Mbete Matiye 7
7
1Í kehr nzukri ɓa nzuk a sukiri, ɓa nzuk a suya-uri ya rɔkɔ kehrna-u ké i kehr nzukri ɓá el mbu̧h wuri ɓa nzuk suyari. 2Suya fe fe ké i kehr nzuk a ɓoruri keni-aw ra, suya-aw gaŋ mí ɓay si ziŋ wuri gel-kuŋ salɓay. Ɓay ké i kan tul nzuk a ɓoru le, ɓay ra ɓay el kan tul woiri. 3Ɓay fe mú-u ko suy ké na nun mbaŋ wo, mí sa̧w nun wo ké baw kpuh tik ri mú-u ko ya le ? 4Uwa, ani mú-u ɓah hi̧ nzuk a ɓoru ɓahri : “Ya̧h, mú hi̧ mi mí lu suy ké ɓu nun wo-aw” le ? Mí í ko, kpuh ké tih sa̧w nun wo, mu ko ya lo ? 5Nzuk-mu̧h ketina, mú ten kpuh ké tik sa̧w nun wo dara mú-u kó gel ɓa teh-u ɓay el lu suy ké nun mbaŋ wo ɓáy.
6Í mbi fe puki Ŋgerzah hi̧ gayri ya, í mbi zaw lari mbayri ɓu siɓa ké pol kɔsɔŋri#7.6 Ziɓri ɗi sa̧wnzukri ké dim záh a ɓoruri mí sa lah ɓay Ŋgerzah ya ɓa gayri ke kɔsɔŋri. ya rɔkɔ kú ndakla duŋa duŋa dale, ku él sɔɓ mun nuŋ wuri. 7Í vbi Ŋgerzah, ke ɓay lah wuri. Í taw ni, ke ɓay hi̧ í tu ni. Í vba̧ nzak vul ye ŋguŋ ŋguŋ, ke ɓay mgbur nzak vulu hi̧ wuri. 8Ɓayu ké nzuk a suŋ suŋ ké vbi Ŋgerzah le, nzuku ƴo ya̧-ya̧. Nzuk ké taw ni le, ke ƴo hi̧ nzuku tu ni. Nzuk ké vba̧ nzak vul ye le, ke ɓay mgbur nzak vulu hi̧ ni. 9Uwa, ké sakra woiri nzukri ra wa, gun vbi bah ye huru le, bah ye ɓay mbi kasaw hi̧ gun ye ra le wo ? 10Gun ye vbi ni nzuy le, ke ɓay mbi soy hi̧ gun ye le wo ? 11Mí kaŋaw ba, a woiri nzuk law a pipiri-uri, i tu hi̧ fe a suki hi̧ gun woiri ra wa, ɓay laɓ ani ɓáy mí bah woiri a ye ké nunmbam ba, ɓay hi̧ suki hi̧ nzukri ké ƴo vbi ni, ya le wo ? 12Kaŋaw ba, lawsuki a suŋ suŋ gbam ké i yih ɓay hi̧ nzuk a ɓoruri ɓá laɓ ziŋ wuri ra, a woiri kara í laɓ lawsuki-u ziŋ niri pi. Kandɔkaw mí ɓa bolkusol Ŋgerzah ké na ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri.
13Í mbi ful a ah ya-u ɓay fe le, mgboŋ a ah-u ra ah borovboŋ, fulu si ziŋ nzukri ɓa zina. Daɓa nzukri mí si keni sina. 14Ful a ah ya-u ra, ah ya gaŋ ba. Fulu-aw si ziŋ nzukri si ka̧h ɔkna, nzukri ŋgi̧ ya mí ziŋ fulu.
15Í ru̧ ke mun woiri ɓay tul gun nzak pihna Ŋgerzah a fohri. Ŋgerzah pih niri ya, mí ku laɓ mun eŋ sami, mí ku ɓa gaykoy ɓay su̧ wuri. 16I tú niri ɓay fe laɓna woyri kandɔk i tu kpuh ɓay lehna kpuh-u kaŋ. Nzuk ɓay hal nzu̧y ké tul ŋgatukru lo ? Ke ɓay hal vo̧ko#7.16 Sa̧w nzak ɓah ɓay raisin ké ɓa lehna kpuh viyȩh, mí viyȩh ti̧h ké kɔr karaŋri ya. Nah sɔɓ ke nzak karaŋ ɓa vo̧ko ɓay hi̧ karaŋri ɓá lah ɓa gah-u. ké tul ŋgatukru gun gay le wo ? 17Kpuh a suki le, leh lehna a suki, kpuh a suya-u, leh lehna a suya-u gaŋ ba. 18Kpuh a suki ta leh lehna a suya-u ya. Kpuh a suya-u ba, leh lehna a suki ya. 19Kpuh a suŋ suŋ gbam ké leh lehna a suki ya le, ku ɓay te ke sa̧wu ku̧ hɔrɔ. 20Mi ɓahri se, i ɓay tu niri ɓay fe laɓna woyri kandɔk i tu kpuh ɓay lehna kpuh-u kaŋ.
21Ta ɓa nzukri gbam kú-u ɗi mi, “ŋgernzuk, ŋgernzuk” mí ɓay rih ɓil lák mbay a nzuk nunmbam ya. Wara le nzuk a a̧y ké laɓ fe ké bah bi ké nunmbam yih ɓayu mí ɓay rih ɓilu. 22Daɓa nzukri ɓay ɓah hi̧ mi ké namu-aw kandɔkay : “ŋgernzuk, ŋgernzuk, nah ten ɓay nzak pihna Ŋgerzah hi̧ nzukri lah ke riŋ wo, nah ni̧h záhri ké tul nzukri ke riŋ wo, nah laɓ ŋgi̧na fe saŋri ke riŋ wo, kaŋ ya le ?”
23Wara mí-i ɓáh ketina-ay hi̧ niri ɓahri : “Bɔk mbew bi gel-tu wuri ya. Í tɔr wuri ke nzak bi ma sa̧, a woiri nzukri ké i poŋ ɓay Ŋgerzah.”
24Kaŋaw ba, nzuk a suŋ suŋ gbam ké lah ɓay bi, mí ke ƴo tulu le, nzuku ɓa nzuk a ru̧-u. Ke mboh vul ye ké gel ké kasaw na diŋu. 25Mbam to, mbih-u haw gi vba̧ bɔk vul ra gbɔh gbɔh. Kuna ba, ku bivbiɗ bivbiɗ, mí vulu haw ya ɓayu ké-e mboh vulu gel ké kasaw na diŋu. 26Nzuk a suŋ suŋ gbam ké lah ɓay bi, mí ke poŋ le, nzuku ɓa kɔk nzuk, ke mboh vul ye ké gel sikɔkre. 27Mbam to, mbih-u haw gi vba̧ bɔk vul ra gbɔh gbɔh. Kuna ba, ku bivbiɗ bivbiɗ, mí vulu dir wuruk. Dirna-u ti̧h ɓa baw ɓeɓna. »
28Kandɔkaw mí Zezu ɔh fe firma ké-e firma nzukri bale, gosoɓay zi nzukri ɓay tul fe firma ye. 29Fe firma ye na kandɔk fe firma nzuk-sɔk mbete bolkusol Ŋgerzahri ya. Ku ƴo mbi ɓay Ŋgerzah firma nzukri keni. A ye ba, ke ɓah ɓayuri kandɔk a ye mí ke ɓa mbay bolkusolu.
Nu markerat:
Mbete Matiye 7: SIAFNK
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Wycliffe Bible Translators, Inc. All rights reserved.
