मत्ती 8

यीशुये रा कोढ़िये जो चंगा करना

(मरकुस 1:40-45; लूका 5:12-16)

1ताहली जे सै पहाड़ा ते थल्ले उतरया, तां इक बड्डी भीड़ तिसरे पिच्छे आईगी। 2तिस वगत इक कोढ़ी माहणुये आईने तिसजो प्रणाम कित्या कने बोल्या, भई “हे प्रभु, जे तुहें चाओ तां मिन्जो ठीक करी सक्कां।” 3यीशुये अपणा हात्थ अग्गे करीने तिसजो छुया कने बोल्या, “बिल्कुल हऊँ चाँह, तू ठीक हुईजो।” कने सै इकदम तिस कोढ़ा ते ठीक हुईग्या। 4यीशुये तिसने गलाया, “देख, इस बारे च किसी ने बी देखां बोलदा, पर जाईने अप्पूँजो याजका ले दास्स कने सै भेंट जे मूसे ठैहराईरी तिसाजो चढ़ा, ताकि सै लोक जाणी लो भई तू ठीक हुईगरा।”

इक सेनापतिये रा विश्वास

(लूका 7:1-10)

5फेरी ताहली जे सै कफरनहूम नगरा च आया तां इक रोमी सेनापतिये#8:5 सेनापतिये सौ सिपाहियां रे ऊपर अधिकारी तिसले आईने बिनती कित्ती, भई सै आईने मेरी मदद करो, 6“हे प्रभु, मेरा सेवक घरें बमार पैईरा, तिस्सो लकवा मारी गरा कने सै बड़िया पीड़ा चा।” 7फेरी यीशुये सेनापतिये ने गलाया, “हऊँ आईने तिस्सो ठीक करगा।” 8सेनापतिये जबाब दित्या, “नां प्रभु, नां हऊँ इस आदरा लायक#8:8 आदरा लायक तिने बोल्या हऊँ इक गैर यहूदी आ इस खातर आदरा लायक नींआ। निआं, भई तुहें मेरे घरें आओ, तुहें सिर्फ मुँआं ते बोल्ली देआ, कने मेरा दास्स ठीक हुई जाणा। 9हऊँ ये जाणाँ काँह्भई हऊँ बी किसी रे अधीन काम्म कराँ; कने मेरे अधीन सिपाई मेरे हुक्मा रा पालन कराँ ये, कने ताहली जे इक्की जो बोलां, ‘जा,’ तां सै ‘जां,’ कने दुज्जे जो बोलां भई ‘औ’ तां सै औआं; कने अपणे किसी दास्सा ने बोलूं भई ये कर, तां सै तिस्सो कराँ।”

10ये सुणीने यीशुये जो चम्भा हुया, कने सै जे तिसरे पिच्छे आई कराँ थे तिन्हांने बोल्या, “हऊँ तुहांजो सच्च बोलां, भई मुझे इस्राएल देश में इक बी येढ़ा माहणु नीं मिलया, सै जे गैर-यहूदी माहणुए साई माह पर भरोसा करां। 11कने हऊँ तुहांजो बोलां, भई मते सारे अन्यजातियां रे लोकां पूर्वा ते कने पश्चिमा ते आईने अब्राहम, इसहाक कने याकूब ने सौगी स्वर्गा रे राज्जा च खाणा खाणे बैठणा। 12पर राज री प्रजा यनि इस्राएली लोक धक्का देईने बाहर नरका च भेज्जी दित्ति जाणी : तित्थी तिन्हां अपणे दुखां रिया वजह ने रोणा कने पीड़ा ने दान्द किरड़ने।” 13फेरी यीशुये तिस सुबेदारा ने गलाया, “घरौ जा, तेढ़ा जे तेरा विश्वास आ, तियां इ तेरे खातर ओ।” कने तिसरा दास तिस इ वगत बमारिया ते ठीक हुईग्या।

कई रोगियां जो चंगा करना

(मरकुस 1:29-34; लूका 4:38-41)

14कने यीशुये पतरसा रे घरें आईने, पतरसा रिया सस्सा जो बौहत बुखारा रिया वजह ने बिस्तरे पर सुत्ती रिया जो देख्या। 15तिने तिसारा हात्थ अपणे हत्था ने छुया कने तिसारा बुखार उतरीग्या, कने सै उट्ठीकने यीशुये री सेवा टैहल करने लगी। 16ताहली जे सान्झ हुई तां सै तिसले मते सारे येढ़े लोकां जो ल्याये तिन्हां च जे बुरीआत्मां थिआं कने किछ बमार थे तिने तिन्हां आत्मां जो अपणे वचना ने बाहर कड्डित्या; कने सारे बीमाराँ जो ठीक कित्या। 17ये इस खातर हुया ताकि परमेशरे यशायाह भविष्यवक्ता रे जरिये जो बी किछ गलाया था सै पूरा ओ : “तिने अहां रियां कमजोरियां जो खुद भोग्या कने अहांरे रोगां रा बोझ चक्कया।”

यीशुये रा चेला बणने री चाह

(लूका 9:57-62)

18यीशुये ताहली जे अपणे चऊँ पासयां लोकां री भीड़ देक्खी, पर तिस्सो आराम करने री जरूरत थी, इस खातर तिने अपणयां चेलयां जो बोल्या भई “आओ अहें दरयावा रे उस पार चलिये।” 19कने तियां जे सै जाणे रे खातर त्यार हुईराँ थे तां इक यहूदी शास्त्री तिसले आया कने गलाया, “हे गुरू, मांह तुहांरा चेला बणने खातर तुहांरा अनुशरण करना।” 20यीशुये तिसने गलाया, “गिदड़ियां ले तिन्हांरी कुड कने अम्बरा रे पंछियां रे आलणे हुआं ये; पर माहणुये रे पुत्रा ले सौणे रे खातर बी अपणा घर नींआ।” 21इक्की होरी चेले तिसजो गलाया, “हे प्रभु, पैहले मिन्जो घरें जाणे दे। मेरे पिता रे मरने ते बाद मांह तिन्हांरा आखरी संस्कार करना कने फेरी हऊँ आईने तेरा चेला बणगा।” 22यीशुये तिसने बोल्या, “मेरा चेला बणने खातर मेरे पिछे औ, सै लोक जे आत्मिकता च मूईरयां साई ये तिन्हौं अपणयां लोकां रे मरने रा इन्तजार करने दे।”

यीशुये रा तूफाना जो शान्त करना

(मरकुस 4:35-41; लूका 8:22-25)

23फेरी यीशु इक्की किश्तिया पर जाईने बैट्ठया, तिसरे चेले बी तिस सौगी थे। 24कने देक्खा, नदिया च इक येढ़ा बड्डा तूफान आया भई किश्ती पाणिये रियां बौहत ऊच्ची छालियां ने डुबणे लगी; पर यीशु सुत्तीरा था। 25फेरी चेलयां नेड़े आईने तिस्सो जगाया कने गलाया, “हे प्रभु, अहांजो बचा! अहें डुबणे लगीरे।” 26यीशुये तिन्हांने गलाया, “अरे कमजोर बिश्वासिओ, तुहें इतणे डरीरे काँह ये?” फेरी तिने खड़ा हुईने तूफाना जो कने पाणिये जो डान्टया, कने चऊँ पासयां शान्ति हुईगी। 27ये देकखीने चेले हैरान थे, तिन्हें इक दूये ने बोल्या, “ये केढ़ा माहणु आ? आन्धी तूफान कने पाणी तक इसरी गल्ल मन्नां ये।”

दो माहणुआं रा बुरीआत्मां ते छुटकारा

(मरकुस 5:1-20; लूका 8:26-39)

28ताहली जे यीशु दरयावा रे उस पार, गदरेनियां प्रदेशा च पुज्जया, तां दो माहणु तिन्हां च जे बुरीआत्मा थिआं कब्राँ ते निकल़दे हुये तिस्सो मिले, सै दोन्नों इतणे खूँखार थे भई कोई बी तिस रस्ते ते जाई नीं सकदा था। 29सै दोन्नो अचानक यीशुये पर चिल्लान्दे हुए बोलणे लगे, “हे परमेशरा रे पुत्र, अहांते तुहांजो क्या काम्म आ? क्या तू अहांजो परमेशरा रे तैह कित्तिरे वगता ते पैहले सजा देईने तिसरी अवहेलना नीं करीरां?” 30तिन्हांते किछ दूरिया पर मते सारे सूराँ रा इक झुण्ड चरने लगीरा था। 31बुरीआत्में तिसने बिनती करदे हुये बोल्या, “जे तू अहांजो बाहर निकल़या इ करां ए, तां अहांजो इन्हां सूराँ रे झुण्डा च भेजी दे।” 32तिने तिन्हांजो बोल्या, “जावा!” कने सै माहणुये ते निकल़ीने सूराँ च बड़ीगियां कने सारा झुण्ड पहाड़िया परा ते दरयावा च पैईग्या, कने सारे सूर पाणिये च डुब्बीने मरीगे। 33कने सूराँ जो सम्भाल़णे औल़े सेवक नट्ठे, कने नगरा च जाईने ये सारियां गल्लां कने तिन्हांच जे बुरीआत्मां थिआं; तिन्हांरा सारा हाल सुणाया। 34कने नगरा रे सारे लोक यीशुये ने मिलणे जो निकल़ीने आईगे, कने तिस्सो देखीने विनती कित्ती, भई अहांरे इलाके ते बाहर निकल़ी जा।

Nu markerat:

मत्ती 8: KFSNT

Märk

Dela

Kopiera