Лука 13
13
ЯПШӀЫКӀУЩЭНЭРЭШЪХЬ
О уипсэкӀодшӀагъэхэм афыкӀэгъожь е зыбгъэкӀодыжьыщт
1А мафэхэм цӀыф куп Исус дэжь къакӀуи, Галилей цӀыфхэу Ӏэшъхьэтет Пилат аригъэукӀыгъагъэхэм якъэбар къыфахьыгъ. А Галилей цӀыфхэм алъырэ ахэмэ къурмэн ашӀырэм ылъырэ зэхэлъадэхэу, Пилат ицӀыфхэм ахэр аригъэукӀыгъагъэх. 2Исус дэжь къэкӀуагъэхэм ариӀожьыгъ: – Мы Галилей цӀыфхэр аущтэу зэрэкӀодыгъэхэм пае, Галилеим щыщхэу адрэ цӀыф пстэумэ анахьи нахь псэкӀодышӀэхэу шъогугъа? 3Хьау, аущтэу щытэп, сэ шъосэӀо! Ау шъуипсэкӀодшӀагъэхэм шъуафыкӀэмыгъожьмэ, шъори зэкӀэми, ащ фэдэ къабзэу шъукӀодыщт. 4Хьаури Силоам зыцӀэ чӀыпӀэм ит унэ плъэпӀэ лъагэр нэбгырэ пшӀыкӀуеу къызытеуи, чӀиукӀыхьагъэхэр адрэ цӀыфхэу Ерусалим дэс пстэуми анахьи нахь мысагъэхэкӀэ шъогугъа? 5Хьау, аущтэу щытэп, сэ шъосэӀо! Ау шъуипсэкӀодшӀагъэхэм шъуафыкӀэмыгъожьмэ, шъори зэкӀэ ащ фэдэ къабзэу шъукӀодыщт.
Ынджыр чъыг гъугъэм ехьылӀэгъэ гъэсэпэтхыдэр
6ЕтӀанэ Исус мы гъэсэпэтхыдэр къафиӀотагъ: – ЛӀы горэм исэнэшъхьэ хатэ ынджыр чъыг хэтэу иӀагъ. Зыгорэ къыпыкӀагъэмэ еплъынэу зэкӀом, къыпыкӀагъэу зи ыгъотыгъэп. 7Джащыгъум сэнэшъхьэшӀым риӀуагъ: «Мары, илъэсищ хъугъэу мы чъыгым зыгорэ къыпыкӀэмэ сеплъынэу сыкъэкӀо, ау зи пытэу згъотырэп. Арышъ, иупкӀыжь, сыд пае чӀыгум ыкӀуачӀэ хьаулыеу хихыра?»
8– СэнэшъхьэшӀым къыриӀожьыгъ: «Тхьэматэ, мы илъэсым щыгъэтыгу. Чъыгыр ихъурэягъэкӀэ къэстӀыхьанышъ, ебз тӀэкӀуи чӀэстэкъон. 9КъэкӀорэгъым къыпыкӀэнкӀи мэхъу. Джащыгъуми къызыпымыкӀэкӀэ, иуупкӀын плъэкӀын».
ЗиузэнкӀыжьын зымылъэкӀэрэ бзылъфыгъэр шэмбэт мафэм Исус зэригъэхъужьыгъэр
10Шэмбэт мафэм синэгогу горэм Исус цӀыфхэм Тхьэм игущыӀэхэр щаригъашӀэщтыгъ. 11Бзылъфыгъэ горэ илъэс пшӀыкӀуй хъугъэу, зыгъэсымаджэрэ джынапцӀэ хэсэу ащ дэжьым чӀэтыгъ. ЗиузэнкӀыжьын ымылъэкӀэу, ытхыцӀэ уфагъэу щытыгъ. 12Исус ар зелъэгъум, къеджи, риӀуагъ: – Нын, джы щегъэжьагъэу ухъужьыгъ, ушъхьафит.
13ЕтӀанэ ыӀэхэр а бзылъфыгъэм зытырелъхьэм, ардэдэм ащ зиузэнкӀыжьи, хъужьыгъэ, Тхьэми щытхъу фишӀыгъ.
14Ау Исус шэмбэт мафэм сымаджэр зэригъэхъужьыгъэм пае, синэгогу пащэр губжи, цӀыфмэ ариӀуагъ: – ЦӀыфыр лэжьэн фаеу мэфих щыӀ. А мафэхэм зыжъугъэхъужьынэу шъукъакӀу нахь, шэмбэт мафэм шъукъэмыкӀу.
15– Шъо, нэпитӀу зиӀэхэр! – риӀожьыгъ Зиусхьаным а пащэм. – Шъуащыщэу зыгорэ щыӀа, зицу е зищыд шэмбэт мафэми къэзымытӀатэу, цощым къычӀэзымыщэу псы езымыгъашъорэр? 16Арэу зыхъукӀэ, мы бзылъфыгъэу Ибрахьимэ къытекӀыгъэ цӀыфхэм ащыщэу, илъэс пшӀыкӀуй хъугъэу шэйтаным ыпхыгъэр шэмбэт мафэм шъхьафит сшӀынышъ, згъэхъужьын фэягъэба?
17Исус ар къызеӀом, къыпэгущыӀэжьырэ цӀыф пстэури укӀытэжьыгъэ, къэнэгъэ цӀыфхэри Исус Ӏофышхо гъэшӀэгъонхэу ышӀэгъэ пстэуми апае гушӀуагъэх.
Андэгурацэмрэ тэджэпсымрэ яхьылӀэгъэ гъэсэпэтхыдэхэр
(Маттэ 13:31-33; Марк 4:30-32)
18– Тхьэм и Тетыгъошхо зыфэдэр сыда? – къыӀуагъ Исус. – Ар сыдым фэзгъэдэна? 19Ар зыфэдэр андэгурацэр ары. Ар лӀы горэм къышти, ихатэ щишӀагъ. Ар къэкӀи, чъыгы хъугъэ, ошъогу бзыухэри икъутамэхэм атесхэ хъугъэ.
20– Тхьэм и Тетыгъошхо сыдым фэзгъэдэна? – джыри зэ къыӀуагъ Исус. 21– Ар зыфэдэр тэджэпсыр ары. Бзылъфыгъэ горэм ар къышти, Ӏанлъищым арыфэрэ хьаджыгъэ зэхипшыхьагъ, зэрэщытэу къэтэджыфэ.
Къэлэпчъэ зэжъур
(Маттэ 7:13-14, 21-23)
22Исус къалэхэмрэ къуаджэхэмрэ къыкӀухьэхэзэ, цӀыфхэм Тхьэм игущыӀэхэр аригъашӀэхэзэ, игъогу Ерусалим фигъэзагъ. 23Зыгорэ ежь къеупчӀыгъ: – Тхьэматэ, мыкӀодхэу Тхьэм къыгъэнэжьыщт цӀыфхэр макӀэха?
24– Къэлэпчъэ зэжъумкӀэ шъузэрэдэхьащтым зэрэшъулъэкӀэу ыуж шъуит, – ариӀожьыгъ Исус, – сыда пӀомэ, сэ шъосэӀо, цӀыфыбэхэр дэхьанхэу ыуж итыщтых, ау алъэкӀыщтэп. 25Унэ бысымыр къэтэджынышъ, къэлапчъэр зыщыфишӀыжьыщт сыхьатыр къэсышт. ЕтӀанэ «Тхьэматэ, къэлапчъэр къытфыӀух» шъуӀоу, кӀыбым шъудэтэу, къэлапчъэм шъукъытеонкӀи мэхъу. Джащыгъум ащ къышъуиӀожьыщт: «Шъо хэтми шъузщыщыр сшӀэрэп». 26ЕтӀанэ шъуублэщт шъуӀоу: «Тыуигъусэу тышхэщтыгъ, тешъощтыгъ, тикъалэ иурамхэми Тхьэм игущыӀэхэр ащытэбгъашӀэщтыгъ». 27Ау ащ къышъуиӀощт: «Шъо хэтми шъузщыщыр сшӀэрэп, санэӀу шъуикӀ, зэкӀэ шъо бзэджашӀэхэр!»
28Ибрахьими, Исхьакъи, Якъуби, адрэ пегъымбар пстэури Тхьэм и Тетыгъошхо ыӀэчӀэгъ чӀэхьагъэхэу, ау шъо а Тетыгъошхом ыӀэчӀэгъ шъукъычӀафыгъэу зышъулъэгъукӀэ, куохьаурэ цэ зэрэгъэшхырэ къэхъущтых. 29ЦӀыфхэр тыгъэ къокӀыпӀэмкӀи, тыгъэ къохьапӀэмкӀи, темырымкӀи, къыблэмкӀи къикӀынхэшъ, Тхьэм и Тетыгъошхо игухэхъо Ӏанэм чӀыпӀэхэр щаубытыщтых. 30Джащыгъум ауж итхэм ащыщхэр апэ хъущтых, апэ итхэм ащыщхэри ауж къинэщтых.
Ей, Ерусалим!
(Маттэ 23:37-39)
31А сыхьат дэдэм фарисей куп къакӀуи, Исус къыриӀуагъ: – Мыщ дэжьым ӀукӀ. Армырмэ пщэу Ирод идзэлӀхэм уаригъэукӀыщт.
32– ШъукӀуи, – ариӀожьыгъ Исус, – а баджэм ешъуӀу: «Сэ непи неущи джынапцӀэхэр цӀыфхэм ахэсфыщтых, сымаджэхэри згъэхъужьыщтых, ящэнэрэ мафэм сиӀоф сыухыщт». 33Ау щытми, непи, неущи, неущмыкӀи сигъогу сырыкӀон фаеу къыспыщылъ, сыда пӀомэ, пегъымбарыр Ерусалим нэмыкӀ чӀыпӀэ щылӀэ хъущтэп.
34– Ей, Ерусалим, Ерусалим! УицӀыфхэм пегъымбархэр аукӀых, мыжъокӀэ яохэзэ Тхьэм илӀыкӀохэри аукӀых. Бзыум ищырхэр ытамэмэ ачӀэгъ зэрэщычӀиугъуаехэрэм фэдэу, сыд фэдизрэ уибынхэр зэсыугъоилӀэнхэу сыфэягъ, ау шъо шъуфэягъэп. 35Моу зэ шъуеплъ, Тхьэр шъуикъалэ нэшӀукӀэ къеплъыжьыщтэп. Сэ шъосэӀо, «Зиусхьаным ыцӀэкӀэ къакӀорэм щытхъушхор ий!» зыщышъуӀощт мафэм нэсыфэ, сышъулъэгъужьыщтэп.
Nu markerat:
Лука 13: AdgNT14
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 1991, 1992, 2014. Стокгольм
