Mbete Matiye 14
14
1Ke sewu-aw, riŋ Zezu ya̧ gelri hi̧ ɓayu toh suk mbay Eroɗ dale, 2ke ɓah hi̧ nzuk yeri ɓahri : « Nzuku-aw ɓa Za̧h batisi mí ti̧h ke puh záh. Sa̧wu mí ke ƴo ke ŋgerna-laɓ fe saŋri-aw. »
3-4Fe ké hi̧ Eroɗ ɓah ɓay tul Za̧h mí na-ay : Eroɗ ya̧ Herodiya wu̧y yi̧n ye Filiɓ ké ƴo ke nun ɓáy, mí Za̧h toŋ ɓah hi̧ ni ɓahri : « Bolkusol Ŋgerzah hah yá̧ wu̧y yi̧n wo ké hu ya ɓáy. »
Sa̧wu mí Eroɗ mgba Za̧h ŋga̧h ni si mbih ɓil vul mgbal. 5Eroɗ yih ɓay i Za̧h, mí ke laɓ hȩkme nzukri ɓay fe le, ku tu Za̧h ɓa gun nzak pihna Ŋgerzah.
6Nam a hani-u mbew dale Eroɗ laɓ yi̧hna nam mbuŋna ye. Gun Herodiya ké ɓa tikla gi nda nday ké pol gahruri, mí ndayu ndɔh nun Eroɗ. 7Bale ke hah mun ye gbaɗ gbaɗ, ke nzak ye ke ɓahri se, fe a suŋ suŋ ké tikla-aw vbi ni le, ke ɓay laɓ hi̧ ni. 8Tikla ra ya̧ ɓay ké mah ye ɓaŋ ndoh law ye, mí ke el keni si ɓah hi̧ Eroɗ : « Aŋay gaŋ í hi̧ mi tul Za̧h batisi kan ɓil pala. »
9Law Eroɗ rih mba. Ɓay tul fe hahna ké-e hah ké pol gahruri, mí ke pih bolnzak hi̧ kú kuŋ tul Za̧h ra gi hi̧ ni. 10Gun nzak pihna ye si vul mgbal mí hi̧ ku kuŋ tul Za̧h batisi. 11Ku ɓaŋ tul Za̧h kan pala gi keni hi̧ tikla ra. A ye ba, ke ya̧ si hi̧ mah ye. 12Nzuk-dih fal Za̧hri si mbi hulu. Ku gɔr, mí ku el si sɔk ɓayu hi̧ Zezu lah.
13Ɓay ké Eroɗ ɓah ra ɓá toh suk Zezu#14.13 Sa̧w nzak gerek ɓahri, Zezu lah ɓay. Nzuk goso fe tuna mbete Ŋgerzah a haniri ɓahri, Zezu lah ɓay hul Za̧h batisi. Nzuk a haniri ba, ɓahri, Zezu lah kerɓay Eroɗ ké ɓil gel ki̧na-aw 2. Sa̧wu mí nah mbi kerɓay nzuk goso fe tunari ké ɓahri, Zezu lah ɓay ɓahna Eroɗ. Í mgba Mbete Luk 9.10 ke Mbete Marki 6.6-30 tuh keni gel ki̧na-ay. bale, ke rih ɓil kumbon, mí ku tɔr si gel a ɓoru ké nzukri ta ri ya. Daɓa nzukri lah ɓay tɔrna ye, mí ku dih doro ye. Ku ur ke bɔk ke puhri ɓoɗ ɓoɗ si ka̧h gelu pol. 14Ti̧hna ye ke kumbon, ke ko daɓa nzukri ké ŋgi̧ mbamba-aw. Ke ko niri baseh, mí ke gah nzuk sena woyri.
15Seh na nzȩh bale nzuk-dih fal yeri loh ma ta̧w ye. Ku ɓahri : « Gelay ɓa ɓil suy. Seh ɓay riŋna. Mú sel daɓa nzukri-ay ɓá tɔr si puhri. Kú yeh fe su̧na, kú su̧. »
16Dale Zezu ɓah hi̧ niri ɓahri : « Uwa, ku tɔ́r ya. A woiri gaŋ, í hi̧ niri fe su̧na, kú su̧. »
17Mí ku ɓahri : « Nah ta ke fe su̧na ya. Sa ɓa peŋ ndiɓi ke nzuy seɗe mí na-ay. »
18Mí ke el ɓahri : « Í gi keni hi̧ mi. »
19Ke hi̧ daɓa nzukri ra mgba hani kaɓ siɓa zuɓ zuɓ. Ke ya̧ peŋ ké ndiɓi ke nzuy ké seɗe ra. Ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra hi̧ nzuk-dih fal yeri wal hi̧ nzukri su̧. 20Nzukri riw su̧ fe mbah ɓil woyri poŋ tɔru. Ku mbu̧h tɔr fe su̧na ra mbah tɔlɔ ɓa boh falu seɗe. 21Nzukri ké su̧ fe ra, ku ki̧ ɓa wo̧rori mí laɓ sɔɗ sɔɗ boh gel ndiɓi (5.000) dan ki̧ wu̧yri ke gunri.
22Ku mbu̧h tɔr fe su̧na dale, Zezu hi̧ bolnzak hi̧ nzuk-dih fal yeri, kú rih ɓil kumbon, kú tɔr pol ma kala mbih sa̧. A ye ba, ke toŋ fal ƴo vbar nzukri ɓá tɔr. 23Bale ke hil si tul kasaw ƴo ɓah ɓay ziŋ Ŋgerzah. Seh riŋ ni gelaw, ke toŋ ke hȩk ye.
24Nzuk-dih fal yeri ba, si ke kumbon ɓa ɗih-u ka̧h haŋsekle mahmbih. Ɓay kú ka̧h kala mbih sa̧ se-se ɓay baw kuna ké ku. Kuna nzɔh nun woyri mí fa̧h mbih vba̧ kumbon gbɔksɔ gbɔksɔ hah niri sina. 25Tipele toŋ ɗih ya, mí Zezu si sina tul mbih ma ta̧w woyri. 26Nzuk-dih fal yeri ɓá ko ni ké-e si sina tul mbih dale, tul woyri fa̧h zikiki zikiki. Ku ɓahri se, záh mbih munu. Ku vba̧ nzak kululu kululu ke hȩkme dale, 27Zezu ɓah hi̧ niri ɓahri : « Í su̧h law. A bi munu. Í laɓ hȩkme ya. »
28Piyer ba, ɓahri : « Ŋgernzuk, ɓa a wo gaŋ le, mú hi̧ mi, mí si tul mbih, mí ka̧h ta̧w wo. »
29Bale ke ɓahri : « Mú gi. »
Mí Piyer ɗer ke ɓil kumbon. Ke si sina tul mbih ma ta̧w Zezu. 30Piyer ɓá ko kuna ké ku tul mbih le, hȩkme laɓ ni, mí ke ƴo riŋ mbih. Ke el vba̧ nzak ɓeleŋ : « Ŋgernzuk. Mú ya̧ mi. »
31Ke gah-u mí Zezu ndar ndɔk mgba ni. Ke el ɓah hi̧ Piyer : « Ani mí law wo kehr seɗe le ? Law wo yo-yok tul bi. »
32Ku hil kaɓ ɓil kumbon, mí kuna tuk. 33Bale nzukri ké kaɓ ɓil kumbonaw ra huk pol ye ɓahri : « Ketina, mu ɓa gun Ŋgerzah gaŋ. »
34Ku ka̧h kala mbih ké tusiɓa Genesareɗ. 35Nzuk Genesareɗri ɓá ko ni ɓa a ye Zezu bale, ku pih nzak pihna si puhri gbam ké ɗoŋ niri. Mí nzukri fa̧h sena woyri gbam gim keni ma ta̧w ye. 36A ge ge le ɗi ni ɓay ké hi̧ nzuk sena ɓá za nzak gar ye. Nzuk sena a suŋ suŋ ké za nzak gar ye le, ti̧h ke ndɔk hul.
Nu markerat:
Mbete Matiye 14: SIAFNK
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Wycliffe Bible Translators, Inc. All rights reserved.
