Juɛl a pwɔdɛn tɛ Mak 9
9
1YECU gɔkjɛn eken ti: Ya gɔkjɛ a warɛ ɣɛke ti, mingɛ ballɛ wɛni agdɛ gɔrtɛ lien bawɛ, dalɛ eken gɔrcɛ Kɛn Juɔŋ a Tolɛn bɛyɛn nɛ tɛyɛn.
2Ɔci tɛ ninkɛ badɛ a intu wilɛn a ciɛlɔ Peter ɔci Jakob ɔci Jɔn enyɛ Yecu, atɛn pom a tolɛn ti pokɛn: ɔci warɛ Yecu ɣaŋɛ warɛ parɛ: 3buruŋ Eke aŋɛ gal a gal, twumɛ a twumɛ; wakɛ bɔcɛn tɛ cabun ban warɛda bwɔnɛ buruŋ Eke nɛ tolɛn. 4Ɔci Ilaja yakɛn Mojet bɛnɛ, yowɛrcɛ ma: eken jɛyɛn Yecu ti. 5Ɔci Peter gɔkjɛ Yecu ti: Rabbi, ɔn balgɔn tɛ wɛni a pwɔcɛn: dalɛ ɔn noŋjɔn duŋkɛ a dorgɔ; tɛ I a ciɛlɔ, tɛ Mojet a ciɛlɔ, tɛ Ilaja a ciɛlɔ. 6Juɛl akɛ gɔktɛn nhijɛn eke bɛ; eken bwɔyɛ nɛ peny. 7Ɔci puɔlɛ timɛn eken: ɔci pwɔnu bɛnɛ ta puɔlɛ ji, gɔkjɛn: Nɛnɛ a Kacɛ Ya, Ya anɛ Eke nɛ tolɛn: ɣɛke tiŋdɛ Minɛ. 8Ɔci aca nɛntɛ nɛ peny, ma gɔrcɛn non, minɛ ballɛ a ciɛlɔ bɛ, Yecu parɛ ballɛ tɛ eken.
9Tɛ eken ballɛ atɛn tɛ wun kacɛn inyu pom ti, Yecu gɔkjɛn aŋkɛ eken na mitkɛ minɛ a ciɛlɔ bɛ tɛ wakɛ gwɔlɛn, dalɛ Minɛ Tɔl Maban parɛ jɔŋdɛ mokɛ ta wakɛ tunɛ. 10Ɔci juɛl tiicɛ ma, tocɛn a tatɛn pokɛn tɛ juɛl jɔŋɛ mokɛ ta wakɛ tunɛ akɛ naŋdɛ a ɔki. 11Ɔci eken tocɛn Yecu ti, gɔkjɛn: Makɛ kijɛ wɛragɛ gɔkjɛn Ilaja aŋkɛ bɛdɛn tɛ nyamɔ, yogɛ? 12Ɔci Yecu gɔkjɛn: A warɛ, Ilaja aŋkɛ bɛdɛ nyamɔ, ɔci wakɛ yuɔŋɛ wakɛnda; ɔci juɛl kienɛ dokɛ tha Tɔl Maban akɛ yanɛ tha wakɛ coŋɛn ɔci dwɔnnɛn ɔntɔ? 13Dalɛ Ya gɔkjɛ ɣɛke ti, Ilaja bɛnɛ dokɛ, ɔci ma noŋɛn eke ti tɛ juɛl yumgɛn eken, ba juɛl kienɛ tha eke.
14Ɔci tɛ eken benɛn makɛ botɛn ti, eken gɔrcɛn ma ballɛ eken ti a coŋɛn a coŋɛn, ɔci ma kijɛ wɛragɛ ballɛ tocɛn eken ti tɛ jig. 15Aca nɛntɛ makɛ gɔrcɛn Yecu wakɛnda a coŋɛn, ma punɛn nɛ tolɛn, ɔci yiŋɛn Eke ti, nyipɛn Eke. 16Yecu tocɛn eken ti: Ɣɛke tocɛ ma tɛ aginɛ? 17Ɔci minɛ a ciɛlɔ gɔkjɛn Eke ti: Ciagɔn, ya ɛcen kacɛ ya I ti, kacɛ a wɔn, kacɛ mwuŋɛn juɔŋ a aaman; 18ɔci tɛ non eke enyɛ, eke jɛmɛn inyu: ɔci eke comɛn toka ti, ɔci nhɛyɛ lɛmɛ, ɔci noŋɛ tuwɛ: ɔci ya gɔkjɛn makɛ botɛn I ti, aŋkɛ minɛ yɛptɛn eken ɔntɔ; ɔci ma kokɛn ti. 19Ɔci Yecu gɔkjɛn eken ti: A A, ɣɛke a kegen jithɛ bawɛ, Ya ciyɛ ɣɛke ti ɣoŋkɛ aŋɛ yitɛn? Ya yadɛn tɛ ɣɛke ɣoŋkɛ agdɛ aŋɛ yitɛn? Minɛ oodɛ Yɛ ti. 20Ma ɛcɛn minɛ Yecu ti: ɔci tɛ minɛ gɔrcɛn Eke, nɛ peny minɛ jɛbdɛ juɔŋ, pot pot bɛ; ɔci minɛ dɛmɛn tɛra ji, ɔci toka camɛn nɛ tolɛn. 21Eke tocɛn wegen ti: Minɛ noŋɛ ɔŋ tɛ tuwɛ? Wegen gɔkjɛ: Aca bɛ, tɛ eke a kacɛ diɛren. 22Kacɛ dɛmdɛ manyɛ ti, ɔci dɛmdɛ piatɛn, aŋkɛ nhugdɛ juɔŋ: dalɛ kan I yakɛn ti naŋkɛ minɛ, da yum I pɔkɛ ɔn ti, ɔci yuucɛ ɔn. 23Ɔci Yecu gɔkjɛn minɛ ti: Kan i yakɛn ti; minɛ jithɛ Yɛ ti ɣorkɛn ti naŋtɛ wakɛ wakɛnda. 24Aca nɛntɛ kacɛ wegen wiagɛ, ɔci gɔkjɛn: Ya jithɛ; magdɛ ya, jithɛ bawɛ yɛ ti. 25Ɔci tɛ Yecu gɔrcɛn makɛ coŋɛn yiŋɛn amam, Yecu ɣitɛ juɔŋ a yayɛn ti, ɔci gɔkjɛn: I juɔŋ a aaman, ɔci i a miŋɛ, Ya gɔkjɛ i ti, kacɛ burɛ, na kacɛ minɛ mokɛ bɛ. 26Ɔci eke yaadɛn, minɛ jɛmɛn, ɔci kacɛn minɛ burɛ: kacɛ ballɛ ba minɛ tunɛ; aŋkɛ ma gɔkjɛ: Eke tunɛ dokɛ. 27Ɔci Yecu muŋɛ eke tɛ biŋɛ, minɛ lulɛ nyalɔ; ɔci eke jɔŋɛ dokɛ. 28Ɔci tɛ Yecu kacɛn ɣora, makɛ botɛn tocɛn Eke ti parɛ, gɔkjɛn: Ɔn kokɔn ti tɛ minɛ yɛptɔn ɔntɔ, ɣogɛ? 29Yecu gɔkjɛ eken ti: Wakɛ ba nɛnɛ bɛyɛ burɛ tɛ aginɛ parɛ bɛ, bɛyɛ burɛ tɛ nyiwɛn Juɔŋ a Tolɛn ti nɛ tolɛn.
30Ma atɛn ta ban a nɛnɛ, gutɛ Galili; ɔci Yecu yuokɛn tɛ minɛ a ciɛlɔ yowɛrtɛn Eke. 31Aŋkɛ Eke lotɛ makɛ botɛn, ɔci gɔkjɛn eken ti: Minɛ Tɔl Maban mwugdɛ makɛ maban, ɔci nhugdɛ ma; ɔci tɛ Eke nhuŋɛ dokɛ, ninkɛ badɛ a dorgɔ Eke jɔŋdɛ nyalɔ mokɛ. 32Ma tiŋɛn juɛl a nɛnɛ bɛ, ɔci bwɔyɛ tɛ tatɛ Eke ti.
33Eken bɛnɛ tɛ Kapernaum: ɔci tɛ Eke cocɛn ɣora Yecu tocɛ ma ti: Tɛ pɔy yum ɣɛke ballɛ pukɛ juɛl a ɔki? 34Ɔci ma ciyɛ liedɛ: tɛ pɔy yum eken weyɛ pokɛn, aŋkɛ minɛ agdɛ tolɛn eken ti. 35Ɔci Eke cocɛn inyu, ɔci borcɛn makɛ inyakɛn witkɛn ayo; ɔci gɔkjɛn eken ti: Minɛ bwɔgɛ jɔcɛ nyamɔ, dalɛ minɛ botɛ ma ŋwoyɛ ti, ɔci noŋɛ kɛngɔn ma ti. 36Ɔci Yecu muŋɛ kacɛ tɔlɛ, ɔci dwɔnnɛn ma ti; ɔci nyaŋdɛ tɛ biŋkɛ, Yecu gɔkjɛn: 37Minɛ mugdɛ kacɛ tɔlɛ ba nɛnɛ tɛ yintɛ Ya, mugdɛ Ya: ɔci minɛ mugdɛ Ya, akɛ mugdɛ Ya bɛ, mugdɛ minɛ cwonyɛ Ya.
38Jɔn gɔkjɛn Yecu ti: We ɔn, ɔn gɔrnɔn minɛ yipɛ jɔkɛn tɔlgɛn ɔntɔ tɛ yintɛ I; ɔci ɔn yuokɔn tɛ eke, eke botɛn ikin ti bɛ. 39Yecu gɔkjɛn: Na yuokɛn tɛ minɛ bɛ; minɛ noŋɛ wakɛ tɛyɛn tɛ yintɛ Ya, yakɛn ti gɔkɛ juɛl a yayɛn ta Ya bawɛ. 40Minɛ yuokɛn tɛ ɔn bɛ, eke ballɛ tɛ ɔn. 41Ɣɛke ballɛ Kitho ti nhijɛn minɛ, ɔci minɛ tiptɛ ɣɛke piak a matɛn, wakɛ ɣonnɛn a ɣongɛn Juɔŋ a Tolɛn badɛ minɛ ti bɛ. 42Ɔci minɛ noŋdɛ akɛ kegen tɔlgɛn dɛmɛn (kegen a jithɛ Yɛ ti), dalɛ pom a tolɛn wiɛnɛ eke dwɔŋɛ ti a pwɔcɛn, aŋkɛ eke yɛmnɛ thul ji. 43Kan i biŋɛ noŋɛ aginɛ akɛ i pɔɔdɛ, taldɛ ɔntɔ parɛ. Kan i mugdɛ ɣodɛ biŋɛ bawɛ a pwɔcɛn; kan biŋkɛ ballɛ yakɛn ɔci i daktɛn, uljɛn non a many, yaddɛn macɛ a pwɔdɛ bɛ. 45Ɔci kan kiu i naŋdɛ akɛ i pɔɔdɛ, taldɛ ɔntɔ; kan i mugdɛ ɣodɛ aŋɛ ŋwɔlɛ a pwɔcɛn. 46Tɛ uljɛn maeɛ kiegɛ ballɛ yakɛn a pwɔcɛn bɛ. 47Kan waŋ i naŋdɛ akɛ i pɔɔdɛ, dalɛ waŋ dodɛ burɛ; kan i koyɛn. Kɛn Juɔŋ a Tolɛn ti tɛ waŋ a ciɛlɔ yayɛ bɛ. 48Tɛ macɛ liu badɛ bɛ, ɔci many badɛ bɛ. 49Dalɛ ma naŋdɛ tɛ many ba yoŋ naŋɛn tɛ enya. 50Enya a pwɔn a pwɔn: ɔci kan enya a dunkɛ, wakɛ naŋɛ a pwɔdɛ a ɔki? Enya dwɔnnɛ yumgɛn ti, ɔci cocɛn tɛ muune wakɛnda.
Nu markerat:
Juɛl a pwɔdɛn tɛ Mak 9: MFZ1947
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
First published by British and Foreign Bible Society in 1947.
