Лука 12

ЯПШӀЫКӀУТӀОНЭРЭШЪХЬ

НэпитӀугъэм шъуфэсакъ

1Джащыгъум цӀыфхэм хэуцуапӀэ амыгъотыжьэу, мин пчъагъэ къызызэӀокӀэхэм, Исус апэу игъогу рыкӀохэрэм ариӀоу къыублагъ: – Фарисейхэм ятэджэпсэу янэпитӀугъэ шъуфэсакъ. 2Къэмылъэгъожьынэу чӀэухъумагъэ зи щыӀэп, цӀыфхэм къамышӀэнэуи гъэбылъыгъэ зи щыӀэп. 3Ащ къыхэкӀыкӀэ, мэзахэм щышъуӀуагъэр мэфэ нэфынэм цӀыфхэм зэхахыжьыщт, унэ кӀоцӀым шъущыӀушъашъэу тхьакӀумэм ишъуӀуагъэри унашъхьэхэм атетхэу къыщаӀотэжьыщт.

Шъузщыщынэн фаер

(Маттэ 10:28-31)

4– Ау сэ шъосэӀо, синыбджэгъухэр, пкъыр зыукӀэу ащ нэужым ащ ехъу зи зышӀэн зымылъэкӀхэрэм шъуащымыщын. 5Ау шъо шъузщыщынэн фаер сэ шъосӀощт: ЗиукӀырэ ужым, джэхьнэмым хэзыдзэжьынэу тетыгъо зиӀэр ары шъузщыщынэн фаер. Ары, шъосэӀо, ащ шъущыщын. 6Бзыу цӀыкӀуитфыр чапычитӀукӀэ ащэрэба? Ау щытми, ахэмэ ащыщэу зи щымыгъупшэжьэу Тхьэм ыгу илъ. 7Ау шъо шъушъхьэ тет шъхьац нэлъэ пстэури лъытагъэ. Шъумыщын, бзыубэхэм анахьи шъо шъуанахь лъапӀ.

Христос игъогу рыкӀохэрэм узэращыщыр цӀыфхэм ябгъэшӀэныр

(Маттэ 10:32-33; 12:32; 10:19-20)

8– ШъосэӀо, сэ ЦӀыф Лъэпкъым ы Къо сигъогу рыкӀохэрэм зэращыщыр цӀыфхэм апашъхьэ хэтми къыщызыӀорэр, сэри ар сигъогу рыкӀохэрэм зэращыщыр Тхьэм имэлэӀичхэм апашъхьэ къыщысӀощт. 9Ау хэтми сигъогу рыкӀохэрэм ащымыщэу цӀыфхэм апашъхьэ щызыӀорэр, сэри ар сигъогу рыкӀохэрэм зэращымыщыр Тхьэм имэлэӀичхэм апашъхьэ щысӀощт. 10Хэтми ЦӀыф Лъэпкъым ы Къо гущыӀэ Ӏае фэзыӀорэм фэгъущт, ау Тхьэм ы Псэ ЛъапӀэ зыгъэпцӀырэм фэгъущтэп.

11– Синэгогухэм шъузаратыкӀэ, хэку пащэхэмрэ тетыгъо зиӀэхэмрэ апашъхьэ шъузыращэкӀэ, «Сыдэущтэу зыдгъэхыен?» шъуӀоу, «Сыда тӀощтыр?» шъуӀоу шъумыгумэкӀ; 12сыда пӀомэ, къэшъуӀон фаер а сыхьатым Тхьэм ы Псэ ЛъапӀэ шъуигъэшӀэшт.

ЛӀы баеу акъыл зимыӀэм ехьылӀэгъэ гъэсэпэтхыдэр

13ЦӀыф купышхом хэтэу лӀы горэ Исус къелъэӀугъ: – Дин гъэсакӀу, тятэ къыкӀэныжьыгъэ мылъкур сшы къыздегъэгощ.

14– Шъузэрыгощэщт шӀыкӀэр къышъосӀонэу хэта сызгъэуцугъэр? – риӀожьыгъ Исус. 15ЕтӀанэ цӀыфмэ ариӀуагъ: – Шъуфэсакъ! Сыд фэдэ нэйпсыягъэ къызхэшъумыгъаф, сыда пӀомэ, цӀыфым сыд фэдиз мылъку иӀэми, ар ищыӀэныгъэ епхыгъэпышъ ары.

16ЕтӀанэ Исус гъэсэпэтхыдэ афиӀотагъ: – ЛӀы бай горэм игубгъо лэжьыгъэр щыбэгъуагъ. 17Аущтэу зэхъум, ышъхьэ фиӀожьэу къыублагъ: «Сыда сшӀэщтыр? Сэ силэжьыгъэхэр зэрыслъхьан зи сиӀэп».

18– ЕтӀанэ къыӀуагъ: «Моущтэу сшӀыщт. Сикъакъырхэр скъутэнхэшъ, нахь ин сшӀыжьынхэшъ, сигъажъорэ симылъкурэ зэкӀэ ахэмэ арыслъхьащт. 19ЕтӀанэ зэсӀожьыщт: Илъэсыбэ пфикъун Ӏаджи уиӀ. Зыгъэпсэф, шхэ, ешъу, зыгъатхъ!»

20– Ау Тхьэм къыриӀуагъ: «О акъыл зимыӀэ цӀыф! Мы чэщ дэдэм о ппсэ хэсхыщт. БгъэтӀылъыгъэхэр хэт къызфэнэжьыщтыр?»

21– Ежь ышъхьэ пае мылъкушхо зыугъоеу, ау Тхьэм дэжькӀэ мылъушхо зимыӀэм джары къехъулӀэщтыр.

ГумэкӀыным ехьылӀагъ

(Маттэ 6:19-21, 25-34)

22– Арышъ, шъосэӀо, – ариӀуагъ Исус игъогу рыкӀохэрэм, – «Сыда тшхыщтыр?» шъуӀоу, шъуищыӀэныгъэ пае шъумыгумэкӀ. «Сыда тщыгъыщтыр?» шъуӀоу, шъупкъы паий шъумыгумэкӀ. 23ЩыӀэныгъэр гъомылэм нахьи нахь лъапӀ, пкъыри щыгъыным нахьи нахь лъапӀ. 24Къуалэхэм шъуяплъ. Ахэмэ чылапхъи апхъырэп, лэжьыгъи ахыжьырэп. Конхэри къакъырхэри яӀэхэп, ау щытми, Тхьэм къареты. Шъо бзыухэм анахьи бэкӀэ шъуанахь лъапӀ! 25ГумэкӀэу хэта шъо шъуащыщэу зы Ӏэнтэгъу нэмыӀэми илъэгагъэ хэзгъэхъон зылъэкӀыщтыр? 26Ащ фэдэ тӀэкӀур зышъумылъэкӀыкӀэ, адрэ къэнэгъэ пстэуми апае сыда шъузкӀэгумэкӀырэр?

27– Къэгъагъэхэм якъэкӀыкӀэ шъуеплъ. Ахэр лажьэхэрэп, ци аджырэп, ау сэ шъосэӀо, ежь пачъыхьэ Сэлмэн#12:27 пачъыхьэ Сэлмэн – Сулиман ары. Илъэхъан дэжь ар пачъыхьэ пстэуми анахьи нахь баигъ. Еплъ Пачъыхьэхэм якъэбархэр зэрыт апэрэ тхылъым (3-я Царств) 10:23. сыд фэдизэу дахэу кӀэракӀэщтыгъэми, ахэмэ ащыщэу зыгорэми фэдэу фэпэгъагъэп. 28А уцэу губгъом непэ итэу, неущ хьакум радзэжьыщтыр Тхьэм аущтэу зигъэкӀэракӀэкӀэ, ащ нахьи бэкӀэ нахьыбэу шъо шъуигъэкӀэрэкӀэщт, шъо, шӀошъхъуныгъэ зимакӀэхэр! 29Шъо шъушхыщтымрэ шъузэшъощтымрэ ауж шъуимыт, шъуафэмыгумэкӀ. 30Сыда пӀомэ, ащ фэдэ Ӏоф пстэури ары дунаим тет лъэпкъхэр зылъыхъухэрэр. Ахэр зэрэшъуищыкӀагъэр шъуя Тэ лъапӀэ ешӀэ. 31Ау ыпэ рапшӀэу Тхьэм и Тетыгъошхо иӀофхэм ауж шъуит, етӀанэ адрэ къэнэгъэ Ӏофхэри къышъуӀэкӀэхьащт.

32– Шъумыщын шъо, куп тӀэкӀур, сыда пӀомэ, шъуя Тэ лъапӀэ и Тетыгъошхо къызыскӀэ, тетыгъо къышъуитыныр игопэщт. 33Шъуихьапщыпхэр шъущэхи, ахъщэр тхьамыкӀэхэм яшъут. Жъы мыхъужьын ахъщалъэхэр зыфэшъушӀых, нахь макӀэ мыхъужьын мылъкушхо уашъом щызэжъугъэгъот. Ащ дэжьым тыгъуакӀо горэ а мылъкушхом щекӀолӀэшъущтэп, хъунэхэми ашхыщтэп. 34Сыда пӀомэ, шъуимылъкушхо зыдэщыӀэм шъугухэри щыӀэщтых.

Шъумычъыеу шъусакъ!

(Маттэ 24:45-51)

35– Шъо шъуицыякӀэхэр дэупкӀагъэхэу, шъуиостыгъэхэри хэгъэнагъэхэу хьазырэу шъущыт. 36ЦӀыфхэу зитхьэматэ нысащэм къикӀыжьыным паплъэхэу, къэлапчъэм къызэрэтеоу фыӀузыхынэу хьазырхэм афэдэу шъущыт. 37Тхьэматэр къызыкӀожьыкӀэ, унэӀутхэу мычъыехэу, сакъыхэу къыгъотыжьхэрэр гъогу мафэ теуцуагъэх. Шъыпкъэр шъосэӀо, ицыякӀэ диупкӀэнышъ, Ӏанэм пигъэтӀысхьащтых, ежьыри къэкӀонышъ, ашъхьащытыщт. 38Чэщныкъом дэжь е нэфшъэгъо атэкъэӀогъум дэжь тхьэматэр къэкӀожьыгъэу, а унэӀутхэр мычъыехэу, сакъыхэу къызигъотыжьхэкӀэ, ахэр гъогу мафэ теуцуагъэх. 39Ау мыр зэжъугъашӀэ: унэр зием тыгъуакӀор къызыкӀощт сыхьатыр ышӀэщтыгъэмэ, чъыещтыгъэп, иуни къыригъахьэу илъыр рыригъэтыгъукӀыщтыгъэп. 40Арышъ, шъори шъухьазырын фае, сыда пӀомэ, ЦӀыф Лъэпкъым ы Къо къэкӀожьынэу шъузымыгугъэрэ сыхьат горэм дунаим къэкӀожьыщт.

41– Зиусхьан, – къыӀуагъ Петрэ, – мы гъэсэпэтхыдэр тэщ пае къэпӀуагъа, хьауми цӀыф пстэуми апае къэпӀуагъа?

42– Хэта адэ, акъылышӀу зиӀэу, зыщыгугъын мылъкугъэзекӀоу тхьэматэм адрэ унэӀутхэу иӀэхэм пащэ афишӀыщтыр, игъом яшхын аритынэу? – къыӀуагъ Зиусхьаным. 43– А унэӀутыр гъогу мафэ теуцуагъ, итхьэматэ къэкӀожьыгъэу, аущтэу ышӀэу къызигъотыжькӀэ. 44Шъыпкъэр шъосэӀо, тхьэматэм имылъку зэкӀэ а унэӀутым ыӀэ рилъхьащт. 45Ау а унэӀутым «Сэ ситхьэматэ шӀэхэу къэкӀожьыщтэп» ыгукӀэ ыӀоу, адрэ унэӀутхэм, бзылъфыгъи хъулъфыгъи, яоу, ешхэу, ешъоу, уташъоу зиублэкӀэ, 46а унэӀутыр зымыгугъэрэ мафэ горэм, зыщимышӀэрэ сыхьат горэм итхьэматэ къэкӀожьыщт. А унэӀутыр укӀыкӀаеу ыукӀыщт, шӀошъхъуныгъэ зимыӀэхэм къин зыщадищэчын чӀыпӀэми ыгъэкӀощт.

47– Ау итхьэматэ зыфаер ышӀэщтыгъэ пэтми, унэӀутэу зызымыгъэхьазырыгъэм е тхьэматэр зыфаер зымыгъэцэкӀагъэм утыныбэ къытефэщт. 48Ау итхьэматэ зыфаер зымышӀэу, утын зифэшъуашэ зышӀагъэм нахь утын макӀэ къытефэщт. Тхьэм бэ зэритыгъэм бэ ытыжьынкӀи къыщыгугъыщт, бэ зыӀэ рилъхьагъэми нахьыбэкӀи къыщыгугъыщт.

Зы унэм зэдисхэр зэрэзэмызэгъыщтхэр

(Маттэ 10:34-36)

49– ЧӀылъэм машӀо есыдзыным пае, сэ сыкъэкӀуагъ. А машӀор зэхэнэгъагъэмэ, сыдэу сыгопэщтыгъ! 50ЦӀыфхэм Ӏаеу саумэхъыныр къыспыщылъ, ар охъуфэ инэуи сэгумэкӀы! 51Зэзэгъыныгъэ чӀылъэм къыфэсхьыным пае, сыкъэкӀуагъэу шъогугъа? Хьау, сэ шъосэӀо, зэмызэгъыныгъэ къэсхьынэу ары нахь, 52сыда пӀомэ, джы щегъэжьагъэу, зы унэм ис нэбгыритфым лъэныкъуитӀоу загощыщт: щыр тӀум пэуцущт, тӀури щым пэуцущт. 53ЛъэныкъуитӀоу загощынышъ, тыр къом пэуцущт, къори тым пэуцущт, ныр пхъум пэуцущт, пхъури ным пэуцущт, гуащэри нысэм пэуцущт, нысэри гуащэм пэуцущт.

Мы лъэхъаным инэшанэхэм къарыкӀырэр зыгурыжъугъаӀу

(Маттэ 16:2-3)

54– Тыгъэ къохьапӀэмкӀэ ошъуапщэ къытехьэу шъулъэгъумэ, «Ощх къещхыщт», занкӀэу шъоӀо, аущтэуи мэхъу, – ариӀуагъ Исус цӀыф купышхом. 55– Къыблэ лъэныкъом къикӀырэ жьыбгъэри къепщэ хъумэ, «Фэбэ дэдэ хъущт» шъоӀо, аущтэуи мэхъу. 56Шъо, нэпитӀу зиӀэхэр! ЧӀылъэмрэ уашъомрэ ятеплъэ къикӀырэр къыжъугурэӀо, мы лъэхъаным инэшанэхэм къарыкӀырэр сыд пае къыжъугурымыӀора?

О уидэогъу узэрешӀужьыным ыуж ит

(Маттэ 5:25-26)

57– Сыд пае шъо шъушӀэн фаер шъор-шъорэу зэхэшъумышӀыкӀыра? 58ГущыӀэм пае, о уидэогъу уригъусэу хьыкумэшӀым дэжь укӀозэ, гъогум утетыфэ, узэрешӀужьыным ыуж ит. Армырмэ, уидэогъу хьыкумэшӀым ыпашъхьэ уригъэуцощт, ащи хьапс къэрэгъулэм уӀэкӀилъхьащт, хьапс къэрэгъулэми хьапсым учӀидзэщт. 59Сэ осэӀо, аужырэ чапычыр отыжьыфэ, хьапсым укъычӀэкӀыжьыщтэп.

Nu markerat:

Лука 12: AdgNT14

Märk

Dela

Kopiera