Лука 18
18
ЯПШӀЫКӀОЕНЭРЭШЪХЬ
Шъузабэмрэ шъыпкъагъэ зимыӀэ хьыкумэшӀымрэ яхьылӀэгъэ гъэсэпэтхыдэр
1ЕтӀанэ игъогу рыкӀохэрэм агу амыгъэкӀодэу, Тхьэм елъэӀу зэпытынхэм пае, Исус гъэсэпэтхыдэ къафиӀотагъ. 2Мыщ фэдэу къыӀуагъ: – Тхьэми щымыщынэу, цӀыфхэми ащымыукӀытэу, хьыкумэшӀ горэ къалэ горэм дэсыгъ. 3А къэлэ дэдэм зы шъузабэ гори дэсыгъ. «Сидэогъу сифэшъуашэр къысегъэт» ыӀозэ, хьыкумэшӀым дэжь къэкӀо зэпытыщтыгъ. 4ХьыкумэшӀым шъузабэр зыкӀэлъэӀурэр бэрэ фидагъэп. ЕтӀанэ ежь хьыкумэшӀым зэриӀожьыгъ: «Тхьэм сыщымыщынэми, цӀыфхэм сащымыукӀытэми, 5сэ сшъхьэ ымыгъэуз зэпытыным пае, мы шъузабэм ифэшъуашэ езгъэгъотын. Армырмэ, къысфэчъэ зэпытзэ зысигъэгъэпсэфыщтэп».
6ЕтӀанэ Зиусхьаным къыӀуагъ: – Шъыпкъагъэ зимыӀэ хьыкумэшӀым ыӀорэр зэхэшъоха? 7Тхьэм ежь къыхихыгъэ цӀыфхэу чэщи мафи лъэшэу къелъэӀухэрэм яфэшъуашэ аригъэгъотынба? Яфэшъуашэ аригъэгъотыным бэрэ ригъэжэщтха? 8Сэ шъосэӀо, ахэмэ яфэшъуашэ псынкӀэу аригъэгъотыщт. Ау ЦӀыф Лъэпкъым ы Къо мы дунаим къызыкӀожькӀэ, шӀошъхъуныгъэ зиӀэхэр щигъотыщтха?
Фарисеимрэ хьакъулахь ахъщэр хэзыхырэ лӀымрэ яхьылӀэгъэ гъэсэпэтхыдэр
9Ащ нэмыкӀэуи ежьхэм шъыпкъагъэ яӀэу зыщыгугъыжьхэу, нэмыкӀхэр зэзымыпэсырэ цӀыф заулэм Исус мы гъэсэпэтхыдэр къафиӀотагъ:
10– НэбгыритӀу Тхьэм елъэӀунхэу Тхьэм иунэшхо кӀуагъэ. Зыр фарисейхэм ащыщыгъ, адрэр хьакъулахь ахъщэр хэзыххэрэм ащыщыгъ. 11Фарисеир ащ дэжьым щытэу, ыгукӀэ моущтэу Тхьэм елъэӀущтыгъ: «Адрэ цӀыфхэу хъункӀакӀохэми, бзэджашӀэхэми, зинэ зышӀэхэрэми, модэ щыт хьакъулахь ахъщэр хэзыхырэми сэ сызэрафэмыдэм пае, щытхъу пфэсэшӀы, си Тхь. 12Сэ тхьэмафэ къэс мэфитӀо сэнэкӀы#18:12 сэнэкӀы – агухэмкӀэ фаехэу, фарисейхэм тхьэмафэ , федэу згъотырэм ипшӀанэ Тхьэм пае сэты». 13Ау хьакъулахь ахъщэр хэзыхырэр чыжьэу къэуцугъэу, уашъом дэплъыеным фэмыеу, ыбгъэгу еозэ, Тхьэм елъэӀущтыгъ: «Си Тхь, сэ, псэкӀод зышӀэрэ цӀыфым, гукӀэгъу къысфэшӀ». 14Сэ шъосэӀо, адрэ лӀым фэмыдэу мы лӀым ТхьэмкӀэ шъыпкъагъэ иӀэу ядэжь кӀожьыгъэ. Сыда пӀомэ, хэти зышъхьэ зыгъэиныжьырэр Тхьэм ыгъэцӀыкӀущт, ышъхьэ зыгъэцӀыкӀужьыри Тхьэм ыгъэиныщт.
Исусрэ сабыйхэмрэ
(Маттэ 19:13-15; Марк 10:13-16)
15ЕтӀанэ цӀыфхэм сабыйхэр Исус къыфащагъэх, Тхьэм ынэшӀу къащифэным пае, Исус ыӀэхэр ахэмэ атырилъхьэнхэу. Ау игъогу рыкӀохэрэм ар залъэгъум, цӀыфхэм афадагъэп. 16Ау Исус сабыйхэм къяджи, къыӀуагъ: – Сабыйхэр садэжь къэрэкӀох, пэрыохъу шъуафэмыхъу, сыда пӀомэ, ащ фэдэхэр Тхьэм и Тетыгъошхо ыӀэчӀэгъ чӀэтых. 17Шъыпкъэр шъосэӀо, сабыим Тхьэм и Тетыгъошхо зэридэрэм фэдэу, хэтми Тхьэм и Тетыгъошхо зымыдэрэр а Тетыгъошхом ыӀэчӀэгъ чӀэхьащтэп.
Тхьэмэтэ баир
(Маттэ 19:16-30; Марк 10:17-31)
18Тхьэматэ горэ Исус къеупчӀыгъ: – Дин гъэсэкӀо дэгъу, мыкӀодыжьын щыӀэныгъэ ӀахьышӀоу къыслъыӀэсыным пае, сыда сшӀэн фаер?
19– Сыда дэгъукӀэ укъызкӀысаджэрэр? – риӀожьыгъ Исус а лӀым. – Тхьэм нэмыкӀэу зи дэгъу щыӀэп. 20Тхьэм иунашъохэр#18:20 Тхьэм иунашъохэр – еплъ Пегъымбар Мусэ ятӀонэрэ тхылъэу ытхыгъэм 20:12-16. ошӀэх: «Зинэ умышӀэ, цӀыф умыукӀ, умытыгъу, нэмыкӀ цӀыфхэм пцӀы атемылъхь, уятэрэ уянэрэ лъытэныгъэ афэшӀ».
21– СикӀэлэгъу къыщегъэжьагъэу ахэр зэкӀэ сэгъэцакӀэх, – риӀожьыгъ адрэм.
22Ар Исус зызэхехым, риӀуагъ: – Джыри зы уищыкӀагъ. УиӀэр зэкӀэ щэжьи, ахъщэр тхьамыкӀэхэм ят. Джащыгъум уашъом мылъкушхо щыуиӀэ хъущт. ЕтӀанэ сауж къырыкӀу.
23Адрэм ар зызэхехым, ыгу лъэшэу къеуагъ, сыда пӀомэ, мылъкушхо иӀагъэти ары. 24Ау Исус ащ ыгу къызэреорэр зелъэгъум, къыӀуагъ: – Мылъку зиӀэхэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин! 25Баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх.
26Ар зэхэзыхыгъэ цӀыфхэм къаӀуагъ: – Ащыгъум, ежь зимыгъэкӀодэу, хэта зыкъэзгъэнэжьын зылъэкӀыщтыр?
27– ЦӀыфмэ ашӀэн амылъэкӀырэр Тхьэм ышӀэн елъэкӀы, – къыӀуагъ Исус.
28– Моу къэдаӀолъ! – къыӀуагъ Петрэ. – Тэ тиӀэгъэ пстэури къэдгъани, о уауж тыкъихьагъ.
29– Шъыпкъэр шъосэӀо, – ариӀожьыгъ Исус, – хэт щыщми е зиунэ, е зятэ-янэхэр, е зышхэр, е зышыпхъухэр, е зишъуз, е зилъфыгъэхэр Тхьэм и Тетыгъошхо пае къэзгъэнагъэу, 30иӀагъэм нахьи бэкӀэ нахьыбэ мы дунаим щызымыгъотыжьыщт цӀыф зи щыӀэп, адрэ дунаими мыкӀодыжьын щыӀэныгъэ щыриӀэ хъущт.
Ежь зэраукӀыщтри лӀагъэхэм къызэрахэтэджыкӀыжьыщтри ящэнэрэу Исус къызэриӀуагъэр
(Маттэ 20:17-19; Марк 10:32-34)
31Исус игъогу рыкӀорэ нэбгырэ пшӀыкӀутӀур лъэныкъокӀэ Ӏуищыхи, ариӀуагъ: – Мары, тэ джы ЕрусалимкӀэ тыдэкӀуае. ЦӀыф Лъэпкъым ы Къо ехьылӀагъэу пегъымбархэм атхыгъэ пстэури къехъулӀэхэзэ, къэшъыпкъэжьыщтых. 32Ащ къикӀырэр ежь хымэ лъэпкъхэм#18:32 хымэ лъэпкъхэр – рим цӀыфхэу тетыгъо зиӀэхэр ары. зэраӀэкӀэхьащтыр. Ахэри къыкӀэнэкӀэщтых, къехъоныщтых, къытеужъунтхэщтых. 33ЕтӀанэ къамыщкӀэ къеощтых, аукӀыщт, ящэнэрэ мафэми ежь лӀагъэхэм къахэтэджыкӀыжьыщт.
34Ау игъогу рыкӀохэрэм а гущыӀэхэу ариӀуагъэхэм ащыщэу зи къагурыӀуагъэп. А гущыӀэхэм къарыкӀырэр ахэмкӀэ шъэфыгъ, Исус ахэмэ къаригъэкӀыгъэри къагурыӀуагъэп.
Исус лъэӀокӀо нэшъу горэ зэригъэхъужьыгъэр
(Маттэ 20:29-34; Марк 10:46-52)
35Исус къалэу Ерихон#18:35 къалэу Ерихон – Ерусалим итемыр тыгъэ къокӀыпӀэ лъэныкъомкӀэ, километрэ 24-кӀэ пэчыжьэу, Иордан псыхъом итыгъэ къохьэпӀэ лъэныкъомкӀэ ит. къекӀуалӀэ зэхъум, нэшъу горэ лъэӀуакӀоу гъогу напцэм Ӏусыгъ. 36ЦӀыф купышхо блэкӀэу зызэхехым, къэупчӀагъ: – Сыда мыр?
37– Назарет щыщ Исус мыщ блэкӀы, – къыраӀуагъ цӀыфхэм.
38Ар къызаӀом, нэшъур мэкъэшхокӀэ къэджагъ: – Даутэ ы Къо#18:38 Даутэ ы Къо – цӀыфхэр мыкӀодхэу Къэзгъэнэжьырэр пачъыхьэ Даут илӀакъо зэрэщыщым пае джуртхэр ащ «Даутэ ы КъокӀэ» еджэх. Исус, гукӀэгъу къысфэшӀ!
39Апэ ит цӀыфхэм амыдэу, «Щыгъэт!» – къыраӀуагъ. Ау ар джыри нахь мэкъэшхокӀэ къэджагъ: – Даутэ ы Къу, гукӀэгъу къысфэшӀ!
40Исус къызэтеуцуи, ежь дэжь а лӀыр къаригъэщагъ. Нэшъур пэгъунэгъу къызэхъум, еупчӀыгъ:
41– Сыда къыпфэсшӀэнэу узыфаер? – Тхьэматэ, сынэхэр къэгъэплъэжь, – къыӀожьыгъ нэшъум.
42– Унэхэр къэплъэжьыщт, – къыриӀуагъ Исус. – УишӀошъхъуныгъэ уигъэхъужьыгъ.
43Ардэдэм нэшъум ынэхэр къэплъэжьыгъэх, Тхьэми щытхъу фишӀызэ, Исус ыуж ихьагъ. ЦӀыф пстэуми ар залъэгъум, ахэми Тхьэм щытхъу фашӀыгъ.
Nu markerat:
Лука 18: AdgNT14
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 1991, 1992, 2014. Стокгольм
