “Kaanon tanion ain bidon pinosumba kon dimukud moraat,” yo dikabí kaanon monimu intua sin aindon muna pinotaaunea, bo kaanon tatua in kinodoíbí in ginamu. 29Makusudku in diábí degá kon bonu in gina monimu intua, táe degá kon bonu in gina intau ibanea.
Sin degá oyúon in moḻibó nanaa, “Nongonu sin ginabí in intau ibanea in monantú kon ibogku? 30Aka tua komintan bo kinaankubí takin sukur kon i Allah, dá umpaka yo singogonpa doman monimu in akuoi sin nokaan kon kaanon tatua, apapa doman munadon nosukur kon i Allah in akuoi bo nokaan kon kaanon tatua?”
31Onukabí in aidan monimu – pinomayá kaanon ande inumon – yo aidaibí komintan takin mopoyaput in sukur kon i Allah. 32Kobiag mokopotompia bá diá tongá mokobaradosa kon bayongan in intau; pinomayá intau in Yahudi ande Yunani ande jamaat i Allah. 33Kobiagdon ná akuoi. Kon soaḷ yagi-yagi, ramujionku totok sinbá mokosanang kon bayongan intau. Bo tua in deemanbí tongá kopontinganku tontaní, táe kopontinganbí in bayongan intau sinbá mosaḷamat in mosia.
Nu markerat:
KORINTUS 1 10: INOMOG
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Alkitab Singog In Mongondow Masa In Tanaa © Indonesian Bible Society, 2016.