Лука 19

ЯПШӀЫКӀУБГЪОНЭРЭШЪХЬ

Исусрэ Закхейрэ

1Ащ нэужым Исус къалэу Ерихон дэхьагъэу пхырыкӀыщтыгъ. 2Закхей ыцӀэу лӀы горэ ащ дэсыгъ. Ар хьакъулахь ахъщэр хэзыххэрэм япащэхэм ащыщыгъ, цӀыф баигъ. 3Исус хэтми зыщыщыр зэригъэлъэгъумэ шӀоигъуагъ, ары шъхьакӀэ ежь лъагэпти, цӀыф купышхом хэтэу зи ылъэгъун ылъэкӀыщтыгъэп. 4Арыти, цӀыфхэм апэ ишъи, ынджыр чъыг горэм дэпшыягъ, Исус ылъэгъуным пае, сыда пӀомэ, Исус а гъогумкӀэ блэкӀын фэягъ.

5Исус а чӀыпӀэм зынэсым, дэплъыий, Закхей риӀуагъ: – Закхей, псынкӀэу къех, непэ уадэжь себлэгъэн фае.

6Закхей псынкӀэу къехыжьи, игуапэу иунэ Исус ригъэблэгъагъ. 7ЦӀыф пстэуми ар залъэгъум, агу емыӀоу аӀуагъ: – ПсэкӀод зышӀэрэм дэжь хьакӀэу ихьагъ.

8Закхей къэтэджи, Зиусхьан Исус къыриӀуагъ: – Моу къэдаӀолъ, Зиусхьан! Симылъку ызыныкъо тхьамыкӀэхэм ястыщт. Ӏоф горэмкӀэ цӀыф горэ згъэпцӀагъэмэ, фэдиплӀыкӀэ фэспщыныжьыщт.

9– ЦӀыфхэр мыкӀодхэу къэзгъэнэжьырэр непэ мы унагъом дэжь къэкӀуагъ, – риӀуагъ Исус Закхей, – сыда пӀомэ, мы лӀыри Ибрахьимэ къытекӀыгъэ цӀыфхэм ащыщ. 10Сыда пӀомэ, ЦӀыф Лъэпкъым ы Къо къызфэкӀуагъэр цӀыф кӀодыгъэхэм алъыхъунышъ, мыкӀодхэу къыгъэнэжьынхэр ары.

Минэ зыцӀэ ахъщэхэм яхьылӀэгъэ гъэсэпэтхыдэр

(Маттэ 25:14-30)

11Исус къыӀорэ гущыӀэхэм цӀыфхэр ядэӀухэ зэхъум, мы гъэсэпэтхыдэр къыпигъэхъуагъ; сыда пӀомэ, Исус Ерусалим игъунэгъугъ, Тхьэм и Тетыгъошхо ардэдэм къэлъэгъонэуи цӀыфхэр гугъэщтыгъэх. 12Аущтэу зэхъум, Исус къыӀуагъ: – Пщы горэ хэгъэгу чыжьэ горэм кӀон фэягъ, ежь ихэгъэгу пае пачъыхьэ заригъэшӀынышъ, етӀанэ къыгъэзэжьыным пае. 13ДэкӀыным ыпэкӀэ, иунэӀутхэм ащыщ нэбгырипшӀмэ къяджи, минэ#19:13 минэ – дышъэ ахъщэу лэжьакӀом мэзищ лэжьапкӀэу ратыщтыгъэр ары. зырыз арити, ариӀуагъ: «Къэсэгъэзэжьыфэ, мы ахъщэр жъугъэзекӀо, шъущ, шъущаф». 14Ау мы пщым ихэгъэгу щыщ цӀыфхэм ежь ауджэгъущтыгъэти, «Мы лӀыр пачъыхьэ къытфэхъунэу тыфаеп» арагъэӀонэу лӀыкӀохэр пщым ыужкӀэ а хэгъэгум агъэкӀуагъэх.

15Ащ пае къэмынэу а пщыр пачъыхьэу агъэнэфагъ. ЕтӀанэ пщым къызегъэзэжьым, унэӀутхэу ахъщэхэр зэритыгъагъэхэм къяджагъ. Ахэмэ ащыщэу хэти ищэн-щэфэн ӀофкӀэ ыгъэхъагъэхэр зэригъашӀэмэ шӀоигъуагъ. 16Апэрэ унэӀутыр къакӀуи, къыӀуагъ: «Тхьэматэ, къысэптыгъэ минэ ахъщэмкӀэ фэдипшӀ къэзгъэхъагъ». 17Тхьэматэм ащ риӀуагъ: «Дэгъоу пшӀагъэ, сиунэӀут дэгъу! Ӏоф макӀэхэмкӀэ сызщыгугъын лӀэу узэрэпсэугъэм пае, къэлипшӀ къыпӀэкӀэслъхьащт».

18ЯтӀонэрэ унэӀутыр къакӀуи, къыӀуагъ: «Тхьэматэ, къысэптыгъэ минэ ахъщэмкӀэ фэдитф къэзгъэхъагъ». 19Тхьэматэм ащ риӀуагъ: «Къэлитф о къыпӀэкӀэслъхьащт».

20Ящэнэрэ унэӀутри къакӀуи, къыӀуагъ: «Тхьэматэ, мары о уиминэ ахъщэ. Хъэдэным кӀоцӀысщыхьи, щызгъэлъыгъ. 21УзэрэлӀ пхъашэм пае, сыкъыпщыщынагъ. УмыгъэтӀылъыгъэр къэоштэжьы, чӀыгум о хэмыпхъагъэри охыжьы». 22Итхьэматэ ащ риӀуагъ: «О уигущыӀэхэмкӀэ узгъэмысэщт, о уунэӀут бзадж! О пшӀэщтыгъ сэ сызэрэлӀ пхъашэри, сымыгъэтӀылъыгъэр къызэрэсштэжьырэри, чӀыгум хэсымыпхъагъэр зэрэсхыжьырэри. 23Сиахъщэ ахъщэхъожьхэм сыда о зыкӀямытыгъэр? Ащыгъум къызысэгъэзэжьым, сиахъщэ хэхъуагъэу къычӀэсхыжьыщтыгъ». 24ЕтӀанэ тхьэматэм къыбгъодэтхэм ариӀуагъ: «Мы лӀым минэ ахъщэр Ӏышъухи, минэ ахъщипшӀ зиӀэм ешъут». 25Ахэмэ раӀуагъ: «Тхьэматэ, минэ ахъщипшӀ ащ иӀэба?»

26Тхьэматэм къыӀожьыгъ: «Сэ шъосэӀо, Тхьэм хэт щыщми зиӀэм нахьыбэ къыритыщт, ау Тхьэм зи зимыӀэм иӀэ тӀэкӀури Ӏихыжьыщт. 27Ау джы сэ сипыйхэу пачъыхьэ сафэхъунэу фэмыягъэхэр къашъущэхи, сапашъхьэ щышъуукӀых».

Щытхъушхо иӀэу, Исус Ерусалим зэрэдэхьагъэр

(Маттэ 21:1-11; Марк 11:1-11; Иуан 12:12-19)

28Исус а гущыӀэхэр къызеӀохэм, ЕрусалимкӀэ дэкӀоенэу игъогу техьажьыгъ. 29Елеон Ӏуашъхьэм Ӏус къуаджэхэу Бет-Фагиерэ Бет-Аниерэ зыцӀэхэм Исус ягъунэгъу зэхъум, игъогу рыкӀохэрэм ащыщхэу нэбгыритӀу ыпэ ыгъэкӀуагъэх, 30моущтэу ариӀозэ: – ШъупэчӀынэтӀэ къуаджэм шъудахь. Шъузэрэдахьэу щыд къунанэу цӀыф ныбжьи зытемытӀысхьагъэр епхыгъэу шъуапэ къифэщт. Ар къэшъутӀати, моу къашъущэ. 31«Сыд ар къызкӀэшъутӀатэрэр?» ыӀоу зыгорэ къышъоупчӀымэ, моущтэу ешъуӀу: «Зиусхьаныр ащ фай».

32А лӀыкӀуитӀур кӀуи, Исус зэрариӀуагъэм тетэу зэкӀэ къагъотыгъ. 33Щыд къунаныр къызатӀатэм, зиехэм къараӀуагъ: – Сыда щыд къунаныр къызкӀэшъутӀатэрэр?

34– Зиусхьаныр мыщ фай, – къаӀуагъ ахэмэ.

35ЕтӀанэ щыд къунаныр Исус дэжь къащи, ящыгъынхэр тыралъхьэхи, Исус тырагъэтӀысхьагъ. 36Исус щыд къунаным тесэу кӀо зэхъум, цӀыфхэм ящыгъынхэр гъогум фытыраубгъощтыгъэх.

37Ерусалим игъунэгъоу гъогур Елеон Ӏуашъхьэм къызщехырэ чӀыпӀэм Исус зынэсым, Ӏофышхо гъэшӀэгъонхэу алъэгъугъэ пстэуми апае гушӀохэу, мэкъэшхокӀэ Тхьэм щытхъу фашӀэу, игъогу рыкӀорэ куп пстэуми аӀоу аублагъ:

38– Зиусхьаным ыцӀэкӀэ къакӀорэ пачъыхьэм щытхъушхор ий! Мамырныгъэ уашъом щыӀ! Анахь Лъагэм щытхъушхор ий! #19:38 яплъ Орэд ЛъапӀэхэм 117:25-26.

39ЦӀыф купышхом хэтэу фарисей заулэмэ Исус къыраӀуагъ: – Дин гъэсакӀу, уигъогу рыкӀохэрэм щагъэтынэу яӀу!

40– Сэ шъосэӀо, – къыӀожьыгъ Исус, – ахэмэ щагъэтмэ, мыжъохэр къэкуощтых.

41Исус Ерусалим нахь игъунэгъоу къэси, къалэр зелъэгъум, ащ фэгъызэ къыӀуагъ:

42– О мамырныгъэ къыпфэзыхьыщт Ӏофхэр непэ пшӀагъот, ау джы о унэхэм ахэр ашӀогъэбылъыгъэх; 43сыда пӀомэ, уипыйхэм пытапӀэхэмкӀэ укъызауцухьащт мафэхэр къыпфэкӀощтых. Ахэмэ о укъаухъурэищт, тыдрэ лъэныкъокӀи къыптезэрэгъэбэнэщтых. 44Уипыйхэм ори уибынхэу къыбдыдэсхэри шъуагъэкӀодыщт, мыжъуитӀу зэтелъэуи къагъэнэщтэп, умыкӀодэу Тхьэм укъызщигъэнэжьын уахътэм узэрэригъэфагъэр къызэрэбгурымыӀуагъэм пае.

Исус щэн-щэфакӀохэр Тхьэм иунэшхо къызэрэчӀифыгъэхэр

(Маттэ 21:12-17; Марк 11:15-19; Иуан 2:13-22)

45ЕтӀанэ Исус Тхьэм иунэшхо чӀахьи, щэн-щэфакӀохэр#19:45 щэн-щэфакӀохэр – ахэмэ къурмэныпхъэ былымхэр Тхьэм иунэшхо ищагу щащэщтыгъэх. къычӀифхэу ыублагъ. 46Ахэмэ ариӀуагъ: – Тхьэм къызэриӀорэр игущыӀэ тхыгъэхэм арыт#19:46 Тхьэм игущыӀэ тхыгъэхэм арыт – еплъ Пегъымбар Ешайа тхылъэу ытхыгъэм 56:7.: «Сэ сиунэ тхьэлъэӀупӀэщт», ау шъо «хъункӀэкӀо гъэбылъыпӀэм»#19:46 хъункӀэкӀо гъэбылъыпӀэ – еплъ Пегъымбар Иеремие тхылъэу ытхыгъэм 7:11. фэдэ шъушӀыгъэ.

47Мафэ къэси Тхьэм иунэшхо чӀэтэу, Исус цӀыфхэм Тхьэм игущыӀэхэр аригъашӀэщтыгъ. Ары шъхьакӀэ дин пэщэшхохэм, Тэурат егъэджэкӀо пащэхэм, адрэ тхьэматэхэу цӀыфмэ яӀэхэм Исус зэрагъэкӀодыщт шӀыкӀэм лъыхъухэу аублагъ, 48ау цӀыф пстэуми ягуапэу Исус едэӀущтыгъэхэти, рашӀэн мыхъун зи агъотыгъэп.

Nu markerat:

Лука 19: AdgNT14

Märk

Dela

Kopiera