GENESIS 7
7
Sinchi parawan castigomanta
1Chaymantam Noeyta Tayta Dios nirqa:
—Qamqa wasikipi lliw kaqkunapiwanyá yaykuy buqueman, runakunapa qayllanpim qamllata qawayki allin ruraqta. 2Ofrecewanaykipaq hina llapan animalkunamantam yaykuchinki qanchis pares orqontin-chinantin animalkunata. Ñoqaman mana ofrecena animalkunamantañataqmi yaykuchinki huk paresta orqontin-chinantinta. 3Alton pawaqkunamantapas orqontin-chinantintam yaykuchinki qanchis parestakama chaynapi kawsaspanku kay pachapi miranankupaq. 4Qanchis punchawmantam parachimusaq kay pachapa hawanman tawa chunka punchaw tawa chunka tutan, llapallan kawsaqkuna rurasqaytam puchukachisaq —nispa.
5Chaymi Tayta Diospa tukuy kamachisqanta hina Noey rurarqa.
6Kay pachaman sinchi para chayamuptinmi Noey karqa soqta pachak watayoq. 7Chay sinchi para chayaykamuptinmi Noey warmintin buqueman yaykurqa chaynataq churinkunapas warmintinkama. 8Tayta Diosman ofrecenapaq hina animalkunam Noeypa kasqan buqueman yaykurqa, yaykurqataqmi mana ofrecenapaq hina animalkunapas, alton pawaqkunapas chaynataq allpapi qasqonpa puriqkunapas, 9orqontin-chinantinmi yaykurqa pares-pareskama Noeyman Diospa kamachisqanpi hina.
10Chaymi qanchis punchawmanta sinchi para kay pachaman chayamurqa. 11Noey soqta pachak watayoq kachkaptinmi iskay kaq killapi, chunka qanchisniyoq punchawpipuni lamar qochapa ukunmanta llapallan yakukuna toqyaramurqa, taqtakaykamurqataqmi cielokunapi llapa yakukunapas. 12Pararamurqamá kay pachapa hawanman tawa chunka punchaw tawa chunka tutan. 13Chay punchawpipunim Noey warmintin buqueman yaykurqa, yaykurqataqmi churin Sempas, Campas hinaspa Jafetpas warmintinkama. 14Paykunawan kuskamá yaykurqa castapura purunpi animalkunapas, uywa animalkunapas, allpapi qasqonpa puriqkunapas, alton pawaqkunapas hinaspa tukuy raprayoqkunapas. 15Llapallan kawsaq animalkunam paresnintinkama yaykurqaku Noeypa kasqan buqueman. 16Chay yaykuqkunam karqa orqontin-chinantin tukuy rikchaq animalkuna. Diospa kamachisqanman hinam yaykurqaku, Noey yaykuruptinñataqmi Tayta Dios wichqarurqa punkuta.
17Chaymi tawa chunka punchaw kay pachaman sinchi para chayamurqa, yakukuna miraruspan buquetapas wampurachisqanraykum pampamanta hoqarikururqa. 18Yakukuna aswan-aswan kay pachaman huntaruptinmi buquepas yakukunapa hawanpi muyurqa. 19Yakukunam kay pachaman huntarurqa llumpa-llumpayta kay pachapi kaq alto orqokunatapas tapaykunankama. 20Orqokunata taparuspanpas qanchis metro mas altotaraqmi yakukunaqa hoqarikururqa. 21Chaymi kay pachapi tukuy rikchaq qasqonpa puriq animalkuna wañururqa, wañurqataqmi alton pawaq animalkunapas, uywa animalkunapas, purunpi kaq animalkunapas, llapallan uruchakunapas chaynataq lliw runakunapas. 22Samatyaspa kawsaq allpapi llapallan kaqkunapas wañururqam. 23Chaynapim kay pachapi llapallan kawsaqkuna puchukarurqa. Runakunamanta qallaykuspam puchukarachirqa uywa animalkunatapas, qasqonpa puriqkunatapas chaynataq alton pawaqkunatapas. Hinaptinmi buquepiqa Noeyllaña quedarurqa paywan kaqkunapiwan. 24Yakum qocharayakurqa kay pachapi pachak pichqa chunkan punchaw.
Nu markerat:
GENESIS 7: QUEAYA87
Märk
Dela
Kopiera
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fsv.png&w=128&q=75)
Vill du ha dina höjdpunkter sparade på alla dina enheter? Registrera dig eller logga in